Kwenda na mambu ke na kati

Kwenda na tansi ya malongi

 DILONGI 45

Kimfumu Me Kabwana

Kimfumu Me Kabwana

Ntangu Salomo vandaka kusambila Yehowa, ngemba vandaka na Izraele. Kansi Salomo kwelaka bankento mingi ya bansi ya nkaka, mpi bankento yina vandaka kusambila biteki. Malembe-malembe, Salomo sobaka, mpi yandi yantikaka kusambila mpi biteki. Yehowa waka makasi. Yandi songaka Salomo nde: ‘Izraele ta yambula dibuta na nge mpi yo ta kabwana na bandambu zole. Mono ta pesa kitini ya nene na bansadi na nge, mpi dibuta na nge ta yala kaka ka kitini ya fioti.’

Yehowa monisaka desizio na yandi pwelele na mutindu ya nkaka mpi. Nsadi ya Salomo mosi, Yeroboami, vandaka kusala nzietelo na nzila mpi yandi kutanaka ti profete Ahiya. Ahiya pasulaka mvwela na yandi na bandambu 12 mpi songaka Yeroboami nde: ‘Yehowa ta katula kimfumu ya Izraele na dibuta ya Salomo mpi yandi ta kabula yo na bandambu zole. Baka bitini kumi ya lele sambu nge ta vanda ntotila ya makanda kumi.’ Ntotila Salomo waka diambu yai mpi vandaka kuzola kufwa Yeroboami! Yo yina Yeroboami tinaka na Ezipte. Na nima, Salomo fwaka mpi mwana na yandi Rehoboami kumaka ntotila. Ebuna Yeroboami monaka nde yo kele ve kigonsa na kuvutuka na Izraele.

Bankuluntu ya Izraele songaka Rehoboami nde: ‘Kana nge sadila bantu mambu ya mbote, bo ta vanda ya kwikama na nge.’  Kansi baleke yina vandaka banduku ya Rehoboami tubaka nde: ‘Nge fwete vanda makambu ngolo sambu na bantu! Kumisa kisalu na bo mpasi mingi!’ Rehoboami landaka ndongisila ya banduku na yandi. Yandi sadilaka bantu mambu na nku ebuna bo kolamaka. Bo kumisaka Yeroboami ntotila ya makanda kumi, yina bo kumaka kubinga na nima kimfumu ya Izraele. Makanda zole ya nkaka zabanaka na zina ya kimfumu ya Yuda, mpi bo bikalaka ya kwikama na Rehoboami. Makanda 12 ya Izraele kabwanaka ntangu yai.

Yeroboami vandaka kuzola ve nde bantu na yandi kwenda kusambila na Yeruzalemi, yina vandaka na kimfumu ya Rehoboami. Keti nge me zaba sambu na nki? Yeroboami vandaka kuwa boma nde bo ta yambula yandi mpi bo ta pesa maboko na Rehoboami. Yo yina, yandi salaka bana-bangombe zole mpi songaka bantu nde: ‘Yeruzalemi kele ntama mingi. Beno lenda sambila awa.’ Bantu yantikaka kusambila bana-bangombe ya wolo mpi na kuvila diaka Yehowa.

“Beno vukana ve ti bantu yina ke kwikilaka ve. Sambu inki kuwakana kele na kati ya lunungu ti kufwa bansiku? . . . To inki kima muntu yina ke kwikilaka kele ti yo na kimvuka ti muntu yina ke kwikilaka ve?”—2 Bakorinto 6:14, 15