TƆM ÑƲƲ ŊGƲ ÐƖKPƐLƖKƖƔ YƆ 3
Yehowa wɛɛ nɛ ɛsɩɣnɩ-ŋ se pɩɖɔmnɩ-ŋ camɩyɛ
«[Yehowa] sɩnɩ Yosɛɛfʋ . . . , nɛ e-nesi tɛɛ tʋma kpeekpe ɖɔŋ camɩyɛ.»—KIÐE 39:2, 3.
HENDU 30 Man-Caa, mɛ-Ɛsɔ nɛ man-Taabalʋ
LƖMAƔZA SƆSƆNA a
1-2. (a) Ɛbɛ yɔɔ pɩɩɖɩɣzɩɣ-ɖʋ se ɖɩkatɩɣ kala? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?
ÐA YEHOWA sɛyaa lɛ, alɩwaatʋ ndʋ ɖɩkatɩɣ kala yɔ pɩɩɖɩɣzɩɣ-ɖʋ. Ðɩnawa se Bibl yɔɔdʋʋ se: «Pɩwɛɛ se ɖɩtɔɔ kʋñɔmɩŋ sakɩyɛ pʋcɔ nɛ ɖɩsʋʋ Ɛsɔ Kewiyaɣ taa.» (Tʋma 14:22) Ðɩnawa ɖɔɖɔ se kala wena ɖɩkatɩɣ sɔnɔ yɔ a-taa naayɛ wɛɛ lɛ, aakaɣ tɛm caɣ caɣ pʋcɔ nɛ ɖɩsʋʋ ɛjaɖɛ kɩfaɖɛ taa. Ɛjaɖɛ kɩfaɖɛ taa lɛ, «sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.»—Natʋ 21:4.
2 Yehowa ɛɛkandɩyɩɣ ɖɔ-yɔɔ se kala ɛtaatalɩ-ɖʋ. Ɛlɛ ɛsɩɣnɩ-ɖʋ se ɖɩɖɔkɩ ɖa-laŋɩyɛ a-taa. Na tɔm ndʋ apostoloo Pɔɔlɩ heyi Krɩstʋ ñɩma mba paawɛ Roma yɔ. Ɛcalɩnɩ-wɛ heyuu kala wena ɛ nɛ koobiya lalaa paawɛɛ nɛ pakatɩɣ yɔ a-tɔm. Pʋwayɩ lɛ ɛma se: «Ðɩwɛɛ nɛ ɖɩwakɩ siŋŋ pɩtɩŋnɩ weyi ɛsɔɔlɩ-ɖʋ yɔ ɛ-yɔɔ.» (Roma 8:35-37) Tɔm tʋnɛ tɩwɩlɩɣ se Yehowa pɩzɩɣ eyele nɛ piɖeni-ŋ halɩ pɩkpɛndɩnɩ alɩwaatʋ ndʋ ŋwɛɛ nɛ ŋɖɔkʋʋ ña-laŋɩyɛ kaɖɛ naɖɩyɛ taa yɔ. Iyele nɛ ɖɩna ɛzɩma Yehowa kaasɩnɩ Yosɛɛfʋ nɛ pɩɖɔmnɩ-ɩ camɩyɛ nɛ ɛzɩma ɛpɩzɩɣ nɛ ɛsɩnɩ-ŋ yɔ.
ALƖWAATƲ NDƲ WƐTƲ LƐƔZƖƔ TUDA YƆ
3. Lɛɣzɩtʋ ndʋ kɔm Yosɛɛfʋ wezuu caɣʋ taa tuda?
3 Yakɔɔb wɩlɩ kpayɩ kpayɩ se ɛɛsɔɔlɩ ɛ-pɩyalʋ Yosɛɛfʋ siŋŋ. (Kiɖe 37:3, 4) Mbʋ pɩlɩ pɩ-taa yɔ lɛ se Yakɔɔb pɩyalaa sɔsaa paɣzɩ sʋsʋʋ pe-neu. Pehiɣ waɖɛ naɖɩyɛ lɛ, pɛpɛdɩ Yosɛɛfʋ nɛ Madiyaŋ tadɩyɛ laɖaa nabɛyɛ. Tadɩyɛ laɖaa mba, pakpaɣ Yosɛɛfʋ nɛ pɔɖɔ nʋmɔʋ kilomɛtawaa mɩnɩŋ sakɩyɛ nɛ powoni-i Ejipiti. Patalɩ peeɖe lɛ pɛpɛdɩ-ɩ nɛ Potifaarɩ; ɛlɛ kaakɛ Farawɔɔ yɔɔ kandɩyaa ñʋʋdʋ. Yosɛɛfʋ wezuu caɣʋ lɛɣzɩ lɛɛ lɛɛ kpem. Ɛnʋ weyi ɛɛkɛ ɛ-caa pɩyalʋ kʋsɔɔlʋ yɔ, ɛpɩsɩ Ejipiti tʋ nɔɔyʋ yom!—Kiɖe 39:1.
