Kon an Kahibaro han Dios Naglulukop Na ha Tuna
Kapitulo 19
Kon an Kahibaro han Dios Naglulukop Na ha Tuna
1, 2. Paonan-o nadaot an mga linarang ni Jehova?
PANANGLITAN an usa ka bantog nga pintor nakatapos pa la han usa ka matahum nga dibuho. Iya gintatagad ito nga maopay hinduro—usa ka obramaestra! Kondi ha gab-i ginbungkag ito han naabugho nga karibal. Hinsasabtan, nakakahimo ini hin daku nga kasakit ha pintor. Karuyag gud niya nga makita an magburungkag nga mapriso! Ngan mahuhunahuna mo nga karuyag han pintor nga maibalik an iya binuhat ha daan nga katahum hito.
2 Pariho hiton nga pintor, ginlarang ni Jehova an usa ka obramaestra ha pag-andam ha tuna ngan ha pagbutang han katawohan dida hito. Katapos larangon an lalaki ngan babaye, iya iginpahayag an ngatanan nga iya tunan-on nga binuhat nga “maopay hinduro.” (Genesis 1:31) Kalugaringon nga mga anak han Dios hi Adan ngan Eva, ngan hinigugma niya hira. Iya naiisip an usa ka malipayon, mahimayaon nga tidaraon para ha ira. Totoo, gintugwayan hira ni Satanas nga magrebelde, kondi waray madaot an urosahon nga linarang han Dios nga diri na maaayad.—Genesis 3:23, 24; 6:11, 12.
3. Ano “an totoo nga kinabuhi”?
3 Nagdesisyon an Dios nga tadongon an mga butang. Mahigugmaon nga karuyag gud niya nga makita kita nga nag-uukoy ha paagi nga iya gintuyo ha tinikangan. An aton halipot ngan masamok nga pagkinabuhi diri amo “an totoo nga kinabuhi,” kay hirayo gud ito ha katuyoan ni Jehova. “An totoo nga kinabuhi” nga karuyag han Dios para ha aton amo an “kinabuhi nga waray kataposan” ilarum han hingpit nga mga kahimtang.—1 Timoteo 6:12, 19.
4, 5. (a) Paonan-o matutuman an paglaom ha Paraiso? (b) Kay ano nga sadang hunahunaon naton an mahitungod han aton paglaom ha tidaraon?
4 An kahibaro han Dios nagdadara hin responsabilidad ha atubangan ni Jehova. (Jakobo 4:17) Kondi hunahunaa an mga bendisyon nga mapapahimulsan mo kon iaplikar mo iton nga kahibaro ngan mangalimbasug nga madangat an kinabuhi nga waray kataposan. Ha iya Pulong, an Biblia, hi Jehova nga Dios nagdibuho hin usa ka matahum nga ladawan kon ano an magigin kahimtang han kinabuhi ha Paraiso nga tuna nga hirani na gud. Siyempre, sugad nga katawohan ni Jehova diri kita nag-aalagad ha Dios tungod la han hingyap para han usa nga balos. Nag-aalagad kita ha Dios tungod kay nahigugma kita ha iya. (Markos 12:29, 30) Dugang pa, diri naton makakarawat an kinabuhi tungod ha pag-alagad kan Jehova. Regalo han Dios an kinabuhi nga waray kataposan. (Roma 6:23) Magpapahimulos kita kon aton pamalandongon an sugad nga kinabuhi an paglaom ha Paraiso tungod kay nagpapahinumdum ha aton kon ano nga klase nga Dios hi Jehova—an mahigugmaon nga “magbaralos hadton madasigon nga nagbibiling ha iya.” (Hebreo 11:6) An paglaom nga totoo gud ha aton mga hunahuna ngan mga kasingkasing makakahimo ha aton nga ilubon an mga kakurian ha kalibotan ni Satanas.—Jeremias 23:20.
5 Aton isentro yana an aton atension ha basado-ha-Biblia nga paglaom ha kinabuhi nga waray kataposan ha tidaraon tunan-on nga Paraiso. Ano an magigin kahimtang han kinabuhi kon an kahibaro han Dios naglulukop na ha tuna?
