Kwenda na mambu ke na kati

Kwenda na tansi ya malongi

 DILONGI 37

Yehowa Solulaka ti Samuele

Yehowa Solulaka ti Samuele

Nganga-Nzambi ya Nene Eli vandaka ti bana-babakala zole yina vandaka kusala bonso banganga-nzambi na nzo-tenta. Bazina na bo Hofni mpi Fineasi. Bo vandaka kuzitisa ve bansiku ya Yehowa, mpi bo vandaka kusadila bantu mambu ya mbi kibeni. Kana bantu ya Izraele me natila Yehowa bimenga, Hofni ti Fineasi vandaka kuzola kubaka bitini ya kuluta mbote ya bambisi yina. Eli waka nsangu ya mambu yina bana na yandi vandaka kusala, kansi yandi salaka kima ve. Keti Yehowa zolaka kubika nde diambu yai landa kusalama?

Ata Samuele vandaka leke mingi na ntwala ya Hofni mpi Fineasi, yandi landaka ve mbandu na bo. Yehowa vandaka kuzola Samuele. Kilumbu mosi na mpimpa ntangu yandi vandaka kulala, Samuele waka ndinga mosi ke binga zina na yandi. Yandi telamaka, kwendaka na Eli, mpi tubaka nde: ‘Mono yandi yai!’ Kansi Eli tubaka nde: ‘Mono me binga nge ve. Kwenda kulala.’ Samuele kwendaka kulala. Ebuna yo salamaka diaka mbala ya nkaka. Ntangu Samuele waka ndinga yina mbala ya tatu, Eli bakisaka nde Yehowa muntu ke binga Samuele. Yandi songaka Samuele nde kana yandi wa diaka ndinga yina, yandi fwete tuba nde: ‘Yehowa, tuba. Nsadi na nge ke wa.’

Samuele kwendaka kulala. Ebuna yandi waka ndinga ke binga: ‘Samuele! Samuele!’ Yandi vutulaka nde: ‘Tuba, sambu nsadi na nge ke  wa.’ Yehowa songaka yandi nde: ‘Songa Eli nde mono ta pesa yandi ti dibuta na yandi ndola. Yandi me zaba nde bana na yandi ke sala mambu ya mbi na nzo-tenta na mono, kansi yandi ke sala kima ve.’ Na suka-suka, Samuele kangulaka bakielo ya nzo-tenta, mutindu yandi vandaka kusala konso kilumbu. Yandi vandaka na boma ya kusonga nganga-nzambi ya nene mambu yina Yehowa tubaka. Kansi Eli bingaka yandi mpi yulaka yandi nde: ‘Mwana na mono, nki mambu Yehowa songaka nge? Songa mono mambu yonso.’ Samuele songaka Eli mambu yonso.

Ntangu Samuele yelaka, Yehowa landaka kuvanda ti yandi. Na insi ya mvimba, bantu yonso ya Izraele zabaka nde Yehowa me pona Samuele na kuvanda profete mpi zuzi.

“Yibuka Ngangi na nge ya Nene na bilumbu ya kileke na nge.”—Longi 12:1