4. Kala wena ɖɩpɩzɩɣ nɛ ɖɩkatɩ yɔ anɩɣzɩnɩ wena Yosɛɛfʋ kaakataa yɔ. A-taa naayɛ lɛ wena?
4 Bibl yɔɔdʋʋ se: ‘Kʋñɔŋ tɔlʋʋ ɛyaa kpeekpe yɔɔ.’ (Ekl. 9:11) Nabʋyʋ taa, ɖɩkatɩɣ kala wena ‘atalɩɣ ɛyaa’ tɩŋa yɔ. (1 Kɔr. 10:13) Yaa pɩtɩla yɔ ɖɩlakɩ kʋñɔŋ mbʋ pʋyɔɔ yɔ ɖɩkɛ Yesu tɔmkpɛlɩkɩyaa. Papɩzɩɣ nɛ powoŋuu-ɖʋ, pakaɖɩɣnɩ-ɖʋ, yaa halɩ panazɩɣ-ɖʋ ɖe-tisuu yɔɔ. (2 Tim. 3:12) Paa kaɖɛ nɖɩ ŋkatɩɣ yɔ, Yehowa pɩzɩɣ eyele nɛ pɩɖɔmnɩ-ŋ camɩyɛ. Ɛzɩma ɛlabɩ mbʋ Yosɛɛfʋ hɔɔlʋʋ taa?
Yehowa sɩnɩ Yosɛɛfʋ nɛ pɩɖɔmnɩ-ɩ camɩyɛ halɩ pɩkpɛndɩnɩ alɩwaatʋ ndʋ pɛpɛdɩ-ɩ nɛ ɛkɛ Potifaarɩ yom Ejipiti ɛjaɖɛ taa yɔ (Cɔnɩ tayʋʋ 5)
5. Pɩɖɔŋaɣnɩ Yosɛɛfʋ camɩyɛ, piyeba nɛ Potifaarɩ kɔ tɔm ñʋʋ suwe? (Kiɖe Tɛɛ Tɔm 39:2-6)
5 Kalɩ Kiɖe Tɛɛ Tɔm 39:2-6. Potifaarɩ ɖiɣzinaa se Yosɛɛfʋ kɛ evebu weyi ɛwɛ niye siŋŋ yɔ nɛ ɛlakɩ tʋmɩyɛ nɛ kpekpeka. Nɛ ɛsɩm ɖɔɖɔ mbʋ pʋyɔɔ ɛwɛnɩ wɛtʋ ndʋ yɔ. Potifaarɩ nawa se ‘Yehowa lakaɣ nɛ Yosɛɛfʋ nesi tɛɛ tʋma kpeekpe ɖɔŋ camɩyɛ.’ b Pɩtɛmnaa se Potifaarɩ pɩsɩ Yosɛɛfʋ ɛ-maɣmaɣ ɛ-lɩmɖʋyʋ. Pɩtasɩ lɛ, ɛɖʋzɩ ɛ-ɖɩɣa kpeekpe Yosɛɛfʋ nesi tɛɛ. Ɛbɛ lɩ pɩ-taa? Yehowa wazɩ mbʋ Potifaarɩ wɛna yɔ pɩ-yɔɔ.
6. Pɩtɩla ɛzɩma pɩlakaɣ Yosɛɛfʋ?
6 Maɣzɩ nɛ ŋna ɛzɩma pɩlakaɣ Yosɛɛfʋ yɔ. Ɛbɛ ɛɛsɔɔlaa nɛ pɩkɩlɩ pɩtɩŋa payɩ? Ɛzɩ ɛɛsɔɔlaa se Potifaarɩ ɛna se ɛlakɩ tʋmɩyɛ camɩyɛ nɛ ɛ-tɔm kɛdɩnɩ-ɩ? Pɩtʋʋ fɛyɩ se mbʋ Yosɛɛfʋ kaasɔɔlaa nɛ pɩkɩlɩ yɔ lɛ se palɩzɩ-ɩ yomiye taa nɛ ɛpɩsɩ ɛ-caa cɔlɔ. Tɔm lɛ se paa Yosɛɛfʋ kaawɛnɩ wala sakɩyɛ Potifaarɩ ɖɩɣa taa yɔ, ɛɛkɛ yom mbʋ nɛ pɩɩwɛɛ se eluzi ɛ-tɩ ɛ-caa weyi ɛkɛ sɩɩnaa layʋ yɔ ɛ-tɛɛ. Yehowa tiyele se Potifaarɩ ɛlɩzɩ Yosɛɛfʋ yomiye taa. Nɛ pɩkazɩ pazɩ lɛ, wɛtʋ ndʋ tɩ-taa Yosɛɛfʋ wɛɛ yɔ tɩkaɣ wɛɛkʋʋ nɛ pɩkɩlɩ.
