Mu Itebuhe Hahulu Tulemeno Twa Jehova

“Mu likanyise Mulimu, sina bana ba ba latwa.”—MAEF. 5:1.

MU KONA KU ALABA CWAÑI?

Ki sika mañi se si ka lu tusa ku itebuha hahulu tulemeno twa Jehova?

Ku sa ketulula ku talusañi?

Lu kona ku likanyisa cwañi Jehova ka ku sa ketulula?

1. (a) Ki tulemeno tufi twa Jehova to mu ziba? (b) Mu ka tusiwa cwañi ka ku ituta tulemeno twa Mulimu?

HA MU nahana ka za Jehova, ki tulemeno tufi twa hae to mu hupula? Mwendi mu nahana tulemeno to tu cwale ka lilato, ku luka, butali, ni maata. Lwa ziba kuli Jehova u na ni tulemeno to tu ñwi to tu nde to tu ñata. Mane ka lilimo ze ñata, mwa lihatiso za luna se ku nyakisisizwe tulemeno to tu shutana-shutana twa Jehova to tu fitelela 40. Mu ka ituta ze ñata ka za Jehova haiba mina mu nosi kamba ni lubasi lwa mina mu ituta kalemeno ni kalemeno kwa tulemeno to! Mu ka itebuha hahulu tulemeno twa Jehova. Mi ka ku eza cwalo, mu ka ba ni takazo ye tuna ya ku likanyisa Jehova mi mu ka ba ni silikani se situna ni yena.—Josh. 23:8; Samu 73:28.

2. (a) Mu fe mutala o bonisa mo ku ituta tulemeno twa Jehova ku kona ku lu tuseza ku itebuha hahulu tulemeno to. (b) Lu ka nyakisisañi mwa taba ye ni mwa litaba ze peli ze tatama?

² Ki sika mañi se si kona ku mi tusa ku itebuha hahulu nto ye ñwi? Lu ngeni kuli mu bata ku ca sico se mu si ka ca kale fateñi. Pili mu ka tabiswa ki munko wa sona o munde. Mi kihona mu ka ca hanyinyani fateñi ni ku lemuha kuli sico seo sa tabusa luli. Mi cwale kona mu ka ikapehela sona. Ka nzila ye swana, lwa kona ku itebuha hahulu kalemeno ni kalemeno ka Jehova ha se lu itutile ze ñata ka za kalemeno kao, ni ku nahanisisa hahulu mwa boniseza kalemeno kao Jehova, mi kwa mafelelezo kihona lu ka bonisa kalemeno kao mwa bupilo bwa luna. (Maef. 5:1) Mwa taba ye ni mwa litaba ze peli ze tatama, lu ka nyakisisa tulemeno to tuñwi twa Jehova. Lu ka nyakisisa lipuzo ze latelela ka za kalemeno ni kalemeno: Kalemeno ka, ka talusañi? Jehova u ka bonisanga cwañi? Mi lu kona ku likanyisa cwañi Jehova ka ku bonisa kalemeno kao?

 JEHOVA WA ATUMELEHA

3, 4. (a) Ku atumeleha ku talusañi? (b) Ki lika mañi ze lu kolwisa kuli Jehova wa atumeleha?

³ Ha lu nyakisiseñi se ku talusa ku atumeleha. Ku atumeleha ku talusa ku ba ni sishemo, ku tabela ku ambola ni batu, ni ku sa icanganisa ha lu bona batu ba bañwi. Mutu ya atumeleha u kona ku bonisa kuli wa lata ku teeleza ni ku tusa ba bañwi ka mwa bulelela, mwa itusiseza liponiso za ka mazoho, ni mwa menyeza ku ba bañwi.

