Magpakigbahin sing Bug-os sa Dakung Espirituwal nga Pag-ani

‘Mangin madamo sing ginahimo sa hilikuton sang Ginuo.’—1 COR. 15:58.

1. Ano nga pangagda ang ginpalab-ot ni Jesus sa iya mga disipulo?

SAMTANG nagalakbay si Jesus sa rehiyon sang Samaria sa hingapusan nga bahin sang 30 C.E., nagdulog sia agod magpahuway sa bubon malapit sa banwa sang Sicar. Didto ginsilingan niya ang iya mga disipulo: “Tuluka ninyo kag tan-awa ang kaumhan, nga maputi na ini agod anihon.” (Juan 4:35) Si Jesus wala nagapatuhoy sa isa ka literal nga pag-ani kundi sa isa ka espirituwal nga pagtipon sang matarong sing tagipusuon nga mga tawo nga mangin iya mga sumulunod. Gani, ang iya ginsiling isa ka pangagda nga magpanghikot. Madamo pa sing dapat himuon apang malip-ot na lang ang nabilin nga tion!

2, 3. (a) Ano ang mga pamatuod nga nagakabuhi na kita sa tion sang tig-alani? (b) Ano ang binagbinagon sa sini nga artikulo?

² Ang ginsiling ni Jesus tuhoy sa pag-ani may pinasahi nga kahulugan sa aton panahon. Nagakabuhi kita sa tion nga ang latagon sang kalibutan ‘maputi na agod anihon.’ Kada tuig, minilyon ka tawo ang nagabaton sang pangagda nga magkuha sing nagahatag-kabuhi nga mga kamatuoran, kag linibo ka bag-ong disipulo ang ginabawtismuhan. Pribilehiyo gid naton nga makigbahin sa pinakadaku nga pag-ani sa maragtas sa idalom sang pagdumala sang Agalon sang alanyon, si Jehova nga Dios. ‘Madamo ka bala sing ginahimo’ sa sining pag-ani nga hilikuton?—1 Cor. 15:58.

³ Sa iya tatlo ka tuig kag tunga nga pagministeryo sa duta, ginhanda ni Jesus ang iya mga disipulo sa ila papel subong mga mangangani. Pagabinagbinagon sa sini nga artikulo ang tatlo sa madamo nga importante nga leksion nga gintudlo ni Jesus sa iya mga disipulo. Ginapadaku sang kada leksion ang isa ka kinaiya nga makabulig sa aton sa paghimo sang aton bug-os nga masarangan sa pagtipon sang mga disipulo sa aton panahon. Binagbinagon naton ang kada isa sining mga kinaiya.

Importante ang Pagkamapainubuson

4. Paano ginpakita ni Jesus ang importansia sang pagkamapainubuson?

⁴ Handurawa ini nga danyag: Ang mga disipulo bag-o lang nagbaisay kon sin-o sa ila ang labing daku. Mahimo makita pa sa ila mga nawong nga naugot sila kag wala sing pagsalig sa isa kag isa. Gani, gindala ni Jesus ang isa ka magamay nga bata sa atubangan nila. Gintudlo ni Jesus ining bata kag nagsiling: “Ang bisan sin-o nga magpaubos sang iya kaugalingon kaangay sini nga bata amo ang labing daku sa ginharian sang langit.” (Basaha ang Mateo 18:1-4.) Sa baylo nga ilugon ang pagtamod sang kalibutan, nga nagatan-aw sa tawo base sa gahom, manggad, kag posisyon, dapat mahangpan sang mga disipulo nga ang ila pagkadaku nagadepende sa ‘pagpaubos nila sang ila kaugalingon’ sa mata sang iban. Pakamaayuhon lamang sila ni Jehova kon magpakita sila sing matuod nga pagkamapainubuson.

5, 6. Ngaa kinahanglan ang pagkamapainubuson agod makapakigbahin sing bug-os sa pag-ani nga hilikuton? Maghatag sing halimbawa.

