Ti Umuna nga Ar-ari 12:1-33

  • Nagubsang a sungbat ni Rehoboam (1-15)

  • Agrebelde ti 10 a tribu (16-19)

  • Nagbalin ni Jeroboam nga ari ti Israel (20)

  • Mabilin ni Rehoboam a saan a makigubat iti Israel (21-24)

  • Panagdaydayaw ni Jeroboam iti urbon a baka (25-33)

12  Napan ni Rehoboam idiay Sikem,+ ta napan sadiay ti intero nga Israel tapno pagbalinenda nga ari.+  Nadamag daytoy ni Jeroboam nga anak ni Nebat (nga agnanaed idi idiay Egipto ta nagtalaw maigapu ken Ari Solomon).+  Gapuna, pinaayabanda. Napan ni Jeroboam ken ti intero nga Israel ken ni Rehoboam ket kinunada:  “Inikkannakami ni amam iti nadagsen nga awit.+ Ngem no palakaem ti panagserbimi ken amam ken palag-anem ti nadagsen* nga awit nga impabaklayna kadakami, agserbikamto kenka.”  Insungbatna kadakuada: “Agawidkayon ket agsublikayto kalpasan ti tallo nga aldaw.” Gapuna, pimmanaw dagiti tattao.+  Nagkonsulta ni Ari Rehoboam kadagiti lallakay* a nagserbi ken Solomon nga amana idi sibibiag pay. Kinunana: “Ania ti maibalakadyo nga isungbatko kadagiti tattao?”  Insungbatda: “No pagserbiam ida ket patgam ti kiddawda ken nasayaat ti ibagam kadakuada, agtalinaeddanto nga adipenmo.”  Ngem saanna nga impangag ti balakad dagiti lallakay,* ket nagkonsulta kadagiti kapatadanna a lallaki nga agserserbin kenkuana.+  Insaludsodna kadakuada: “Ania ti maibalakadyo nga isungbatko kadagiti tattao a nangibaga kaniak, ‘Palag-anem ti awit nga impabaklay ni amam kadakami’?” 10  Insungbat dagiti kapatadanna: “Kasaritam dagiti tattao a nangibaga kenka, ‘Inikkannakami ni amam iti nadagsen nga awit, ngem masapul a palag-anem,’ ket ibagam kadakuada, ‘Nais-istriktoakto ngem ni amak.* 11  Inikkannakayo ni amak iti nadagsen nga awit, ngem nayonakto pay. Dinusanakayo ni amak iti saplit, ngem dusaenkayto iti saplit nga adda tademna.’” 12  Iti maikatlo nga aldaw, nagsubli ken Rehoboam ni Jeroboam ken dagiti Israelita, ta imbaga ti ari: “Agsublikayto kaniak iti maikatlo nga aldaw.”+ 13  Ngem nagubsang ti sungbat ti ari kadakuada, ket saanna nga impangag ti imbalakad dagiti lallakay.* 14  Imbagana kadakuada ti imbalakad dagiti kapatadanna: “Inikkannakayo ni amak iti nadagsen nga awit, ngem nayonakto pay. Dinusanakayo ni amak iti saplit, ngem dusaenkayto iti saplit nga adda tademna.” 15  Gapuna, saan nga impangag ti ari dagiti tattao ta immaniobra ni Jehova ti napasamak,+ tapno matungpal ken Jeroboam nga anak ni Nebat ti imbaga ni Jehova babaen ken Ahias+ a taga-Shilo. 16  Idi nakita ti intero nga Israel a saan ida nga impangag ti ari, insungbatda kenkuana: “Adda aya bingaymi ken David? Awan ti tawidmi iti anak ni Jesse. Agsublikayon kadagiti diosyo, O Israel. Sika ti mangaywan iti sangakabbalayam, O David!” Iti kasta, nagawid dagiti Israelita kadagiti balayda.*+ 17  Ngem nagtultuloy nga inturayan ni Rehoboam dagiti Israelita nga agnanaed kadagiti siudad ti Juda.