Roma mba 8:1-39
8 Ye mbʋ, mba pa nɛ Krɩstʋ Yesu pɛwɛ nɔɔ kʋɖʋmaɣ yɔ, paakʋʋ pɔ-tɔm.
2 Mbʋ pʋyɔɔ yɔ fezuu ŋgʋ kɩhaɣ wezuu mba pa nɛ Krɩstʋ Yesu pɛwɛ nɔɔ kʋɖʋmaɣ yɔ, kɩ-paɣtʋ holi-ŋ+ kɩwɛɛkɩm nɛ sɩm pa-paɣtʋ tɛɛ.
3 Mbʋ Paɣtʋ taapɩzɩɣ labʋ+ tomnaɣ ɛjandʋ yɔɔ yɔ,+ Ɛsɔ labɩ-pʋ alɩwaatʋ ndʋ etiyi ɛ-maɣmaɣ ɛ-Pɩyalʋ+ tomnaɣ ŋga kanɩɣzɩnɩ kɩwɛɛkɩm tomnaɣ yɔ ka-taa yɔ+ se ɛlɩzɩ kɩwɛɛkɩm; Ɛsɔ tɩŋnɩ nʋmɔʋ ŋgʋ kɩ-yɔɔ nɛ ɛkʋ kɩwɛɛkɩm tɔm tomnaɣ taa,
4 se pɩsa nɛ Paɣtʋ taa tɔm siɣsiɣ ñɩndʋ la ɖɔ-yɔɔ,+ ɖa mba ɖɩɩɖɔŋ ɛzɩ tomnaɣ sɔɔlʋʋ yɔ, ɛlɛ ɖɩɖɔŋ ɛzɩ fezuu sɔɔlʋʋ yɔ.+
5 Mbʋ pʋyɔɔ yɔ mba pacakɩ wezuu ɛzɩ tomnaɣ sɔɔlʋʋ yɔ, tomnaɣ wondu yɔɔ pakaŋ pa-maɣzɩm;+ ɛlɛ mba pacakɩ wezuu ɛzɩ fezuu sɔɔlʋʋ yɔ, fezuu wondu yɔɔ pakaŋ pa-maɣzɩm.+
6 Mbʋ pʋyɔɔ yɔ mba pakaŋ pa-maɣzɩm tomnaɣ yɔɔ yɔ, piwokini-wɛ sɩm taa;+ ɛlɛ mba pakaŋ pa-maɣzɩm fezuu yɔɔ yɔ, piwokini-wɛ wezuu nɛ laŋhɛzɩyɛ pa-taa;+
7 mbʋ pʋyɔɔ yɔ mba pakaŋ pa-maɣzɩm tomnaɣ yɔɔ yɔ, papɩsɩɣ Ɛsɔ koyindinaa;+ mbʋ pʋyɔɔ yɔ tomnaɣ eeluzuu ka-tɩ Ɛsɔ paɣtʋ tɛɛ, nɛ toovenim taa lɛ, kaapɩzɩɣ nɛ kala mbʋ.
8 Pʋyɔɔ lɛ, mba pacakɩ wezuu ɛzɩ tomnaɣ sɔɔlʋʋ yɔ, pɔ-tɔm ɛɛpɩzɩɣ nɛ tɩkɛdɩnɩ Ɛsɔ.
9 Ɛlɛ, ye Ɛsɔ fezuu ɛwɛ mɩ-taa toovenim taa yɔ, ɩɩcakɩ wezuu ɛzɩ tomnaɣ sɔɔlʋʋ yɔ ɛlɛ ɩcakɩ wezuu ɛzɩ fezuu sɔɔlʋʋ yɔ.+ Ɛlɛ ye nɔɔyʋ ɛfɛyɩnɩ Krɩstʋ fezuu yɔ, ɛyʋ ɛnʋ, ɛtɩkɛ ɛ-pʋyʋ.
10 Ɛlɛ ye mɩ nɛ Krɩstʋ ɩwɛ nɔɔ kʋɖʋmaɣ yɔ,+ kɩwɛɛkɩm yɔɔ lɛ tomnaɣ sɩba; ɛlɛ siɣsiɣ wɛtʋ yɔɔ lɛ fezuu kɛ wezuu.