KATAPOS HAN ARMAGEDON—USA KA PARAISO NGA TUNA
6. Ano an Armagedon, ngan ano an magigin kahulogan hito para ha katawohan?
6 Sugad han ipinakita na, ha diri mag-iiha bubungkagon ni Jehova nga Dios an presente maraut nga sistema han mga butang. An kalibotan madagmit nga nagtitiarabot ha tinatawag han Biblia nga Har–Magedon, o Armagedon. Iton nga pulong bangin makapahunahuna han iba nga mga tawo han usa ka nuklear nga kabungkagan nga pagdadad-on han nag-aaraway nga mga nasud, kondi an Armagedon kaiba gud han nuklear nga kabungkagan. Sugad han ipinapakita han Pahayag 16:14-16, an Armagedon amo “an girra han daku nga adlaw han Dios nga Makagagahum-ha-ngatanan.” Amo ito an girra nga nag-uupod han “kahadian ha bug-os inuukyan nga tuna,” o mga nasud. An Anak ni Jehova nga Dios, an pinili nga Hadi, ha diri na mag-iiha mabulig ha girra han Armagedon. Sigurado an resulta. Pagwawad-on an ngatanan nga nakontra ha Ginhadian han Dios ngan bahin han maraut nga sistema ni Satanas. Adto la nga maunongon kan Jehova an maluluwas nga buhi.—Pahayag 7:9, 14; 19:11-21.
7. Hingangain hi Satanas ngan an iya mga demonyo durante han Usa ka Yukot ka Tuig nga Pagmando ni Kristo, ngan paonan-o magpapahimulos hini an katawohan?
7 Hunahunaa nga ikaw naluwas nga buhi hiton nga kabungkagan. Ano an magigin kahimtang han tuna ha iginsaad han Dios nga bag-o nga kalibotan? (2 Pedro 3:13) Diri kinahanglan nga magbanabana kita, kay an Biblia nagsusumat ha aton, ngan makalilipay an ginsisiring hito. Maaram kita nga hi Satanas ngan an iya mga demonyo waray na mahihimo, iginbilanggo ha kahiladman han kawaray buruhaton durante han Usa ka Yukot ka Tuig nga Pagmando ni Jesu-Kristo. Adton magraut, nakakadaot nga mga linarang diri na maglilimbong ha pag-aghat ha aton ha pagbuhat han kasamok ngan mangalimbasug ha pagsagda ha mga buhat han pagkadiri-matinumanon ha Dios. Daw ano nga katalwasan!—Pahayag 20:1-3.
8, 9. Ha bag-o nga kalibotan, ano an mahitatabu ha mga kasakitan, sakit, ngan kalagas?
8 Ha igo nga panahon, an ngatanan nga klase han sakit mawawara na. (Isaias 33:24) An mga kimay hiton nga panahon matindog, maglalakat, madalagan, ngan masayaw ha musika, nga mahimsog an mga bitiis. Katapos han mga katuigan han kinabuhi nga diri nakakabati, an mga bungol makakabati han malipayon nga mga tunog ha ira palibot. An mga buta mahipapausa samtang nakikita nira an matahum nga kolor ngan porma han kalibotan. (Isaias 35:5, 6) Ha kataposan, makikita nira an mga nawong han ira mga hinigugma! Bangin an ira mga mata hiton nga panahon magdudulom ha usa ka dali tungod han mga luha han kalipay.
9 Hunahunaa la! Waray na mga antiyohos, waray na mga saklay ngan mga tungkod, waray na mga medisina, waray na mga klinika han dentista o mga ospital! An sakit ha emosyon ngan kaguol diri na gud magwawara utro han kalipayan han mga tawo. Waray na bata nga may sakit. An mga lagas magigin batan-on. (Job 33:25) Labaw nga magigin mahimsog kita, makurokusog. Kada aga magmamata kita tikang ha makarepresko nga pagkaturog ha gab-i nga may nabag-o nga kusog, puno hin kaaktibo ngan kadasig para han usa ka bag-o nga adlaw han mahimsog nga kinabuhi ngan makapatagbaw nga buruhaton.