+ 18  Kalpasanna, imbaon ni Ari Rehoboam ni Adoram,+ a mangidadaulo kadagiti naayaban nga agtrabaho, ngem inubor ti intero nga Israel agingga a natay. Dagus a naglugan ni Ari Rehoboam iti karuahena ket nagkamang idiay Jerusalem.+ 19  Intultuloy dagiti Israelita ti bumusor+ iti sangakabbalayan ni David agingga ita nga aldaw. 20  Idi nadamag ti intero nga Israel a nagsublin ni Jeroboam, pinaayabanda sa pinagbalinda nga ari iti intero nga Israel.+ Awan ti simmurot iti sangakabbalayan ni David malaksid iti tribu ni Juda.+ 21  Idi nakadanon ni Rehoboam idiay Jerusalem, dagus nga inummongna ti intero a sangakabbalayan ti Juda ken ti tribu ni Benjamin, 180,000 a nasanay* a mannakigubat, tapno makilabanda kadagiti umili ti Israel ken maisubli ti kinaari ni Rehoboam nga anak ni Solomon.+ 22  Kalpasanna, kinuna ti pudno a Dios ken ni Semaias+ nga adipen ti pudno a Dios: 23  “Ibagam ken Rehoboam nga anak ni Solomon nga ari ti Juda, ken iti intero a sangakabbalayan ti Juda ken Benjamin, agraman ti amin nga umili, 24  ‘Daytoy ti kinuna ni Jehova: “Dikay mapan makilaban kadagiti Israelita a kakabsatyo. Agawidkayon, ta siak ti nangimaniobra iti daytoy.”’”+ Gapuna, nagtulnogda iti sao ni Jehova ket nagawidda, kas imbaga kadakuada ni Jehova. 25  Tinarimaan* ni Jeroboam ti Sikem+ iti kabambantayan ti Efraim sa nagnaed sadiay. Manipud sadiay, napanna tinarimaan* ti Penuel.+ 26  Kinuna ni Jeroboam iti pusona: “Agsublinto ti pagarian iti sangakabbalayan ni David.+ 27  No agtultuloy nga agidaton dagiti tattao iti balay ni Jehova idiay Jerusalem,+ agsublinto met ti pusoda iti apoda, ni Ari Rehoboam ti Juda. Wen, papatayendakto ket agsublida ken Ari Rehoboam ti Juda.” 28  Kalpasan a nagkonsulta ti ari, nangaramid iti dua a balitok nga urbon a baka+ sa kinunana kadagiti tattao: “Marigatankayo no mapankayo pay laeng idiay Jerusalem. Daytoy ti Diosyo, O Israel, a nangiruar kadakayo idiay Egipto.”+ 29  Inkabilna ti umuna idiay Bethel,+ ken ti maikadua idiay Dan.+ 30  Daytoy ti makagapu a nagbasolda.+ Napan dagiti tattao agingga idiay Dan tapno agdaydayawda iti balitok a baka a naikabil sadiay. 31  Nangaramid ni Jeroboam kadagiti balay a pagdaydayawan iti nangangato a disso ken nangdutok kadagiti papadi manipud kadagiti umili, dagidiay saan a Levita.+ 32  Nangaramid pay iti maysa a piesta iti maika-15 nga aldaw ti maikawalo a bulan, kas iti piesta idiay Juda.+ Iti altar nga inaramidna idiay Bethel,+ nagdaton kadagiti inaramidna a balitok a baka, ken nangdutok idiay Bethel kadagiti papadi nga agserbi iti nangangato a disso nga inaramidna. 33  Rinugianna ti agidaton iti altar nga inaramidna idiay Bethel iti maika-15 nga aldaw ti maikawalo a bulan, ti bulan a pinilina. Pinagbalinna dayta kas piesta dagiti umili ti Israel, ket immuli iti altar tapno mangidatag iti daton a mangpataud iti asuk.

Footnotes

Wenno “mangirurumen.”
Wenno “panglakayen.”
Wenno “panglakayen.”
Lit., “Napuspuskolto ti kikitko ngem ti siket ni amak.”
Wenno “panglakayen.”
Lit., “toldada.”
Lit., “napili.”
Wenno “Pinatibker.”
Wenno “pinatibker.”