YE WƐTƲ ƐTƐZƖƔ WƐƐKƲƲ YƆ
7. Ɛbɛ yɔɔ pɔtɔŋ se wɛtʋ ndʋ tɩ-taa Yosɛɛfʋ kaawɛɛ yɔ tɩɩwɛɛ nɛ tɩtɛzɩɣ wɛɛkʋʋ? (Kiɖe Tɛɛ Tɔm 39:14, 15)
7 Kiɖe Tɛɛ Tɔm ñʋʋ 39 kɛdaa se Potifaarɩ halʋ liu tɛɛ paɣzɩ kɔtɩnʋʋ Yosɛɛfʋ nɛ ɛñaɣ pana tam sakɩyɛ se epeɣzi-i nɛ ɛ nɛ ɩ pasʋʋ. Paa ɛzɩmtaa lɛ, Yosɛɛfʋ kizaɣ. Pɩtɛmnaa se Potifaarɩ halʋ taa wɩnɩ Yosɛɛfʋ siŋŋ nɛ ɛcɛtɩnɩ ɛ-taa se ɛlɛ ñɩnaɣ se ɛkpa-ɩ nɛ ɖoŋ nɛ ɛsʋnɩ-ɩ. (Kalɩ Kiɖe Tɛɛ Tɔm 39:14, 15.) Potifaarɩ nɩ tɔm ndʋ lɛ, ɛkpa Yosɛɛfʋ nɛ ɛɖʋ-ɩ salaka; nɛ ɛlɛ wɛɛ salaka taa peeɖe pɩnzɩ nasɩyɩ. (Kiɖe 39:19, 20) Ɛzɩma salaka ŋga kaawɛɛ? Ebree tɔm piye nɖɩ Yosɛɛfʋ labɩnɩ tʋmɩyɛ nɛ pɛɖɛzɩ-ɖɩ se salaka yɔ, ɖɩpɩzɩɣ nɛ ɖɩwɩlɩ se pɩkɛ «lɔkɔ» yaa «pɔʋ;» nɛ pɩwɩlɩɣ se cɩkpɛndʋʋ kaayu salaka ŋga ka-taa nɛ pɩlakaɣ-ɩ ɛzɩ ɛfɛyɩnɩ lidaʋ nakʋyʋ yɔ. (Kiɖe 40:15.) Pɩtasɩ lɛ, Bibl yɔɔdʋʋ se alɩwaatʋ natʋyʋ taa, paaɖɩ ɛ-nɩŋgbanzɩ kpasɩ nɛ pasʋzɩ e-pondone ñɩɣtʋ taa. (Keɣa 104:17, 18) Wɛtʋ ndʋ tɩ-taa Yosɛɛfʋ kaawɛɛ yɔ, tɩɩwɛɛ nɛ tɩtɛzɩɣ wɛɛkʋʋ. Ɛɛkɛ yom weyi pataɣaɣ-ɩ liu yɔ nɛ pʋwayɩ lɛ ɛpɩsɩ salaka tʋ.
8. Ye ɖɩkatɩɣ kaɖɛ naɖɩyɛ nɛ ɖɩtɛzɩɣ kpaʋ ɖoŋ yɔ, tɔm ndʋ ɖa-taa pɩzɩɣ nɛ pɩtɛmna?
8 Wiɖiyi ŋtɛm wɛʋ laŋwɛɛkɩyɛ wɛtʋ natʋyʋ taa nɛ wɛtʋ ndʋ tɩwɛɛ nɛ tɩtɛzɩɣ wɛɛkʋʋ paa ŋwɛɛ nɛ ŋtɩmɩɣ siŋŋ yɔ? Pɩpɩzɩɣ nɛ pɩla mbʋ. Yehowa eehuuzuu ɖɔ-yɔɔ se Sataŋ ɛjaɖɛ ɖɩnɛ ɖɩ-taa kala ɩtaatalɩ-ɖʋ. (1 Yoh. 5:19) Ɛlɛ ña-taa pɩzɩɣ nɛ pɩtɛmnɩ tɔm tʋnɛ: Yehowa sɩm wɛtʋ ndʋ tɩ-taa ŋwɛɛ yɔ camɩyɛ nɛ ɛmaɣzɩɣ ñɔ-yɔɔ. (Mat. 10:29-31; 1 Pɩy. 5:6, 7) Pɩtasɩ lɛ, ɛyɔɔdɩ lidaʋ tɔm tʋnɛ: «Maakaɣ-ŋ yebu kaaʋ, nɛ maakaɣ-ŋ siɣye haʋ kaaʋ.» (Ebr. 13:5) Halɩ alɩwaatʋ ndʋ ŋwɛɣ wɛtʋ natʋyʋ taa nɛ pɩlakɩ-ŋ ɛzɩ kɩlabɩm nabʋyʋ fɛyɩ yɔ, Yehowa pɩzɩɣ ɛsɩnɩ-ŋ nɛ ŋɖɔkɩ ña-laŋɩyɛ. Iyele nɛ ɖɩna ɛzɩma pɩlabɩ mbʋ Yosɛɛfʋ hɔɔlʋʋ taa yɔ.