10. Ano nga buruhaton an bubuhaton han mga naluwas nga buhi ha Armagedon?
10 Magkakaada damu han makalilipay nga buruhaton nga pagbubuhaton han mga naluwas nga buhi ha Armagedon. Hihimoon nira an tuna nga usa ka paraiso. Lilimpyohon an bisan ano nga mga tigaman han mahugaw daan nga sistema. An mga parke ngan mga hardin han mga prutas ngan mga utanon masaliwan ha mahugaw nga mga lugar ngan guba nga tuna. An ngatanan magpapahimulos han mahimyang, matahum nga mga balay. (Isaias 65:21) Samtang nalabay an panahon, adton paraiso nga mga bahin han tuna magtutubo ngan maglulukop tubtob nga an bug-os nga kalibotan nakadangat ha suruklan han katahum nga ginhimo han Maglalarang hadto ha hardin ha Eden. Makapatagbaw gud an makaambit hiton nga buruhaton han pagtukod utro!
11. Ano an magigin tidaraon nga relasyon han katawohan ha palibot han tuna ngan han mga hayop?
11 Ini ngatanan pagbubuhaton ilarum han baraan nga giya basi an palibot diri pagdauton. An mga tawo magigin mamurayawon upod han mga hayop. Imbes nga pamatayon ito, an tawo magpapadayon ha pagbuhat han pagkatinapuran ha bawbaw han tuna, nagmamangno hin maopay hito. Handurawa an mga lobo ngan mga karnero, mga leon ngan mga baka, nga nangangaon nga tarampo—ngan an maanad nga mga hayop bug-os nga talwas na gud. Bisan an gutiay nga bata diri na mahahadlok ha ihalas nga mga mananap, an kalinaw han bag-o nga kalibotan diri na man madadaot han mapintas, mabangis nga mga tawo. (Isaias 11:6-8) Magigin mamurayawon gud iton bag-o nga kalibotan!
GINBAG-O NGA KATAWOHAN
12. Paonan-o natutuman na yana nga adlaw an Isaias 11:9, ngan paonan-o ito matutuman ha Paraiso?
12 An Isaias 11:9 nagsusumat ha aton kon kay ano nga waray na kadaot nga mahihimo ha bug-os nga tuna. Ito nasiring: “An tuna sigurado nga mapupuno han kahibaro ni Jehova sugad han katubigan nga nagpupuno han dagat.” Naghihisgut ini han mga tawo tungod kay an mga hayop diri mahimo kumarawat han “kahibaro ni Jehova” ngan maghimo hin mga pagbag-o, kay ginmamandoan hira han kinaiya. Kondi an kahibaro han aton Maglalarang amo an nagbabag-o ha mga tawo. Sigurado nga naghihimo ka na hin mga pagbag-o ha imo kalugaringon sugad nga resulta han pag-aplikar han kahibaro han Dios ha imo kinabuhi. Minilyon an nagbubuhat hito. Salit, ini nga tagna nagtikang na matuman dida hadton nag-aalagad kan Jehova. Kondi, nagtutudlok liwat ito ha panahon kon pagwad-on na han mga tawo ha bug-os nga kalibotan an bisan ano hayopnon o madarahog nga mga batasan ngan magin mamurayawon ha kadayonan.
13. Ano nga programa ha edukasyon an mahitatabu ha tuna?
13 Pagkaurosahon gud hito kon an kahibaro han Dios naglulukop na ha tuna! Magkakaada haluag nga programa ha edukasyon ilarum han pagtugway han Hadi nga hi Jesu-Kristo ngan han iya 144,000 igkasi mga magmarando. Hiton nga panahon gagamiton an bag-o nga “mga basahon.” Matin-aw nga ini an sinurat nga mga instruksion han Dios nga amo an basihanan ha pagtutdo ha mga umurokoy ha tuna. (Pahayag 20:12) An katawohan, mag-aaram, diri ha pakig-away, kondi kamurayawan. An ngatanan makabungkag nga mga hinganiban mawawara ha kadayonan. (Salmo 46:9) An mga umurokoy ha bag-o nga kalibotan tututdoan ha pagtrato ha ira igkasi mga tawo nga may gugma, pagtahod, ngan dignidad.
