Kingdom News No. 34
Akin a Say Bilay so Ontanlan Napno na Saray Problema?
Kasin posibli so paraison andiay problema?
OMPAPALALO IRAY SERYOSON PROBLEMA—AKIN?
Saray totoo so walaan a naynay na saray problema. Anggaman dakel so manisip a nayarian na modernon teknolohiya a solbaren iratan, ompapalalo iray seryoson problema.
Krimen: Pigpigara so manliknan maligen a manakar ed saray lansangan odino anggan manyodyorong ed dilin ayaman da. Diad sakey a bansa ed Europa, ngalngali 1 a too ed kada 3 so biktima na sakey a krimen ed apalabas a taon.
Kaliber-liber: Say polusyon ed dagem, dalin, tan danum so ompapalalon onkakayat. Diad maaligwas iran nasyon, sakey a kakapat na totoo so andian na malinis a danum.
Inkaduka: Lalon ondarakel so mairap tan naeerasan a totoo nen say kapiganman. Masulok a 90 porsiento na totoo ed arum a daldalin so manbibilay ed inkaduka; 30 porsiento ed komikimey na mundo, ngalngalin 800 milyon, so andian na trabaho odino anggapoy magenap a trabaho—tan ombabaleg so bilang.
Eras: Anggaman no sikayon mismo so walaan na magenap a kanen, ondaraak a minilyon so andian. Diad onaaligwas iran bansa, kada taon et walan-walay 13 milyon a totoo, kaslakan et ugugaw, ya ompapatey lapud saray epekto na eras.
Bakal: Nilasus nilibo so pinatey ed apalabas ya impanlalaban na tribo. Tan diad koma-20 siglo, saray bakal so amatey na masulo-sulok a sanlasus milyon a totoo.
Arum Niran Problema: Diad saratan a probleman asalambit ed tagey, iyarum so ompapalalon kagegeba na pamilya, idarakel na agkasal a kainaan, idaraak na andiay ayaman, ilalaknab na panangabuso’d druga, ikakasmak na imoralidad. Diad tua, sakey a datin membro na kabenite na E.U. so angikuan: “Wala so dakel a tuloy iran tanda na . . . kabubulok na sibilisasyon.” Diad apalabas a 30-taon, say populasyon na E.U. so binmaleg na 41 porsiento, balet say marawal a krimen so maples a dinmaak ya asabi toy 560 porsiento, saray impananak ya agkasal so dinmaak na 400 porsiento, say diborsyo so 300 porsiento, say bilang na manbibitkel a katayatdang et masulok a 200 porsiento. Say kipapasen so miulibay ed arum iran nasyon.
Akin ya Ompapalalo Iray Problema?
Say Manamalsa tayo so mangitatarok na ebat. Tatawagen na Salita To irayan napnoy-probleman panaon a “saray kaunoran ya agew,” sakey a peryodo sano “onsabi so saray panaon a maatap.” (2 Timoteo 3:1) Kaunoran iran agew na anto? Bueno, sasalambiten na Biblia so “anggaan na mundo.”—Mateo 24:3, King James Version.
Say ondarakel iran problema natan so mabitar a paneknek a say anggaan na sayan sistema na bengabengatla so asingger la, pati say anggaan na karelmengan tan saraman so responsabli ed satan. (Mateo 24:3-14; 2 Timoteo 3:1-5; Apocalipsis 12:7-12) Agla mabayag et onsalet so Dios tan seguroen ya amin a problema natan so sigpot a nasolbar.—Jeremias 25:31-33; Apocalipsis 19:11-21.
SARAYAN RELIHYON NA MUNDO SO ONSASAEW
Imbes ya ontulong ed panolbar ed saray problema natan, lalo nin pauugesen natan na saray relihyoson sistema na mundo iratan. Legan na saray bakal, manpapateyan iray Katoliko, saray Protestanti so amatey ed saray Protestanti, nanpapateyan iray totoo a nilasus nilibo ed bilang! (Nengnengen so litrato ed kawigi.)
Kasin onla si Jesus ed bakal a walaan na paltog odino kampilan tan mamatey ed saray babangatan to lapud say nasyonalidad da so midumaan ed sikato? Peteg ya andi! “Say mangaro ed Dios,” ibabaga na Biblia, “aroen to met so agi to.” (1 Juan 4:20, 21) Sarayan relihyon na mundo so onsasaew a manggawa ed satan. “Ipapaliwawa ra ya amta’ra so Dios, ingen dia ed saray gawa sikato so benegan da.”—Tito 1:16.
Niyarum ni, diad agpangitatandoro’d saray estandarte na Biblia ed moralidad, saray relihyon na mundo so angarum ed makapakebbiew a kagegeba na moral ed sankamundoan.
