Magdiretso sa kaundan

Magdiretso sa listahan sang kaundan

“Ang Dios Gugma”

“Ang Dios Gugma”

 “Ang Dios Gugma”

“Sia nga wala nagahigugma wala makakilala sa Dios, bangod ang Dios gugma.”​—⁠1 JUAN 4:8.

1-3. (a) Ano ang ginasiling sang Biblia tuhoy sa kinaiya ni Jehova nga gugma, kag sa ano nga paagi pinasahi ini nga pinamulong? (b) Ngaa nagasiling ang Biblia nga “ang Dios gugma”?

ANG tanan nga kinaiya ni Jehova di-matupungan, himpit, kag makagalanyat. Apang ang labi gid ka makagalanyat sa tanan nga kinaiya ni Jehova amo ang gugma. Wala na sing liwan pa nga nagaganyat gid sa aton kay Jehova kundi ang iya gugma. Makalilipay nga ang gugma amo man ang iya nagapangibabaw nga kinaiya. Paano naton nahibaluan ini?

2 May ginsiling ang Biblia tuhoy sa gugma nga wala gid sini ginasiling tuhoy sa iban pa nga pangunang mga kinaiya ni Jehova. Ang Biblia wala nagasiling nga ang Dios gahom ukon nga ang Dios katarungan ukon nga ang Dios kaalam pa gani. Nagapanag-iya sia sini nga mga kinaiya kag sia gid ang ginhalinan sining tatlo ka kinaiya. Apang, tuhoy sa gugma, mas madalom ang ginsiling sa 1 Juan 4:⁠8: “Ang Dios gugma.” Huo, ang gugma isa gid ka importante nga bahin sang personalidad ni Jehova. Amo ini ang iya kinaugali. Sa kabilugan nga paghambal, mahimo nga subong sini ang hunahunaon naton: Ang gahom ni Jehova nagabulig sa iya sa paghikot. Ang iya katarungan kag ang iya kaalam nagatuytoy sa iya paghikot. Apang, ang gugma ni Jehova nagapahulag sa iya sa paghikot. Kag ang iya iban pa nga mga kinaiya pirme ginapakita nga may gugma.

3 Masami ginasiling nga si Jehova amo gid ang personipikasyon sang gugma. Gani, kon luyag naton makatuon tuhoy sa gugma, dapat kita magtuon tuhoy kay Jehova. Kon amo, usisaon naton ang pila ka kinaiya sang di-matupungan nga gugma ni Jehova.

 Ang Labing Daku nga Buhat sang Gugma

4, 5. (a) Ano ang labing daku nga buhat sang gugma sa bug-os nga maragtas? (b) Ngaa makasiling kita nga si Jehova kag ang iya Anak nahiusa sa pinakamabakod gid nga higot sang gugma?

4 Si Jehova nagpakita sing gugma sa madamo nga paagi, apang may isa nga tumalagsahon gid sa tanan. Ano ini? Amo ang pagpadala niya sa iya Anak agod mag-antos kag mapatay tungod sa aton. Makasiling gid kita nga amo ini ang labing daku nga buhat sang gugma sa bug-os nga maragtas. Ngaa makasiling kita sini?

5 Ang Biblia nagatawag kay Jesus nga “panganay sa tanan nga tinuga.” (Colosas 1:15) Hunahunaa lamang​—⁠ang Anak ni Jehova nagkabuhi sa wala pa ang pisikal nga uniberso. Kon amo, daw ano kadugay magkaupod ang Amay kag ang Anak? Ginabanta sang pila ka sientipiko nga ang uniberso 13 bilyones anyos na. Apang, bisan pa husto ini nga pagbanta, malip-ot lamang ini sa paglaragway kon daw ano kadugay nagkabuhi ang panganay nga Anak ni Jehova! Ano ang ginhimo niya sa sini nga mga dag-on? Ang Anak malipayon nga nag-alagad subong “batid nga manugpangabudlay” sang iya Amay. (Hulubaton 8:30; Juan 1:⁠3) Si Jehova kag ang iya Anak magkaupod nga nagpangabudlay sa pagtuga sa tanan iban pa nga mga butang. Makakulunyag kag makalilipay gid ang ila pag-updanay! Kon amo, sin-o sa aton ang makahangop sing bug-os sa gahom sang isa ka higot nga nagluntad sa amo kadugay nga tion? Maathag nga si Jehova nga Dios kag ang iya Anak nahiusa sa pinakamabakod gid nga higot sang gugma.

