Enyi xɔ́ntɔn ɖé na we nǔ ɖagbeɖagbe ɖé ɔ, nɛ̌ nǔ ka na cí nú we? Xomɛ sixu hun we tawun bɔ a na ba na xlɛ́ xɔ́ntɔn towe ɖɔ nǔ e é na we é sù nukún towe mɛ. Jehovah kpo Jezu kpo na mǐ nǔ ɖagbe hugǎn e mɛɖé ma na mǐ kpɔ́n ǎ é ɖé. Nǔ tɛ ka wɛ? Nɛ̌ mǐ ka sixu ɖexlɛ́ ɖɔ é sù nukún mǐtɔn mɛ gbɔn?

1. Ali tɛ nu mǐ ka sixu ɖexlɛ́ ɖɔ nǔ e Mawu kpo Klisu kpo wà nú mǐ é sù nukún mǐtɔn mɛ ɖè?

Biblu d’akpá ɖɔ “mɛ e na ɖi nǔ [nú Jezu] lɛ” é sixu nɔ gbɛ̀ kaka sɔyi. (Jaan 3:16) Nɛ̌ è ka nɔ wà mɔ̌ gbɔn? Mǐ ɖó na ɖè nǔɖiɖi mǐtɔn xlɛ́ gbɔn gbeta e kɔn mǐ nɔ wá lɛ é kpo nǔ e mǐ nɔ wà lɛ é kpo gblamɛ. (Jaki 2:17) Nú mǐ nɔ ɖè nǔɖiɖi mǐtɔn xlɛ́ gbɔn nǔ e mǐ nɔ wà é kpo nǔ e mǐ nɔ ɖɔ é kpo gblamɛ ɔ, mǐ nɔ na hlɔnhlɔn kancica e mǐ ɖó xá Jezu kpo Tɔ́ tɔn Jehovah kpo é.—Xà Jaan 14:21.

2. Nǔwiwa bǔnɔ tɛ ka nɔ d’alɔ mǐ, bɔ mǐ nɔ ɖè lee nǔ e Jehovah kpo Jezu kpo wà nú mǐ é sù nukún mǐtɔn mɛ sɔ é xlɛ́?

Ðò zǎn e jɛ nukɔn nú kú Jezu tɔn é mɛ ɔ, é ɖɔ xó nú ahwanvu tɔn lɛ dó ali ɖevo e nu ye na ɖexlɛ́ ɖɔ vɔsisa tɔn sù nukún yetɔn mɛ ɖè é wu. É sɔ́ nǔwiwa bǔnɔ ɖé sín nu ɖó te bɔ Biblu ylɔ́ ɖɔ “Aklunɔ sín nǔɖuɖu,” bɔ è nɔ lɛ́ ylɔ́ ɖɔ Flǐn kú Klisu tɔn tɔn. (1 Kɔlɛntinu lɛ 11:20) Jezu ba ɖɔ mɛsɛ́dó emitɔn lɛ kpo Klisanwun nǔgbo ɖěɖee jɛ gudo yetɔn lɛ é bǐ kpo ni nɔ flín ɖɔ emi sɔ́ gbɛ̀ emitɔn jó dó ta mǐtɔn mɛ. Jezu ɖegbe elɔ e kúnkplá nǔwiwa enɛ é: “Mi nɔ bló lě, dó flín mì na.” (Luki 22:19) Nú a yì Flǐn ɔ tɛnmɛ ɔ, a nɔ ɖexlɛ́ ɖɔ wǎn ɖaxó e Jehovah kpo Jezu kpo yí nú mǐ é sù nukún towe mɛ.

 BA DÒ NÚ NǓ D’EJI

3. Nǔsumɛnukúnmɛ nɔ sísɛ́ mǐ bɔ mǐ nɔ wà nǔ

Mǐ ni ɖɔ ɖɔ a ɖò tɔ̀ na kú wɛ bɔ mɛɖé wá hwlɛn we. A na wɔn nǔ e mɛ ɔ wà nú we é kpowun wɛ à? Alǒ a na ba ali ɖěɖee nu a na ɖexlɛ́ ɛ ɖè ɖɔ nǔ e é wà nú we é sù nukún towe mɛ ɖè lɛ é?

Mǐ ɖu gbɛ̀ mǐtɔn sín axɔ́ dó Jehovah. Xà 1 Jaan 4:8-10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛwu vɔsisa Jezu tɔn ka nyí nǔnina bǔnɔ ɖé?

• Nɛ̌ nǔ ka nɔ cí nú we dó nǔ e Jehovah kpo Jezu kpo wà nú we é wu?

Nɛ̌ mǐ ka sixu ɖexlɛ́ ɖɔ nǔ e Jehovah kpo Jezu kpo wà nú mǐ é sù nukún mǐtɔn mɛ gbɔn? Xà 2 Kɔlɛntinu lɛ 5:15 kpo 1 Jaan 4:11; 5:3 kpo. Nú mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:

• Sɔgbe xá wemafɔ enɛ ɔ, etɛ mǐ ka sixu wà dó ɖè nǔsumɛnukúnmɛ mǐtɔn xlɛ́?

4. Wà nǔ Jezu ɖɔhun

Ali ɖevo e nu mǐ sixu ɖè nǔsumɛnukúnmɛ mǐtɔn xlɛ́ ɖè é wɛ nyí ɖɔ mǐ na wà nǔ Jezu ɖɔhun. Xà 1 Piyɛ́ɛ 2:21, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Ali tɛ lɛ nu a ka sixu xwedó afɔdomɛ Jezu tɔn lɛ télélé ɖè?

• Nɛ̌ nǔ lɛ ka nɔ yì gbɔn ɖò Flǐn ɔ domɛ?

 ETƐ LƐ A KA KPLƆ́N?

Mǐ nɔ ɖexlɛ́ ɖɔ nǔ e Jezu wà nú mǐ é sù nukún mǐtɔn mɛ, gbɔn nǔɖiɖi ɖiɖó n’i kpo Flǐn kú tɔn tɔn domɛ yiyi kpo gblamɛ.

Vɔ̌gbɔnji

• Etɛ ka nyí tinmɛ è ni ɖi nǔ nú Jezu tɔn?

• Nɛ̌ a ka ba na ɖexlɛ́ ɖɔ nǔ e Jehovah kpo Jezu kpo wà nú we é sù nukún towe mɛ gbɔn?

• Etɛwu é ka ɖò taji tawun ɖɔ è ni nɔ yì Flǐn kú Klisu tɔn tɔn tɛnmɛ?