Zekaria 2:1-13
2 Ne ating’o wang’a mi aneno ng’at moro koting’o tond pimo+ e lwete.
2 Omiyo, ne apenje kama: “Idhi kanye?”
Nodwoka niya: “Adhi pimo Jerusalem mondo ang’e lachne kod borne.”+
3 To ne! malaika ma ne wuoyo kodano ne owuok, mi malaika machielo ne obiro romone.
4 Eka nowachone niya: “Ring idhi inyis ng’atcha kama, ‘“Jerusalem biro bedo dala ma onge gi ohinga molwore, nikech ji ma biro dak e iye kaachiel kod jamni nobed mang’eny ahinya.+
5 Kendo anabedne ohinga mar mach molwore,”+ Jehova owacho, “kod duong’ maler e diere.”’”+
6 “Biuru! Biuru! Ringuru ua e piny man yo nyandwat,”+ Jehova owacho.
“Nimar asekeyou e yembe ang’wen mag polo,”+ Jehova owacho.
7 “Biuru, yaye Jo-Sayun! Ringuru, un jo ma odak gi nyar Babulon.+
8 Bang’ ka Jehova Nyasach oganda lweny noseyudo duong’, ne oora ir ogendni ma ne yako mwandu magu.+ Ne owacho niya: ‘Ng’ato ang’ata ma mulou, mulo tong wang’a.+
9 To koro, abiro rieyo bada kuomgi, kendo wasumbnigi e ma biro peyogi.’+ Eka unung’e ni Jehova Nyasach oganda lweny e ma oseora.
10 “Kog gi mor, yaye nyar Sayun;+ nimar abiro,+ kendo abiro dak e dieru,”+ Jehova owacho.
11 “Chieng’no, ogendni mang’eny nobi ir Jehova mi ginibed joge;+ to anadag e dieru.” Kendo unung’e ni Jehova Nyasach oganda lweny e ma oseora iru.
12 Jehova biro kawo Juda kaka pokne e piny maler, mi enoyier Jerusalem kendo.+
13 Un dhano duto, ling’uru thi e nyim Jehova, nimar osekawo okang’ ka en kar dakne maler.