6. Sang nabawtismuhan si Jesus, paano ginpabutyag ni Jehova ang iya balatyagon tuhoy sa Iya Anak?

6 Walay sapayan sini, ginpadala ni Jehova ang iya Anak sa duta agod matawo subong isa ka tawhanon nga lapsag. Nagakahulugan ini nga sa kapin sa tatlo ka dekada, ginkalimtan ni Jehova ang suod nga pagpakig-upod sa iya hinigugma nga Anak sa langit. May daku nga interes nga gintan-aw Niya gikan sa langit ang pagdaku ni Jesus subong isa ka himpit nga tawo. Sa edad nga mga 30 anyos, si Jesus nagpabawtismo. Sadto nga okasyon ang Amay personal nga nagpamulong halin sa langit: “Ini ang akon Anak, ang hinigugma, nga ginakahamut-an ko.” (Mateo 3:17) Mahimo nga nalipay gid ang iya Amay nga makita nga matutom nga gintuman ni Jesus ang tanan nga gintagna, ang tanan nga ginpahimo sa iya!​—⁠Juan 5:36; 17:4.

7, 8. (a) Ano ang naagihan ni Jesus sang Nisan 14, 33 C.⁠E., kag paano naapektuhan ang iya langitnon nga Amay? (b) Ngaa gintugutan ni Jehova ang iya Anak nga mag-antos kag mapatay?

 7 Apang, ano ang ginbatyag ni Jehova sang Nisan 14, 33 C.⁠E., sang si Jesus ginluiban kag nian gindakop sang akig nga guban? Sang si Jesus ginyaguta, ginduplaan, kag ginsumbag? Sang sia ginsakit, napilasan sing tuman ang likod? Sang sia ginlansang, sa kamot kag tiil, sa isa ka kahoy nga poste kag ginpabay-an nga nagakabit didto samtang ginatamay sia sang mga tawo? Ano ang ginbatyag sang Amay samtang ang iya hinigugma nga Anak nagtuaw sa iya sa tuman nga kasakit? Ano ang ginbatyag ni Jehova sang nahunusan sing ginhawa si Jesus kag, sa nahauna nga tion kutob sa panugod sang tanan nga pagpanuga, ang Iya pinalangga nga Anak napatay?​—⁠Mateo 26:14-​16, 46, 47, 56, 59, 67; 27:​26, 38-​44, 46; Juan 19:1.

8 Sanglit si Jehova may balatyagon, ang kasakit nga ginbatyag niya bangod sa pagkapatay sang iya Anak indi gid mapabutyag paagi sa aton mga hambal. Ang mapabutyag lamang amo ang motibo ni Jehova kon ngaa gintugutan niya ini nga matabo. Ngaa gintugutan sang Amay ang iya kaugalingon nga mag-antos sini nga kasakit? Ginapahayag ni Jehova ang butang nga dalayawon gid para sa aton sa Juan 3:16​—⁠isa ka bersikulo sa Biblia nga tuman ka importante amo kon ngaa ginatawag ini nga gamay nga Ebanghelyo. Ini nagasiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan.” Gani ang motibo sang Dios amo ang gugma. Wala sing gugma nga ginpakita nga labaw pa sa sini.

Kon Paano si Jehova Nagapasalig sa Aton sang Iya Gugma

9. Ano ang luyag ni Satanas nga patihan naton tuhoy sa pagtamod ni Jehova sa aton, apang ano ang ginapasalig ni Jehova sa aton?

9 Apang, isa ka importante nga pamangkot ang nagautwas: Ginahigugma bala kita sang Dios subong indibiduwal? Ang iban mahimo magaugyon nga ginahigugma sang Dios ang katawhan sa kabilugan, subong sang ginasiling sa Juan 3:16. Apang, nagasiling sila, ‘Indi gid ako mahigugma sang Dios subong indibiduwal.’ Ang matuod, luyag gid ni Satanas nga Yawa nga papatihon kita nga wala kita ginahigugma ukon ginapabaloran ni Jehova. Sa pihak nga bahin, bisan pa mahimo batyagon naton nga wala kita ginahigugma ukon walay pulos, ginapasalig kita ni Jehova nga ginapabaloran niya ang tagsatagsa sang iya matutom nga mga alagad.

10, 11. Paano ginapakita sang ilustrasyon ni Jesus tuhoy sa mga maya nga may balor kita sa mata ni Jehova?