Inkuan nen Jesus a nayarian yon ibaga’y palson relihyon manlapud tuan relihyon ‘diad panamegley na saray bunga to’—no anto so gagawaen na saray membro to. Inkuan to met: “Balang kiew ya agmanbunga na maong a bunga sikato so nabatang tan ibontok ed apuy.” (Mateo 7:15-20) Ipapaseseg na Salitay Dios ed sikatayo ya onarawi manlapud relihyon a manbubungay makapoy tan sirin mamapaarap ed kadederal.—Apocalipsis 18:4.
Say Tuan Relihyon so Ag-onsasaew
Say Tuan relihyon so “mamapawala na maabig a bunga,” nagkalautla ed aro. (Mateo 7:17; Juan 13:34, 35) Anton nankakasakey ya internasyonal ya impanaagi na Kristianos so mangaagamil na ontan ya aro? Siopay mangipupulisay a mamatey ed saramay kabiangan na dili ran relihyon odino anggan siopaman ni?—1 Juan 3:10-12.
Saray Tasi nen Jehova so walaan na reputasyon ed pamapawala’d satan a “maong a bunga.” Diad interon globo, diad masulok a 230 a daldalin, ‘pipitpiten daray kampilan da a pagmaliwen iran lokoy.’ (Isaias 2:4) Say aro ra’d totoo so nipapanengneng met ed katotolok da’d ganggan nen Kristo ed pangipulong na “maong a balita” na Panariay Dios ed sankamundoan. (Mateo 24:14) Sikara met so mangaagamil tan mangidadalangirang na atagey iran moral ya ibabangat na Biblia.—1 Corinto 6:9-11.
Say tuan relihyon so ag-onsasaew. Ipapaarap toray totoo ed mogmon Sakey a makasarag a manolbar ed saray problema na katooan. Agla mabayag et satan a Sakey so mangitarok na sakey ya interon balon mundo. Siopa itan a Sakey? (Ipangasin nengnengen so beneg a pahina.)
SEGURADO SO PARAISON ANDIAY PROBLEMA
No nayarian mo, agmo ta solbaren so amin a probleman mamapairap ed katooan? Siempre gawaen mo! Kasin isipen tayon agnagawaan na maaron Manamalsa tayo, say mogmon walaan na pakayari tan karunongan a manolbar ed saray problema na katooan?
Ipaparungtal na Biblia a say Dios so onsalet ed saray kurang na too diad panamegley na mangatatawen a gobierno to ed lima nen Jesu-Kristo. “Buybuyaken” na satan iray marelmeng a gobierno ed dalin. (Daniel 2:44; Mateo 6:9, 10) Tan akin? Diad pangipapaarap ed Dios, inyebat na salmista: “Pian saray totoo nakabatan da a sika, a say ngaran mo a bokbokor et JEHOVA, sankatageyan ka a manuna nen say amin a dalin.”—Salmo 83:18.
Sano mangangga iyan mundo, kasin walaray niliktar? “Say mundo mangan-ga,” ibabaga na Biblia, “sabalet so mangonor ed linawa na Dios onsiansia lawas.” (1 Juan 2:17) Iner so panayaman ya ando lan ando na sarayan niliktar? “Saray matunong tawiren to so dalin tan manayam diman lawas,” so ebat na Biblia.—Salmo 37:9-11, 29; Uliran 2:21, 22.
Diad balon mundo na Dios, “andi gapo la naani ipatey, tan angapo la naani onnangis o dageyem, o ot-ot.” (Apocalipsis 21:4) Anggapolay krimen, inkaduka, eras, sakit, ermen, odino ipapatey! Agayla, anggan saray inaatey so nabilay lamet! “Wala naani kioli ed bilay.” (Gawa 24:15) Tan say dalin a mismo so pagmaliwen a literal a paraiso.—Isaias 35:1, 2; Lucas 23:43.
Antoy nepeg tayon gawaen pian pangayagaan so bilay ed balon mundo na Dios? Inkuan nen Jesus: “Saya sikato so andiangaan a bilay, ya naantaan da ka a saksakey a tua’n Dios, tan saman so inbakim, salanti Jesu-Cristo.” (Juan 17:3) Minilyon a matuan-impanpuson totoo ed interon mundo so mangaala ed satan a pikakabat. Saya so manggagawa’d sikaran natalonaan so dakel a personal iran problema ra natan, balet lalon importanti, satan so mangiiter ed sikara na sigpot a talek a saray probleman agda nayarian a resolbien so sigpot a narimedyoan ed balon mundo na Dios.
[Picture Credit Line ed pahina 2]
WHO nilitrato nen P. Almasy
[Picture Credit Line ed pahina 3]
Jerden Bouman/Sipa Press