⁵ Tubtob subong, madamo sa kalibutan ang nagahinguyang sang ila kabuhi sa paghingamo sang gahom, manggad, kag posisyon. Bangod sini, halos wala na sila sing tion sa espirituwal nga mga butang. (Mat. 13:22) Tuhay gid ang katawhan ni Jehova, bangod malipayon sila sa ‘pagpaubos sang ila kaugalingon’ sa mata sang iban agod maagom nila ang pagpakamaayo kag kahamuot sang Agalon sang alanyon.—Mat. 6:24; 2 Cor. 11:7; Fil. 3:8.

⁶ Binagbinaga ang halimbawa ni Francisco, nga  nagaalagad subong gulang sa Bagatnan nga Amerika. Sang pamatan-on sia, nag-untat sia sa pag-eskwela sa unibersidad agod magpayunir. “Sang ulihi, sang manugpakasal na ako,” siling niya, “nakakita kuntani ako sing trabaho nga makahatag sa akon kag sa akon asawa sing pinansial nga kasiguruhan. Apang, nagdesisyon kami nga pasimplehon ang amon kabuhi kag magpadayon sa bug-os tion nga pag-alagad. Sang ulihi, sang may kabataan na kami, nagdamo pa gid ang mga kabudlayan. Apang ginbuligan kami ni Jehova nga magpabilin sa amon desisyon nga huptan ang simple nga pagkabuhi.” Si Francisco naghinakop: “Kapin na sa 30 ka tuig nga nagaalagad ako subong gulang, kag nakabaton man ako sang iban pa nga pinasahi nga asaynment. Wala gid kami naghinulsol nga ginhuptan namon ang simple nga pagkabuhi.”

7. Naaplikar mo na bala ang laygay sang Roma 12:16? Ano ang resulta?

⁷ Kon ginalikawan mo ang “matinaastaason nga mga butang” sining kalibutan kag ginatugutan ang imo kaugalingon nga “magpatuytoy sa kubos nga mga butang,” makapaabot ka man sing madamo nga pagpakamaayo kag pribilehiyo sa pag-ani nga hilikuton.—Roma 12:16; Mat. 4:19, 20; Luc. 18:28-30.

Ang Kapisan Nagadala sing mga Pagpakamaayo

8, 9. (a) Isumaryo ang ilustrasyon ni Jesus tuhoy sa mga talanton. (b) Sin-o ang ilabi na nga mapalig-on sini nga ilustrasyon?

⁸ Ang isa pa ka kinaiya nga kinahanglan naton agod makapakigbahin kita sing bug-os sa pag-ani amo ang kapisan. Gin-ilustrar ina ni Jesus sa iya parabola sang mga talanton. * Sa sina nga ilustrasyon, may isa ka tawo nga antes naglakbay sa malayo nga lugar, nagtugyan sang iya mga pagkabutang sa iya tatlo ka ulipon. Ang una nga ulipon nakabaton sing lima ka talanton, ang ikaduha, duha, kag ang ikatlo, isa. Sang nakahalin na ang ila agalon, nangin mapisan ang una kag ikaduha nga ulipon kag “nagpatikang” gilayon sang ila mga talanton. Apang, ang ikatlo nga ulipon nangin “uyaya.” Ginlubong niya ang iya talanton sa duta. Pagbalik sang agalon, ginpadyaan niya ang una kag ikaduha nga ulipon paagi sa pagtugyan sa ila nga magdumala sa “madamo nga butang.” Apang, ginkuha niya ang talanton sa ikatlo nga ulipon kag gintabog ini sa iya panimalay.—Mat. 25:14-30.

⁹ Wala sing duhaduha nga luyag mo ilugon ang mapisan nga mga ulipon sa parabola ni Jesus kag makigbahin sing bug-os tubtob sa imo masarangan sa paghimo-disipulo nga hilikuton. Apang, ano abi kon ang imo kahimtangan nagaupang sa imo? Ayhan bangod sa kapigaduhon kinahanglan mo mag-obra sing madamo nga oras agod maaman ang kinahanglanon sang imo pamilya. Ukon ayhan naglipas na ang kusog sang imo pagkapamatan-on ukon nadula na ang imo kapagros. Kon amo sina ang imo kahimtangan, ang parabola sang mga talanton may makapalig-on nga mensahe para sa imo.