10 Halimbawa, binagbinaga ang ginsiling ni Jesus sa Mateo 10:29-31. Agod ilaragway ang balor sang iya mga disipulo, si Jesus nagsiling: “Wala bala ginabaligya ang duha ka maya sa isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Apang bisan ang mga buhok sa inyo ulo naisip na tanan. Busa dili kamo mahadlok: mahal pa kamo sa madamo nga maya.” Binagbinaga kon ano ang kahulugan sining mga pulong sa mga tagpalamati ni Jesus sang unang siglo.

11 Sang adlaw ni Jesus, ang maya amo ang pinakabarato nga pispis nga ginakaon. Ang isa ka sensilyo nga may diutay nga balor makabakal sing duha ka maya. Apang nagsiling si Jesus sang ulihi, suno sa Lucas 12:​6, 7, nga kon duha ka sensilyo ang ibayad sang isa ka tawo, makatigayon sia sing lima sa baylo sang apat lamang ka maya. Ang isa ka pispis ginapaaman nga daw wala sing balor. Mahimo nga ini nga mga pispis daw wala sing balor sa mata sang tawo, apang paano sila gintamod sang Manunuga? Si Jesus nagsiling: “Wala sing isa sa ila [bisan ang paaman] ang nalipatan sa atubangan sang Dios.” Mahimo nga nahangpan na naton karon ang punto ni Jesus. Sanglit ginapabaloran  ni Jehova ang isa ka maya, daw ano ka daku pa ang balor sang isa ka tawo! Subong sang ginsiling ni Jesus, nahibaluan ni Jehova ang tagsa ka detalye tuhoy sa aton. Bisan gani ang mga buhok sang aton ulo naisip!

12. Ngaa makapat-od kita nga si Jesus realistiko sang nagsiling sia tuhoy sa pag-isip sa mga buhok sa aton ulo?

12 Mahimo magasiling ang iban nga ginpasobrahan ini ni Jesus. Apang, hunahunaa lamang ang pagkabanhaw. Pat-od nga kilala gid kita ni Jehova agod nga matuga niya kita liwat! Ginapabaloran niya kita sing tuman amo nga madumduman niya ang aton tagsa ka detalye, lakip ang aton masibod nga genetic code kag ang aton tanan nga tinuig sang memorya kag mga eksperiensia. Ang pag-isip sa aton mga buhok​—⁠nga sa promedyo may kadamuon nga 100,000⁠​—⁠mangin simple lamang buhaton kon ipaanggid. Daw ano katahom nga nagapasalig sa aton ang mga pulong ni Jesus nga si Jehova nagaulikid sa aton subong mga indibiduwal!

13. Paano ginapakita sang halimbawa ni Hari Jehosapat nga ginapangita ni Jehova kon ano ang aton maayo nga kinaiya bisan pa di-himpit kita?

13 May butang pa nga ginapakita ang Biblia nga nagapasalig sa aton sang gugma ni Jehova. Ginapangita niya kag ginapabaloran kon ano ang aton maayo nga kinaiya. Binagbinaga, halimbawa, ang maayo nga si Hari Jehosapat. Sang nakahimo ang hari sing isa ka binuang nga buhat, ang manalagna ni Jehova nagsiling sa iya: “Bangod sini ang kasingkal yara sa imo gikan kay Jehova mismo.” Makapasubo gid! Apang ang mensahe ni Jehova wala matapos didto. Ini nagsiling: “Walay sapayan, may maayo nga mga butang nga nakita sa imo.” (2 Cronica 19:​1-3) Gani ang matarong nga kaakig ni Jehova wala magpugong sa iya nga makita ang “maayo nga mga butang” kay Jehosapat. Indi bala makapasalig mahibaluan nga ginapangita sang aton Dios kon ano ang aton maayo nga kinaiya bisan pa di-himpit kita?

Isa ka Dios nga “Handa Magpatawad”

14. Kon makasala kita, anong nagapabug-at nga mga balatyagon ang mahimo naton maeksperiensiahan, apang paano kita makabenepisyo sa pagpatawad ni Jehova?

14 Kon makasala kita, ang kapaslawan, kahuya, kag natublag nga konsiensia nga ginabatyag naton magapahunahuna sa aton nga indi gid kita takus nga mag-alagad kay Jehova. Apang, dumduma nga si Jehova “handa magpatawad.” (Salmo 86:⁠5) Huo, kon hinulsulan naton ang aton mga sala kag magpanikasog nga indi ini paghimuon liwat, makabenepisyo kita sa pagpatawad ni Jehova. Binagbinaga kon paano ginalaragway sang Biblia ining dalayawon nga bahin sang gugma ni Jehova.

