Kwenda na mambu ke na kati

Kwenda na tansi ya malongi

 DILONGI 69

Gabriele Me Kwisa Kutala Maria

Gabriele Me Kwisa Kutala Maria

Elizabeti vandaka ti mpangi mosi ya nkento Maria, yina vandaka kuzinga na mbanza Nazareti na Galilea. Maria vandaka fianse ya Yozefi; Yozefi vandaka sharpantie. Ntangu divumu ya Elizabeti kumaka ti bangonda sambanu, wanzio Gabriele basikilaka Maria. Yandi tubaka nde: ‘Kilumbu ya mbote, Maria. Yehowa me pesa nge lukumu mingi.’ Yandi bakisaka ve mambu yina Gabriele tubaka. Ebuna Gabriele songaka yandi nde: ‘Nge ta baka divumu mpi nge ta buta mwana-bakala, mpi nge ta pesa yandi zina Yezu. Yandi ta vanda Ntotila. Kimfumu na yandi ta zinga kimakulu.’

Maria tubaka nde: ‘Kansi mu ke mwense. Inki mutindu mu lenda buta?’ Gabriele tubaka nde: ‘Yehowa lenda sala mambu yonso. Mpeve santu ta kwisa na zulu na nge, mpi nge ta buta mwana. Mpangi na nge Elizabeti mpi me baka divumu.’ Ebuna Maria tubaka nde: ‘Mono kele mpika ya Yehowa. Bika yo salama mutindu nge me tuba.’

 Maria kwendaka na mbanza mosi ya kele na ngumba sambu na kutala Elizabeti. Ntangu Maria pesaka yandi mbote, Elizabeti waka nde mwana yina ke na divumu na yandi me pumbuka. Yandi fulukaka ti mpeve santu, mpi yandi tubaka nde: ‘Maria, Yehowa me sakumuna nge. Yo kele lukumu mutindu mama ya Mfumu na mono me kwisa na nzo na mono.’ Maria tubaka nde: ‘Mu ke kumisa Yehowa na ntima ya mvimba.’ Maria bikalaka ti Elizabeti bangonda tatu, na nima yandi vutukaka na Nazareti.

Ntangu Yozefi waka nde Maria ke ti divumu, yandi sosaka kufwa makwela. Kansi wanzio basikilaka yandi na ndosi mpi songaka yandi nde: ‘Kuwa ve boma ya kukwela yandi. Yandi me sala ve diambu ya mbi.’ Yo yina Yozefi kwelaka Maria mpi tulaka yandi na nzo na yandi.

“Yehowa ke salaka mambu yonso yina yandi ke zolaka kusala na zulu mpi na ntoto.”—Nkunga 135:6