Yehowa kaawɛ Yosɛɛfʋ cɔlɔ halɩ pɩkpɛndɩnɩ alɩwaatʋ ndʋ ɛɛwɛ salaka taa yɔ, piyeba nɛ paɖʋzɩ e-nesi tɛɛ salaka tɩnaa lalaa (Cɔnɩ tayʋʋ 9)
9. Alɩwaatʋ ndʋ Yosɛɛfʋ wɛ salaka taa yɔ, ɛbɛ wɩlɩɣ se Yehowa kaawɛ ɛ-cɔlɔ? (Kiɖe Tɛɛ Tɔm 39:21-23)
9 Kalɩ Kiɖe Tɛɛ Tɔm 39:21-23. Halɩ alɩwaatʋ ndʋ Yosɛɛfʋ kaawɛ kaɖɛ wɛtʋ taa salaka taa yɔ, Yehowa yeba nɛ pɩɖɔmnɩ-ɩ camɩyɛ. Ɛzɩma tɩyɛ? Alɩwaatʋ natʋyʋ wayɩ lɛ, ɛzɩ pɩɩlabʋ Potifaarɩ hɔɔlʋʋ taa yɔ, salaka yɔɔ cɔnɩyʋ ñʋʋdʋ paɣzɩ taʋ liu Yosɛɛfʋ nɛ ɛñaŋɩ-ɩ. Alɩwaatʋ pazɩ wayɩ lɛ, salaka yɔɔ cɔnɩyʋ ñʋʋdʋ ɖʋzɩ salaka taa mba lalaa Yosɛɛfʋ nesi tɛɛ. Toovenim taa lɛ, Bibl yɔɔdʋʋ se: «Salaka yɔɔ cɔnɩyʋ ñʋʋdʋ tɩtasɩɣ kem mbʋ peyebini-i yɔ pɩ-cɔlɔ.» Lɛɛlɛɛyɔ lɛ, Yosɛɛfʋ wɛnɩ tʋmɩyɛ naɖɩyɛ se ɛlakɩ. Pɩɩkɛ lɛɣzɩtʋ ndʋ ɛtaaɖʋna yɔ! Salaka tʋ weyi pakʋyɩ ɛ-yɔɔ se ɛñɩnaɣ se ɛsʋnɩ Farawɔɔ ɖɩɣa taa kaɖɩka halʋ nɛ ɖoŋ yɔ, ɛzɩma papɩzaɣ se pataa-ɩ liu mbʋ? Kiɖe Tɛɛ Tɔm 39:23 lɩzɩ mbʋ pi-ɖeke pɩ-cɔlɔ pɩlɩnaa yɔ pɩ-taa. Mayaɣ ŋga kɔyɔɔdʋʋ se: «[Yehowa] sɩɣaɣnɩ-ɩ nɛ ɛpɩzɩɣ mbʋ ɛlakaɣ yɔ.»
10. Pɩtɩla yɔ ɛbɛ yɔɔ Yosɛɛfʋ maɣzaɣ se pɩtaaɖɔŋnɩ-ɩ camɩyɛ pɩtɩŋa pɩ-taa?
10 Ðaɣnɩ maɣzʋʋ nɛ ŋna ɛzɩma pɩlakaɣ Yosɛɛfʋ yɔ. Pɛcɛtɩnɩ Yosɛɛfʋ taa nɛ paɖʋ-ɩ salaka nɛ pɩtɛ lɛ, ŋmaɣzɩɣ se pɩlakaɣ-ɩ ɛzɩ pɩɖɔŋaɣnɩ-ɩ camɩyɛ pɩtɩŋa pɩ-taa? Ɛbɛ Yosɛɛfʋ kaasɔɔlaa nɛ pɩkɩlɩ pɩtɩŋa? Ɛzɩ mbʋ ɛɛsɔɔlaa nɛ pɩkɩlɩ yɔ lɛ se ɛ-tɔm ɛkɛdɩnɩ salaka yɔɔ cɔnɩyaa ñʋʋdʋ na? Pɩtʋʋ fɛyɩ se mbʋ Yosɛɛfʋ kaasɔɔlaa nɛ pɩkɩlɩ yɔ lɛ se palɩzɩ-ɩ salaka taa. Halɩ ɛpɔzɩ salaka tʋ lɛlʋ, weyi pacaɣaɣ-ɩ yebu yɔ se eheyi ɛ-tɔm Farawɔɔ nɛ ɛlɛ yele nɛ palɩzɩ-ɩ salaka taa. (Kiɖe 40:14) Ɛlɛ abalʋ ɛnʋ, ɛtɩtɔzɩ nɛ eheyi Yosɛɛfʋ tɔm Farawɔɔ kpaagbaa. Mbʋ pɩlɩ pɩ-taa yɔ lɛ se Yosɛɛfʋ ɖaɣnɩ caɣʋ salaka ŋga ka-taa pɩnzɩ naalɛ. (Kiɖe 40:23; 41:1, 14) Paa mbʋ yɔ, Yehowa wobi pɩ-yɔɔ nɛ eyele nɛ pɩɖɔŋnɩ-ɩ camɩyɛ. Ɛzɩma tɩyɛ?
