1-3. (a) Katapos han aton bawtismo, ano nga mga pagbag-o an bangin makurian kita paghimo? (b) Kon mas makuri an paghimo hin gudtiay nga mga pagbag-o kay han aton ginlalaoman, ano an mahimo naton igpakiana ha aton kalugaringon? (Kitaa an retrato hini nga pahina.)

HAN hinbaroan ni Kevin ^[1] an kamatuoran, waray hiya iba nga hingyap kondi an magin duok gud kan Jehova. Pero ha sulod hin damu nga katuigan, nahuygo hiya, nasigarilyo, parahubog, ngan adik ha droga. Basi makarawat an pag-uyon han Dios, kinahanglan niya bayaan ito nga mga bisyo nga supak ha Biblia. Nahimo niya ini pinaagi han iya pagsarig kan Jehova ngan ha nakakapabag-o nga gahum han Pulong han Dios.—Heb. 4:12.

² Katapos han bawtismo ni Kevin, umundang na ba hiya paghimo hin mga pagbag-o ha iya kinabuhi? Waray, tungod kay kinahanglan niya padayon nga kultibaron ngan pauswagon an iya Kristiano nga mga kalidad. (Efe. 4:31, 32) Pananglitan, nasantop niya nga nakukurian gud hiya pagkontrol han iya kasina. Hi Kevin nagsiring, “An pagkontrol han  akon kasina mas makuri gud kay ha pagbaya han akon mga bisyo!” Nahimo ni Kevin an ginkikinahanglan nga pagbag-o pinaagi han sinsero nga pag-ampo ngan maduruto nga pag-aram ha Biblia.

³ Pariho kan Kevin, damu ha aton an naghimo hin importante nga mga pagbag-o antes kita magpabawtismo basi maipahiuyon an aton kinabuhi ha nangunguna nga mga ginkikinahanglan han Biblia. Katapos han bawtismo, nasantop naton nga kinahanglan naton padayon nga maghimo hin mga pagbag-o—gutiay nga mga pagbag-o—basi mas masubad naton an Dios ngan an Kristo. (Efe. 5:1, 2; 1 Ped. 2:21) Pananglitan, bangin nasantop naton nga kritiko kita, nahahadlok ha tawo, mahilig manlibak, o may iba pa nga kaluyahan. Naobserbaran ba naton nga makuri an pagbag-o hini kay han aton ginlalaoman? Kon oo, bangin maghunahuna ka, ‘Nakahimo na ako hin dagku nga mga pagbag-o, pero kay ano nga makuri gud an padayon nga paghimo hin gutiay nga mga pagbag-o? Ano an mahimo ko buhaton basi padayon nga mabag-o han Biblia an akon kinabuhi?’

4. Kay ano nga usahay napapasubo naton hi Jehova?

⁴ Tungod kay nakilala naton hi Jehova ngan hinigugma naton hiya, hingyap gud naton nga buhaton an nakakapalipay ha iya. Pero bisan kon ito gud an aton hingyap, usahay napapasubo naton an Dios tungod kay diri kita hingpit. Bangin abaton naton an pariho han inabat ni apostol Pablo, nga nagsurat: “May hingyap ako pero waray ako abilidad ha pagbuhat han maopay.”—Roma 7:18; San. 3:2.

5. Ano nga mga pagbag-o an aton ginhimo antes magpabawtismo, pero ano nga mga kaluyahan an bangin kinahanglan pa naton atohan?

⁵ Iginsalikway na naton an maraot nga mga buhat basi magin kwalipikado nga membro han Kristiano nga kongregasyon. (1 Cor. 6:9, 10) Pero diri pa kita hingpit. (Col. 3:9, 10) Salit diri makatadunganon nga laoman naton nga katapos han aton bawtismo—o bangin katapos hin damu ka tuig ha kamatuoran—diri na kita makakasayop, manluluya, o magkakaada sayop nga mga motibo ngan hingyap. May mga kaluyahan nga bangin magpadayon ha sulod hin mga katuigan.

6, 7. (a) Kay ano nga mahimo kita magin sangkay ni Jehova bisan kon diri kita hingpit? (b) Kay ano nga diri kita sadang mag-alang pangaro hin pasaylo kan Jehova?