10. Paano nagpakita sing pagkamakatarunganon ang agalon sa parabola sang mga talanton, kag ngaa makapalig-on ini?

 ¹⁰ Talupangda nga nahibaluan sang agalon sa parabola ang nanuhaytuhay nga potensial sang iya mga ulipon. Ginpakita niya ini sang ginhatagan niya sila sing talanton “suno sa [ila] ikasarang.” (Mat. 25:15) Ang una nga ulipon nagpatubas sing mas madamo nga talanton sangsa ikaduha nga ulipon, suno sa kon ano ang ginapaabot sa iya. Apang, ginpabaloran sang agalon ang kapisan sang duha ka ulipon paagi sa pagtawag sa ila nga “maayo kag matutom” nga ulipon kag paagi sa paghatag sa ila sing pareho nga padya. (Mat. 25:21, 23) Sing kaanggid, nahibaluan sang Agalon sang alanyon, si Jehova nga Dios, nga ang imo mahimo sa pag-alagad sa iya nagadepende sa imo kahimtangan. Indi gid niya pagkalimtan ang imo bug-os kalag nga mga panikasog nga alagaron sia kag padyaan ka gid niya.—Mar. 14:3-9; basaha ang Lucas 21:1-4.

11. Maghatag sing halimbawa kon paano ang mga kabudlayan mahimo magresulta sa mga pagpakamaayo.

¹¹ Ang halimbawa ni Selmira, isa ka utod nga taga-Brazil, nagapakita nga ang kapisan sa pag-alagad sa Dios wala nagadepende sa maayo nga kahimtangan sa kabuhi. Beinte ka tuig na ang nagligad, ang bana ni Selmira natiruhan sang mga kawatan, kag sia na lang ang nagpadaku sa ila tatlo ka magagmay nga kabataan. Nagatrabaho sia subong timbang sa bug-os nga adlaw kag nagapanagil-ot sa de-pasahero nga salakyan pakadto-pauli. Walay sapayan sining mga kabudlayan, gin-organisar niya ang iya hilikuton agod makaalagad sia subong regular payunir. Sang ulihi, ang duha niya ka bata nagpayunir man upod sa iya. “Sa nagligad nga mga tinuig, kapin sa 20 ka tawo nga nagtuon sa Biblia upod sa akon ang nangin katapo sang akon ‘pamilya,’” siling niya. “Tubtob subong, nabatyagan ko ang ila pagpalangga kag nangin suod ko sila nga mga abyan. Isa ini ka manggad nga indi mabakal sang kuarta.” Huo, ang kapisan ni Selmira ginpadyaan sang Agalon sang alanyon!

12. Paano mo mapakita ang kapisan sa pagbantala nga hilikuton?

¹² Kon limitado na lang karon ang imo mahimo sa ministeryo bangod sa imo kahimtangan, madugangan mo gihapon ang imo pagpakigbahin sa pag-ani nga hilikuton kon himuon mo nga mabungahon ang imo pagministeryo. Kon iaplikar mo sing maayo ang praktikal nga mga panugda nga ginapresentar sa Miting sa Serbisyo kada semana, mapauswag mo ang imo kalantip sa pagbantala kag matilawan ang iban pa nga pamaagi sa pagpanaksi. (2 Tim. 2:15) Kag kon posible, ngaa indi mo pag-untatan ang paghinguyang sing tion sa indi tanto ka importante nga mga hilikuton agod masakdag mo sing regular ang mga kahimusan sang kongregasyon sa pag-alagad sa latagon?—Col. 4:5.

13. Ano ang yabi sa pagpalambo kag paghupot sing kapisan?

¹³ Dumduma nga ang kapisan nagagikan sa isa ka mainapresyahon nga tagipusuon. (Sal. 40:8) Ang ikatlo nga ulipon sa parabola ni Jesus nahadlok sa iya agalon, kag ginatamod sia subong mabudlay pahamut-an kag indi makatarunganon nga tawo. Gani, sa baylo nga padamuon ang mga pagkabutang sang iya agalon, ginlubong sang ulipon ang iya talanton. Agod malikawan naton ini nga panimuot, dapat naton palambuon kag huptan ang suod nga kaangtanan kay Jehova, ang Agalon sang alanyon. Magpain kita sing tion sa pagtuon kag sa pagpamalandong sa iya matahom nga mga kinaiya—ang iya gugma, pagkamapinasensiahon, kag pagkamaluluy-on. Sa amo, pahulagon ka sang imo tagipusuon nga himuon ang imo bug-os nga masarangan sa pag-alagad sa iya.—Luc. 6:45; Fil. 1:9-11.