⁴ Kona mwa inezi Jehova cwalo. Nihaike kuli ki yena Mutu ya na ni maata ka ku fitisisa mwa pupo, u lu mema kuli lu lapelange ku yena. Wa teelezanga kwa litapelo za luna ni ku lu fa tuso ye lu tokwa. (Mu bale Samu 145:18; Isaya 30:18, 19.) Lwa kona ku lapela ku Mulimu ko lu fumaneha kaufela, ka nako ifi kamba ifi, mi tapelo ya luna ya kona ku ba ye kuswani kamba ye telele. Mulimu ha ikutwangi kuli lwa mu kataza ha lu lapela ku yena. (Samu 65:2) Bibele i talusa Jehova ka nzila ye lu tusa ku lukuluha ha lu lapela ku yena. Ka mutala, Davida naa ñozi kuli “Meeto a Muñaa Bupilo a talimile” ku luna ni kuli wa lu tusa ka ‘lizoho la hae la bulyo.’ (Samu 34:15; 63:8) Mi mupolofita Isaya naa bulezi kuli Jehova u swana sina mulisana. Naa ñozi kuli: “U ka kubukanya lingunyana mwa mazoho a hae, a li lwale mwa sifuba sa hae.” (Isa. 40:11) Ha mu nahane feela taba yeo! Jehova u bata kuli lu be hahulu bukaufi ni yena sina ngunyana ye mwa mazoho a mulisana ya lilato. Ku ziba kuli Ndataa luna kona mwa inezi cwalo ku ka lu tusa ku mu lata hahulu! Lu kona ku likanyisa cwañi Jehova?

KALEMENO KA BUTOKWA HAHULU

5. Ki kabakalañi baana-bahulu ha ba swanela ku atumeleha?

⁵ Cwanoñu fa, Lipaki ba bañwi ba mwa linaha ze shutana-shutana za mwa lifasi ne ba buzizwe kuli, “Ki kalemeno kafi ke mu tabela ku bona ku muuna-muhulu?” Buñata bwa bona ne ba alabile kuli, “Muuna-muhulu u swanela ku ba ya atumeleha.” Ki niti kuli kaufelaa luna lu swanela ku bonisa kalemeno kao, kono baana-bahulu  sihulu ki bona ba ba swanela ku ka bonisa. (Isa. 32:1, 2) Ki kabakalañi ha ku li kwa butokwa kuli baana-bahulu ba be ba ba atumeleha? Kaizeli yo muñwi naa bulezi kuli u kona ku ziba hande tulemeno to tunde twa muuna-muhulu haiba muuna-muhulu yo wa atumeleha, mi hape kaizeli yo u kona ku ziba tulemeno to tunde twa muuna-muhulu yo haiba yena kaizeli a ikutwa ku lukuluha ku ambola ni yena. Taba yeo ki ya niti luli. Mu kona ku ezañi kuli batu ba bañwi ba lukuluhe ku ambola ni mina?

6. Mu kona ku bonisa cwañi kuli mwa atumeleha?

⁶ Nzila ye ñwi ye mu kona ku bonisa ka yona kuli mwa atumeleha ki ka ku iyakatwa ba bañwi ni ku tabela ku ba tusa. Ha mu ka eza cwalo, mizwale ni likaizeli, hamohocwalo ni banana ba ka lukuluha ku ambola ni mina. (Mare. 10:13-16) Mushimani wa libizo la Carlos ili ya na ni lilimo ze 12 u bulela kuli: “Na bonanga baana-bahulu mwa Ndu ya Mubuso inze ba menya ni ku bonisa sishemo, mi na tabelanga mo ba ezezanga.” Kamukwaocwalo, muuna-muhulu ha swaneli ku bulela feela kuli wa tabela ku teeleza ni ku tusa. U swanela ku eza za bulela. (1 Joa. 3:18) Muuna-muhulu u kona ku eza cwañi cwalo?

7. Ki kabakalañi batu ba bañwi ha ba lukuluhanga ku ambola ni luna ha lu tinile baji ya kwa mukopano wa sikiliti, mi lu kona ku itutañi kwa taba yeo?