⁶ An aton pagkadiri-hingpit diri ulang ha aton pakigsangkay kan Jehova o ha padayon nga pag-alagad ha iya. Tagda ini: Han iginpahirani kita ni Jehova basi magin sangkay niya, maaram hiya nga ha panapanahon makakasayop kita. (Juan 6:44) Maaram an Dios han aton mga kinaiya ngan han aada ha aton kasingkasing, salit maaram gud hiya kon ano nga mga kaluyahan an mas nakukurian kita pag-ato. Ngan maaram hiya nga usahay makakasala kita. Pero diri ito rason basi diri na makigsangkay ha aton hi Jehova.

⁷ Gugma an nagpagios ha Dios nga tagan kita hin presyoso nga regalo—an halad-lukat han iya hinigugma nga Anak. (Juan 3:16) Kon nakakasala kita ngan mangangaro hin pasaylo kan Jehova basado hinin birilhon nga tagana, makakasiguro kita nga sangkay la gihapon kita niya. (Roma 7:24, 25; 1 Juan 2:1, 2) Sadang ba kita mag-alang nga pahimulosan an mga kapulsanan han lukat tungod kay inaabat naton nga mahugaw kita o makasasala? Syempre diri! Pariho la ito ha diri paghunaw kon mahugaw an aton kamot. Ngani, an lukat igintagana para ha mga makasasala nga nagbabasol. Salit nagpapasalamat gud kita ha tagana nga lukat kay pinaagi hito mahimo kita magin kasangkayan ni Jehova bisan kon diri kita hingpit.—Basaha an 1 Timoteo 1:15.

8. Kay ano nga diri naton sadang igbalewaray an aton mga kaluyahan?

⁸ Syempre, diri naton iginbabalewaray an aton mga kaluyahan. Basi magin sangkay ni Jehova, kinahanglan mangalimbasog kita nga subaron hin maopay an Dios ngan an Kristo ngan magin an klase hin mga tawo nga inuuyonan nira. (Sal. 15: 1-5) Kinahanglan liwat naton atohan an aton mga kaluyahan, wad-on pa ngani ito kon posible. Bag-ohan man kita o maiha na ha kamatuoran, kinahanglan kita “padayon nga . . . magpatadong.”—2 Cor. 13:11.

9. Paonan-o kita nahibaro nga mahimo naton padayon nga maisul-ot an bag-o nga personalidad?

⁹ Importante an padayon nga pangalimbasog basi “magpatadong” ngan maipakita “an bag-o nga personalidad.” Ginpahinumdoman ni Pablo an iya mga igkasi-tumuroo: “Sadang niyo hukason an daan nga personalidad nga uyon ha iyo panggawi hadto ngan gindadaot tungod han malimbong nga mga hingyap hito. Ngan padayon nga bag-oha an iyo paagi han paghunahuna ngan isul-ot an bag-o nga personalidad nga ginhimo uyon ha kaburut-on han Dios, nga iginbasar ha totoo nga pagkamatadong ngan pagkamaunungon.” (Efe. 4:22-24) An mga pulong nga “padayon nga bag-oha” nagpapasabot nga an pagkultibar hin bag-o nga personalidad nagpapadayon nga proseso. Makaparig-on ini, kay nagpapasarig ini ha aton nga mationan-o man kita kaiha nga nag-aalagad kan Jehova, mahimo naton padayon nga makultibar ngan mapauswag an aton Kristiano nga mga kalidad basi magkaada bag-o nga personalidad. Oo, an Biblia padayon nga makakagbag-o han aton kinabuhi.

10. Ano an kinahanglan naton buhaton basi padayon nga makahimo hin mga pagbag-o ha bulig han Biblia, ngan ano an bangin igpakiana naton?

¹⁰ Kinahanglan kita mangalimbasog gud kon karuyag naton nga an Pulong han Dios padayon nga makagbag-o ha aton. Pero kay ano nga importante nga mangalimbasog gud kita? Kon ginbibendisyonan ni Jehova an aton mga pangalimbasog, diri ba masayon la unta an aton espirituwal nga pag-uswag? Diri ba puydi nga wad-on na la ni Jehova an aton sayop nga mga tendensya basi diri kita makurian pagpakita han diosnon nga mga kalidad?

