Kwenda na mambu ke na kati

Kwenda na tansi ya malongi

 DILONGI 29

Yehowa Me Pona Yozue

Yehowa Me Pona Yozue

Na nima ya kutwadisa dikanda ya Izraele bamvula mingi, Moize kumaka pene-pene ya nsuka ya luzingu na yandi. Yehowa songaka yandi nde: ‘Nge ve muntu ta kotisa bantu ya Izraele na Ntoto ya Lusilu. Kansi mono ta pesa nge nzila ya kumona insi yina.’ Ebuna Moize lombaka Yehowa na kusola mfumu ya mpa sambu na kukeba bantu ya Izraele. Yehowa songaka yandi nde: ‘Kwenda na Yozue, mpi songa yandi nde yandi muntu mono me pona.’

Moize songaka dikanda nde yandi ta fwa ntama ve mpi nde Yehowa me pona Yozue sambu na kukotisa bo na Ntoto ya Lusilu. Na nima, Moize songaka Yozue nde: ‘Kuwa ve boma. Yehowa ta sadisa nge.’ Ntangu fioti na nima, Moize kwendaka na nsongi ya Ngumba ya Nebo, kisika Yehowa songaka yandi insi yina yandi silaka na Abrahami, na Izaki, mpi na Yakobi. Moize vandaka ti bamvula 120 ntangu yandi fwaka.

Yehowa songaka Yozue nde: ‘Sabuka Nzadi ya Yordani, mpi kwenda na Kanana. Mono ta sadisa nge kaka mutindu mono sadisaka Moize. Sala yonso na kutanga Nsiku na mono konso kilumbu. Kuwa boma ve. Vanda kikesa. Kwenda mpi sala mambu yina mono me songa nge.’

 Yozue tindaka mineki zole na mbanza Yeriko. Na disolo yina ke landa, beto ta longuka mambu mingi ya ke tadila mambu yina salamaka kuna. Ntangu bo vutukaka, bo pesaka nsangu nde yo vandaka ntangu ya mbote ya kukota na Kanana. Kilumbu yina landaka, Yozue songaka dikanda na kukanga bima na bo. Na nima yandi tindaka banganga-nzambi yina vandaka kunata sanduku ya kuwakana na ntwala na Nzadi ya Yordani. Nzadi vandaka ti masa mingi kibeni. Kansi ntangu makulu ya banganga-nzambi simbaka masa, masa ya nzadi yambulaka kutambula, mpi yo yumaka! Banganga-nzambi kwendaka tii na kati-kati ya nzadi mpi telamaka kuna tii kuna dikanda ya mvimba ya Izraele sabukaka na simu yina ya nkaka. Keti nge ke yindula nde kimangu yai yibusaka bo mambu yina Yehowa salaka na Nzadi-Mungwa ya Mbwaki?

Nsuka-nsuka, na nima ya bamvula yina yonso, bantu ya Izraele kumaka na Ntoto ya Lusilu. Bo lendaka kutunga banzo mpi bambanza. Bo lendaka kukuna bilanga, bilanga ya vinu, mpi banti yina ke butaka bambuma. Ntoto yina vandaka ti miliki mpi bwiki mingi.

“Yehowa ta twadisaka nge ntangu yonso mpi ta sepedisaka nge ata na ntoto ya kuyuma.”—Yezaya 58:11