Kwenda na mambu ke na kati

Kwenda na tansi ya malongi

 DILONGI 102

Bambona-Meso ya Yoane

Bambona-Meso ya Yoane

Ntangu ntumwa Yoane vandaka na boloko na kisanga ya Patmosi, Yezu songaka yandi bambona-meso to bifwanisu 16 ya bilumbu ke kwisa. Bambona-meso yai ke monisa mutindu bo ta santisa zina ya Yehowa, mutindu Kimfumu ta kwisa, mpi mutindu luzolo na yandi ta salama na ntoto bonso na zulu.

Na mbona-meso mosi, Yoane monaka Yehowa na kiti na yandi ya Kimfumu ya nkembo na zulu; na nziunga na yandi, kuvandaka ti bankuluntu 24 ya me lwata bilele ya mpembe mpi bampu ya kimfumu ya wolo na ba-ntu na bo. Bansemo ya nzasi mpi makelele na yo wakanaka na kiti ya kimfumu. Bankuluntu 24 fukamaka na ntwala ya Yehowa mpi vandaka kusambila yandi. Na mbona-meso ya nkaka, Yoane monaka kimvuka ya nene ya bantu yina me katuka na makanda, na bansi, mpi na bandinga yonso ke sambila Yehowa. Mwana-Dimeme, disongidila Yezu, ke gungula bo mpi ke nata bo na bamasa ya luzingu. Na nima, na mbona-meso ya nkaka, Yezu me yantika kuyala bonso Ntotila na zulu, kumosi ti bankuluntu 24. Na mbona-meso yina landaka, Yoane monaka Yezu ke nwana ti dragoni, disongidila Satana, mpi bademo na yandi. Yezu kulaka bo na zulu mpi losaka bo na ntoto.

 Na nima, Yoane monaka kifwanisu mosi ya kitoko ya Mwana-Dimeme mpi bantu 144 000 me telama na Ngumba ya Sioni. Yandi monaka mpi wanzio mosi ke pumbuka na nziunga ya ntoto, mpi ke songa bantu nde beno wa Nzambi boma mpi beno pesa yandi nkembo.

Na mbona-meso yina landaka, bo nwanaka bitumba ya Armagedoni. Na bitumba yina, Yezu ti basoda na yandi nungaka ngidika ya mbi ya Satana. Na mbona-meso ya nsuka, Yoane monaka kuwakana ya kukuka na zulu mpi na ntoto. Nzambi me fwa Satana ti bana na yandi kimakulu. Bantu yonso na zulu mpi na ntoto ke baka zina ya Yehowa nde yo kele santu mpi bo ke sambila kaka yandi.

“Mono ta tula kimbeni na kati na nge ti nkento mpi na kati ya mwana na nge ti mwana na yandi. Yandi ta niata ntu na nge mpi nge ta tatika yandi na dikulu.”—Kuyantika 3:15