“Dapat Kamo Mangin Balaan”

14. Anong importante nga butang ang ginapatuman sa mga luyag mangin mangangani?

¹⁴ Paagi sa pagkutlo sang Hebreong Kasulatan, ginsaysay ni apostol Pedro kon ano ang kabubut-on sang Dios para sa iya mga alagad sa duta: “Nahisuno sa Isa nga Balaan nga nagtawag sa inyo, mangin balaan man kamo sa tanan ninyo nga paggawi, bangod nasulat na: ‘Dapat kamo mangin balaan, bangod ako balaan.’” (1 Ped. 1:15, 16; Lev. 19:2; Deut. 18:13) Ginapakita sini nga pinamulong nga ang mga mangangani dapat gid mangin matinlo sa moral kag sa espirituwal. Matuman naton ina kon maghimo kita sing mga tikang nga mahugasan sa malaragwayon nga paagi. Paano naton ina mahimo? Paagi sa bulig sang kamatuoran sa pulong sang Dios.

15. Ano ang sarang mahimo sang kamatuoran sang pulong sang Dios para sa aton?

 ¹⁵ Ang kamatuoran sa pulong sang Dios ginapaanggid sa tubig nga nagatinlo. Halimbawa, si apostol Pablo nagsulat nga ang kongregasyon sang hinaplas nga mga Cristiano matinlo sa panulok sang Dios, kaangay sang putli nga nobya para kay Cristo, nga nagtinlo sini “sa paghugas sa tubig paagi sa pulong, . . . agod mangin balaan ini kag wala sing depekto.” (Efe. 5:25-27) Antes sini, ginsambit ni Jesus nga ang pulong sang Dios nga iya ginbantala may gahom sa pagtinlo. Sang nagpakigsugilanon sia sa iya mga disipulo, si Jesus nagsiling: “Matinlo na kamo bangod sang pulong nga akon nahambal sa inyo.” (Juan 15:3) Gani, ang kamatuoran sang pulong sang Dios may gahom sa pagtinlo sa moral kag sa espirituwal. Mangin kahalamut-an lamang sa Dios ang aton pagsimba kon tugutan naton ang kamatuoran sang Dios nga magtinlo sa aton sa sining paagi.

16. Paano kita makapabilin nga matinlo sa espirituwal kag sa moral?

¹⁶ Gani, agod mangin kalipikado kita nga mangangani sang Dios, dapat nga wala na kita nagahimo sing mga buhat nga makahigko sa aton sa moral kag sa espirituwal. Huo, agod makapabilin kita nga kalipikado sa sining pribilehiyo subong mangangani, dapat nga mangin huwaran kita sa pagsakdag sa mataas nga mga talaksan ni Jehova sa moral kag sa espirituwal. (Basaha ang 1 Pedro 1:14-16.) Kon paano nga ginakabalak-an naton ang aton pisikal nga katinlo, dapat man kita regular nga magpaidalom sa nagatinlo nga impluwensia sang kamatuoran sa pulong sang Dios. Nalakip sa sini ang pagbasa sang Biblia kag pagtambong sa Cristianong mga miting. Nagakahulugan man ini sang hanuot nga pagpanikasog nga iaplikar ang mga pahanumdom sang Dios sa aton kabuhi. Ang paghimo sini makabulig sa aton nga mabatuan ang aton makasasala nga mga huyog kag mapamatukan ang makapahigko nga mga impluwensia sa sining kalibutan. (Sal. 119:9; Sant. 1:21-25) Huo, makalilipay gid mahibaluan nga paagi sa bulig sang kamatuoran sa pulong sang Dios, ‘mahugasan kita’ bisan sa mabug-at nga mga sala!—1 Cor. 6:9-11.

