Sugr kosg sõngdame tɩ laafɩ zĩndi

“SUGR kosg tara pãng wʋsgo. Sugr kosg welgda mo-yõs tɩ pa tũ ne nin-kɛglem, a menesda welsg nins sẽn be tẽnsã ne taab sʋkã, a kɩtdame tɩ goosneema rãmbã sakd n deegdẽ tɩ b tẽnsã neb namsdame, la a kɩtdẽ me tɩ nebã ne taab zĩid-n-taar yaa noogo.” Woto la a Deborah Tannen sẽn yaa seb-gʋlsd yʋʋr sẽn yi la sẽn tar minim wʋsg buud goama la buudã yɛl vaeesg pʋgẽ n be Washington D.C. Georgetown inivɛrsite wã gʋls-yã.

Biiblã sɩd yetame tɩ sak n deeg f kongr ne pʋ-peelem n kos sugr nong n tõe n manega mo-yõsr zĩid-n-taas ne taab sʋka. Wala makre, a Zezi sẽn kõ kɩbar biribl sẽn yaa laog sãamdã wɛɛngẽ wã pʋgẽ, a wilgame tɩ bi-kãng sẽn lebg n kul yirã sak n deega a beegrã la a kos sugr ne pʋ-peelem t’a ba wã sũur yɩ noog hal wʋsg t’a ye sak n deeg-a. (Luk 15:17-24) N-ye, ned pa segd n zẽk a meng hal tɩ wa kɩt t’a pa kos sugr a kongr yĩng ye. La yaa vẽeneg yẽ tɩ ne sẽn sɩd ya-b sik-m-mens rãmbã, sugr kosg ka toog ye.

Sugr kosg pãngã

A Abigaill sẽn yɩ pag sẽn tall yam tẽn-kʋdem-wẽndẽ Israɛllã pʋgẽ wã kõo makr sẽn wilgd sugr kosg yõodo, baa sẽn yɩ a sɩda kongr yĩng la a sẽn kos sugrã. A Davɩɩd sẽn wa n lebg Israɛll rĩm kaoosg zugẽ wã sẽn da wa n be weooga pʋgẽ ne a rapã, b ra kogla a Abigaill sɩd a Naball rũmsã. La a Davɩɩd sẽn wa n tʋm kom-bɩɩsã tɩ b tɩ kos a Naball bur la koom, a tõdgame n gom bãmb beed n dig-ba.  Woto yika a Davɩɩd sũur hal wʋsg t’a yik ne rap 400 n na n kẽng n tɩ kʋ a Naball ne a zaka rãmb fãa. A Abigaill sẽn wʋm yellã, a yikame n na n sɛg a Davɩɩd. La a sẽn yã a Davɩɩdã, a fõgna a neng tẽng a Davɩɩd taoor n yeele: “M tão sõngo, yaa maam n konge. Bɩ y bas tɩ m togs-yã.” Woto, a Abigaill bilga yellã fãa n togs la a kõ a Davɩɩd rɩɩb ne koom. Rẽ poore, a Davɩɩd yeel-a lame: “Lebg n kuil ne laafɩ tɩ m kelga f koɛɛgã, la m saka f sẽn datã.”—1 Sãmwɛll 25:2-35.

A Abigaill sẽn tall sik-m-meng manesem n paas a sẽn kos sugr a sɩdã sẽn tall toom manesmã yĩngã kɩtame t’a zaka rãmb põse. A Davɩɩd pʋʋs-a-la bark meng a sẽn gɩdg-a t’a ‘ka raag zɩɩmã’ yĩnga. Baa ne sẽn da ya a sɩdã la pa a meng n beeg a Davɩɩdã, a Abigaill sakame n kos sugr a zakã neb fãa yĩng tɩ bãan zĩndi.

