Joel 1:1-20
1 Ma e wach Jehova ma ne obiro ne Joel* wuod Pethuel:
2 “Winjuru wachni un jodongo,Kendo chikuru itu un jo modak e piny.
Be gima kama osetimore e ndalou,Kata e ndalo kwereu?+
3 Nyisuru nyithindu wachni,Mondo gin bende ginyis nyithindgi,Kendo nyithindgigo onyis tieng’ ma biro luwogi.
4 Gima det-bonyo ma ngemo noweyo, det-bonyo ma fuyo rumbi osechamo;+Kendo gima det-bonyo ma fuyo rumbi noweyo, dede matindo osechamo;Kendo gima dede matindo noweyo, dede ma chamo gik moko duto osechamo.+
5 Chung’uru malo mondo uywag un jomer!+
Gouru nduru un jomadh divai,Nikech osegol divai mamit e dhou.+
6 Oganda moro maduong’ osemonjo pinya, tekogi ng’eny kendo gikadho akwana.+
Lekegi kod dhogi chal gi mag sibuor.+
7 Giseketho yienda mar mzabibu, kendo giselwero it ng’opa,Gisepoke modong’ nono, kae to giwite oko.
Bedene odong’ ka rachar.
8 Ywaguru matek mana ka nyako morwako law gunia,Ma ywago wuoyi ma nyocha dwaro kende.
9 Onge chiwo mar cham+ kata chiwo miolo+ minyalo chiw e od Jehova mondo otimnego misango;Jodolo ma timo misengni ne Jehova ywak.
10 Puothe ni nono, kendo piny ywak,+Nikech cham osekethore, divai manyien oseduono, kendo mo oserumo.+
11 Jopur ywagore, jo ma tiyo e puoth mzabibu goyo nduru,Nikech ngano gi shairi osekethore;Koro onge cham ma ikayo.
12 Yadh mzabibu osener,Yadh ng’owo bende osener.
Yiend komamanga, gi othidhe, kod yiend olemo,*Kaachiel gi yiende mamoko duto osener.+
Kendo wich-kuot osemako jo ma ne mor.
13 Un jodolo, rwakuru lep gunia, ywaguru;Gouru nduru un jo ma tiyo e kendo mar misango.+
Un jotich Nyasacha, biuru unind otieno mangima kurwako lep gunia,Nimar tinde onge jo ma kelo chiwo mar cham+ kod chiwo miolo+ e od Nyasachu.
14 Gouru milome mondo ji otue. Kendo luonguru chokruok mowal.+
Chokuru jodongo duto kaachiel gi jo modak e piny,Mondo gidhi e od Jehova,+ kendo giywag ne Jehova mondo okonygi.
15 Yaye, odiechiengno biro!
Odiechieng Jehova chiegni.+
En e odiechieng’ ma Jal Manyalo Duto nokelie kethruok!
16 Donge cham osekethore mana ka waneno?
Kendo mor koro onge e od Nyasachwa?
17 Kodhi* osekethore e bwo opawo.
Onge gimoro amora e deche.
Ute mikanoe chiemo osekethore nikech cham onge.
18 Jamni bende koro chur!
Dhok ong’eng’ ang’eng’a nikech onge lege mikwayogie.
Kendo kuedhe mag rombe sandore.
19 Yaye Jehova, in e ma abiro ywakni,+Nikech mach oseketho lege duto manie thim,Bende, osewang’o yiendewa duto.
20 Kata mana le manie bungu ywakni,Nikech aoche duto oseduono,Kendo mach osewang’o lege duto manie thim.”