17. Agod makapabilin kita nga matinlo, ano nga laygay sang Biblia ang dapat naton tumanon?

¹⁷ Ginabaton mo bala ang nagatinlo nga impluwensia sang kamatuoran sa pulong sang Dios sa imo kabuhi? Halimbawa, ano ang imo reaksion kon ginapaandaman ka tuhoy sa katalagman sang di-maayo nga mga kalingawan sa sining kalibutan? (Sal. 101:3) Ginalikawan mo bala ang indi kinahanglanon nga pagpakig-upod sa imo mga kaeskwela kag mga katrabaho nga indi pareho ang pagpati sa imo? (1 Cor. 15:33) Sinsero gid bala ang imo panikasog nga malandas ang mga kaluyahon nga makapahigko sa imo sa mga mata ni Jehova? (Col. 3:5) Nagapabilin ka bala nga napain sa mga isyu sa pulitika sining kalibutan kag sa nasyonalistiko nga espiritu nga makita sa madamo nga isport?—Sant. 4:4.

18. Paano ang katinlo sa moral kag sa espirituwal makabulig sa aton nga mangin mabungahon nga mga mangangani?

¹⁸ Ang imo pagkamatinumanon sa sini nga mga butang may maayo gid nga mga resulta. Sang ginpaanggid ni Jesus ang iya hinaplas nga mga disipulo sa mga sanga sang puno sang ubas, nagsiling sia: “Ang tagsa ka sanga nga yara sa akon nga wala nagapamunga ginautod niya, kag ang tagsa ka sanga nga nagapamunga ginatinluan niya, agod magpamunga ini sing madamo pa.” (Juan 15:2) Samtang nagapaidalom ka sa nagatinlo nga impluwensia sang tubig sang kamatuoran sa Biblia, makapatubas ka sing mas madamo nga bunga.

Mga Pagpakamaayo Karon kag sa Palaabuton

19. Paano ginpakamaayo ni Jesus ang mga panikasog sang iya mga disipulo subong mga mangangani?

¹⁹ Gintuman sang matutom nga mga disipulo  ni Jesus ang iya mga panudlo. Sang Pentecostes 33 C.E, ginpabaskog sila sang balaan nga espiritu agod mangin mga saksi “tubtob sa ukbong sang duta.” (Binu. 1:8) Nangin mga katapo sila sang nagadumala nga hubon, mga misyonero, kag nagalakbay nga mga gulang, kag daku ang ila papel sa pagbantala sang maayong balita “sa tanan nga tinuga sa idalom sang langit.” (Col. 1:23) Daw ano nga mga pagpakamaayo ang ila naagom, kag daw ano nga kalipay ang nahatag nila sa iban!

20. (a) Ano nga mga pagpakamaayo ang imo nabaton sa pagpakigbahin sing bug-os sa espirituwal nga pag-ani? (b) Ano ang imo determinado nga himuon?

²⁰ Huo, paagi sa pagpakita sing pagkamapainubuson, kapisan, kag pagsakdag sa mataas nga talaksan sang Pulong sang Dios, padayon kita nga makapakigbahin sing bug-os kag sing epektibo sa dakung espirituwal nga pag-ani karon. Samtang madamo ang nagaantos sing kasakit kag kapaslawan sa sining materyalistiko kag mahuyugon sa kalipay nga kalibutan, nagaagom kita sing matuod nga kalipay kag pagkakontento. (Sal. 126:6) Labaw sa tanan, ang aton “pagpangabudlay may kaangtanan sa Ginuo indi wala sing pulos.” (1 Cor. 15:58) Ang Agalon sang alanyon, si Jehova nga Dios, magahatag sa aton sing walay katapusan nga mga pagpakamaayo bangod sa ‘binuhatan kag gugma nga aton ginpakita para sa iya ngalan.’—Heb. 6:10-12.

[Nota]

Madumduman Mo Bala?

Samtang nagapanikasog ka nga makigbahin sing bug-os sa pag-ani . . .

• ngaa importante ang pagkamapainubuson?

• paano mo mapalambo kag mahuptan ang kapisan?

• ngaa importante ang pagpabilin nga matinlo sa moral kag sa espirituwal?

[Mga Pamangkot sa Pagtinuon]

[Retrato sa pahina 17]

Kon mapainubuson kita, magakabuhi kita sing simple kag magakonsentrar sa mga intereses sang Ginharian