11 Ye lɛɛlɛɛyɔ weyi efezi Yesu nɛ sɩɖaa taa yɔ, e-fezuu ɛwɛ mɩ-taa yɔ, weyi efezi Krɩstʋ Yesu nɛ sɩɖaa taa yɔ,+ ɛkaɣ tɩŋnʋʋ e-fezuu ŋgʋ kɩwɛ mɩ-taa yɔ kɩ-yɔɔ ɖɔɖɔ nɛ ɛla nɛ mi-tomnasɩ kɩsɩbasɩ wɛɛ wezuu.+
12 Pʋyɔɔ lɛ, koobiya, pɩfɛyɩ se ɖiyele nɛ ɖo-tomnasɩ wɛɛnɩ ɖoŋ ɖɔ-yɔɔ nɛ ɖɩla sɩ-sɔɔlɩm;+
13 mbʋ pʋyɔɔ yɔ ye ɩcakɩ wezuu ɛzɩ tomnaɣ sɔɔlʋʋ yɔ, pɩtʋʋ fɛyɩ se ɩkaɣ sɩbʋ; ɛlɛ ye ɩtɩŋɩɣnɩ fezuu yɔɔ nɛ ɩkʋʋ tomnaɣ lakasɩ yɔ,+ ɩkaɣ caɣʋ wezuu.+
14 Mbʋ pʋyɔɔ yɔ mba payɩ Ɛsɔ fezuu ɖiyiɣ yɔ, toovenim taa lɛ, pɛkɛ Ɛsɔ pɩyalaa.+
15 Mbʋ pʋyɔɔ yɔ pɩtɩkɛ yomiye fezuu ɩmʋwa se sɔɔndʋ ɛtasɩ-mɩ kpaʋ, ɛlɛ ɩmʋ fezuu ŋgʋ Ɛsɔ haɣ se ɛkpaɣ-mɩ ɛzɩ ɛ-pɩyalaa yɔ, nɛ fezuu ŋgʋ kɩ-yɔɔ ɖɩtɩŋɩɣna nɛ ɖɩmakɩ kubusi se: «Aba,* Caa!»+
16 Fezuu maɣmaɣ tɩnɩɣ ɖe-fezuu yɔɔ nɛ kɩlɩzɩɣ aseɣɖe+ se ɖɩkɛ Ɛsɔ piya.+
17 Ye mbʋ, ye ɖɩkɛ Ɛsɔ piya yɔ, ɖɩmʋʋ ñɩm mbʋ ɛhaɣ yɔ. Nɛ ɛkaɣ-ɖʋ haʋ ñɩm mbʋ ɛha Krɩstʋ yɔ,+ ye ɖɩñɩtaa nɛ ɖɩkpɛndɩ Krɩstʋ yɔɔ nɛ ɖa nɛ ɩ ɖɩtɔɔ kʋñɔŋ+ se pɩsa nɛ pɛkpɛndɩ ɖa nɛ ɩ nɛ pasa yɔ.+
18 Mbʋ pʋyɔɔ yɔ mɛ-ɛsɩndaa lɛ, alɩwaatʋ tʋnɛ tɩ-taa kʋñɔmɩŋ tɩlɩɩ pʋyʋ ye pakpaɣ-ɩ nɛ pamaɣzɩnɩ samtʋ ndʋ pakaɣ tɩ-yɔɔ kuluu ɖɔ-hɔɔlʋʋ taa yɔ.+
19 Mbʋ pʋyɔɔ yɔ wondu kɩlɩzɩtʋ ɖaŋ kpam se pokuli Ɛsɔ pɩyalaa yɔɔ nɛ pawɩlɩ.+
20 Mbʋ pʋyɔɔ yɔ paɖʋzɩ wondu kɩlɩzɩtʋ wezuu ŋgʋ kɩɩwazɩɣ pʋyʋ yɔ ki-nesi tɛɛ,+ pɩtɩkɛ tɩ-maɣmaɣ tɩ-sɔɔlɩm taa, ɛlɛ weyi eluzi-tʋ yɔ ɛ-sɔɔlɩm taa, lidaʋ kʋnɛ kɩ-yɔɔ
21 se wondu kɩlɩzɩtʋ maɣmaɣ kaɣ lɩʋ ɖɔɖɔ+ mbʋ pɩɖazaa yɔ pi-yomiye taa nɛ tɩwɛɛnɩ Ɛsɔ piya tɩ-yɔɔ wɛʋ sɔsɔm.
