Pak ning a Zeezi sẽn maan yaoolmã yɩɩ toor fasɩ. A kũumã sẽn da kolgdã yĩnga, a yãka yam n na naag a tʋm-tʋmdbã tɩ b rɩ Pakã, la a kell n lugl Soaalã zaabr dɩɩbã, b sẽn na n maand yʋʋmd-yʋʋmdã. Rẽ n so t’a tʋm a Pɩyɛɛr ne a Zã tɩ b tɩ maneg roog rẽ yĩnga. (Luk 22:7-13; ges-y sebrã pipi neng fotã.) Woto tẽegda tõnd tɩ d segd n segla d meng Tẽegrã d sẽn na n maan tʋʋlg kiuug rasem 27 daarã. Tigimsã pʋsẽ, b na n yãka sõsda, n ges divẽ wã la burã maaneg yelle, la bũmb a taaba. La bõe la ned kam fãa tõe n maan n segl a meng Tẽegrã yĩnga?

Segl-y y mens y sũyã pʋsẽ. Karm-y Biiblã vɛrse nins b sẽn yet tɩ d karem Tẽegrã yĩnga, la y bʋgs b zugu. Karengã na-kẽndr bee D vaees Gʋls-sõamyã daar fãa wã pʋgẽ. La Bible. Traduction du monde nouveau wã pʋgẽ, appendice B12 zĩigẽ, b paasa bũmb a taab na-kẽndrã pʋgẽ. (Ges-y yʋʋmd 2020, tʋʋl-nif kiuug Kiris-nebã vɩɩm la b tʋʋma tigissã na-kẽndr sebrã pʋgẽ me.) Zagsã rãmb sã n ges l’Index des publications des Témoins de Jéhovah wã pʋgẽ, wall Vaeesg sebre, a Zeova Kaset rãmbã yĩnga pʋgẽ, b na n yãa bũmb a taab sẽn gomd a Zeezi maoongã yõod yelle, n gom rẽ yell b zak pʋgẽ Biiblã zãmsgã sasa.

Bool-y neb a taab tɩ b wa Tẽegrã. Tẽegrã seb-vãoogã pʋɩɩb sasa, kẽes-y y meng zãng-zãnga. Tags-y n ges-y neb nins y sẽn tõe n boolã. Wala makre, neb yãmb sẽn kẽnd n kaagdẽ, neb sẽn da zãmsd Biiblã, y mitinsi, la y roagdba. Kãsem-dãmbã segd n modgame n bool d tẽed-n-taas nins sẽn pa le yit koɛɛgã moonegã la b pa le wat tigissã. Tẽeg-y tɩ baa ned ning yãmb sẽn na n boolã pa be yãmb babgẽ wã, y tõe n kẽe jw.org pʋgẽ, n kilik KIBAY TÕND ZUGU la y ges “Tẽegrã” zĩigẽ, n bãng zĩig b sẽn na n maan Tẽegrã tɩ pẽ ne a soabã sẽn beẽ wã, la wakatã.

Bõe me la y tõe n maane, n segl y meng Tẽegrã yĩnga?