Tʋm-tʋmd a Poll me kõo mak-sõng sugr kosgã wɛɛngẽ. Sasa n da zĩnd t’a ra segd n gom n wilg a bʋʋm Sãnedrẽ wã sẽn yaa Zʋɩf rãmbã bʋ-kaoodb sul-kãsengã taoore. A Ananias sẽn yaa maan-kʋʋdbã kãsma sũur yika wʋsg a Poll sẽn gom ne pʋ-peelmã yĩnga, t’a yeel tɩ neb nins sẽn kɛg a Pollã wẽ a noorã. Dẽ, a Poll yeela yẽnda: “Wẽnnaam na n wẽe yãmba, pʋ-libsem soaba. Yãmb zĩndame n kao mam bʋʋdo tɩ zems tõogo, n yaool n kõ noor tɩ b wẽ maam tɩ ka zems tõog ye.” La neb nins sẽn yas a Poll sɛɛgẽ wã sẽn yeel t’a tʋʋsa maan-kʋʋdba kãsma, tʋm-tʋmdã yɩɩ tao-tao n sak a kongrã n yeele: “Ba-biisi, mam ka bãng tɩ yaa maan-kʋʋdba kãsem ye; tɩ bõe, a gʋlsame: Bɩ y ra gom y naab wẽng ye.”—Tʋʋma 23:1-5.

A Poll sẽn da wilg tɩ ned b sẽn yãk t’a yɩ bʋ-kaood pa segd n tũnug ne nin-kɛglmã sɩd ra zemsame. Baasg zãnga a kosa sugr a sẽn pa bãng n gom ne maan-kʋʋdba kãsmã ne manesem sẽn da wõnd a paoog-a-lame wã yĩnga. * A Poll sugrã kosg paka sor n kõ Sãnedrẽ wã rãmb tɩ b kelg a sẽn da tar koɛɛg ning n dat n togsã. A Poll sẽn da mi tɩ bʋ-kaoodbã neb ra kɩɩsda taabã yĩnga, a togs-b lame tɩ yaa yẽ sẽn tẽed kũum vʋʋgrã yĩng la b sẽn da bool-a bʋʋd n namsd-a wã. La a Poll sẽn yeel woto wã yĩnga, no-keemd n yik kẽer ne Fariziẽ rãmb nins sẽn da be a Poll poorẽ wã sʋka.—Tʋʋma 23:6-10.

Bõe la d tõe n zãms Biiblã mak kãensã b yiibã pʋgẽ? Zĩis a yiibã fãa pʋgẽ, nin-kãensã sẽn sak n deeg b kongrã ne pʋ-peelmã paka sor tɩ yẽsgã kell n kẽng taoore. Dẽnd sugr kosg tõe n sõng-d lame tɩ d welg mo-yõsre. N-yẽe, d sã n sak n deeg d kongr n kos sugr yell d sẽn maan pʋgẽ na n kõo weer tɩ yẽsg sẽn na maneg yellã tõog n zĩndi.

‘La mam pa beeg wɛ!’

Tõnd sã n wa yã tɩ d beega ned ne d noor goam bɩ ne d manesem, d tõe n wa tẽedame  t’a soabã n yaa yel-zẽnda, wall a yaa ra kɛk-m soaba. La a Zezi Kirist yaool n sagla a karen-biisã n yeel tɩ: “Dẽ yĩnga, fo sã n wa ne f kũun tẽn-kugr taoore, n zĩnd be n tẽeg tɩ f tara yell ne f ba-biiga, bɩ f bas f kũuna tẽn-kugrã taoore n kẽng n deng n maneg f yella ne f ba-biigã n yaool n wa n kõ f kũunã.”—Matɩe 5:23, 24.

Wala makre, saam-biig tõe n tagsdame tɩ y beeg-a lame. Yell a woto wɛɛngẽ a Zezi yeelame tɩ y segd n deng n tɩ manega ‘yellã ne y saam-biigã nanda,’ y sã n neẽ tɩ y sɩd beeg-a lame wall ba y sã n pa beeg-a. Sã n yaa ne Gerɛk goamã, gom-biig ning a Zezi sẽn tũnug ne wã “bilgda yẽsg ned ne a to sẽn maand mo-yõsr sẽn kẽ b sʋk wɛɛngẽ.” (Vine’s Expository Dictionary of Old and New Testament Words) Sɩda, neb a yiib sã n wa pa wʋm taab moore, b ned kam fãa zoe n kongame, bala b yiibã fãa yaa pa zems-zãng rãmb sẽn mi n tudgdẽ. Rẽ kɩtame tɩ b segd n bao n wʋm taab yɛsa.