15. Daw ano kalayo ginadala ni Jehova ang aton mga sala?

15 Naggamit si salmista David sing maathag nga ekspresyon agod ilaragway ang pagpatawad ni Jehova: “Subong sang kalayuon sang sidlangan sa katundan, subong sini kalayo nga ginkuha Niya ang aton mga kalapasan gikan sa aton.” (Italiko amon; Salmo 103:​12, The Amplified Bible) Daw ano kalayo ang sidlangan gikan sa katundan? Sa isa ka kahulugan, ang sidlangan amo pirme ang pinakamalayo nga distansia gikan sa katundan; wala gid ini nagatabuay. Ang isa ka iskolar nagsiling nga ini nga ekspresyon nagakahulugan sing “tubtob sa pinakamalayo; tubtob sa pinakamalayo nga mahanduraw naton.” Ginasugiran kita sang inspirado nga mga pulong ni David nga kon nagapatawad si Jehova, ginadala niya ang aton mga sala sa pinakamalayo nga mahanduraw naton.

16. Kon ginapatawad ni Jehova ang aton mga sala, ngaa makasalig kita nga matinlo ang pagtamod niya sa aton pagkatapos sini?

16 Natilawan mo na bala nga kuhaon ang mantsa gikan sa malus-aw sing duag nga bayo? Ayhan walay sapayan sang imo daku gid nga pagtinguha, bal-anon gihapon ang mantsa. Talupangda kon paano ginalaragway ni Jehova ang iya ikasarang sa pagpatawad: “Bisan pa ang inyo mga sala subong sang iskarlata, papution ini subong sang niebe; bisan pa mapula ini subong sang tela nga krimson, mangin subong ini sang delana.” (Isaias 1:18) Ang tinaga nga “iskarlata” nagapahangop sing masili nga pula nga duag.⁠ * Ang “krimson” isa sang madukot nga mga duag sang nalugom nga materyal. Bisan ano man ang himuon naton, indi gid naton makuha ang mantsa sang sala. Apang, ang mga sala nga kaangay sang iskarlata kag krimson sarang mapaputi ni Jehova kaangay sang niebe ukon wala malugom nga delana. Gani kon ginapatawad ni Jehova ang aton mga sala, indi kita dapat magbatyag nga ang mantsa sini nga mga sala indi makuha sa aton bug-os nga kabuhi.

17. Sa ano nga kahulugan ginapilak ni Jehova ang aton mga sala sa likod niya?

 17 Sa isa ka makatalandog nga ambahanon sang pagpasalamat nga ginkomposo ni Ezequias sa tapos sia ginluwas gikan sa isa ka makamamatay nga balatian, nagsiling sia kay Jehova: “Ginpilak mo sa imo likod ang tanan nakon nga sala.” (Isaias 38:17) Ginalaragway diri si Jehova nga ginakuha niya ang mga sala sang isa ka mahinulsulon nga nakasala kag ginapilak ini sa likod Niya diin indi na Niya makita ukon matalupangdan ini. Suno sa isa ka reperensia, mahimo nga ang ideya nga ginapaalinton amo: “Ginhimo mo [ang akon mga sala] subong nga daw wala ini matabo.” Indi bala makalulugpay ini?

18. Paano ginapakita ni manalagna Miqueas nga kon magpatawad si Jehova, ginakuha Niya ang aton mga sala sing permanente?

18 Sa saad tuhoy sa pagpasag-uli, ginpabutyag ni manalagna Miqueas ang iya pagsalig nga patawaron ni Jehova ang iya mahinulsulon nga katawhan: “Sin-o ang Dios nga kaangay mo, nga . . . nagapaligad sang paglapas sang nagkalabilin sa iya palanublion? . . . Kag itagbong mo sa kadadalman sang dagat ang tanan nila nga sala.” (Miqueas 7:​18, 19) Handurawa kon ano ang buot silingon sining mga pulong sa mga nagakabuhi sang panahon sang Biblia. Posible pa bala nga makuha liwat ang butang nga gintagbong “sa kadadalman sang dagat”? Sa amo, ginapakita sang mga pulong ni Miqueas nga kon magpatawad si Jehova, ginakuha niya ang aton mga sala sing permanente.

