Kwenda na mambu ke na kati

Kwenda na tansi ya malongi

 DILONGI 6

Bantu Nana Kotaka na Ntoto ya Mpa

Bantu Nana Kotaka na Ntoto ya Mpa

Noa, dibuta na yandi, mpi bambisi kotaka na maswa. Yehowa kangaka kielo, ebuna mvula yantikaka. Yo nokaka mingi kibeni yo yina maswa yantikaka kutambula na zulu ya masa. Nsuka-nsuka, ntoto ya mvimba fulukaka na masa. Na nganda ya maswa, bantu yonso ya mbi fwaka. Kansi Noa ti dibuta na yandi vandaka na lutaninu na kati. Keti nge lenda yindula kiese yina bo vandaka na yo sambu bo lemfukaka na Yehowa?

Mvula nokaka bilumbu 40 mpi bampimpa 40 ebuna yo zenganaka. Malembe-malembe masa kulumukaka. Nsuka-nsuka, maswa telamaka na bangumba. Kansi, masa vandaka mingi na bisika yonso, yo yina Noa ti dibuta na yandi vandaka ve ti mpila ya kubasika na maswa.

Malembe-malembe, masa yumaka. Na kimvuka, Noa ti dibuta na yandi salaka mvula mosi ti ndambu na kati ya maswa. Na nima, Yehowa songaka bo nde bo lenda basika na maswa mpi kuvanda na kisika yina vandaka bonso ntoto ya mpa. Bo pesaka Yehowa mersi mingi sambu yandi gulusaka bo, mpi bo pesaka yandi kimenga sambu na kumonisa ntonda na bo.

Yehowa sepelaka na kimenga na bo. Yandi silaka nde yandi ta fwa diaka ve ata fioti bima yonso na ntoto na mvula ya ngolo. Yandi basisaka nkongolo ya ntete na zulu sambu yo vanda kidimbu ya lusilu yina. Keti nge me monaka dezia nkongolo?

Na nima Yehowa songaka Noa ti dibuta na yandi na kubuta bana mpi na kufulusa ntoto.

“Noa kotaka na maswa, mpi [bantu] tulaka ve dikebi tii ntangu Mvula ya Ngolo kwisaka mpi fwaka bo yonso.”—Matayo 24:38, 39