Mapan iti linaonna

PANNAKAILAWLAWAG DAGITI BERSIKULO ITI BIBLIA

Proverbio 3:5, 6—“Dika Agtalek iti Ipagarupmo nga Ammom”

 “Agtalekka ken Jehova iti amin a pusom, ket dika agtalek iti bukodmo a pannakaawat. Ikabilangam iti amin a dalanmo, ket palintegennanto dagiti danam.”—Proverbio 3:5, 6, Baro a Lubong a Patarus.

 “Agtalekka iti APO iti amin a pusom. Dika agtalek iti ipagarupmo nga ammom. Laglagipem ti APO iti amin nga aramidmo, ket isuronanto kenka ti rumbeng a dalan.”—Proverbio 3:5, 6, Ti Baro a Naimbag a Damag Biblia.

Kaipapanan ti Proverbio 3:5, 6

 No mangaramidtayo kadagiti importante a desision, masapul nga agpaidalantayo ken Jehova a a Dios, imbes nga agdesisiontayo a bukbukodtayo.

 “Agtalekka ken Jehova iti amin a pusom.” Ipakpakitatayo nga agtaltalektayo iti Dios no aramidentayo dagiti bambanag maibatay iti pagayatanna. Masapul nga agtalektayo iti Dios iti amin a pusotayo. Iti Biblia, maus-usar ti puso a tumukoy iti pudpudno a kinatao—ti emosion, motibo, panagpampanunot, ken ugali. Isu a saan laeng nga emosion ti karaman iti panagtalek iti Dios iti amin a puso. Pilientayo ti agtalek iti Dios iti amin a pusotayo gapu ta talaga a kombinsidotayo nga ammo ti Namarsua ti kasayaatan para kadatayo.—Roma 12:1.

 “Dika agtalek iti bukodmo a pannakaawat.” Masapul nga agtalektayo iti Dios ta saantayo a mapagtalkan ti imperpekto a panagpampanunottayo. No agtalektayo iti bagitayo laeng wenno surotentayo ti riknatayo, baka makaaramidtayo kadagiti desision a kasla nasayaat ngem madi dagiti resultana. (Proverbio 14:12; Jeremias 17:9) Adayo a nasirsirib ti Dios ngem kadatayo. (Isaias 55:8, 9) No agpaidalantayo kenkuana, agbalin a naragsak ti biagtayo.—Salmo 1:1-3; Proverbio 2:6-9; 16:20.

 “Ikabilangam iti amin a dalanmo.” Masapul nga ammuentayo ti pagayatan ti Dios kadagiti importante nga aspeto ti biagtayo ken kadagiti dadakkel a desision nga aramidentayo. Isu nga ikararagtayo nga idalannatayo ken surotentayo ti ibagana iti Saona, ti Biblia.—Salmo 25:4; 2 Timoteo 3:16, 17.

 “Palintegennanto dagiti danam.” Ilinlinteg ti Dios dagiti danatayo ta tultulongannatayo a mangaramid kadagiti nalinteg a bilinna. (Proverbio 11:5) Maliklikantayo dagiti problema a resulta ti di nasayaat a desision ken naragragsak ti biagtayo.—Salmo 19:7, 8; Isaias 48:17, 18.

Konteksto ti Proverbio 3:5, 6

 Mabasa iti libro ti Biblia a Proverbio dagiti prinsipio a makatulong kadatayo tapno agbalin a naragsak ti biagtayo ken maparagsaktayo ti Dios. Naisurat ti umuna a siam a kapitulo kas pammagbaga ti maysa nga ama iti ay-ayatenna nga anak. Iti kapitulo 3, mabasatayo dagiti pagsayaatan ti panangawat ken panangaramid kadagiti ibaga ti masirib a Namarsua kadatayo.—Proverbio 3:13-26.

a Jehova ti nagan ti Dios.—Salmo 83:18.