Sẽn pakã pa bao n bãng sẽn tar-a bʋʋm la sẽn pa tar-a bʋʋm ye. Yaa b bãng ãnd n na n yãk yam n welg mo-yõsrã. Tʋm-tʋmd-a Poll sẽn wa n yã tɩ Korẽnt kiris-nebã boonda taab bʋʋd dũniyã bʋ-kaoodba nengẽ mo-yõs wala ligd poorẽ wã, a zab-b la woto: “Yaa bõe tɩ yãmb ka sak tɩ b maan yãmb sẽn ka tɩrga? La yaa bõe tɩ b sẽn fã yãmba, yãmb ka bas yell tɩ sɛ?” (1 Korẽnt dãmba 6:7) Baa a Poll sã n yeela woto n dat tɩ kiris-nebã ra ye bool taab bʋʋd dũniyã bʋ-kaoodb nengẽ me, no-yẽgrã pʋs n yaa vẽenega: Bãan tẽedba ne taab sʋk yõod n yɩɩd bao n wilg sẽn tar-a bʋʋm la sẽn ka-a bʋʋm. No-yẽgr kãngã sã n be d pʋ-tẽerẽ, yaa nana ne tõnd tɩ d sak n kos sugri, ned sã n wa tagsdẽ tɩ d beeg-a lame.

Pʋ-peelem yaa tɩlae

Baasg zãnga, neb n be n tũnugd ne gom-biis nins sẽn wilgd sugr kosgã wʋsg tɩ pa zems ye. Wala makre Zapõ, sumimasen yaa gom-biig b sẽn nong n wʋmd naoor tus ka tɛk b sẽn tũnugd ne sugr kosg pʋgẽ. B tõe n tũnuga ne-a meng n wilg mi-beoogo, wall mi-beoog wilgr pʋgẽ f sẽn dat n yeel tɩ f pa tar tõog n na n dol yel-sõmd b sẽn maan-f ye. Gom-biiga võor sẽn toeemda yĩnga, kẽer tõe n tagsdame tɩ b tũnugda ne-a wʋsgo, n wa sãmbd ne neb nins sẽn tũnugd ne-a wã sã n sɩd maanda woto ne pʋ-peelem. Tõe n wõnda b tũnugda ne sugr kosg manesem buud toor-toor buud a taab pʋsẽ tɩ loog noore.

Sẽn yaa buud gomd ning fãa pʋgẽ f sã n wa kot sugri, tara yõod tɩ pʋ-peelem zĩnd f goamẽ wã. A soabã goam la a koe-zom segd n wilgame t’a sũurã sɩd sãama ne a kongrã. A tãng-zug zãmsgã pʋgẽ a Zezi yeela a karen-biisã woto: ‘Bɩ yãmb n-yẽe yɩ n-yẽe, tɩ y ayo yɩ ayo. Sã n yɩɩd a woto, sẽn paasã yita wẽng soabã nengẽ.’ (Matɩe 5:37, Kãab-paalgã Koe-noogo) Y sã n wa kot sugr bɩ y sɩd wilg rẽ vẽenega. D rɩk makre: Rao a ye sẽn da tong sɩlg yir sɛbã gesg zĩigẽ kosa sugri, a valiisã sẽn toog pag sẽn da tong me n be-a taoorã yĩnga. Sẽn maan minit a wãn loogr poor b sẽn ket n tong n kẽndã, a valɩɩsã tooga pagã yɛsa, t’a ye bõos-a sugr ne waoogre. Wakat bilfu, bõn-kãngã sẽn ye maan yɛsa, pagã so-toak tũud-n-taag yeela rao wã t’a sã n sɩd ra kosẽ-la sugr pipi wã, a ra na n gũusame t’a valɩɩsã ra ye toog pagã ye. N-yẽe, sugr sẽn kos sã n sɩd yaa ne pʋ-peelem, f segd n dɩka sard kãn-kãe n da ye yɩlem kongrã ye.

Tõnd sã n yaa pʋ-peen neda, d sugrã kosg pʋgẽ d segd n saka d sẽn konga fãa, n kos sugri, la d mao n maneg sẽn sãama wa d sẽn tõe tɛka. B sẽn beeg a soaba me segda wakat kãng n sɩd sak n kõ koangda sugri. (Matɩe 18:21, 22; Mark 11:25; Efɛɛz rãmba 4:32; Kolos rãmba 3:13) Sẽn mik tɩ neb a yiibã fãa yaa pa zems zãng rãmbã, pa wakat fãa la bãan baoob tõe n yɩ faag-faag ye. La baasgo, sugr kosg tara pãng n tõe n welg mo-yõsre tɩ laafɩ ye zĩndi.

