L-Aħbar Tajba Skont Marku 13:1-37
13 Hu u ħiereġ mit-tempju, wieħed mid-dixxipli qallu: “Għalliem, ara xi ġmiel taʼ ġebel u bini!”
2 Imma Ġesù qallu: “Qed tarah dan il-bini kbir? Żgur li l-ġebel kollu se jitwaqqaʼ u ma titħalliex ġebla fuq oħra.”
3 Hekk kif kien bilqiegħda fuq il-Muntanja taż-Żebbuġ iħares lejn it-tempju, Pietru, Ġakbu, Ġwanni, u Indrì staqsewh waqt li kien waħdu:
4 “Għidilna, meta se jiġru dawn l-affarijiet, u x’se jkun is-sinjal li dan kollu se jispiċċa?”
5 Ġesù beda jgħidilhom: “Oqogħdu attenti li ħadd ma jqarraq bikom.
6 Ħafna se jiġu u jużaw ismi, u jgħidu, ‘Jien il-Kristu,’ u jqarrqu b’ħafna.
7 Iktar minn hekk, meta tisimgħu bi gwerer f’postijiet differenti, tibżgħux. Dawn l-affarijiet iridu jiġru, imma ma jkunx għadu t-tmiem.
8 “Se jkun hemm il-ġlied bejn poplu u ieħor u bejn pajjiż u ieħor, terremoti f’post wara l-ieħor, u anki nuqqas taʼ ikel. Dawn l-affarijiet huma l-bidu taż-żmien tat-tbatija.*
9 “Imma intom, oqogħdu attenti għalikom infuskom. In-nies se jtellgħukom il-qorti, se jsawtukom fis-sinagogi, u se jiħdukom għand il-mexxejja u r-rejiet minħabba fija biex jieħdu xhieda.
10 Ukoll, l-ewwel trid tiġi ppritkata l-aħbar tajba lill-popli kollha.
11 U meta jkunu qed jiħdukom għand l-awtoritajiet, tkunux ansjużi minn qabel dwar x’se tgħidu. Se tkunu tafu dak il-ħin xi tridu tgħidu, għax mhux intom tkunu qed titkellmu, imma l-ispirtu qaddis.
12 Barra minn hekk, in-nies se jieħdu lil ħuhom jew lit-tifel tagħhom biex jinqatel, u t-tfal se jirribellaw kontra l-ġenituri u jiħduhom biex jinqatlu.
13 In-nies kollha se jobogħdukom minħabba li intom dixxipli tiegħi. Imma min jissaporti sal-aħħar se jiġi salvat.
14 “Madankollu, intom se taraw il-ħaġa moqżieża li se teqred l-affarijiet kollha fil-post fejn m’għandhiex tkun (ħa juża moħħu l-qarrej). Meta dawk li jkunu fil-Lhudija jaraw dan, għandhom jaħarbu lejn il-muntanji.
15 Min ikun fuq il-bejt la għandu jinżel u lanqas jidħol id-dar biex jieħu xi affarijiet.
16 Min ikun fl-għalqa m’għandux imur lura biex jieħu l-ħwejjeġ tiegħu.
17 Ħa jkun żmien ikrah għan-nisa tqal u għal dawk li jkunu qed jieħdu ħsieb xi tarbija.
18 Ibqgħu itolbu biex ma jkollkomx għalfejn taħarbu fix-xitwa,
19 għax se jkun żmien taʼ tbatija kbira* li qatt ma kien hawn bħalu mill-bidu tal-ħolqien t’Alla sa dak iż-żmien, u qatt mhu se jerġaʼ jkun hawn.
20 Fil-fatt, li kieku Ġeħova* ma jqassarx dak iż-żmien, ħadd ma jsalva. Imma hu se jqassar dak iż-żmien minħabba dawk li għażel.
21 “Mela jekk xi ħadd jgħidilkom, ‘Hawn qiegħed il-Kristu!’ jew, ‘Hemm qiegħed!’ temmnuhx.
22 Għax se jkun hemm Kristijiet foloz u profeti foloz li se jagħmlu mirakli biex iqarrqu, jekk jistaʼ jkun, bil-magħżulin.
23 Għalhekk, oqogħdu attenti. Jien għedtilkom kollox minn qabel.
24 “Imma wara dak iż-żmien taʼ tbatija, ix-xemx se tiddallam, il-qamar mhux se jagħti d-dawl,
25 l-istilel se jaqgħu mis-sema, u l-affarijiet li hemm fis-sema jitheżżu.
26 Imbagħad in-nies se jaraw lili, Bin il-bniedem, ġej fis-sħab b’qawwa u glorja kbira.
27 Wara se nibgħat lill-anġli biex jiġbru lill-magħżulin tiegħi mill-erbaʼ naħat tad-dinja, minn tarf l-art sa tarf is-sema.
28 “Tgħallmu mis-siġra tat-tin: Meta din toħroġ friegħi ġodda u ttellaʼ l-weraq, tkunu tafu li ġej is-sajf.
29 Bl-istess mod, meta intom taraw dawn l-affarijiet kollha jiġru, tkunu tafu li jien kważi wasalt.*
30 Naċċertakom li dawn l-affarijiet kollha se jiġru qabel ma tmut din il-ġenerazzjoni.
31 Is-sema u l-art se jispiċċaw, imma dak li ngħid jien se jibqaʼ għal dejjem.
32 “Ħadd ma jaf meta u x’ħin ġejja din il-ġurnata, la l-anġli tas-sema u lanqas jien, l-Iben. Il-Missier biss jaf.
33 Ibqgħu għassa u mqajmin, għax ma tafux meta ġej iż-żmien li għażel Alla.
34 Dan hu bħal raġel li siefer u ħalla d-dar tiegħu f’idejn l-ilsiera tiegħu, billi ta xogħol lil kull wieħed minnhom u kkmanda l-għassies tal-bieb biex jibqaʼ għassa.
35 Għalhekk, ibqgħu għassa, għax ma tafux meta ġej sid id-dar, jekk hux filgħaxija, f’nofsillejl, xħin jisbaħ,* jew filgħodu.
36 B’hekk meta jiġi għal għarrieda, ma jsibkomx reqdin.
37 Imma dak li ngħid lilkom, ngħidu lil kulħadd: Ibqgħu għassa.”
Noti taʼ taħt
^ Letteralment “tal-uġigħ tal-ħlas,” jiġifieri wġigħ taʼ meta mara tkun qed twelled.
^ Letteralment “tribulazzjoni kbira.”
^ Jew “jien qiegħed ħdejn il-bieb.”
^ Letteralment “xħin jidden is-serduq.”
