Ti Umuna nga Ar-ari 13:1-34

  • Padto maibusor iti altar idiay Bethel (1-10)

    • Narsuod ti altar (5)

  • Agsukir ti adipen ti Dios (11-34)

13  Babaen ti sao ni Jehova, napan idiay Bethel ti maysa nga adipen ti Dios+ a taga-Juda, bayat a nakatakder ni Jeroboam iti abay ti altar+ tapno mangipaay iti daton a mangpataud iti asuk.  Nagpukkaw maibusor iti altar ket imbagana ti sao ni Jehova: “O altar, altar! Daytoy ti kinuna ni Jehova: ‘Mayanakto ti lalaki nga agnagan Josias+ iti balay ni David! Idatonnanto iti rabawmo dagiti papadi iti nangangato a disso, dagidiay mangipapaay iti daton a mangpataud iti asuk iti rabawmo, ket puorannanto ti tulang dagiti tattao iti rabawmo.’”+  Nangted iti pagilasinan* iti dayta nga aldaw, ket kinunana: “Daytoy ti pagilasinan* nga imbaga ni Jehova: Marsuodto ti altar, ket maiwaranto dagiti dapo* nga adda iti rabawna.”  Idi nangngeg ni Jeroboam ti impukkaw ti adipen ti pudno a Dios maibusor iti altar idiay Bethel, bayat nga agidatdaton iti altar, intudona ti lalaki ket kinunana: “Tiliwenyo!”+ Dagus a nagango* ti imana, ket saannan a maikuti.+  Narsuod ti altar ket naiwara dagiti dapo nga adda iti rabawna maitunos iti pagilasinan* nga imbaga ti adipen ti pudno a Dios babaen ti sao ni Jehova.  Ita, kinuna ti ari iti adipen ti pudno a Dios: “Pangngaasim ta agpakaasika ken* Jehova a Diosmo, ket ikararagannak tapno umimbag ti imak.”+ Iti kasta, nagpakaasi ken Jehova ti adipen ti pudno a Dios, ket immimbag ti ima ti ari.  Kinuna ngarud ti ari iti adipen ti pudno a Dios: “Kumuyogka kaniak idiay balay ket manganka, ken ikkanka iti sagut.”  Ngem kinunana iti ari: “Uray itedmo kaniak ti kagudua ti balaymo, saanak a kumuyog kenka ken mangan iti tinapay wenno uminum iti danum iti daytoy a lugar.  Ta daytoy ti naibilin kaniak babaen ti sao ni Jehova: ‘Dika mangan iti tinapay wenno uminum iti danum, ket dika agsubli iti dalan a nagnaam.’” 10  Iti kasta, nagna iti sabali a dalan, ket saan a nagsubli iti dalan a nagnaanna a napan idiay Bethel. 11  Adda idi lakay a propeta nga agnanaed idiay Bethel. Idi nagawid dagiti annakna, inyestoriada kenkuana ti amin nga inaramid ti adipen ti pudno a Dios iti dayta nga aldaw idiay Bethel ken ti imbagana iti ari. Kalpasan a nayestoriada dayta, 12  insaludsod ti amada: “Sadino ti nagturonganna?” Gapuna, impakitada kenkuana ti dalan a nagturongan ti adipen ti pudno a Dios a naggapu idiay Juda. 13  Kinunana kadagiti annakna: “Siliaanyo* ti asno a pagsakayak.” Siniliaanda ti asno, ket nagsakay iti dayta. 14  Sinurotna ti adipen ti pudno a Dios ket nasarakanna a nakatugaw iti sirok ti dakkel a kayo. Kinunana iti lalaki: “Sika kadi ti adipen ti pudno a Dios a naggapu idiay Juda?”+ Insungbat ti lalaki: “Wen, siak.” 15  Imbaga ti lakay a propeta: “Kumuyogka kaniak idiay balay ket manganka iti tinapay.” 16  Ngem kinuna ti lalaki: “Diak mabalin ti kumuyog kenka ken sumrek iti balaymo. Diak met mabalin ti makipangan iti tinapay wenno makiinum iti danum kenka iti daytoy a lugar. 17  Ta imbilin kaniak ni Jehova, ‘Dika mangan iti tinapay wenno uminum iti danum sadiay. Dika agsubli iti dalan a nagnaam.’” 