Sã n wa pa zems tɩ d kos sugri

Baa ne sũ-sãang wilgr f kongr yĩng sẽn tõe n bʋgl yella la a sõng n welg mo-yõsrã, yam  soab na n gũusame n da kos sugr woto, sã n mik tɩ pa zems t’a maan woto ye. D rɩk makr wala yellã sã n tɩ loee ne burkĩndlem tallg ne Wẽnnaam. A Zezi Kirist sẽn wa n be tẽn zugã ‘a sika a meng hali n sak n ki, n-ye, n ki kũum da-luk zugu.’ (Filip rãmba 2:8, NW ) Baasg zãnga, a pa kos sugr a tẽebã yĩng sẽn na yɩl n paam yolsg ne a namsgã ye. A Zezi pa kos sugri, maan-kʋʋd kãsmã sẽn wa n kos-a woto wã ye: “Bɩ y zoe Wẽnnaam sẽn vɩ tɩ y sã n yaa Kirist Wẽnnaam Biiga bɩ y togs tõndo.” A Zezi pa zoe rabeem n kos sugr ye, a leoka yẽnda ne raood n yeel-a woto: “Yãmb n yeel la. La sẽn paase, mam yeta yãmb tɩ sẽn sɩng ne masã yãmb na yã Ninsaal Biiga sẽn zao Wẽnnaam sẽn yaa pãng soaba nug-rɩtgo la sẽn be sawat zut n watẽ.” (Matɩe 26:63, 64) A Zezi zɩ n sak n sãam kɩs-sɩd ning a sẽn tar ne a Ba a Zeova wã n bao bãan ne nebã ye.

Kiris-neba waoogda neb nins sẽn tar zu-sobendã. La ket n pa tɩlae ne-b tɩ b kos sugr b sẽn sakd Wẽnnaam la b tar nonglem ne b saam-biisã yĩng ye.—Matɩe 28:19, 20; Rom dãmba 13:5-7.

Sugr kosg sẽn na n wa ka le beẽ

Rũndã-rũndã, tõnd tudgdame, bala d yaab a Ãdem yel-wẽndã sẽn wa ne pa-zems-zãnga mad-d lame. (Rom dãmba 5:12; 1 Zã 1:10) Ya a Ãdem sẽn kɩɩs a Naandã yĩng n kɩt t’a lebg yel-wẽn-maandã. La sɩngrẽ wã a Ãdem ne a Hawa ra zemsa zãng n pa tar yel-wẽn ye. La Wẽnnaam kãabame t’a na n ye lebs n kõo ãdem-biisã zems-zãngã. A na n yiisa yel-wẽndã ne a biisa fãa fasɩ.—1 Korẽnt dãmba 15:56, 57.

Tags-y n ges wã sẽn dat n yɛɛlga! A Zezi ma-biig a Zak saglgã a sẽn kõ zɩlemd rɩk-n-tʋm wɛɛngẽ wã pʋgẽ, a yeelame: “Ned sã n ka kong ne a goama a zemsa zãnga, la a tõe n ninga a yĩnga fãa salbre n tõog-a.” (Zak 3:2) Ned sẽn zems zãng tõeyã a zɩlemde, tɩ pa tɩlae t’a wa kos sugr ne a no-goam ye. ‘A tõe n ning-a yĩnsa fãa salbr n tõog-a.’ Ad tõnd sã n wa lebg neb sẽn zems zãngã, na n sɩd yɩɩ bũmb sẽn be yamleoog hal wʋsgo. Rẽ masã gɩdgr kõn ye zĩnd n tõe n sãam laafɩ wã nebã ne taab sʋk ye. La nananda, sugr kosg ne pʋ-peelem la sẽn zemse, beegr d sẽn maan yĩng na n kɩtame tɩ d welg mo-yõsã tɩ bãan zĩnd tõnd ne neb a taabã sʋka.

[Tẽngr note]

[Foto, seb-neng a 5]

Bõe la a Poll makrã tõe n zãms tõndo?

[Foto, seb-neng a 7]

Neba fãa sã n wa zems zãnga sugr kosg kõn ye yɩ tɩlae ye