Magdiretso sa kaundan

Magdiretso sa listahan sang kaundan

Mga Pamangkot Gikan sa mga Bumalasa

Mga Pamangkot Gikan sa mga Bumalasa

 Mga Pamangkot Gikan sa mga Bumalasa

Sa Hebreo 2:​14, ngaa gintawag si Satanas nga “isa nga may ikasarang sa pagpahanabo sang kamatayon”?

Sa malip-ot nga sabat, ginpahangop ni Pablo nga si Satanas, sing personal man ukon paagi sa iya mga sinakpan, makapahanabo sang kamatayon sang mga tawo. Nahisanto sa sini, gintawag ni Jesus si Satanas nga “manugpatay sing tawo sang nagsugod sia.”​​—⁠Juan 8:⁠44.

Mahimo magsayop ang paghangop sa Hebreo 2:14 bangod sang pila ka pagbadbad sa sini, nga nagasiling nga si Satanas may “gahom sang kamatayon” ukon may “gahom sa kamatayon.” (King James Version; Revised Standard; New International Version; Jerusalem Bible) Daw ginapakita sining mga pagbadbad nga si Satanas may walay latid nga gahom sa pagpatay kon gustuhon niya. Apang, maathag nga indi amo sini. Kay kon amo sini, mahimo gid nga ginpamatay na niya sang una pa ang tanan nga mga sumilimba ni Jehova sa duta.​​—⁠Genesis 3:⁠15.

Ang Griego nga termino nga ginbadbad “gahom sa kamatayon” sa pila ka mga pagbadbad kag “ikasarang sa pagpahanabo sang kamatayon” sa New World Translation amo ang “kraʹtos tou tha·naʹtou.” Ang tou tha·naʹtou isa ka porma sang tinaga nga nagakahulugan “kamatayon.” Ang kraʹtos nagakahulugan sing “puwersa, kusog, gahom.” Suno sa Theological Dictionary of the New Testament, ginapakita sini “ang presensia kag importansia sang puwersa ukon kusog sa baylo sang paggamit sini.” Gani, sa Hebreo 2:​14, wala ginapahangop ni Pablo nga may bug-os nga gahom si Satanas sa kamatayon. Sa baylo, ginapakita niya ang ikasarang ukon ikasangkol ni Satanas sa pagpahanabo sang kamatayon.

Paano ginagamit ni Satanas ang “ikasarang sa pagpahanabo sang kamatayon”? Sa tulun-an sang Job, mabasa naton ang isa ka daw pinasahi nga kahimtangan. Ang kasaysayan nagasiling nga gingamit ni Satanas ang isa ka bagyo agod ‘pahanabuon ang kamatayon’ sang mga anak ni Job. Apang, talupangda nga nahimo lang ini ni Satanas sa pahanugot sang Dios, nga gintugutan bangod may importante nga hulusayon nga dapat desisyunan. (Job 1:​12, 18, 19) Matuod gid, si Job mismo wala mapatay ni Satanas. Wala sia ginpahanugutan sa paghimo sini. (Job 2:⁠6) Ini nagapakita nga bisan pa, kon kaisa, mahimo mapahanabo ni Satanas ang kamatayon sang matutom nga mga tawo, indi kita dapat mahadlok nga mahimo niya utdon ang aton kabuhi sa bisan ano lang nga oras nga luyag niya.

Ginpahanabo man ni Satanas ang kamatayon paagi sa paggamit sa mga tawo. Gani, madamo nga mga Cristiano ang ginpatay bangod sang ila pagtuo, ang iban ginpatay sang akig katama nga mga guban ukon di-makatarunganon nga ginpatay sa mando sang mga opisyal sang gobierno ukon garok nga mga huwes.​​—⁠Bugna 2:⁠13.

Dugang pa, si Satanas kon kaisa makapahanabo sang kamatayon paagi sa paghingalit sa mga kaluyahon sang tawo. Sa Israel sang una, ginpanugyan sang propeta nga si Balaam sa mga Moabnon nga hayluhon ang mga Israelinhon ‘nga maglalis kay Jehova.’ (Numeros 31:16) Nagresulta ini sa kamatayon sang kapin sa 23,000 ka Israelinhon. (Numeros 25:⁠9; 1 Corinto 10:⁠8) Sa karon, ang pila napatalang man sa “mga padihot” ni Satanas kag nasulay sa imoralidad kag iban di-diosnon nga mga buhat. (Efeso 6:11) Matuod, masami nga wala nila gilayon madula ang ila kabuhi. Apang ginarisgo nila nga madula ang oportunidad sa pag-agom sang kabuhi nga walay katapusan, kag ginapatay sila ni Satanas sa sining paagi.

Bisan pa nahibaluan naton nga makapanghalit si Satanas, indi kita dapat mahadlok sing tuman. Sang si Pablo nagsiling nga mapahanabo ni Satanas ang kamatayon, nagdugang man sia nga si Cristo napatay agod ‘malaglag niya si Satanas kag agod maluwas niya ang tanan nga bangod sa kahadlok sa kamatayon nangin ulipon sa bug-os nila nga kabuhi.’ (Hebreo 2:​14, 15) Huo, ginbayad ni Jesus ang gawad kag gani ginhilway ang matinuuhon nga mga tawo gikan sa pagkaulipon sa sala kag kamatayon.​​—⁠2 Timoteo 1:⁠10.

Matuod, daw makulbaan kita mamensar nga may ikasarang si Satanas sa pagpamatay, apang sigurado kita nga dulaon ni Jehova ang ano man nga halit nga gintuga ni Satanas kag sang iya mga sinakpan. Ginapasalig kita ni Jehova nga ang ginbanhaw nga si Jesus ‘magalaglag sa mga binuhatan sang Yawa.’ (1 Juan 3:⁠8) Sa gahom ni Jehova, banhawon ni Jesus ang mga patay kag gani dulaon na ang kamatayon mismo. (Juan 5:​28, 29) Sa ulihi, ipakita ni Jesus sa daku nga paagi ang limitado nga gahom ni Satanas paagi sa pagtagbong sa iya sa kadadalman. Sa hingapusan, si Satanas laglagon sa walay katapusan.​​—⁠Bugna 20:​1-​10.