11. Ŋgee waɖɛ nɖɩ Yehowa ha Yosɛɛfʋ, nɛ ɛzɩma ɖɩsɩnaa se Yehowa tamaɣ ɛla?
11 Alɩwaatʋ ndʋ Yosɛɛfʋ wɛ salaka taa yɔ, Yehowa yeba nɛ Ejipiti wiyaʋ ɖozi ɖoza naalɛ nɛ asidi ɛ-ñʋʋ taa. Farawɔɔ kaasɔɔlɩ kpem se ɛnɩɩ ɖoza ana a-tɔbʋʋ, ɛlɛ ɛtɩna nɔɔyʋ se ɛlɩzɩ-ɩ a-tɔbʋʋ. Ɛnɩwa se Yosɛɛfʋ pɩzɩɣ nɛ ɛlɩzɩɣ ɖoza tɔbʋʋ lɛ, etiyi nɛ payaa-ɩ. Yehowa sɩnɩ Yosɛɛfʋ nɛ ɛlɩzɩ ɖoza ana a-tɔbʋʋ nɛ ɛsɩnɩ-ɩ ɖɔɖɔ nɛ ɛtasɩ Farawɔɔ lɔŋ kɩbaŋ nɛ lɔŋ ɛnɩ ɛkɛdɩnɩ-ɩ. Farawɔɔ ɖiɣzinaa se Yehowa wɛɛ nɛ ɛsɩɣnɩ Yosɛɛfʋ lɛ, ɛlɩzɩ-ɩ se ɛcɔnɩ Ejipiti tɔɔnasɩ kpeekpe yɔɔ. (Kiɖe 41:38, 41-44) Pʋwayɩ lɛ, ñɔɔsɩ sɔsɔsɩ nasɩyɩ lɩɩ Ejipiti nɛ Kanaŋ ajɛɛ taa ɖenɖe Yosɛɛfʋ hɔʋ kaawɛɛ yɔ. Lɛɛlɛɛyɔ lɛ, Yosɛɛfʋ wɛ lone nɖɩ ɖɩ-taa yɔ, ɛpɩzɩɣ nɛ ɛya ɛ-hɔʋ ñʋʋ nɛ ɛkandɩyɩ liɖe nɖɩ ɖɩ-taa Mesiya kaɣ lɩnʋʋ yɔ ɖɩ-yɔɔ.
12. Hɔɔlɩŋ weyi taa Yehowa yeba nɛ pɩɖɔmnɩ Yosɛɛfʋ camɩyɛ?
12 Maɣzɩ piti lakasɩ nzɩ sɩlabɩ Yosɛɛfʋ wezuu caɣʋ taa yɔ sɩ-yɔɔ nɛ ŋna. Ayeba nɛ Potifaarɩ maɣzɩ Yosɛɛfʋ yɔɔ ŋgʋ ɛlɛ kɛ yom yem? Yosɛɛfʋ kɛ salaka tʋ yem na, ye mbʋ ayeba nɛ ɛ-tɔm kɛdɩnɩ salaka yɔɔ cɔnɩyaa ñʋʋdʋ? Ayeba nɛ Farawɔɔ ɖozi ɖoza nɛ asidi ɛ-ñʋʋ taa nɛ ɛha waɖɛ Yosɛɛfʋ nɛ ɛlɩzɩ a-tɔbʋʋ? Aseɣti Farawɔɔ se ɛlɩzɩ Yosɛɛfʋ nɛ ɛkɛ Ejipiti tɔɔnasɩ yɔɔ cɔnɩyʋ? (Kiɖe 45:5) Pɩtʋʋ fɛyɩ se Yehowa kaawɛna nɛ ɛsɩɣnɩ Yosɛɛfʋ nɛ pɩɖɔŋnɩ-ɩ camɩyɛ pɩtɩŋa pɩ-taa. Paa Yosɛɛfʋ ɖalaa kaasɔɔlaa se pakʋ-ɩ yɔ, Yehowa lɛɣzɩ pa-tamaɣ kɩdɛkɛdaɣ ŋga se pɩsa nɛ ɛ-sɔɔlɩm la.