22 Mbʋ pʋyɔɔ yɔ ɖɩsɩm mbʋ se wondu kɩlɩzɩtʋ tɩŋa ɖiɣni muzuu nɛ tɩnɩɣ siziŋ halɩ nɛ sɔnɔ.
23 Pɩtɩsɩɩnɩ pi-ɖeke, ɛlɛ ɖa-maɣmaɣ ɖɔɖɔ, mba ɖa ɖɩwɛnɩ kajalaɣ tɔɔnaɣ pee, pʋ-tɔbʋʋ se fezuu yɔ; ɛɛɛ, ɖa-maɣmaɣ ɖimuzuuni ɖooo ɖa-taa+ alɩwaatʋ ndʋ ɖɩɖaŋ kpam se Ɛsɔ ɛmʋ-ɖʋ ɛzɩ ɛ-pɩyalaa yɔ,+ se patɩŋnɩ kɩhɛyʋʋ pʋ-ñʋʋ taa yɔɔ nɛ poholi-ɖʋ ɖo-tomnasɩ taa yɔ.
24 Mbʋ pʋyɔɔ yɔ payabɩ ɖa-ñʋʋ lidaʋ kʋnɛ kɩ-taa; ɛlɛ lidaʋ ŋgʋ panaɣ-kʋ yɔ kɩtɩkɛ lidaʋ, mbʋ pʋyɔɔ yɔ alɩwaatʋ ndʋ nɔɔyʋ naɣ nabʋyʋ yɔ, ɛtasɩɣ-pʋ ɖaŋʋʋ* yaa we?
25 Ɛlɛ ye ɖɩɖaŋɩɣ*+ mbʋ ɖɩɩnaɣ yɔ,+ ɖɩwɛɣ nɛ ɖɩɖaŋɩɣ-pʋ kpam nɛ laŋɩyɛ ɖɔkʋʋ.+
26 Mbʋ keekee fezuu ɖɔɖɔ sɩɣnɩ-ɖʋ ɖɛ-ɛjandʋ taa;+ mbʋ pʋyɔɔ yɔ tɔm lɛ se ɖɩɩsɩŋ mbʋ pɩwɛɛ se ɖɩpɔzɩ adɩma taa yɔ, ɛlɛ fezuu maɣmaɣ tendiɣ ɖo-lone taa alɩwaatʋ ndʋ ɖimuzuuni ɖa-taa nɛ natʋyʋ ɛɛlɩɣ yɔ.
27 Ɛlɛ weyi ɛtazɩɣ laŋa taa yɔ,+ ɛnɩɣ fezuu tɔbʋʋ;* mbʋ pʋyɔɔ yɔ kitendiɣ ɛyaa kiɖeɖema yɔɔ nɛ pɩlakɩ nɔɔ kʋɖʋmaɣ nɛ Ɛsɔ sɔɔlɩm.
