Kwenda na mambu ke na kati

Kwenda na tansi ya malongi

 DILONGI 66

Esdrasi Longaka Nsiku ya Nzambi

Esdrasi Longaka Nsiku ya Nzambi

Bamvula kiteso ya 70 lutaka banda bantu ya Izraele vutukaka na Yeruzalemi, kansi bankaka vandaka kaka kuzinga na bitini ya nkaka ya Kintinu ya Persia. Nganga-nzambi Esdrasi, yina vandaka kulonga Nsiku ya Yehowa vandaka na kati na bo. Esdrasi waka nde bantu yina vandaka na Yeruzalemi vandaka kuzitisa ve Nsiku, mpi yandi vandaka kuzola kukwenda kusadisa bo. Ntotila Artazeresesi ya Persia songaka yandi nde: ‘Nzambi pesaka nge mayele sambu nge longa Nsiku na yandi. Kwenda, mpi nata bantu yonso yina ke zola kukwenda ti nge.’ Esdrasi kutanaka ti bantu yonso yina vandaka kuzola kuvutuka na Yeruzalemi. Bo sambaka Yehowa sambu yandi tanina bo na nzila, ebuna bo yantikaka nzietelo.

Bangonda iya na nima, bo kumaka na Yeruzalemi. Bamfumu songaka Esdrasi nde: ‘Bantu ya Izraele me kolaminaka Yehowa mpi bo me kwelaka bankento yina ke sambilaka banzambi ya luvunu.’ Esdrasi salaka nki? Na ntwala ya bantu yonso, Esdrasi fukamaka mpi sambaka nde: ‘Yehowa, nge me salaka mambu mingi sambu na beto, kansi beto me sala masumu na ntwala na nge.’ Bantu balulaka ntima, kansi bo vandaka kulanda kusala mambu ya mbi. Esdrasi ponaka bankuluntu ti bazuzi sambu bo tadila mambu yai. Na bangonda tatu yina landaka, bo kulaka bantu yina vandaka kusambila ve Yehowa.

Bamvula 12 lutaka. Na ntangu yina, bibaka ya Yeruzalemi vandaka kaka ya kubeba. Yo yina Esdrasi vukisaka bantu na kisika ya bantu yonso sambu na kutangila bo Nsiku ya Nzambi. Ntangu Esdrasi kangulaka mukanda, bantu telamaka. Yandi kumisaka Yehowa, mpi bo tombulaka maboko sambu na kumonisa nde bo me ndima. Ebuna Esdrasi tangaka Nsiku mpi tendulaka yo, mpi bantu vandaka kuwidikila na dikebi. Bo ndimaka nde bo yambulaka Yehowa, mpi bo dilaka. Kilumbu yina landaka, Esdrasi tangilaka bo diaka Nsiku. Bo zabaka nde ntama ve bo fwete sala Nkinsi ya Bisasa. Na mbala mosi, bo yantikaka kubongisa nkinsi yango.

 Na bilumbu nsambwadi ya nkinsi, bantu vandaka na kiese mpi bo pesaka Yehowa mersi sambu na bima ya bilanga. Bo me salaka ntete ve Nkinsi ya Bisasa ya mutindu yina banda na bilumbu ya Yozue. Na nima ya nkinsi yina bantu vukanaka, mpi bo sambaka nde: ‘Yehowa, nge katulaka beto na kimpika, disaka beto na ntoto ya zelo na zelo, mpi pesaka beto insi yai ya kitoko. Kansi mbala na mbala, beto kolaminaka nge. Nge tindaka baprofete sambu na kukebisa beto, kansi beto waka ve. Ata mpidina, nge vandaka ntima-nda. Nge lungisaka mambu ya nge silaka na Abrahami. Ntangu yai, beto ke sila nde beto ta lemfukila nge.’ Bo sonikaka lusilu na bo, mpi bamfumu, Balevi, ti banganga-nzambi tulaka kashe na bo na zulu na yo.

“Kiese na bantu yina ke waka ndinga ya Nzambi mpi ke landaka yo!”—Luka 11:28