ƐZƖMA YEHOWA YEKI SE PƖÐƆMNƖ-Ŋ CAMƖYƐ YƆ
13. Ɛzɩ Yehowa ɖʋʋ nesi mbʋ payɩ pɩtalɩɣ-ɖʋ yɔ pɩ-taa? Lɩzɩ pɩ-taa.
13 Ɛbɛ Yosɛɛfʋ kɛdaɣ kpɛlɩkɩɣ-ɖʋ? Ɛzɩ Yehowa ɖʋʋ nesi mbʋ payɩ pɩtalɩɣ-ɖʋ yɔ pɩ-taa? Ɛzɩ eɖiyiɣ mbʋ payɩ pɩlakɩ ɖe-wezuu caɣʋ taa yɔ, se pɩsa nɛ wɛtʋ kɩdɛkɛdɩtʋ ndʋ payɩ tɩlakɩ yɔ, pɩkɛ lɩmaɣzɩyɛ kɩbanɖɛ naɖɩyɛ yɔɔ tɩlakɩ? Aayɩ, Bibl ɛɛwɩlɩɣ tɔm ndʋ. (Ekl. 8:9; 9:11) Ɛlɛ tɔm tʋnɛ ɖɩsɩma: Alɩwaatʋ ndʋ ɖɩkatɩɣ kaɖɛ naɖɩyɛ yɔ, Yehowa naɣ-ɖɩ nɛ ɛnɩɣ kubusi nzɩ ɖɩmakɩ se ɛsɩnɩ-ɖʋ yɔ. (Keɣa 33:16; 54:23; Iza. 59:1) Kɔzɩ kɔzɩ lɛ, Yehowa pɩzɩɣ ɛsɩnɩ-ɖʋ nɛ ɖɩɖɔkɩ ɖa-laŋɩyɛ camɩyɛ kala taa. Ɛzɩma tɩyɛ?
14. Ɛzɩma Yehowa sɩɣnɩ-ɖʋ kaɖɛ alɩwaatʋ taa?
14 Nʋmɔŋ weyi ɩ-yɔɔ Yehowa tɩŋɩɣna nɛ ɛsɩɣnɩ-ɖʋ yɔ ɩ-taa nakʋyʋ lɛ se ɛhɛzɩɣ ɖa-laŋɩyɛ nɛ ɛkpazɩɣ-ɖʋ ɖoŋ; nɛ ɖoŋ ɖoŋ lɛ ɛlakɩ mbʋ alɩwaatʋ kɩbandʋ yɔɔ. (2 Kɔr. 1:3, 4) Mbʋ pɩɩlabɩ koobu abalɩñɩnʋ nɔɔyʋ hɔɔlʋʋ taa. Payaɣ-ɩ se Eziz nɛ ɛwɛ Turkmenistan ɛjaɖɛ taa. Paakʋ ɛ-tɔm se paɖʋʋ-ɩ salaka pɩnzɩ naalɛ e-tisuu yɔɔ. Ɛkɛdaa se: «Tanaŋ ŋgʋ kɩ-tɛɛ pahʋwaɣnɩ-m tɔm yɔ, koobu abalɩñɩnʋ nɔɔyʋ wɩlɩ-m Izaayii 30:15. Pɔyɔɔdɩ peeɖe se: ‘Tamɩyɛ sum nɛ lidaʋ yɔɔ mi-ɖoŋ wɛɛ.’ Mayaɣ ŋga, kasɩnɩ-m paa ɛzɩmtaa nɛ mancaɣ ɖiɣ ɖiɣ nɛ mantaa Yehowa liu pɩtɩŋa pɩ-taa. Mayaɣ ŋga kɔ-yɔɔ maɣzʋʋ sɩnɩ-m alɩwaatʋ ndʋ payɩ malabɩ salaka taa yɔ.» Ŋpɩzɩɣ nɛ ŋmaɣzɩ ñe-wezuu caɣʋ alɩwaatʋ ndʋ tɩ-taa pɩɩpɔzaa se pasɩnɩ-ŋ nɛ pɩkɩlɩ, nɛ Yehowa hɛzɩ ña-laŋɩyɛ nɛ ɛkpazɩ-ŋ ɖoŋ yɔ tɩ-yɔɔ?
15-16. Mbʋ pɩtalɩ Tori yɔ, ɛbɛ pɩkpɛlɩkɩ-ŋ?
