Kwenda na mambu ke na kati

“BENO LANDA KUVANDA NA NGEMBA”

Lukutakanu ya Distrike ya Bambangi ya Yehowa ya 2022

Beto ke lomba nge na kiese yonso na kulanda lukutakanu ya distrike yina Bambangi ya Yehowa ta sala bilumbu tatu.

Sambu na maladi ya coronavirus (COVID-19), beto ta landa lukutakanu yai na nzila ya Internet na jw.org. Bo ta tula manaka yango na Internet na ngonda ya Juillet mpi ya Août.

Manaka yai kele ya ofele. Sambu na kukota na Internet bo ta lomba nge ve mot de passe.

Bangindu ya Mfunu ya Lukutakanu

Manaka ya Kitanu: Tala mutindu zola ke salaka nde beto zwa ngemba ya ntima mpi beto zinga na ngemba ti bantu ya nkaka. Nge ta mona sambu na nki bandongisila ya Biblia na yina me tala bankwelani, bibuti mpi bana lenda sadisa dibuta na kuvanda na ngemba.

Manaka ya Mposo: Keti nge lenda vanda na ngemba ata nge ke bela maladi mosi buna, nge kele na mpasi ya mbongo, nge ke niokwama sambu na bisumbula ya lugangu to bampasi ya nkaka? Tala video mosi ya ke pesa kikesa. Video yango ke monisa mambu yina bantu ke sala na nsi-ntoto sambu na kuvanda na ngemba.

Manaka ya Lumingu: Keti beto lenda kuma kibeni banduku ya Nzambi? Keti beto ta kuma banduku ya Nzambi mbala mosi to yo kele ti kima yina beto fwete sala sambu na kukuma banduku na yandi? Nge ta baka mvutu na bangiufula yina na diskure yina me katuka na Biblia mpi ya kele ti ntu-diambu: “Kinduku ti Nzambi—Keti yo Lenda Salama?”

Tala manaka ya mvimba mpi tala video ya ke tubila balukutakanu na beto ya distrike.