28 Ðɩsɩm mbʋ se Ɛsɔ lakɩ se ɛ-tʋma tɩŋa ɩkpɛndɩ nɛ awɛɛ nɔɔ kʋɖʋmaɣ nɛ pɩwazɩ mba pɔsɔɔlɩ Ɛsɔ yɔ, mba paya-wɛ nɛ pɩla nɔɔ kʋɖʋmaɣ nɛ ɛ-kaɖʋwa yɔ;+
29 mbʋ pʋyɔɔ yɔ mba ɛcalɩ-wɛ tɩlʋʋ yɔ, ɛɛɖʋ ɖɔɖɔ ɖooo lɔŋ se pɛkɛ ɛ-Pɩyalʋ lɛzʋʋ,+ se pɩsa nɛ ɛlɛ kɛ kajalaɣ pɩɣa+ koobiya sakɩyɛ hɛkʋ taa.+
30 Pɩtasɩ lɛ, mba ɛɛɖʋ ɖooo lɔŋ yɔ,+ mba kɛnɩ mba ɛyawa ɖɔɖɔ yɔ;+ nɛ mba ɛyawa yɔ, mba ɛya ɖɔɖɔ se siɣsiɣ tɩnaa.+ Nɛ mba ɛya-wɛ se siɣsiɣ tɩnaa yɔ, mba ɛsama ɖɔɖɔ.+
31 Ye mbʋ, ɖɩyɔɔdɩ suwe tɔm ndʋ tɩ-yɔɔ yɔ? Ye Ɛsɔ ɛwɛ ɖɔ-yɔɔ, akaɣ-ɖʋ kaɖɩnʋʋ?+
32 Ɛtɩfɛɛ ɛ-maɣmaɣ ɛ-Pɩyalʋ, ɛlɛ ɛkpaɣ-ɩ nɛ ɛcɛlɩ ɖa-tɩŋa ɖɔ-yɔɔ;+ ye mbʋ, ɛzɩ ɛ nɛ ɩ paakaɣ-ɖʋ haʋ wondu lɛɛtʋ tɩŋa faaa yaa we?
33 Akaɣ kʋyʋʋ se ɛkaɖɩnɩ mba Ɛsɔ lɩzaa yɔ?+ Ɛsɔ yaɣnɩ-wɛ se siɣsiɣ tɩnaa.+
34 Akaɣ pɔ-tɔm kʋʋ? Krɩstʋ Yesu kɛnɩ weyi ɛsɩba yɔ; ɛɛɛ, pɩkɩlɩ lɛ, ɛnʋ kɛnɩ weyi pefezi-i yɔ; weyi ɛwɛ Ɛsɔ nesi kɩbanzɩ yɔɔ,+ nɛ weyi etendiɣ ɖɔɖɔ ɖɔ-yɔɔ yɔ.+
35 Akaɣ-ɖʋ yasʋʋ nɛ Krɩstʋ sɔɔlɩm?*+ Pɩkaɣ kɛʋ kʋñɔŋ yaa siziŋ nɩʋ yaa nazɩm yaa ñɔɔsɩ yaa ndaakpeɖe wɛʋ yaa kaɖɛ yaa laɣɖɛ na?+
36 Ɛzɩ pamaʋ yɔ se: «Ñɔ-yɔɔ pakʋʋ-ɖʋ evemiye kpeekpe; pakpaɣ-ɖʋ ɛzɩ heŋ weyi powokini-i kʋʋ yɔ.»+
37 Ɛlɛ wɛtʋ ndʋ tɩ-tɩŋa tɩ-taa lɛ, weyi ɛsɔɔlɩ-ɖʋ yɔ ɛ-yɔɔ lɛ ɖɩwɛɛ nɛ ɖɩwakɩ caɣ caɣ.+
38 Mbʋ pʋyɔɔ yɔ man-taa tɛma se paa pɩtɩɩkɛ sɩm, yaa wezuu, yaa Ɛsɔ tiyiyaa, yaa kominawaa, yaa wondu ndʋ tɩwɛ lɛɛlɛɛyɔ yɔ, yaa wondu ndʋ tɩkaɣ kɔm yɔ, yaa ɖoŋ,+
39 yaa kʋkʋyɩŋ, yaa cukaŋ, yaa wonuu kɩlɩzʋʋ lɛɛkʋ nakʋyʋ yɔ, pɩɩkaɣ pɩzʋʋ nɛ pɩyasɩ-ɖʋ nɛ Ɛsɔ sɔɔlɩm mbʋ pɩwɛ ɖa-Kɩbaɣlʋ Krɩstʋ Yesu taa yɔ.
Pɩ-tɛɛ tɔm
^ Pɩkɛ Ebree yaa Arameya kʋnʋŋ taa tɔm piye, nɛ ɖɩ-tɔbʋʋ lɛ se «Hayɩ Caa!»
^ Yaa «taʋ liu.»
^ Yaa «ɖɩtaɣ liu.»
^ Yaa «ɛsɩm fezuu kaɖʋwa.»
^ Yaa «Ɛbɛ pɩzɩɣ piyele nɛ Krɩstʋ yebi-ɖʋ sɔɔlʋʋ?»
