No Akin ya Importante Iyan Libro

1. Diad libron Oseas, anton kualidad nen Jehova so mabitabitar, tan panon to itan ya inyilustra?

 KASIN si Jehova et maaron Manuley? Kasin iyaansakit to ray mandadayew ed sikato? On, atan so naaralan tayo ed libron Oseas. Naaralan tayo dia so sakey ya balibalin kualidad nen Jehova: say panangasi. Bilang ilustrasyon, inusar nen Jehova so panangaro nen Oseas ed agmatoor ya asawa to, pian idanet ya sikatoy akaparaan ya mangipanengneng na panangasi anggano anggapo ni pakapatnagan ya say sakey et magbabawi. (3:1) Panamegley na sayan ilustrasyon, nanengneng tayo ya talagan balbaleg so panangasi nen Jehova. Malinew ya “mabulbulos” iran aaroen nen Jehova anggano aliwa ran matoor.—14:​1-4.

2. Anto ni naaralan tayo ed libron Oseas nipaakar ed si Jehova?

² Naaralan tayo met ed libron Oseas so arum nin kualidad nen Jehova. Sikatoy matoor tan maanos. (2:​19, 20) Anggano aminpigapigan tinaynan na saray Israelita si Jehova pian mandayew ed arum a dirios, siansia nin ‘guguyoren ira nen Jehova panamegley na saray bedber na aro.’ (11:​1-4) Pero no ag-ira magbabawi tan tuloytuloy iran manggawa na kaugsan, walay anggaan na pananos to. (10:​9-12) Kabusol nen Jehova iray mansimpisimpitan. Pero papablien to so panagdayew na saramay walaan na matoor a panangaro ed sikato.—6:​4, 6; 10:​1, 2.

3. Anton importantin leksion so naaralan tayo ed libron Oseas?

³ Diad interon libro na Oseas, walay importantin leksion ya ibabangat nen Jehova: No manakar tayod saray “dalan nen Jehova,” sikatayo lanlamang so nagunggonaan. (14:9) Say inisip na saray totoo ed Israel a et mas natulongan ira na arum a bansa tan arum a dirios nen say si Jehova. (7:11; 9:10; 12:1) Pero agda amta ya traidoren lanlamang ira na saraman ya bansa, tan anggapoy nagawaan na saray palson dirios pian tulongan ira. (8:​8, 9; 10:5) Duma balet si Jehova ta lanang to ran aasikasoen tan insipan to ya bendisyonan to ra.—2:​8, 18.

4. Anto ran importantin impormasyon parad saray Kristiano so nabasa tayo ed libron Oseas?

⁴ Diad libron Oseas, dakel met so importantin impormasyon ya nabasa tayo parad saray Kristiano. Wala ray teksto dia ya inaon nen Jesus tan na arum ya apostol diad Kristianon Griegon Kasulatan. Nabasa met dia iray propesiya ya asumpal la. (Nengnengen so  Kahon 28-A.) Singa bilang, oniay impasakbay nen Jehova nipaakar ed Mesias: “Tinawag ko so ana’ko ed Ehipto.” (11:1) Asumpal iya nen inawit si Jesus ed Ehipto tan impawil ed Israel kayari impatey nen Herodes. (Mat 2:​14, 15) Impaliwawa nen apostol Pablo ya say kabaliksan na arum a propesiya ed Oseas et wala ray aliwan Israelita ya magmaliw ya totoo na Dios tan natawag ya “ananak na mabilay a Dios.” (1:10; 2:23) Tan nakaiba day Jesus ya manuley ed tawen.—Rom 9:​25, 26; ikompara so 1Pe 2:​9, 10.

Makatulong Iran Impormasyon

5. Antoy amta tayo nipaakar ed si propeta Oseas?

⁵ Nansulat: Say ngaran ya Oseas et pinatikey ya Hosaias, ya say kabaliksan to et “Inliktar nen Jah; Si Jah so Angiliktar.” (1:​1, paimanod leksab) Sikatoy sakey ya propeta diad amianen a panarian na Israel, pero saray arum a propesiya to et para met ed abalaten a panarian na Juda. Sikatoy nanlingkor ya propeta nen manga 804 B.C.E. anggad kayari na 745 B.C.E. Labay ton ibaga, sikatoy nanlingkor ya propeta na manga 59 taon. Nayarin asumpal nen Oseas iyan libro diad kapegleyan na 745 tan 740 B.C.E. b Kabansag ton nampropesiya si Amos tan Oded ya propeta ed Israel, tan si Isaias tan Miqueas ya propeta ed Juda.

