Kwenda na mambu ke na kati

Kwenda na tansi ya malongi

 DILONGI 44

Tempelo Sambu na Yehowa

Tempelo Sambu na Yehowa

Ntangu Salomo kumaka ntotila ya Izraele, Yehowa yulaka yandi nde: ‘Nge ke zola mono pesa nge nki?’ Salomo tubaka nde: ‘Mono kele leke, mpi mono me zaba ve mambu ya mono fwete sala. Pardo, pesa mono mayele ya kukeba bantu na nge.’ Yehowa tubaka nde: ‘Sambu nge me lomba na kuvanda mayele, mono ta kumisa nge muntu ya me luta bantu yonso ya ntoto na mayele. Mono ta kumisa nge mpi mvwama ya nene. Mpi kana nge lemfukila mono, nge ta vanda ti luzingu ya nda.’

Salomo yantikaka kutunga tempelo. Yandi sadilaka wolo, arza, mabaya, mpi matadi ya kitoko. Mafunda ya babakala ti ya bankento ya me zaba kisalu mbote salaka kisalu ya kutunga tempelo. Na nima ya bamvula nsambwadi, tempelo manaka mpi yo lombaka nde bo pesa yo na Yehowa. Yo vandaka ti mesa-kimenga, mpi makabu vandaka na zulu na yo. Salomo fukamaka na ntwala ya mesa-kimenga mpi sambaka nde: ‘O Yehowa, tempelo yai me fwana ve mpi kele ve kitoko mingi sambu na nge, kansi pardo ndima lusambu na beto mpi wa bisambu na beto.’ Yehowa yindulaka nki sambu na tempelo mpi kisambu ya Salomo? Ntangu Salomo manisaka kisambu na yandi, tiya katukaka na zulu mpi yokaka bimenga yina vandaka na mesa-kimenga. Yehowa ndimaka tempelo. Ntangu bantu ya Izraele monaka diambu yina, bo sepelaka.

Ntotila Salomo zabanaka na Izraele ya mvimba mpi na bisika ya ntama sambu na mayele na yandi. Bantu vandaka kukwisa na Salomo sambu yandi sadisa bo na mambu na bo. Ata ntotila-nkento ya Sheba kwisaka sambu na kumeka yandi ti bangiufula ya mpasi. Ntangu yandi waka bamvutu ya Salomo, yandi tubaka nde: ‘Mono ndimaka ve mambu yina bantu songaka mono sambu na nge, kansi ntangu yai mono me mona nde nge kele mayele kuluta mutindu bo tubaka. Nzambi na nge, Yehowa, me sakumunaka nge.’ Luzingu vandaka mbote sambu na dikanda ya Izraele, mpi bantu vandaka na kiese mingi. Kansi mambu zolaka kusoba.

“Tala! awa kele ti muntu yina me luta Salomo.”—Matayo 12:42