No Akin ya Importante Iyan Libro

1. Anton balikas so aminpigan abitla ed libron Joel, tan antoy tutukoyen na satan?

 DIAD libron Joel, ipapaamta nen Jehova ed amin—lalo lad saray lingkor to—iray importantin detalye nipaakar ed agew to. Diad tua, nayarin say libron Joel so unonan pakabasaan ed Biblia na balikas ya “agew nen Jehova.” Limaran beses itan ya abitla ed sayan libro. (1:15; 2:​1, 11, 31; 3:14) No nabibitla so “agew nen Jehova” diad Biblia, ontutukoy itan ed nanduruman peryodo na panaon, ya no iner et dudusaen nen Jehova iramay onkokontra ed sikato tan ipapanengneng to ya sikato so saksakey ya tuan Dios.

2. Panon ya makatulong so arum ya libro na Biblia pian natalosan tayo so propesiya nen Joel nipaakar ed “agew nen Jehova”?

² Wala ray importantin impormasyon ya nabasad arum ya libro na Biblia ya makatulong pian natalosan tayo so propesiya nen Joel nipaakar ed “agew nen Jehova.” (Nengnengen so  Kahon 29-A.) Singa bilang, impropesiya nen Joel so iyataki na saray simbolikon duron. Asumpal itan ya propesiya nen 607 B.C.E. nen inmataki iray sundalo ya taga Babilonia (saray Caldeo) ed Juda tan dineral day Jerusalem. Kinompirma itan nen Jeremias tan Esdras ed saray insulat da. (Joe 1:6; 2:​1, 8-11, 20, 25; ikompara so 2Aw 36:​17, 19; Jer 32:43.) Kayari na dakel ya taon, nen deneskribe nen Jesus so nipaakar ed panangukom ya nagawa ed arapen, imbaga to iray salitan mipara ed inusar nen Joel. (Joe 2:31; Mat 24:​29, 30) Tan nen nikalbo so masanton espiritu ed saray disipulo nen Pentecostes 33 C.E., imbaga nen apostol Pedro ya impropesiya itan nen Joel. (Joe 2:​28-32; Gaw 2:​16-21) Saraman ya disipulo et nambilay legan na “kaunoran iran agew” na Jerusalem tan say templo. Kalabas na saray taon, diad “agew nen Jehova” nen 70 C.E., inusar To iray Romano pian deralen so syudad. Ontan met, imbaga nen apostol Pedro tan Pablo ya diad arapen et walay onsabin “agew nen Jehova.” No nagawa la itan, sigpot lan nasumpal so propesiya nen Joel.—2Pe 3:​12, 13; 1Te 5:​2-4.

3. Anto ran bansa so dinusa nen Jehova, tan akin?

³ Imbaga nen Joel ya “asingger lay agew nen Jehova” parad saray bansa ya amairap ed saray totoo na Dios. (3:​2-6, 12, 14, 19) Insulat to so propesiya nipaakar ed panusa nen Jehova ed Tiro, Sidon, Edom, Filistia (Asdod, sakey ed saray manunan syudad na satan), tan Ehipto. Mipara iray propesiya nen Joel ed arum nin propesiya na panangukom ed sarayan bansa. (Ikompara so Eze 29:​14-18; Am 1:8; Mal 1:​3, 4.) Base ed history, tinmua irayan propesiya. Kanian makaseguro tayo ya saray impropesiya nen Joel nipaakar ed arapen et nagawan nagawa.

4. Base ed libron Joel, antoy nepeg tayon gawaen pian niliktar?

⁴ Panamegley na libron Joel, naamtaan tayo no antoy nepeg tayon gawaen pian makaliktar ed “agew nen Jehova.” Nabasa ditan ya “balang sakey ya ontatawag ed ngaran nen Jehova et niliktar.” (2:​31, 32) Inaon nen Pablo itan ya imbaga nen Joel, tan impaliwawa to ya ontan so nepeg ya gawaen na saray Kristiano pian niliktar ira. Say sakey ya paraan pian nagawaan da itan et diad pangipanengneng day pananisia ed si Jehova.—Rom 10:​13, 14.

5. Antoy naaralan tayod libron Joel nipaakar ed si Jehova?

⁵ Ipapanonot ed sikatayo na libron Joel ya si Jehova et “mapangasi, matantan a manpasnok tan abalbaleg so matoor a panangaro to.” (Joe 2:13; Ex 34:6) Papasesegen to ray lingkor ton tinmaynan ya manguman ira tan ompawil ed sikato, ta labalabay to ran perdonaen tan bendisyonan. (2:​12-14, 21) Pero lapud Dios na hustisya si Jehova, agto abuloyan ya agnadusa iramay agmagbabawi tan mamapairap ed totoo to.—1:15; 3:19.