6. Anto ray situasyon ed Israel legan ya propeta ditan si Oseas?

⁶ Situasyon ed saman ya panaon: Diad dakel a taon, matoor ya sinumpal nen Oseas so kimey to bilang propeta ed Israel, anggano aglabay na saray Israelita so manlingkor ed si Jehova tan dakdakel so problema na bansa da. Nen ginmapon manpropesiya si Oseas, say mauges ya Arin Jeroboam II so manuuley ed Israel. Anggaman ontan, aminpigapiga iran analo ed guerra tan yinmaman so bansa ra. (2Ar 14:​24-28) Balet tinaynan na Israel si Jehova. Inisip da ya inmaligwas so bilay da lapud si Baal. No dadayewen da iyan palson dios ed templo ya ginawa parad sikato, manbuabuanges tan manggagawa ra na imoral. (4:​11-13) Nen inatey lay Jeroboam, magulogulo so Israel ta nansasamsaman na totoo so pagmaliw ya ari. Kaslakan, iplaplano dan pateyen so akatronon ari. Tan no siopa may onsalat ya ari, ontan met so gawaen dad sikato. (2Ar 15:​8-20) Saraman ya arari et labay day mialyansa ed Ehipto tan Asirya, pero anggapod sikara so nanmatalek ed si Jehova.

7. Antoy imbaga nen Jehova ed saray totoo ed Israel panamegley nen propeta Oseas?

⁷ Panamegley nen Oseas, impasabi nen Jehova ed Israel so basiyan to no akin ya ipapasen to ran mauges. Sinansakey to iray mauges ya gagawaen da, tan imbaga to ya anien da so makapuy ya resulta na saratan. (4:​1, 2, 9) Pero, inusar met nen Jehova si Oseas pian ipanonot ed saray totoo ed Israel ya sikato et mapangasin Dios tan mabulos ya mamerdona. Aya la so sampot ya akikasi si Jehova ed sikara pian manguman ira, antis ton inabuloyan so Asirya ya sakopen so Samaria.

8. Panon so impansulat nen Oseas ed libro to?

⁸ Arum nin detalye: Halos amin ya karga na libron Oseas et insulat ya singa tula. Mapuersa iran salita so inusar nen Oseas pian ibaga ed saray totoo ya aliwliway gagawaen da. Pero angusar met na maabig iran salita pian napakiwas iray totoo ya ompawil ed si Jehova. (10:1; 14:​1, 2) Dakel met so inusar ton ilustrasyon odino panangikompara.—4:16; 5:​13, 14; 6:​3, 4.

Saray Karga na Libro

9. Panon ya inusar nen Jehova si Oseas pian natalosan na saray Israelita ya inar-aro To ra tan labay To ran perdonaen?

⁹ Inusar nen Jehova si Oseas tan say agmatoor ya asawa to pian natalosan na saray Israelita ya inar-aro To ra tan labay To ra ya perdonaen. (1:1–3:5) Imbaga nen Jehova ed si Oseas ya mangasawa na bii a magmaliw ya imoral. (1:2) Inasawa toy Gomer tan awalaan ira na anak a laki. Balet amay sinmublay ya duaran anak nen Gomer et aliwan si Oseas so ama. c Say kabaliksan na kangaranan na taloran ugugaw et mangipapanengneng ya ukomen tan ipulisay nen Jehova so Israel. Diad kapitulo 2, impasakbay nen Jehova ya kayari ton dusaen iray agmatoor ya Israelita, mabulos to ran perdonaen tan maaro to ran tulongan pian makapawil irad sikato. Pian natalosan da ya sikatoy akaparaan ya mamerdona ed sikara, imbaga tod si Oseas ya alaen tan aroen to lamet so agmatoor ya asawa to.—3:1.

10-11. Anto ray basiyan nen Jehova no akin ya dusaen to iray Israelita?

¹⁰ Impasakbay nen Jehova ya dusaen toy Israel. (4:1–13:16) Imbaga nen Oseas so basiyan nen Jehova no akin ya ipapasen ton mauges so Israel. Sinansakey to iray kasalanan da. (4:​1, 2) Binitla to met ya nankasalanan so Juda. (5:5) Pinaseseg nen Oseas so Israel ya ompawil ed si Jehova. (6:1) Pero ag-ira dinmengel tan kinmerew iray tulong ed arum a bansa. (7:11) Lapud satan, anien da so makapuy ya resulta na agda impanmatoor. (8:​7-10) Dusaen tan ipulisay ira nen Jehova.—9:17; 10:15.

¹¹ Impanonot nen Jehova ed saray Israelita ya ag-anguman so panangaro to ed sikara. (11:​1-3) Pero imbaliwala da itan tan agda binales so panangaro to. (11:7; 12:1) Lapud tuloytuloy iran nanrebelde ed si Jehova, naderal so Samaria, say capital city da.—13:16.

12. Antoy gawaen nen Jehova no ompawil iray totoo tod sikato?

¹² Sampot ya kerew ya ompawil irad si Jehova. (14:​1-9) Papasesegen nen Jehova iray totoo to ya ompawil ed sikato. No ondengel ira, insipan to ya perdonaen, kasian, tan aroen to ira.