⁷ Mu nyakisise mutala wo. Cwanoñu fa, muzwale yo muñwi ha naa li mwa fulai ka nako ya naa zwa kwa mukopano wa sikiliti o ne u ezelizwe kwa naha isili, naa tinile baji fo ne ku ñozwi toho ya taba ye li, “Mubuso wa Mulimu U Tahe!” Mutu yo muñwi ya sebeleza mwa fulai yeo a bona manzwi a naa ñozwi fa baji yeo mi a bulela kuli, “Mubuso u tahe luli!” Muzwale yo a ba ni puisano ye nde ni muuna yo, mi muuna yo a amuhela limagazini za luna. Ki kabakalañi batu ha ba lukuluhanga ku ambola ni luna ha lu tinile baji ya kwa mukopano wa sikiliti? Libaka ki la kuli baji ye lu tinanga i tahisanga kuli batu ba bate ku ziba ko lu ya mi baji yeo i ba bonisanga kuli lwa tabela ku ambola ni bona litaba ze lu lumela. Ka nzila ye swana, muuna-muhulu u swanela ku bonisa mizwale ni likaizeli kuli wa tabela ku ambola ni bona ka nako kaufela. Baana-bahulu ba kona ku eza cwalo mwa linzila lifi?

8. Baana-bahulu ba kona ku bonisa cwañi kuli ba iyakatwa batu ba bañwi, mi ku eza cwalo ku kona ku tusa cwañi mizwale ni likaizeli mwa puteho?

⁸ Nihaike kuli lizo za shutana-shutana ku likana ni ko mu pila, mwa kona ku bonisa kuli mwa iyakatwa mizwale ni likaizeli ba mina ka ku ba menyeza, ku ba swala mwa lizoho, kamba ku ba lumelisa feela ka silikani. Ki bo mañi pili ba ba swanela ku eza cwalo? Bibele i bulela kuli Jesu ha naa ezize mukopano ni balutiwa ba hae naa ‘sutelezi mi a bulela ku bona.’ (Mat. 28:18) Ka nzila ye swana, baana-bahulu kacenu ba atumelanga batu ba bañwi ni ku ambola ni bona. Batu mwa puteho ba ikutwanga cwañi baana-bahulu ha ba eza cwalo? Kaizeli ya li paina ya na ni lilimo ze 88 naa bulezi kuli: “Ni tabiswanga ki baana-bahulu ha ba ni menyeza ni ku ni susueza ha ni kena mwa Ndu ya Mubuso.” Kaizeli yo muñwi naa bulezi kuli: “Muuna-muhulu ha ni amuhela kwa Ndu ya Mubuso inze a menya, ni ikutwanga hande.”

MU FUMANANGE NAKO YA KU AMBOLA NI MIZWALE NI LIKAIZELI

9, 10. (a) Ki mutala mañi o munde wa lu tomela Jehova? (b) Baana-bahulu ba kona ku likanyisa cwañi mutala wa Jehova?

 ⁹ Haiba lu bata kuli batu ba lukuluhe ku ambola ni luna, lu swanela ku bona teñi kuli lwa fumana nako ya ku ambola ni bona. Jehova u lu tomela mutala o munde mwa taba yeo. Bibele i bulela kuli: “Ha yo kwahule ni mañi ni mañi wa luna.”  (Lik. 17:27) Nzila ye ñwi ye ba kona ku bonisa ka yona baana-bahulu kuli ba likanyisa mutala wa Jehova ki ka ku ambolanga ni mizwale ni likaizeli hamoho cwalo ni banana ni basupali, pili ni hamulaho wa mikopano. Muzwale ya li paina naa bulezi kuli: “Ni ikutwanga hande muuna-muhulu ha ni lumelisa ni ku libelela kalabo ya ka.” Kaizeli ya saa sebelelize Jehova ka lilimo ze bato ba 50 naa bulezi kuli: “Baana-bahulu ba ba ambolanga ni na hamulaho wa mikopano ba tahisanga kuli ni ikutwe kuli ba itebuha na.”

¹⁰ Ki niti kuli baana-bahulu ba na ni buikalabelo bo buñata. Kono ha ba li kwa mikopano, baana-bahulu ba swanela ku bona teñi kuli ba fumana nako ya ku ambola ni mizwale ni likaizeli.

JEHOVA HA KETULULI

11, 12. (a) Ku sa ketulula ku talusañi? (b) Bibele i bonisa cwañi kuli Jehova ha ketululi?