14. Paonan-o magigin kaiba an kalibotan kon an katawohan nagkakaurosa na nga pamilya?
14 An katawohan magigin usa nagkakaurosa nga pamilya. Mawawaray na mga ulang ha pagkaurosa ngan pagminagburugto. (Salmo 133:1-3) Waray na balay nga kinandadohan basi diri makasulod an mga kawatan. An kamurayawan magmamando ha tagsa nga kasingkasing, ha tagsa nga balay, ha tagsa nga bahin han tuna.—Mika 4:4.
AN MAKALILIPAY NGA PAGKABANHAW
15. Ano an duha nga grupo nga babanhawon ha tuna?
15 Durante hiton nga Milenyo, mahitatabu an pagkabanhaw. Adton tinuyo nga nakasala kontra han baraan nga espiritu han Dios, o aktibo nga puwersa, pinaagi han diri-mabinasulon nga pagbuhat kontra han pagtugway hito diri babanhawon. (Mateo 23:15, 33; Hebreo 6:4-6) Siyempre, an Dios an magdidesisyon kon hin-o an nakasala kontra han baraan nga espiritu. Kondi duha magkaiba nga grupo an babanhawon—“an magtadong ngan diri-magtadong.” (Buhat 24:15) Tungod kay magkakaada husto nga kahusayan, makatadonganon an pagsiring nga an siyahan nga babanhawon ha kinabuhi ha tuna amo an magtadong, adton nga maunongon nga nag-alagad kan Jehova.—Hebreo 11:35-39.
16. (a) Hin-o an magigin kaupod han “magtadong” nga babanhawon ha tuna? (b) Hin-o nga magtinumanon ha kadaan nga mga panahon an karuyag mo gud nga igkita, ngan kay ano?
16 Imbes nga makabati hin mga sumat mahitungod han mga girra, mga kalamidad, ngan kamatayon, an mga surogoon ni Jehova makarawat han urosahon nga mga sumat han pagkabanhaw. Magigin makalilipay hibaroan an mahitungod han pagbalik han matinumanon nga kalalakin-an ngan kababayin-an, sugad kan Abel, Enok, Noe, Abraham, Sarah, Job, Moises, Rahab, Ruth, David, Elias, Ester. Makaruruyag nga mga kamatuoran ha kasaysayan an ira ipipresenta samtang iginhahatag nira an mga detalye han damu nga mga asoy han Biblia! Sigurado nga hira ngan an magtadong nga bag-o la nga namatay magigin madasigon nga mahibaro mahitungod han kataposan han sistema ni Satanas ngan kon paonan-o ginbaraan ni Jehova an iya baraan nga ngaran ngan ginbindikar an iya pagkasoberano.
17. Ano nga bulig an ihahatag han magtinumanon ha iba nga mga binanhaw?
17 Makakabulig gud ini nga magtinumanon durante han masunod nga bahin han pagkabanhaw, kon an yinukot ka milyon han “magtadong” makagawas na tikang ha mga gapos han kamatayon! An kadam-an han katawohan waray gud magkaada higayon nga makilala hi Jehova. Kan Satanas ‘ginbubuta an ira mga hunahuna.’ (2 Korinto 4:4) Kondi tatapuson an buhat han Yawa. An magtadong mabalik ha matahum ngan mamurayawon nga tuna. Kakarawaton hira han mga tawo nga organisado hin maopay ha pagtutdo ha ira mahitungod kan Jehova ngan ha iya nagmamando nga Anak, hi Jesu-Kristo. Samtang an binilyon han mga binanhaw nakakakilala ngan nahigugma ha ira Maglalarang, an kahibaro ni Jehova maglulukop ha tuna ha waray kapariho nga paagi.