“Ang Malum-ok nga Kaawa Sang Aton Dios”

19, 20. (a) Ano ang kahulugan sang Hebreong tinaga nga ginbadbad “magpakita sing kaluoy” ukon “magkaluoy”? (b) Paano ginagamit sang Biblia ang balatyagon sang isa ka iloy para sa iya lapsag agod tudluan kita tuhoy sa kaawa ni Jehova?

19 Ang kaawa isa pa ka bahin sang gugma ni Jehova. Ano ang kaawa? Sa Biblia, may suod nga kaangtanan ang kaawa kag kaluoy. May pila ka Hebreo kag Griegong tinaga nga nagapaalinton sang ideya sang kaawa. Halimbawa, ang Hebreong tinaga nga ra·chamʹ masami ginabadbad “magpakita sing kaluoy” ukon “magkaluoy.” Ining Hebreong termino, nga ginaaplikar ni Jehova sa iya kaugalingon, naangot sa tinaga para sa “taguangkan” kag sarang malaragway subong “iloynon nga kaawa.”

20 Ginagamit sang Biblia ang balatyagon sang isa ka iloy para sa iya bata agod tudluan kita sang kahulugan sang kaawa ni Jehova. Ang Isaias 49:15 nagasiling: “Malimtan bala sang isa ka babayi ang iya ginapasuso nga anak, amo nga indi sia magkaawa [ra·chamʹ] sa anak sang iya taguangkan? Huo, mahimo nga malipat sila, apang indi ako malipat sa imo.” (The Amplified Bible) Mabudlay hunahunaon nga ang iloy malipat sa pagbatiti kag sa pag-atipan sa iya ginapatiti pa nga anak. Kay man, ang isa ka lapsag wala sing mahimo; sa adlaw kag gab-i kinahanglan sang bata ang igtalupangod sang iya iloy. Apang, makapasubo nga may yara mapinatumbayaon nga mga iloy, ilabi na sa sining “makahalanguyos nga mga tion.” (2 Timoteo 3:​1, 3) “Apang,” siling ni Jehova, “indi ako malipat sa imo.” Ang malum-ok nga kaawa ni Jehova para sa iya mga alagad  mas mabaskog sangsa labing malum-ok nga kinaugali nga balatyagon nga mahanduraw naton​—⁠ang kaawa nga normal nga ginabatyag sang isa ka iloy para sa iya lapsag.

21, 22. Ano ang naeksperiensiahan sang mga Israelinhon sa dumaan nga Egipto, kag ano ang ginhimo ni Jehova sa ila mga pagtuaw nga nagapangayo sing bulig?

21 Paano ginapakita ni Jehova, kaangay sang isa ka mahigugmaon nga ginikanan, ang kaawa? Ini nga kinaiya maathag nga makita sa iya pagpakig-angot sa pungsod sang Israel. Sang nagahingapos ang ika-16 nga siglo B.⁠C.⁠E., minilyon ka Israelinhon ang naulipon sa Egipto, diin ginpigos gid sila. (Exodo 1:​11, 14) Sa ila kapiot, nagtuaw ang mga Israelinhon kay Jehova nga nagapangayo sing bulig. Ano ang ginhimo sang Dios nga may malum-ok nga kaawa?

22 Natandog ang tagipusuon ni Jehova. Sia nagsiling: “Nakita ko ang kapipit-an sang akon katawhan nga yara sa Egipto, kag nabatian ko ang ila pagtuaw . . . Nahibaluan ko gid ang kasakit nga ila ginaantos.” (Exodo 3:⁠7) Indi makita ni Jehova ang pag-antos sang iya katawhan ukon mabatian ang ila mga pagtuaw kon indi niya pagbatyagon ini. Si Jehova isa ka Dios nga may kahanuklog. Kag ang kahanuklog​—⁠ang ikasarang nga mabatyagan man ang ginaantos sang iban​—⁠naangot gid sa kaawa. Apang, wala lamang ginbatyag ni Jehova ang pag-antos sang iya katawhan; napahulag sia nga maghikot para sa ila. Ang Isaias 63:⁠9 nagasiling: “Sa iya gugma kag sa iya kaawa gintubos niya sila.” Paagi sa “makusog nga kamot,” ginluwas ni Jehova ang mga Israelinhon gikan sa Egipto. (Deuteronomio 4:34) Pagkatapos sadto, gin-amanan niya sila sing milagruso nga pagkaon kag ginluwas sila padulong sa ila mabungahon nga duta.

