Yesaya 1:1-31
1 Yesaya,* a manpkin fu Amos, kisi wan fisyun di ben abi fu du nanga Yuda èn nanga Yerusalem na a ten di Kownu Usia, Kownu Yotam, Kownu Akas nanga Kownu Heskia ben e tiri Yuda. Disi na san Yesaya si:
2 Arki, un alamala na hemel èn meki ala sma na grontapu poti prakseri,bika Yehovah taki:
„Mi sorgu den pkin fu mi èn mi kweki den teleki den kon bigi,ma den opo densrefi teige mi.
3 Wan mankaw sabi a sma di bai enèn wan buriki sabi pe en basi poti wan n’nyan-baki gi en.Ma den Israelsma no sabi mi.*Mi eigi pipel e du leki den no abi ferstan.”
4 Bigi ogri o miti a sondu pipel disi!Den sondu fu den hebi srefsrefi.Den na pkin fu ogriman, takr’ati pkin!
Den gwe libi Yehovah.Den no sori lespeki gi a Santawan fu Israel.Den drai baka gi en.
5 Fu san ede unu e tan opo unsrefi teige mi? Pe mi musu naki unu ete?
Un kisi mankeri na un heri ede kbaèn un heri ati siki tu.
6 Fu un ede te na un ondrofutu nowan pisi fu un skin bun moro.
Ibri pisi fu un skin abi soro, sweri nanga marki fu a fonfon di unu kisi.Den soro fu unu no krin,* den no tai èn oli no de na den tapu fu dresi den.
7 A kondre fu unu tron wan brokopresi.
Den foto fu unu bron nanga faya.
Leti na un fesi, trakondre sma e nyan den sani di unu prani.
A kondre fu unu tron wan brokopresi neleki na feanti pori en.
8 Sma gwe libi na umapkin fu Sion leki wan kampu* na ini wan droifidyari.A de leki wan kampu na ini wan komkomro-gronèn leki wan foto di feanti lontu na ala sei.
9 Efu Yehovah di e tiri den legre no ben o meki sonwan fu wi tan na libi,dan wi ben o tron leki Sodomèn wi ben o gersi Gomora.
10 Un ogr’ati tiriman fu Sodom, yere san Yehovah e taki.
Un sma fu Gomora, poti prakseri na a wet* fu wi Gado.
11 Yehovah taki: „Sortu wini mi kisi fu den furu ofrandi fu unu?
Mi e tegu gi den manskapu di unu e tyari leki bron-ofrandi èn gi a fatu fu den meti di kisi bun n’nyan.Mi no e prisiri nanga a brudu fu den yongu mankaw, den yongu skapu, nanga den krabita di unu e tyari gi mi.
12 Di unu kon na mi fesi,suma aksi unu fu kon dyaso?Suma aksi unu fu wakawaka na ini mi dyari?
13 Un no musu tyari n’nyan-ofrandi moro gi mi. Den no warti noti.
Mi e tegu gi den switismeri di unu e bron,
den Nyunmun-fesa, den Sabat-dei nanga den spesrutu konmakandra di unu e hori.Mi no man si srefsrefi taki unu e hori den spesrutu konmakandra, ma na a srefi ten unu e du afkodrei.
14 Wan sani di mi no lobi srefsrefi, na den Nyunmun-fesa nanga den tra fesa di unu e hori.
Den kon de leki wan hebi gi mi.Mi weri fu tyari den.
15 Te unu e opo un anu fu begi mi,mi no o luku unu.
Awinsi unu e begi mi furu tron,tòg mi no o arki.Un anu lai brudu.
16 Un wasi unsrefi èn meki unsrefi kon krin.No meki mi si den ogri sani moro di unu e du.Tapu nanga den ogri di unu e du.
17 Leri fu du bun. Du san reti.Pir’ai gi sma di e pina trawan.Koti krutu na wan reti fasi gi pkin di no abi p’pa.Opo taki gi uma di den masra dede kba.”
18 Yehovah taki: „Grantangi, kow seti sani kon bun baka.
Awinsi den sondu fu unu redi leki brudu,tòg den o kon weti leki snew.Awinsi den redi leki redi krosi,tòg den o tron leki weti skapu-w’wiri .
19 Efu unu e arki mi èn unu e du san mi taki,dan unu o nyan bun fu a kondre.
20 Ma efu unu no wani arki èn unu e opo unsrefi teige mi,dan sma o kiri unu nanga fet’owru.Bika Yehovah srefi taki dati nanga en eigi mofo.”
21 Luku fa a foto di ben e dini Gado tron wan huru-uma now!
A ben furu nanga retiduèn ret’ati sma ben e tan na ini en.Ma now na soso kiriman e tan drape.
22 A solfru fu unu kon doti.A biri* fu unu no bun moro fu di a moksi nanga watra.
23 Den granman fu unu tranga-ede èn den e wroko makandra nanga den fufurman.
Ibriwan fu den lobi teki tyuku èn ala ten den wani taki sma musu gi den sani.
Den no e koti krutu na wan reti fasi gi den pkin di no abi p’paèn den no e luku a krutu-afersi fu uma di den masra dede kba.
24 Fu dati ede a tru Masra, Yehovah di e tiri den legre,a Maktiwan fu Israel, taki:
„A musu kba now! Mi o puru den gensman fu mi na pasièn mi o puru atibron na tapu den feanti fu mi.
25 Mi o strafu unuèn mi o bron ala a doti fu unu puru.*Iya, mi o meki unu kon krin.
26 Mi o gi unu krutuman baka leki fa a ben de biginbiginèn mi o gi unu raiman baka leki fa a ben de fosi.
Dan sma o kari a foto fu unu Foto fu Retidu noso Foto di e dini Gado.
27 Na retidu o ferlusu Sionèn den sma di drai go baka o kisi ferlusu te ala sani e psa na wan reti fasi.
28 Den sma di opo densrefi teige en nanga den sma di du sondu o lasi den libi na a srefi ten.Den wan di gwe libi Yehovah o dede.
29 Unu o kisi syen fu di unu anbegi falsi gado na ondro den bigi bon di ben moi gi unuèn na ini den dyari di unu ben lobi.
30 Unu o kon de leki wan bigi bon di abi soso drei w’wirièn leki wan dyari di no abi watra.
31 Wan tranga man o kon de leki drei grasi*èn den sani di a e du o de leki wan pkin faya.Den ala tu o bron makandraèn nowan sma o man kiri a faya.”
Futuwortu
^ Yesaya wani taki „Ferlusu fu Yehovah”.
^ Noso: „no sabi den basi”.
^ Hebrewtongo: „Sma no pers den soro fu unu fu puru a doti na ini”.
^ Noso: „afdaki”.
^ Noso: „den leri”.
^ Noso: „biri di meki fu tarwe”.
^ Sobun, a o bron den neleki fa sma e bron gowtu noso solfru fu meki den kon krin.
^ Noso: „vlas-t’tei”. Disi na wan sortu t’tei di e bron makelek.
