Kwenda na mambu ke na kati

Kwenda na tansi ya malongi

 DILONGI 70

Bawanzio Me Pesa Nsangu ya Kubutuka ya Yezu

Bawanzio Me Pesa Nsangu ya Kubutuka ya Yezu

Mfumu ya Kintinu ya Roma, Auguste Kaisali, songaka Bayuda yonso na kuvutuka na babwala na bo sambu na kusonikisa bazina. Yo yina, Yozefi ti Maria kwendaka na Betelemi, bwala yina dibuta ya Yozefi katukaka. Maria kumaka pene-pene ya kubuta.

Ntangu bo kumaka na Betelemi, kisika mosi kaka yina bo zwaka vandaka na nzo ya bambisi. Yo yina kisika Maria butaka Yezu. Maria ziungaka yandi bilele ya pete mpi ladisaka yandi na mawete na kidikilu.

Pene-pene ya Betelemi, bangungudi vandaka na nganda na mpimpa, bo ke keba bitwisi na bo. Na mbala mosi, wanzio mosi telamaka na ntwala na bo mpi nsemo ya nkembo ya Yehowa vandaka na nziunga na bo. Bangungudi waka boma, kansi wanzio tubaka nde: ‘Beno wa boma ve. Mono kele ti nsangu ya  mbote. Mesia me butuka bubu na Betelemi.’ Na ntangu yina, bawanzio monanaka na zulu, bo ke tuba nde: ‘Nkembo na Nzambi na zulu, mpi ngemba na ntoto.’ Ebuna bawanzio vilaka. Bangungudi salaka nki?

Bo tubaka bo na bo nde: ‘Beto kwenda na Betelemi kaka sesepi yai.’ Bo kwendaka ntinu mpi bo monaka Yozefi ti Maria na nzo ya bambisi ti bebe na bo.

Bantu yonso yina waka mambu yina bawanzio songaka bangungudi yitukaka. Maria yindulaka mingi mambu yina wanzio tubaka mpi yandi vilaka yo ve ata fioti. Bangungudi vutukaka na kukeba bitwisi na bo, bo ke pesa Yehowa mersi sambu na mambu yonso yina bo monaka mpi waka.

“Mono katukaka na Nzambi mpi mono kele awa. Mono kwisaka ve na luzolo na mono mosi, kansi yandi muntu tindaka mono.”—Yoane 8:42