15 Ðoŋ ɖoŋ lɛ, kaɖɛ naɖɩyɛ talɩɣ-ɖʋ nɛ pɩtɛ nɛ ɖɩmaɣzɩɣ ɖɩ-yɔɔ lɛ ɖɩnaɣ ɛzɩma Yehowa sɩnɩ-ɖʋ kaɖɛ nɖɩ ɖɩ-taa yɔ. Payaɣ koobu halɩñɩnʋ nɔɔyʋ se Tori; eɖiɣzinaa se tɔm ndʋ tɩkɛ toovenim. Ɛ-pɩyalʋ Mason lʋbɩnɩ kansɛɛrɩ kʋdɔŋ pɩnzɩ loɖo nɛ pɩkɔɔ pɩsɩɩnɩ alɩwaatʋ ndʋ ɛsɩbɩnɩ-kʋ yɔ. Tori kaawɛ laŋwɛɛkɩyɛ taa siŋŋ, nɛ ɖɩnɩɣ ɛ-tɔm taa. Ɛyɔɔdaa se: «Mantɩsa se kaɖɛ wɛtʋ natʋyʋ pɩzɩɣ nɛ tiyele nɛ mɛwɛɛ laŋwɛɛkɩyɛ taa nɛ pɩkɩlɩ tʋnɛ.» Ɛtasɩ yɔɔdʋʋ se: «Man-taa tɛma se lʋlɩyaa tisiɣ se ye ña-maɣmaɣ ŋnɩɣ siziŋ yɔ, pɩwɛɣ weewee nɛ pɩkɩlɩ se ŋnaɣ ña-pɩɣa kɛwɛɛ nɛ kanɩɣ siziŋ.»
16 Kaɖɛ nɖɩ, paa ɖɩkɔnɩ Tori laŋwɛɛkɩyɛ siŋŋ yɔ, pʋwayɩ lɛ ɛkpaɣ alɩwaatʋ nɛ ɛmaɣzɩ nʋmɔŋ weyi ɩ-yɔɔ Yehowa tɩŋnaa nɛ ɛsɩnɩ-ɩ nɛ ɛlʋbɩnɩ kaɖɛ wɛtʋ ndʋ yɔ pɩ-yɔɔ. Ɛyɔɔdaa se: «Mamaɣzɩɣ alɩwaatʋ ndʋ tɩ-yɔɔ lɛ, manaɣ ɛzɩma Yehowa sɩnɩ-m nɛ sɔɔlɩm man-pɩyalʋ kʋdɔŋ alɩwaatʋ ndʋ tɩ-taa yɔ. Kɩɖaʋ nakʋyʋ yɔ: Halɩ alɩwaatʋ ndʋ pɩwɩɣaɣ Mason siŋŋ nɛ ɛtaapɩzɩɣ se ɛna mba pɔkɔŋaɣ se pana-ɩ yɔ, koobiya saɣaɣ lɔɔɖɩyɛ ñɩɣtʋ naalɛ nɛ pɔkɔŋ ɖɔkɔtɔ taa. Paa ɛzɩmtaa lɛ, nɔɔyʋ kaawɛ ɖaŋ ŋgʋ kɩ-tɛɛ pamʋʋ ɛyaa yɔ, nɛ ɛɛsɔɔlɩ faaa se ɛsɩnɩ-ɖʋ. Pɩtasɩ lɛ, koobiya cɔŋnaɣ ɖo-tomnaɣ yɔɔ kɩcɛyɩm ɖeɖe. Halɩ alɩwaatʋ ndʋ pɩɩwɛ kaɖɛ nɛ pɩkɩlɩ yɔ, ɖɩɩwɛnɩ mbʋ pɩpɔzaɣ-ɖʋ yɔ paa ɛzɩmtaa.» Yehowa ha Tori mbʋ pɩpɔzaɣ-ɩ yɔ se ɛpɩzɩ nɛ ɛɖɔkɩ ɛ-laŋɩyɛ. Nɛ mbʋ ɖɔɖɔ ɛsɩnɩ Mason.—Kalɩ aɖakaɣ « Yehowa ha-ɖʋ mbʋ ɖeyi ɖeyi pɩpɔzaɣ-ɖʋ yɔ.»
TAASƆƆ MBƲ PAYƖ YEHOWA LABƖ-Ŋ YƆ PƖ-YƆƆ
17-18. Alɩwaatʋ ndʋ ɖɩwɛɣ kaɖɛ naɖɩyɛ taa yɔ, ɛbɛ pɩzɩɣ pɩsɩnɩ-ɖʋ nɛ ɖiɖiɣzina ɛzɩma Yehowa wɛɛ nɛ ɛsɩɣnɩ-ɖʋ yɔ nɛ ɖɩwɩlɩ-ɩ ɖɛ-ɛsɩmɩyɛ? (Keɣa 39:6)
17 Kalɩ Keɣa 39:6. Weyi ɛkpaɣ pʋʋ nakʋyʋ yɔ, ɛ-kaɖʋwa lɛ se ɛtalɩ kɩ-ñʋʋ taa. Ɛlɛ lona sakɩyɛ wɛ nʋmɔʋ taa, wena a-taa ɛpɩzɩɣ nɛ ɛsɩŋ nɛ ɛcɔnɩ mbʋ pɩwɛ kajʋka yɔ. Mbʋ ɖɔɖɔ, kpakɩɣ alɩwaatʋ ɖoŋ ɖoŋ nɛ ŋmaɣzɩɣ ɛzɩma Yehowa wɛɛ nɛ eyeki nɛ pɩɖɔŋnɩ-ŋ camɩyɛ kala alɩwaatʋ taa yɔ pɩ-yɔɔ. Paa evemiye nɖɩ ɖɩ-ɖɩdɛnɖɛ lɛ, pɔzɩ ña-tɩ tɔm tʋnɛ: ‘Hɔɔlʋʋ ŋgʋ taa mana Yehowa wazaɣ sɔnɔ? Paa kaɖɛ nɖɩ ɖɩ-taa mɛwɛɛ yɔ ɖɩtɩsɩɩ tɩnaɣ yɔ, ɛzɩma Yehowa wɛɛ nɛ ɛsɩɣnɩ-m se mɔnɖɔkɩ ma-laŋɩyɛ?’ Maɣzɩ nɛ ŋna se ŋpɩzɩɣ nɛ ŋɖiɣzini mbʋ Yehowa laba nɛ ɛsɩnɩ-ŋ yɔ pɩ-taa kʋɖʋm na.