18  Gapuna, kinuna ti lakay a propeta: “Maysaak met a propeta a kas kenka, ket kastoy ti imbaga kaniak ni Jehova babaen ti maysa nga anghel, ‘Awisem a kumuyog kenka iti balaymo tapno makapangan iti tinapay ken makainum iti danum.’” (Inallilawna ti lalaki.) 19  Iti kasta, kimmuyog iti balay ti lakay tapno mangan iti tinapay ken uminum iti danum. 20  Bayat nga agtugtugawda iti lamisaan, dimteng ti sao ni Jehova iti propeta a nangpasubli kenkuana, 21  ket imbagana iti adipen ti pudno a Dios a naggapu idiay Juda: “Daytoy ti kinuna ni Jehova, ‘Gapu ta sinukirmo ti bilin ni Jehova ket dimo inaramid ti imbilin ni Jehova a Diosmo, 22  no di ket nagsublika ditoy tapno manganka iti tinapay ken uminumka iti danum nupay imbaga ti Dios, “Dika mangan iti tinapay wenno uminum iti danum,” saanto a maitabon ti bangkaymo iti tanem dagidi ammam.’”+ 23  Idi nakapangan ken nakainumen ti adipen ti pudno a Dios, siniliaan ti lakay a propeta ti asno a pagsakayan ti propeta a pinagsublina. 24  Idi addan iti dalan, adda leon a nasabatna a nangpatay kenkuana.+ Naiwara ti bangkayna iti dalan, ket nakatakder iti abayna ti asno kasta met ti leon. 25  Nakita dagiti limmabas a tattao ti bangkay a naiwara iti dalan ken ti leon a nakatakder iti abayna. Napanda iti siudad a pagnanaedan ti lakay a propeta ket impadamagda dayta. 26  Idi nangngeg ti lakay a propeta* ti napasamak, dagus nga imbagana: “Dayta ti adipen ti pudno a Dios ngem nagsukir iti bilin ni Jehova.+ Iti kasta, impalubos ni Jehova a darupen ken patayen ti leon, kas imbaga kenkuana ni Jehova.”+ 27  Kalpasanna, kinunana kadagiti annakna: “Siliaanyo ti asno a pagsakayak.” Iti kasta, siniliaanda ti asno. 28  Napan ket nasarakanna ti bangkay a naiwara iti dalan agraman ti asno ken ti leon a nakatakder iti abayna. Saan a kinnan ti leon ti bangkay, ken saanna met a dinangran ti asno. 29  Binagkat ti propeta ti bangkay ti adipen ti pudno a Dios ket insakayna iti asno. Insublina iti siudadna tapno dung-awan ken itabonna. 30  Gapuna, inkabilna ti bangkay iti bukodna a tanem, ket indungdung-awda: “Asika pay, kabsatko!” 31  Idi naitabonnan ti lalaki, imbagana kadagiti annakna: “Inton matayak, itabondakto iti nakaitabonan ti adipen ti pudno a Dios. Ikabilyo dagiti tulangko iti abay dagiti tulangna.+ 32  Sigurado a mapasamak ti sao ni Jehova nga impukkawna maibusor iti altar idiay Bethel ken maibusor iti amin a balay a pagdaydayawan iti nangangato a disso+ nga adda kadagiti siudad ti Samaria.”+ 33  Uray napasamak daytoy, saan latta nga insardeng ni Jeroboam ti dakes nga aramidna, no di ket intultuloyna ti nangdutok kadagiti agserbi a padi iti nangangato a disso manipud kadagiti umili.+ Pagbalinenna a padi* ti asinoman a mayat ket ibagana: “Agbalinka koma a maysa kadagiti papadi iti nangangato a disso.”+ 34  Daytoy a basol ti sangakabbalayan ni Jeroboam+ ti nakaigapuan ti pannakadadael ken pannakaibusda iti rabaw ti daga.+

Footnotes

Wenno “tanda.”
Wenno “tanda.”
Wenno “nataba a dapo,” kayatna a sawen, dapo a nabasa iti taba dagiti daton.
Wenno “naparalisado.”
Wenno “tanda.”
Wenno “paluknengem ti rupa ni.”
Wenno “Ap-apanyo.”
Lit., “propeta a nangpasubli kenkuana manipud iti dalan.”
Lit., “Punnuenna ti ima.”