11-13. Kay ano nga naglalaom hi Jehova nga mangangalimbasog gud kita ha pag-ato ha aton mga kaluyahan?

¹¹ Kon ginpapamalandong naton an uniberso, nasasantop naton nga gamhanan gud hi Jehova. Pananglitan, an adlaw nagpapagawas hin lima ka milyon nga tonilada hin enerhiya kada segundo. Bisan kon gutiay la hito an nakakaabot ha tuna, igo ito basi mapasoan ngan malamragan an tuna para mabuhi an mga linarang dida hini. (Sal. 74:16; Isa. 40:26) Nalilipay hi Jehova nga tagan an iya mga surugoon hin igo nga kusog kon ginkikinahanglan nira ito. (Isa. 40:29) Oo, puydi unta kita tagan han Dios hin kusog nga maatohan an anoman nga kaluyahan bisan diri na kita mangalimbasog o mahibaro hin leksyon tikang ha aton mga sayop. Pero kay ano nga diri niya ito ginbubuhat?

¹² Gintagan kita ni Jehova hin maopay gud nga regalo, an kagawasan ha pagbuot. Kon pipilion naton nga buhaton an kaburut-on han Dios ngan mangalimbasog gud ha pagbuhat hito, iginpapakita naton an aton hilarom nga gugma kan Jehova ngan an aton hingyap nga lipayon hiya. Iginpapakita liwat naton nga ginsusuportaran naton an iya pagkasoberano. Ginkukwestyon ni Satanas an katungod han Dios ha pagmando, salit an aton kinaburut-on ngan duro nga pangalimbasog nga suportaran an pagkasoberano han Dios birilhon gud ha aton harangdon ngan maapresyaron nga Amay. (Job 2:3-5; Prob. 27:11) Pero kon mamaniobrahon ni Jehova nga diri na naton kinahanglan mangalimbasog pag-ato ha aton mga kaluyahan basi mapalipay hiya, magigin waray pulos an aton pag-angkon nga maunungon kita ha iya ngan nasuporta kita ha iya pagkasoberano.

¹³ Salit ginsusugo kita ni Jehova nga “mangalimbasog gud” ha pagkultibar han diosnon nga mga kalidad. (Basaha an 2 Pedro 1:5-7; Col. 3:12) Ginlalaoman niya nga mangangalimbasog kita pagkontrol han aton hunahuna ngan pagbati. (Roma 8:5; 12:9) Tungod kay nangangalimbasog gud kita nga buhaton ini, mas malipayon kita kay inaabat naton nga padayon nga ginbabag-o han Biblia an aton kinabuhi.

14, 15. Ano an puydi naton himoon basi makultibar an mga kalidad nga naruruyagan ni Jehova? (Kitaa an kahon nga “ An Biblia Ngan Pag-ampo Nakagbag-o han Ira Kinabuhi.”)

¹⁴ Ano an mahimo naton buhaton basi makultibar an diosnon nga mga kalidad ngan mapalipay hi Jehova? Imbes nga kita la an magdesisyon kon ano an kinahanglan naton bag-uhon, kinahanglan sundon gud naton an giya han Dios. An Roma 12:2 nasiring: “Ayaw na kamo pagsubad han mga paagi hini nga sistema, kondi magbag-o kamo pinaagi ha pagbag-o han iyo panhunahuna, basi mapamatud-an niyo ha iyo kalugaringon an kaburut-on han Dios nga maopay, hingpit, ngan nakakalipay ha iya.” Pinaagi han iya Pulong ngan baraan nga espiritu, ginbubuligan kita ni Jehova nga masabtan an iya kaburut-on, buhaton ito, ngan bag-uhon an aton kinabuhi tubtob nga posible basi maabot an iya mga ginkikinahanglan. An aton pangalimbasog nag-uupod han adlaw-adlaw nga pagbasa ha Biblia, pagpamalandong ha Kasuratan, ngan pag-ampo para han baraan nga espiritu. (Luc. 11:13; Gal. 5:22, 23) Kon magpapagiya kita ha baraan nga espiritu han Dios ngan ipapahiuyon naton an aton panhunahuna ha panhunahuna ni Jehova nga mababasa ha iya Pulong, mas makukultibar naton an diosnon nga mga kalidad—ha aton paghunahuna, pagyakan, ngan buhat. Bisan pa hito, kinahanglan kita padayon nga magbantay nga diri madaog ha anoman nga kaluyahan.—Prob. 4:23.

