Proverbios 7:1-27
7 Wawáy, nisqasniyta kasukuy,kamachisqasniytapis waqaychay.+
2 Kamachisqasniyta kasukuy, kausankitaj.+
Yachachisusqayta* sumajta waqaychay, ñawi papaykita jina cuiday.
3 Chaykunataqa dedosniykiman wataykukuy,sonqoykimantaj qhelqaykuy.+
4 Yachaytaqa niy: “Qan hermanay kanki”, nispa,sumajta tanteaytapis niy: “Qan parientey kanki”, nispa.
5 Chaykunamin chay mana allin kausayniyoj warmimanta jarkʼasonqa.+
Qhencha warmimanta jarkʼasonqa, miskʼi parlayninmantawan.+
6 Noqaqa wasiypi kashaspa ventanaymanta qhawasharqani.
Ventanaypa rejillasninmanta qhawasharqani.
7 Mana yachayniyojkunata qhawasharqani.
Jóvenes ukhupitaj uj mana allin yuyayniyoj joventa rikorqani.+
8 Chay jovenqa callenta pasasharqa uj warmej esquinan chayta,chantá chay warmej wasin ladoman rerqa.
9 Inteqa chinkaykusharqaña, tardeña karqa.+
Chʼisiyaykusharqaña, laqhayaykojña risharqa.
10 Chantá rikorqani chay jovenman uj warmi chimpaykusqanta.
Chay warmeqa khuchi warmi jina* pʼachallisqa kasharqa.+ Sonqonqa mana jinalla, engañananpaj churasqa.
11 Chay warmeqa manchay habladora, nisqanwan atipakun.+
Mana wasinpi sayanchu.
12 Uj ratoqa callepi purishan, chantá plazapiñataj purishan.
Payqa sapa esquinapi qharista wateqaspa sayan.+
13 Chay warmeqa chay joventa japʼiytawan muchʼaykun.
Mana pʼenqarikuspataj chay joventa nin:
14 “Khuska mikhurikuy ofrendata jaywanay karqa.+
Chay jaywasaj nisqaytaqa kunan pʼunchay juntʼaykuni.
15 Chayrayku qanwan tinkoj llojsimorqani.
Qantapuni makʼasharqayki, kunantaj taripayki.
16 Camayta sumaj qhatanaswan mastʼaykuni.
Egiptomanta coloresniyoj lino telawan mastʼaykuni.+
17 Camayman chʼajchuykuni sumaj qʼapayniyoj mirrata,* aloesta,* canelatawan.+
18 Jamuy, sutʼiyanankama munakuyninchejwan machaykuna.
Munanakusqanchejpi khuska karikuna.
19 Qosayqa mana wasipichu kashan,karuman viajan,
20 qolqetapis apakun.
Payqa cielopi killa juntʼita* kashajtinraj kutimonqa”, nispa.
21 Ajinata parlaykuspa chay warmeqa chay jovenpa umanta muyurparichin,+miskʼi parlaywan sonqonta suwarparin.
22 Chay joventaj ujllata chay warmej qhepanta rin, imaynatachus toropis ñakʼachikoj* rillan ajinata.
Imaynatachus uj wampupis cepopi* castigasqa kananpaj rin ajinata.+
23 Chaymantataj ujllata uj flecha higadonman satʼirpakun.
Imaynatachus uj pʼisqopis usqhayllata trampaman phawaykun, ajinata chay jovenqa mana reparakunchu chay ruwasqanqa wañuyman chayachinanta.+
24 Kunanqa wawasníy, uyariychej.
Allinta uyariychej parlasqayta.
25 Amapuni saqeychu sonqoyki chay warmej ñanninman aysakunanta.
Amapuni chay warmej ñanninman wistʼuykuychu.+
26 Chay warmeqa ashkhastaña urmachispa wañuyman chayachin.+
Payqa ashkhastaña wañuchin.+
27 Wasenqa Sepulturaman* pusaj ñan,wañuypa ukhu ukhu cuartosninman chayan.
Sutʼinchaykunasnin
^ Chayri “Leyniyta”.
^ Khuchi warmi nispaqa parlashan qhariswan puñuykoj warmimanta, astawanqa qolqerayku.
^ Aloeqa sumaj qʼapayniyoj sachʼa. Unayqa chay sachʼamanta perfumeta ruwaj kanku.
^ Killa juntʼa: waj lugarespi ninku lleno, pura.
^ Ñakʼay: waj lugarespi ninku degollay, wañuchiy.
