Job 2:1-13
2 Liutiha neʼe, iha loron neʼebé anju sira*+ halibur hamutuk no hamriik iha Jeová nia oin,+ Satanás mós tama iha sira-nia leet atu hamriik iha Jeová nia oin.+
2 Entaun Jeová husu ba Satanás: “Ó foin mai husi neʼebé?” Satanás hatán ba Jeová: “Haʼu foin laʼo bá-mai haleʼu mundu.”+
3 Jeová hatete ba Satanás: “Ó haree ona* haʼu-nia atan Job ka? Iha mundu, la iha ema ida hanesan nia. Nia mak ema neʼebé laran-loos no laran-metin,*+ hamtaʼuk Maromak no hadook an husi buat neʼebé aat. Maski ó husu haʼu atu haterus* nia+ la ho razaun, maibé nia nafatin laran-metin tebes*+ ba haʼu toʼo agora.”
4 Maibé Satanás hatán ba Jeová: “Se ema ida besik ona atu mate,* nia sei fó buat hotu neʼebé nia iha atu salva nia moris.*
5 Maibé agora, lolo Ita-nia liman bá no kona ninia ruin no isin, no nia sei hatete aat duni ba Ita.”+
6 Ho ida-neʼe, Jeová dehan ba Satanás: “Nia iha ona ó-nia liman!* Maibé ó keta halakon ninia moris!”
7 Nuneʼe, Satanás sai husi Jeová nia oin no haterus Job ho fisur aat barak+ husi ulun toʼo ain.
8 Job foti sanan-rai rohan ida hodi koi ninia isin, no tuur iha ahi-kadesan laran.+
9 Ikusmai nia feen hatete ba nia: “Ó sei laran-metin nafatin* toʼo agora ka? Hatete aat Maromak no mate deʼit bá!”
10 Maibé Job hatete ba nia: “Ó koʼalia arbiru hanesan feto neʼebé la iha neon. Ita hakarak simu deʼit buat diʼak husi Maromak neʼebé loos no lakohi simu buat neʼebé aat ka?”+ Kona-ba buat hotu neʼe, Job la halo sala ho ninia ibun.+
11 Job nia kolega naʼin-tolu rona kona-ba susar hotu neʼebé kona nia, no sira mai husi sira ida-idak nia rai. Sira mak Elifaz+ ema Teman, Bildad+ ema Suá,+ no Zofar+ ema Naama. Sira halibur hamutuk hodi bá atu fó kmaan ba Job no hatudu sira hanoin nia.
12 Bainhira sira haree Job husi dook, sira la koñese ona nia. Sira hahú tanis ho lian makaʼas no lees sira-nia unuk, no sira kari rai-rahun ba leten no ba sira-nia ulun.+
13 Tuirmai, sira tuur hamutuk ho nia iha rai ba loron hitu no kalan hitu. La iha ema ida mak koʼalia liafuan ida ba nia, tanba sira haree katak Job nia terus boot tebetebes.+
Nota-rodapé
^ Orj., “Maromak nia oan-mane sira”.
^ Orj., “tau ó-nia laran ba”.
^ Ka “no iha integridade”.
^ Orj., “tolan”.
^ Ka “nafatin kaer metin ba ninia integridade”.
^ Haree “Nefes” iha Glosáriu.
^ Orj., “Kulit troka ho kulit”.
^ Ka “Ó mak kontrola nia!”
^ Ka “Ó sei kaer metin nafatin ó-nia integridade”.