Makatulong Iran Impormasyon

6. Kapigan tan iner so posiblin nanlingkoran nen Joel bilang propeta?

⁶ Nansulat: Pigaran detalye labat so amta tayo nipaakar ed si Joel. Singa bilang, say ngaran to, tan say kabaliksan na satan ya “Si Jehova so Dios.” Wala ray insulat nen Joel nipaakar ed Juda, Jerusalem, tan say templo. Kanian nayarin sikatoy nanayam ed Jerusalem tan nampropesiya ed Juda. (1:​9, 14; 2:​17, 32; 3:​1, 2, 16-20) Diad Biblia, say libron Joel et walad pegley na Oseas tan Amos, kanian posible ya kasabayan ira nen Joel ya nanlingkor bilang propeta. Nayarin wala ray inaon nen Amos ya insulat nen Joel. Asumpal nen Amos so libro to nen manga 804 B.C.E. (Joe 3:16; Am 1:​1, 2) No ontan sirin, nayarin mas akaunan insulat nen Joel iray propesiya to nen say si Amos. Nayarin asumpal iratan ya insulat nen Joel nen manga 820 B.C.E. No susto irayan petsa, posible ya walay panaon ya akapansabay so ministeryo nen Joel tan Jonas.

7. Anton mensahe so impasabi nen Joel, tan panoy paraan na impansulat to?

⁷ Situasyon ed saman ya panaon: Nen 820 B.C.E., si Uzias (tinawag met ya Azarias) so ari na Juda. Sikatoy “nantultuloy a nanggaway duga ed pakanengneng nen Jehova.” Legan na uley to, aminpigan analo ed guerra so Juda tan yinmaman so bansa da. (2Aw 26:​3-14) Balet dakel ed saray sakop to so mandadayew ed saray palson dios. (2Ar 15:​1-4) Kanian nipanpanaon so mensahen impasabi nen Joel ta pinaseseg to ray totoo ya magbabawi tan si Jehova labat so dayewen da. (2:​1, 12) Diad sulat nen Joel, sikatoy amili na saray salita ya malinew ya mangipasabi na kanonotan tan liknaan nen Jehova. Pian nidanet to ray importantin impormasyon, inulit-ulit ton imbaga iratan tan sikatoy angusar na saray nikadkaduman ilustrasyon ya mainomay ya natandaan, singa samay nipaakar ed saray simbolikon duron. (1:​4, 6; 2:7) Tua, seryoso so mensahen insulat nen Joel. Pero ipapaseguro met na saya ed sikatayo ya no dusaen nen Jehova iramay onkokontra ed sikato, agto ipilanor iramay matoor ya lingkor to.

Saray Karga na Libro

8. Base ed samay pasingawey, antoy epekto na inyataki na saray simbolikon duron?

 ⁸ Inupot na saray simbolikon duron iray tanaman ed dalin. (1:1–2:11) Insulat nen Joel so makapataktakot ya pasingawey ya anengneng to nipaakar ed saray duron ya mangupot ed amin ya suplay na naakan. Lapud satan, anggapo met lay nibagat na totoo ed templo nen Jehova. Sarayan duron et inkompara ed sakey a nasyon ya “makapanyari tan agnabilang” tan ed armada ya “manusumpal ed salita [na Dios]” diad “agew nen Jehova.”—1:6; 2:11; nengnengen so  Kahon 29-B.

9. Antoy imbaga nen Jehova ed saray totoo to?

⁹ Imbaga nen Jehova ed totoo to ya magbabawi ra tan ompawil irad sikato. (2:​12-32) No magbabawi ra, kasian to ra tan agto ra dusaen. Aliwan satan labat. Perdonaen tan bendisyonan to ra, tan ikalbo toy espiritu to ed sikara.

10. Antoy gawaen nen Jehova ed saramay bansa ya amairap ed totoo to?

¹⁰ Ukomen nen Jehova iray bansa ya amairap ed totoo to. (3:​1-21) Ipawil na Dios iray totoo to ed Juda tan Jerusalem. Tiponen to iray bansa insan to ra ukomen tan dusaen ed “Lawak nen Jehosafat,” ya tatawagen met ya “lawak a pangukoman ed saray totoo.” (3:​12, 14) Oniay nabasa ed sampot na libro: “Manayam si Jehova ed Sion.” (3:21) Ipapaseguro na satan ya bendisyonan tan protektaan na Dios iray totoo to.