18 Toovenim taa lɛ, pɩtɩla yɔ ŋwɛɛ nɛ ŋtɩmɩɣ se kaɖɛ nɖɩ ɖɩ-taa ŋwɛɛ yɔ ɖɩsɩɩ tɩnaɣ. Pɩ-taa wɛ nɩʋ nɛ pɩmʋnɩ mbʋ. (Fil. 4:6) Ɛlɛ pɩwɛɛ ɖɔɖɔ se ɖɩtɩlɩ wazasɩ nzɩ ɖɩwɛɛ nɛ ɖihikiɣ lɛɛlɛɛyɔ yɔ. Kɔzɩ kɔzɩ lɛ, Yehowa labɩ-ɖʋ tamaɣ se ɛkpazɩɣ-ɖʋ ɖoŋ nɛ ɛsɩnɩ-ɖʋ nɛ ɖɩɖɔkɩ ɖa-laŋɩyɛ. Ye mbʋ paa ɛzɩmtaa lɛ, taasɔɔ se ŋwɩlɩ ɛsɩmɩyɛ ɛzɩma Yehowa wɛɛ nɛ ɛsɩɣnɩ-ŋ yɔ pɩ-yɔɔ. Ðɩnɛ ɛlɛ, ŋkaɣ naʋ ɛzɩma Yehowa wɛɛ nɛ ɛsɩɣnɩ-ŋ se pɩɖɔmnɩ-ŋ camɩyɛ halɩ pɩkpɛndɩnɩ kaɖɛ alɩwaatʋ taa yɔ, ɛzɩ ɛɛlabʋ Yosɛɛfʋ hɔɔlʋʋ taa yɔ.—Kiɖe 41:51, 52.
HENDU 32 Wɛɛ Yehowa hɔɔlʋʋ taa!
a Alɩwaatʋ ndʋ ɖɩkatɩɣ kaɖɛ naɖɩyɛ yɔ, pɩtɩla yɔ ɖɩmaɣzɩɣ se ‘pɩɩɖɔŋnɩ-ɖʋ camɩyɛ.’ Ðɩpɩzɩɣ nɛ ɖɩmaɣzɩ se alɩwaatʋ ndʋ kaɖɛ nɖɩ ɖɩsɩɣ tɩnaɣ yɔ lɛ, ɖɩpɩzɩɣ nɛ ɖɩyɔɔdɩ se pɩɖɔŋnɩ-ɖʋ camɩyɛ. Ɛlɛ, mbʋ pɩlabɩ Yosɛɛfʋ wezuu caɣʋ taa yɔ pɩkpɛlɩkɩɣ-ɖʋ lɔŋ kɩbaŋ nɩɩyɩ. Ɛnɩ yɔ: Yehowa pɩzɩɣ ɛsɩnɩ-ɖʋ nɛ pɩɖɔmnɩ-ɖʋ camɩyɛ halɩ pɩkpɛndɩnɩ alɩwaatʋ ndʋ ɖɩwɛ kala taa yɔ. Tɔm ñʋʋ kʋnɛ, kɩkaɣ-ɖʋ sɩnʋʋ nɛ ɖɩna ɛzɩma Yehowa sɩɣnɩ-ɖʋ se pɩɖɔmnɩ-ɖʋ camɩyɛ kala taa yɔ.
b Bibl kɛdɩ lɛɣzɩtʋ ndʋ tɩtalɩ Yosɛɛfʋ alɩwaatʋ ndʋ ɛɛwɛ yomiye taa Potifaarɩ ɖɩɣa taa yɔ pɩ-tɔm masɩ pazɩ taa yem na; ɛlɛ pɩtala pɩɩkpaɣ pɩnzɩ sakɩyɛ pʋcɔ nɛ lɛɣzɩtʋ ndʋ tɩla.