18. Mationan-o ha hunahuna mo an imo aabaton ha pagkarawat ha binanhaw nga mga hinigugma?
18 Pagkadaku nga kalipayan an mahihimo han pagkabanhaw ha aton mga kasingkasing! Hin-o an waray mag-antos tungod han aton kaaway nga kamatayon? Tinuod, hin-o an waray maguol han nadaot an pipira nga bugkos han gugma o pakigsangkay samtang an sakit, kalagas, aksidente, o kamadarahog nakahimo han kamatayon han usa nga hinigugma? Ngan, hunahunaa, an kalipay han pagtarampo utro ha Paraiso. An mga iroy ngan mga amay, mga anak nga kalalakin-an ngan kababayin-an, mga sangkay ngan mga paryente, madalagan ha paghangkop ha usa kag usa, nga nagtatawa ngan nagtatangis ha kalipay.
KAHINGPITAN HA KATAPOSAN!
19. Ano nga milagro an mahitatabu durante han Milenyo?
19 Ha bug-os nga Milenyo, mahitatabu an usa ka urosahon nga milagro. Para ha katawohan, bangin amo ito an pinaka makalilipay nga bahin han Usa ka Yukot ka Tuig nga Pagmando ni Kristo. Susugoon ni Jehova an iya Anak nga iaplikar an mga kapulsanan han halad lukat ha kada usa ngan kada tagsa nga matinumanon ngan masinugtanon nga lalaki ngan babaye. Pinaagi hiton, kukuhaon an ngatanan nga sala ngan an katawohan babayawon ngadto ha kahingpitan.—1 Juan 2:2; Pahayag 21:1-4.
20. (a) Ano an magigin kahulogan han pagin hingpit? (b) San-o an mga maluluwas nga buhi ha Armagedon ngan mga binanhaw magtitikang ha pagkinabuhi ha bug-os nga kahulogan?
20 Kahingpitan! Ano an magigin kahulogan hito? Mangangahulogan ito hin pagbalik ha kinabuhi nga pinahimulsan ni Adan ngan Eva antes hira makasala kan Jehova nga Dios. Ha pisikal, mental, emosyonal, moral, espirituwal—ha bisan ano nga paagi nga maiisip—an hingpit nga mga tawo bug-os nga makakadangat ha mga suruklan han Dios. Kondi magigin parapriho ba an mga tawo hiton nga panahon? Diri gud! An mga linarang ni Jehova—kakahoyan, mga bukad, mga hayop—an ngatanan nagtututdo ha aton nga hiya nahigugma han pagkaibaiba. An hingpit nga mga tawo magkakaada magkalainlain nga mga personalidad ngan mga abilidad. An kada usa magpapahimulos han kinabuhi sugad han gintuyo han Dios. An Pahayag 20:5 nasiring: “An iba han mga patay waray magkabubuhi tubtob nga natapos an usa ka yukot ka tuig.” Pariho han daku nga kadam-an han mga naluwas nga buhi ha Armagedon, an mga binanhaw magigin bug-os nga buhi kon makadangat hira ha waray-sala nga kahingpitan.
21. (a) Ano an mahitatabu ha kataposan han Usa ka Yukot ka Tuig nga Pagmando ni Kristo? (b) Ha kataposan ano an mahitatabu kan Satanas ngan ha ngatanan nga nasuporta ha iya?
21 An hingpit nga mga tawo maatubang ha kataposan nga pagsari. Ha kataposan han Milenyo, hi Satanas ngan an iya mga demonyo bubuhian tikang ha kahiladman ha halipot nga panahon ngan tutugotan nga maghimo han kataposan nga pangalimbasug nga ipahirayo an mga tawo kan Jehova. Labaw nga pabibilhan han iba an ira sayop nga mga hingyap kay ha gugma ha Dios, kondi ini nga pagrebelde pahahaliputon. Papatayon ni Jehova ini nga mga hakog upod ni Satanas ngan han ngatanan nga iya mga demonyo. An ngatanan nga mga magburuhat hin sayop hiton nga panahon mawawara na ha kadayonan.—Pahayag 20:7-10.
ANO AN IMO PAGBUBUHATON?