¹¹ Kalemeno ka kañwi kwa tulemeno twa Jehova ki ka ku sa ketulula. (Lik. 10:34) Ku sa ketulula ku talusañi? Ku talusa ku eza batu kaufela hande. Kuli lu eze batu kaufela hande ku si na ku ba ketulula, lu swanela ku lumela pili kuli mutu kaufela u swanela ku eziwa hande. Mutu ya si na ketululo ha ezangi batu ba bañwi hande ku fita ba bañwi ku si na taba ni mo ba bonahalela kamba masheleñi e ba na ni ona. Mutu ya si na ketululo u ezanga batu kaufela hande ku si na taba ni ponahalo kamba miinelo ya bona.

¹² Jehova u lu tomezi mutala o munde wa ku sa ketulula. Linzwi la hae li bulela kuli: “Ha ketululi” mi ha “ezi mutu ka sobozi.” (Mu bale Likezo 10:34, 35; Deuteronoma 10:17.) Ha lu nyakisiseñi mutala o bonisa kuli Jehova ha ketululi.

13, 14. (a) Ki butata mañi bo ne ba kopani ni bona bana ba basizana ba Zelofehadi ba ketalizoho? (b) Jehova naa bonisize cwañi kuli ha na ketululo?

 ¹³ Pili Maisilaele ba si ka kena kale mwa Naha ya Sepiso, bana ba basizana ba ketalizoho ba muuna ya naa bizwa Zelofehadi ne ba na ni butata bo ne bu tokwa ku tatululwa. Ne li butata mañi? Ndataa bona naa shwile, mi ne ba si na tukelo ya ku fiwa naha sina saanda sa bona. Libaka? Bakeñisa kuli ka ku ya ka Mulao, ne li bana ba bashimani feela ba ne ba na ni tukelo ya ku fiwa naha sina saanda. Kono ndataa bona naa shwile a si na bana ba bashimani. (Num. 26:33, 52-55) Kana saanda seo ne si ka fiwa bahabo basizana bao? Basizana bao ne ba ezizeñi kuli butata bwa bona bu tatululwe?

¹⁴ Basizana bao ne ba ile ku Mushe ni ku yo mu bulelela kuli: “Libizo la ndataa luna li shweleñi mwa lusika lwa hae, kabakala ku tokwa mwanaa mushimani?” Kana Mushe naa alabile kuli, ‘Kona mo u boniseza mulao mi ha ku na ze ni kona ku eza kuli ni mi tuse’? Batili, naa lapezi ku Jehova ka za taba yeo. (Num. 27:2-5) Jehova naa buleziñi? Naa bulelezi Mushe kuli: “Bana ba Zelofehadi, ba basizana, ba bulela  ka swanelo. U ka ba fa saanda mwahalaa banabahabo ndataa bona; u ka eza kuli saanda sa ndataa bona si ye ku bona.” Mi mane Jehova a eza nto ye ñwi hape. A bulelela Mushe ku beya taba yeo mwa Mulao. A talusa kuli: “Mutu ha shwa a si na mwanaa mushimani, mu ka fitisa saanda sa hae ku mwanaa hae wa musizana.” (Num. 27:6-8; Josh. 17:1-6) Ku zwa feela ka nako yeo, basali ba Maisilaele kaufela ba ne ba ipumananga mwa muinelo o swana ni wo, ne ba fiwanga saanda.

15. (a) Jehova u tusanga cwañi batu ba hae, ku beya cwalo ni batu ba ba si na ya ba tusa? (b) Ki makande afi a mañwi a mwa Bibele a bonisa kuli Jehova ha ketululi?

¹⁵ Katulo ya naa ezize Jehova i bonisa kuli ha na ketululo! Basizana ba ketalizoho bao ne ba si na ya naa ka ba tusa, mi Jehova naa ba ezize hande ni ku ba kuteka, sina mwa naa ezelize Maisilaele kaufela. (Samu 68:5) Le ki le liñwi kwa makande a mañata a mwa Bibele a bonisa kuli Jehova ha ketululangi batu ba hae.—1 Sam. 16:1-13; Lik. 10:30-35, 44-48.