¹⁵ Labot la han adlaw-adlaw nga pagbasa ha Biblia, kinahanglan naton adman an Pulong han Dios pati na an aton mga publikasyon basi masubad naton an mag-opay nga kalidad ni Jehova. An pipira nagkukolekta ngan usahay nagrirepaso hin mga teksto ngan mga artikulo ha Barantayan o Pagpamata! nga makakabulig gud ha pagkultibar han Kristiano nga mga kalidad o ha pag-ato ha partikular nga mga kaluyahan.

16. Kay ano nga diri kita sadang manluya kon diri dayon naton nahihimo an mga pagbag-o?

¹⁶ Kon baga hin mahinay an imo espirituwal nga pag-uswag, hinumdumi nga nagkikinahanglan ito hin igo nga panahon. An pagkaada maopay nga espirituwalidad nagpapadayon nga proseso. Kinahanglan magin mapailubon kita samtang nangangalimbasog nga padayon nga mabag-o han Biblia an aton kinabuhi. Ha siyahan, bangin kinahanglan naton disiplinahon an aton kalugaringon basi mahimo an ginsisiring ha Kasuratan. Pero samtang padayon nga ginbubuhat naton an karuyag ni Jehova, maabot an panahon nga bangin masayon ngan natural na la para ha aton an paghunahuna ngan paggios uyon ha paagi han Dios.—Sal. 37:31; Prob. 23:12; Gal. 5:16, 17.

17. Kon maunungon kita kan Jehova, ano nga makalilipay nga tidaraon an aton mapapamulat?

¹⁷ Ha urhi, an maunungon nga mga magsiringba  ni Jehova magkakaada pribilehiyo nga mag-alagad ha iya ha kadayonan ha hingpit nga kahimtang. Hito nga panahon, diri na makuri an pagpakita hin diosnon nga mga kalidad; lugod, malipayon nga maipapakita na naton ito pirme. Samtang diri pa ito naabot, mapasalamaton kita ha tagana nga lukat kay nakakagsingba kita ha aton mahigugmaon nga Dios. Bisan kon diri kita hingpit, mahihimo naton ini kon padayon nga magpapagiya kita ha nakakapabag-o nga gahum han iya Pulong.

18, 19. Kay ano nga sigurado kita nga an Biblia may gahum nga padayon nga bag-uhon an aton kinabuhi?

¹⁸ Hi Kevin nga gin-unabi kanina nangalimbasog gud pagkontrol han iya kasina. Ginpamalandong ngan gin-aplikar niya an mga prinsipyo ha Biblia ngan ginkarawat an bulig ngan sagdon han iya mga igkasi-tumuroo. Paglabay hin pipira ka tuig, nag-uswag gud hi Kevin. Ha urhi, nagin kwalipikado hiya nga magin ministeryal nga surugoon, ngan ha sulod hin 20 ka tuig na, nag-aalagad hiya sugad nga tigurang ha kongregasyon. Bisan pa hini, maaram hiya nga kinahanglan la gihapon niya magin mabinantayon kontra ha iya mga kaluyahan.

¹⁹ Iginpapakita ha eksperyensya ni Kevin nga an Biblia nabulig ha katawohan han Dios nga padayon nga maghimo hin positibo nga mga pagbag-o ha ira kinabuhi. Salit tugotan naton nga an Pulong han Dios padayon nga makagbag-o ha aton basi magin mas duok kita kan Jehova. (Sal. 25:14) Samtang mas nakikita naton nga ginbibendisyonan ni Jehova an aton mga pangalimbasog, mas napapamatud-an naton nga padayon nga ginbabag-o han Biblia an aton kinabuhi.—Sal. 34:8.