22. Ano an ginpapamulat mo nga bubuhaton ha Paraiso?
22 An kadayonan ihahatag ngada hadton nahigugma kan Jehova nga Dios ngan nag-uukoy ha Paraiso nga tuna. Haros diri naton maiisip an ira kalipay, ngan ikaw liwat makakaambit hini. An musika, mga dibuho, mga buhat han kamot—aw, an hingpit nga mga nahimo han katawohan malabaw pa gud ha gimaopayi nga mga buhat han pinakabantug nga mag-abtik hini nga sistema han mga butang! Aw, an mga tawo magigin hingpit ngan waray tubtuban an ira panahon. Hunahunaa an mahihimo mo sugad nga hingpit nga tawo. Hunahunaa, liwat, an hibabaroan mo ngan han imo igkasi mga tawo mahitungod han mga linarang ni Jehova—tikang ha binilyon nga mga galaksi ha uniberso ngadto ha gigugutiayi nga mga bahin han atomo. An ngatanan nga butang nga nahihimo han katawohan magpapalipay pa gud ha kasingkasing han aton mahigugmaon langitnon nga Amay, hi Jehova.—Salmo 150:1-6.
23. Kay ano nga an kinabuhi ha Paraiso diri gud makauuyam?
23 An kinabuhi hiton nga panahon diri makauuyam. Labaw nga magigin makaruruyag ito samtang nagpapadayon an panahon. Kitaa, waray kataposan an kahibaro han Dios. (Roma 11:33) Ha bug-os nga kadayonan, magkakaada labaw pa nga mahibabaroan ngan bag-o nga mga butang nga pag-aadman. (Eklesiastes 3:11) Ngan samtang nagpapadayon ka ha paghibaro mahitungod kan Jehova nga Dios, magpapadayon ka nga buhi—diri la ha pipira ka mga tuig kondi ha kadayonan!—Salmo 22:26.
24, 25. Kay ano nga sadang magkinabuhi ka yana uyon han kahibaro han Dios?
24 Diri ba an makalilipay nga tidaraon ha paraiso nga tuna takos han bisan ano nga pangalimbasug o ginbubuhat mo nga sakripisyo? Siyempre! Bueno, iginhahatag ni Jehova ha imo an yawi ngadto hiton matahum nga tidaraon. Iton nga yawi amo an kahibaro han Dios. Gagamiton mo ba ito?
25 Kon nahigugma ka kan Jehova, malilipay ka ha pagbuhat han iya kaburut-on. (1 Juan 5:3) Samtang nagpapadayon ka hiton nga kurso, pagkadamu han mga bendisyon nga maieksperiensiahan mo! Kon imo iaplikar an kahibaro han Dios, magdadara ito ha imo hin labaw kamalipayon nga kinabuhi bisan hinin masamok nga kalibotan. Ngan an tidaraon nga mga balos daku gud, kay ini an kahibaro nga nagtutugway ngadto ha kinabuhi nga waray kataposan! Yana an maopay nga panahon para ha imo nga magbuhat. Magin determinado ha pagkinabuhi uyon han kahibaro han Dios. Ipakita an imo gugma kan Jehova. Pasidunggi an iya baraan nga ngaran ngan pamatud-i nga hi Satanas buwaon. Dida hito, hi Jehova nga Dios, an Surok han totoo nga kinaadman ngan kahibaro, malilipay ha imo ha iya daku ngan mahigugmaon nga kasingkasing. (Jeremias 31:3; Sepania 3:17) Ngan hihigugmaon ka niya ha kadayonan!
SARIHI AN IMO KAHIBARO
Ano “an totoo nga kinabuhi?”
Katapos han Armagedon, ano an mahitatabu ha tuna?
Hin-o an babanhawon ha tuna?
Paonan-o magigin hingpit an katawohan ngan sasarihan ha kataposan?
Ano an imo paglaom mahitungod han Paraiso?
[Mga Pakiana]
[Piktyur ha pahina 188, 189]
Naglalaom ka ba nga mabuhi ha Paraiso, kon an kahibaro han Dios naglulukop na ha tuna?
