Yesaya 33:1-24
33 A kba gi unu! Unu e feti nanga tra pipel, aladi den no kon feti nanga unu!Unu e bedrigi sma, aladi sma no bedrigi unu!
Te unu kba feti nanga den pipel, dan den o kon feti nanga unu.
Te unu kba bedrigi sma, dan sma o bedrigi unu.
2 Yehovah, wi e begi yu, du bun gi wi.
Na tapu yu wi e fertrow.
Langa yu anu fu yepi wi ibri m’manten.*Iya, ferlusu wi te wi de na nowtu.
3 Den pipel lon di den yere a b’bari.
Di yu opo fu du wan sani, den panya go na ala sei.
4 Neleki fa sprenka e nyan ala sani na a gron fu wan sma, na so sma o kon fu teki den gudu fu unu.Leki wan ipi sprenka den o lon kon teki den sani fu unu.
5 Yehovah o kon hei.A e tan na wan hei presi.
A o furu Sion nanga retidu.
6 A e sorgu taki yu abi wan bun libi.A e ferlusu yu furu leisi, a e gi yu koni nanga sabi èn a e leri yu fu abi bigi lespeki gi Yehovah.Disi na wan bigi gudu.*
7 Luku! Den dek’ati man fu den e bari na strati.Den boskopuman fu freide e bari krei.
8 Nowan sma de na den bigi pasi moro.Nowan sma e waka na strati.
Den feanti broko a ferbontu,den e si den foto leki soso sanièn den no e lespeki nowan libisma.
9 A heri kondre e sari èn a e drei gwe.
Libanon e syen, a pori.
Saron kon tron wan drei sabana.Ala den w’wiri fu den bon na Basan nanga Karmel fadon.
10 „Now mi o opo du wan sani”, na so Yehovah taki.„Now mi o sori mi makti.Now mi o sori o bigi mi de.
11 Na drei grasi de ini un bere èn na drei w’wiri unu o kisi leki pkin.
Un eigi denki o bron unu leki faya.
12 Den pipel o tron leki karkiston* di bron.
Sma o sutu faya gi den neleki maka di den koti puru na wan bon.
13 Un sma di de farawe, arki san mi o du!
Un sma di de krosbei, unu o abi fu taki dati mi abi furu makti.
14 Den sondari na ini Sion e frede.Den sma di drai baka gi Gado e beifi èn den e taki:
’Suma fu wi man tan na ini wan faya di e pori ala sani?
Suma fu wi man tan na ini wan faya di e bron ala ten?’
15 Wan sma de di e tan du san reti.A e taki sani di tru,a no e teki nowan sani di trawan kisi na wan kruka fasi,en anu no e teki nowan tyuku,en yesi no e arki te sma e seti sani fu kiri trawanèn a e tapu en ai fu di a no wani si nowan ogri.
16 A sma disi o tan na hei presi.A kibripresi fu en o de hei na tapu den bergi pe nowan sma man doro.Ala ten a o abi bredeèn noiti a o mankeri watra.”
17 Den ai fu unu o si wan kownu di abi furu glori.Den o si wan kondre di de farawe.
18 Na ini un ati unu o memre den sani di ben meki un frede:
„Pe a sekretarsi de?
Pe a sma de di ben wegi a moni fu pai belasting?
Pe a sma de di ben e teri den toren?”
19 Unu no o si na asranti pipel morodi e taki wan tongo di unu no man ferstan*èn di e taki neleki den e gagu.
20 Luku Sion, a foto pe wi e hori den alayari fesa!
Unu o si Yerusalem leki wan tanpresi pe nowan dyugudyugu deèn leki wan tenti di nowan sma man puru fu en presi.
Noiti den o hari den pen fu a tenti dati puruèn den no o hari nowan fu den t’tei fu en koti.
21 Drape a Maktiwan Yehovaho kibri wi neleki fa liba noso bradi kriki e kibri wan presi.Nowan sipi di e tyari fetman o man psa drapeèn nowan bigi sipi o man abra drape.
22 Bika Yehovah na wi Krutuman,Yehovah na a sma di e gi wi wet,Yehovah na wi Kownu.Na en o ferlusu wi.
23 Den t’tei fu den sipi fu den feanti o anga luslusu.Den no man hori a postu let’opo èn den no man opo den seiri fu den sipi.
Na a ten dati sma o prati den furu gudu di den teki fu den feanti.Srefi den lanman o man teki bun furu gudu.
24 Nowan sma di e tan na ini a kondre o taki: „Mi siki.”
Den sma di e tan na ini a kondre o kisi pardon fu den sondu fu den.
