Magdiretso sa kaundan

Magdiretso sa listahan sang kaundan

Ang Pagkaalisto Nagadul-ong sa Maayo nga mga Resulta

Ang Pagkaalisto Nagadul-ong sa Maayo nga mga Resulta

 Ang Pagkaalisto Nagadul-ong sa Maayo nga mga Resulta

ALISTO ka bala sa pagpanaksi sa inyo teritoryo sa mga kahigayunan nga wala ginapaabot? Amo sini ang ginhimo sang mga kauturan sa maragtason nga pantalan sa siudad sang Turku, Finland kag ang ila pagkaalisto nagdul-ong sa maayo nga mga resulta.

Isa ka bes, natalupangdan sang mga kauturan sa Turku nga nag-abot sa ila lugar ang isa ka grupo sang mga lalaki nga taga-Asia agod tapuson ang pag-obra sang daku nga cruise ship sa pantalan. Sang ulihi, nahibaluan sang isa ka utod nga lalaki kon sa diin nga mga hotel nagadayon ining mga dumuluong. Nahibaluan man niya nga aga pa sila ginasugat sang bus sa ila mga dalayunan pakadto sa pantalan. Gani, ginpahibalo niya ini gilayon sa mga kauturan sa Ingles nga kongregasyon sa Turku.

Nakita sang mga gulang sa sina nga kongregasyon nga ang pag-abot sang madamo nga dumuluong naghatag sa ila sing kahigayunan nga ipaambit ang mensahe sang Ginharian sa sini nga mga tawo, kag naghimo sila gilayon sing kahimusan para sa pinasahi nga kampanya. Pagka-Domingo sina nga semana, alas siete pa lang sang aga, ang pulo ka utod nagkadto na malapit sa ginadulugan sang bus. Sang primero, wala sila sing nakita bisan isa. ‘Ano naulihi kita?’ pamangkot sang mga utod. ‘Basi wala na sila diri sa Turku?’ Apang, may isa nga nag-abot nga nakauniporme para sa trabaho. May isa pa nga nagasunod sa iya, kag may iban pa nga nagapadulong. Wala madugay, madamo na nga trabahador ang nagtililipon malapit sa ginadulugan sang bus. Ginbantalaan sila sang mga kauturan kag gintanyagan sang Ingles nga mga publikasyon. Maayo na lang kay mga isa ka oras pa kag nakasakay sa mga bus ang tanan nga trabahador amo nga may bastante nga tion ang mga kauturan para mabantalaan sila. Nakapahamtang sa ila ang mga kauturan sing 126 ka bukleta kag 329 ka magasin!

Ining maayo nga mga resulta nagpalig-on sa mga kauturan nga suliton ining kampanya pagkasunod nga semana, sa tion sang pagbisita sang manugtatap sang sirkito. Sina nga adlaw, mga 6:30 pa lang sang aga, gindumalahan sang manugtatap sang sirkito ang miting para sa pagua sa latagon. Bisan pa nagaulan, 24 ka utod ang nagkadto sa ginadulugan sang bus. Nagdala na sila sang Tagalog nga mga literatura bangod nakita nila nga madamo sa mga dumuluong ang naghalin sa Pilipinas. Sina nga aga, antes makahalin ang mga trabahador sa pantalan, 7 ka libro, 69 ka bukleta, kag 479 ka magasin ang napahamtang sang mga kauturan sa ila. Handurawa ang kalipay nga nabatyagan sang mga kauturan nga nakigbahin sa sining kampanya!

Antes nakapauli ang mga trabahador sa ila mga pungsod, madamo sa ila ang nabisitahan sang mga kauturan sa mga hotel nga ila ginadayunan kag nahatagan sing dugang nga panaksi tuhoy sa Ginharian. Ang iban sa ila nagsiling nga nakaistorya na sila sa mga Saksi sang didto pa sila sa iban nga pungsod. Nagpasalamat gid sila sa panikasog sang mga kauturan nga mabantalaan sila samtang yara sila sa Finland.

Alisto ka man bala sa mga kahigayunan nga wala ginapaabot? Nagapanikasog ka man bala nga mapanaksihan ang mga tawo nga tuhay ang kultura? Kon amo, mahimo nga nabatyagan mo man ang kalipay nga nabatyagan sang mga kauturan sa Turku.

[Mapa/Retrato sa pahina 32]

(Para sa aktual nga pormat, tan-awa ang publikasyon)

FINLAND

HELSINKI

Turku

[Retrato sa pahina 32]

STX Europe