Yesaya 27:1-13
27 Na a ten dati Yehovah o teki en bigi, tranga, srapu fet’owrufu dyuku Lefiatan,* a sneki di e grati psa es’esi.Iya, a o dyuku Lefiatan, a sneki di e kroipi.A o kiri a bigi meti di de na ini a se.
2 Na a ten dati un musu singi gi na uma:*
„Yu na wan droifidyari di e gi froktu fu meki bun win!
3 Na mi, Yehovah, e luku en.
Ala ten mi e gi en watra.
Nowan sma o man pori en,fu di mi e luku en dei nanga neti.
4 Mi ati no e bron moro.
Efu wan sma ben o prani makabusi nanga takru w’wiri na ini mi droifidyari, dan mi o feti nanga en.
Mi o trapu na tapu den makabusi nanga den takru w’wiri èn mi o bron den alamala.
5 A moro bun efu a sma kon na mi fortresi*
fu meki en bun nanga mi.Iya, a musu kon meki en bun nanga mi.”
6 Na ini a ten di e kon Yakob o teki rutu.Israel o gi bromki èn a o sproiti.Den o furu a heri kondre nanga froktu.
7 Fu san ede Israel musu kisi so wan hebi fonfon?
Fu san ede sma musu kiri en so?
8 Te yu o seni en gwe, yu o feti nanga en èn yu o bari en fu meki a frede.
Na a dei te a winti e wai fu owstusei, yu o yagi en gwe nanga wan bigi tranga winti.
9 Na so Yakob o kisi pardon fu en sondu.Ala den sani disi o psa nanga en te Gado o puru den sondu fu en:
A o meki den ston fu den altari kon deleki karkiston* di kon tron puiri.Nowan santa postu* noso altari fu bron switismeri o de moro.
10 Nowan sma o de moro na ini a foto di abi bigi skotu.Nowan sma o de na den weigron di o tron leki wan sabana.
Na drape pkin kaw o tan èn na drape den o nyan grasi.Den o nyan ala w’wiri puru na den taki fu en.
11 Te den pkin taki fu en kon drei,umasma o kon broko den puruèn den o bron den.
A pipel disi no koni.
Dati meki a Mekiman fu den no o sari den.A Mekiman fu den no o du nowan bun sani gi den.
12 Ai un Israelsma, neleki fa wan sma e naki den froktu puru na wan bon fu piki den wan-fru-wan na gron, na so Yehovah o piki unu na a ten dati na a heri kontren fu Gran Liba* te na a lagipresi pe Egepte-liba e lon.
13 Na a ten dati sma o yere a tranga b’bari fu wan tutu. Ala sma di de fu dede na ini Asiria èn den sma di panya na ini Egepte, o kon boigi gi Yehovah na tapu a santa bergi na Yerusalem.