LWA KONA KU LIKANYISA JEHOVA

16. Ki nto mañi ye kona ku lu tusa ku likanyisa mutala wa Jehova wa ku sa ketulula?

¹⁶ Ki nto mañi ye kona ku lu tusa ku likanyisa mutala wa Jehova wa ku sa ketulula? Mu hupule kuli lu ka eza batu kaufela hande ku sina ku ba ketulula haiba feela lu lumela kuli mutu kaufela u swanela ku eziwa hande. Mwendi mu ikutwa kuli ha mu na ketululo. Kono fokuñwi ku taata ku ziba luli mo lu ikutwela ka za batu ba bañwi. Kamukwaocwalo, mu kona ku ziba cwañi haiba ha mu na ketululo luli? Jesu u lu tomezi mutala o munde. Ha naa bata ku ziba ze ne ba bulela batu ka za hae, naa buzize balikani ba hae kuli: “Kanti batu ba li Mwanaa mutu ki mañi?” (Mat. 16:13, 14) Mwendi mwa kona ku ambola ni mulikanaa mina ya sepahala ili ya ka mi taluseza luli niti. Mwa kona ku mu buza kuli, ‘Ni ezanga cwañi batu? Kana batu ba bañwi ba nga kuli ha ni na ketululo?’ Mulikanaa mina yo mwendi wa kona ku mi bulelela kuli fokuñwi mu kutekanga hahulu batu ba litalo la mubala u sili ku fita mo mu kutekela ba litalo la mubala o muñwi, kamba kuli mu ezanga hande batu ba ba na ni masheleñi kamba ba ba itutile hahulu. Haiba mulikanaa mina a mi bulelela taba yeo, ki sika mañi se mu swanela ku eza? Mu lapele ku Jehova, mi mu mu kupe kuli a mi tuse ku cinca mo mu ikutwela ka za ba bañwi ilikuli mu kone ku likanyisa hande Mulimu ni ku eza batu kaufela ku si na ketululo.—Mat. 7:7; Makolo. 3:10, 11.

17. Ki mwa linzila mañi mo lu kona ku bonisa kuli ha lu ketululi ba bañwi?

 ¹⁷ Mwa puteho, lwa kona ku likanyisa Jehova ka ku bonisa likute ni sishemo kwa batu kaufela. Ka mutala, ha mu mema mizwale ni likaizeli kwa ndu ya mina, mwa kona ku mema mizwale ni likaizeli ba ba na ni lizo ze shutana ni za mina. Kamba mwa kona ku mema batu ba ba si na hande masheleñi, ba ba shwezwi ki bakubona, kamba banana ba ba kopananga ni luna ili ba ba zwa mwa mabasi a si a Lipaki. (Mu bale Magalata 2:10; Jakobo 1:27.) Ha lu li mwa bukombwa, lu ambolanga ni batu kaufela, ku beya cwalo ni ba ba zwa kwa linaha li sili. Kopano ya Jehova i hatisanga lihatiso ze tomile fa Bibele mwa lipuo ze bato eza 600. Taba yeo i bonisa kuli ha lu na ketululo!

18. Ku nahanisisa kuli Jehova wa atumeleha mi ha na ketululo ku ka lu tusa ku bata ku ezañi?

¹⁸ Ku nahanisisa hahulu kuli Jehova wa atumeleha mi ha na ketululo, ku ka lu tusa ku itebuha hahulu tulemeno to twa bonisa Jehova. Ka ku eza cwalo, lu ka bata ku likanyisa Jehova ni ku bonisa tulemeno to kwa mizwale ni likaizeli ba luna ni kwa batu be lu kopana ni bona mwa bukombwa.

[Lipuzo za Tuto]

[Siswaniso se si fa likepe 8]

“Muñaa Bupilo u fakaufi ni ba ba mu lapela kaufela.”—Samu 145:18 (Mu bone  paragilafu 9)

Jehova ha “ezi mutu ka sobozi.”—Deut. 10:17 (Mu bone  paragilafu 17)

[Siswaniso se si fa likepe 10]

Bana ba Zelofehadi ba basizana ne ba itebuhile ku Mulimu bakeñisa kuli naa si ka ba ketulula (Mu bone  maparagilafu 13, 14)