23. (a) Paano ang mga pulong sang salmista nagapasalig sa aton nga si Jehova nabalaka gid sa aton subong mga indibiduwal? (b) Sa anong mga paagi nagabulig si Jehova sa aton?

23 Indi lamang nagpakita si Jehova sing kaawa sa iya katawhan subong isa ka grupo. Daku man ang kabalaka sang aton mahigugmaon nga Dios sa aton subong mga indibiduwal. Nahibaluan gid niya ang bisan ano nga ginaantos naton. Ang salmista nagsulat: “Ang mga mata ni Jehova nagatulok sa mga matarong, kag ang iya mga igdulungog bukas sa ila pagpangayo sing bulig. Si Jehova malapit sa mga buong sing tagipusuon; kag ginaluwas niya ang mga nadugmok sa espiritu.” (Salmo 34:​15, 18) Paano si Jehova nagabulig sa aton subong mga indibiduwal? Indi buot silingon nga ginakuha niya ang kabangdanan sang aton pag-antos. Apang madamo sing gin-aman si Jehova para sa mga nagatuaw sa iya nga nagapangayo sing bulig. Ang iya Pulong nagahatag sing praktikal nga laygay nga makabulig gid. Sa kongregasyon, nagaaman sia sing sangkol sa espirituwal nga mga manugtatap, nga nagatinguha sa pagpabanaag sang iya kaawa sa pagbulig sa iban. (Santiago 5:​14, 15) Subong “Nagapamati sa pangamuyo,” si Jehova nagahatag sing “balaan nga espiritu sa mga nagapangayo sa iya.” (Salmo 65:⁠2; Lucas 11:13) Ini nga mga aman mga pagpakita sang “malum-ok nga kaawa sang aton Dios.”​—⁠Lucas 1:78.

24. Paano ka magahulag sa gugma ni Jehova?

24 Indi bala makalilipay nga binagbinagon ang gugma sang aton langitnon nga Amay? Sa nagligad nga artikulo, ginpahanumdom kita nga ginpakita ni Jehova ang iya gahom, katarungan, kag kaalam sa mahigugmaon nga mga paagi para sa aton kaayuhan. Kag sa sining artikulo, nakita naton nga direkta nga ginpakita ni Jehova ang iya gugma sa katawhan​—⁠kag sa aton sing indibiduwal⁠​—⁠sa talalupangdon nga mga paagi. Karon, ang kada isa sa aton dapat mamangkot, ‘Paano ako magahulag sa gugma ni Jehova?’ Kabay nga magahulag ka paagi sa paghigugma sa iya sa bug-os mo nga tagipusuon, hunahuna, kalag, kag kusog. (Marcos 12:​29, 30) Kabay nga magkabuhi ka kada adlaw nga ginabinagbinag ang imo tinagipusuon nga handum nga magsuod pa kay Jehova. Kag kabay nga si Jehova, ang Dios nga amo ang gugma, labi pa nga magsuod sa imo​—⁠tubtob sa walay katubtuban.​—⁠Santiago 4:8.

[Nota]

^ par. 16 Ang isa ka iskolar nagsiling nga ang iskarlata “isa ka wala nagalubad, ukon permanente nga duag. Indi ini makuha sa tun-og, sa ulan, sa laba, ukon sa madugay nga paggamit.”

Madumduman Mo Bala?

Paano naton nahibaluan nga ang gugma amo ang nagapangibabaw nga kinaiya ni Jehova?

Ngaa masiling nga ang pagpadala ni Jehova sa iya Anak agod mag-antos kag mapatay para sa aton amo ang labing daku nga buhat sang gugma?

Paano si Jehova nagapasalig sa aton nga ginahigugma niya kita subong mga indibiduwal?

Sa anong maathag nga mga paagi ginalaragway sang Biblia ang pagpatawad ni Jehova?

[Mga Pamangkot sa Pagtinuon]

[Retrato sa pahina 15]

‘Ginhatag sang Dios ang iya bugtong nga Anak’

[Retrato sa pahina 16, 17]

“Mahal pa kamo sa madamo nga maya”

[Credit Line]

© J. Heidecker/VIREO

[Retrato sa pahina 18]

Ang balatyagon sang iloy sa iya anak makatudlo sa aton sang kaawa ni Jehova