Ti Umuna nga Ar-ari 17:1-24

  • Ipadto ni propeta Elias ti panagtikag (1)

  • Napakan ni Elias babaen kadagiti wak (2-7)

  • Mapan ni Elias iti balo a babai idiay Sarefat (8-16)

  • Matay ken mapagungar ti anak ti balo a babai (17-24)

17  Ita, ni Elias*+ a Tisbita a taga-Gilead+ imbagana ken Ahab: “Isapatak iti nagan ni Jehova, ti sibibiag a Dios ti Israel a pagserserbiak,* awanto ti dumteng a linnaaw wenno tudo iti sumagmamano a tawen, malaksid no ibagak!”+  Kinuna kenkuana ni Jehova:  “Pumanawka ditoy, ket agpadayaka ken aglemmengka iti Tanap ti Kerit,* iti daya ti Jordan.  Uminumka iti danum ti karayan, ket bilinekto dagiti wak nga ikkandaka iti taraon sadiay.”+  Dagus a napan ket tinungpalna ti sao ni Jehova. Nagyan iti Tanap ti Kerit,* iti daya ti Jordan.  Bigat ken rabii nga ikkan dagiti wak iti tinapay ken karne, ket imminum iti danum ti karayan.+  Ngem kalpasan ti sumagmamano nga aldaw, nagmaga ti karayan+ ta saan a nagtudo.  Imbaga kenkuana ni Jehova:  “Tumakderka, mapanka idiay Sarefat a sakup ti Sidon ket agyanka sadiay. Bilinekto sadiay ti maysa a balo a babai nga ikkannaka iti taraon.”+ 10  Timmakder ket napan idiay Sarefat. Idi nakadanon iti pagserkan ti siudad, adda balo a babai nga agal-ala iti kayo. Kinunana iti babai: “Pangngaasim ta iyalaannak iti sangkabassit a danum tapno makainumak.”+ 11  Idi mapan mangalan, kinuna pay ni Elias: “Pangngaasim ta iyalaannak pay iti sangkabassit a tinapay.” 12  Insungbat ti babai: “Ammo ni Jehova a sibibiag a Diosmo nga awan ti tinapayko. Adda laeng sangarakem nga arina iti dakkel a burnay ken sangkabassit a lana iti putik.+ Agal-alaak iti kayo, ket agawidak ken aglutoak iti kanenmi nga agina. Daytoyen ti maudi a kanenmi ket mataykaminton.” 13  Kinuna ni Elias iti babai: “Dika madanagan. Agawidka ket aramidem ti imbagam. Ngem iyaramidannak nga umuna iti bassit a tinapay, ket itedmo kaniak. Kalpasanna, manglutoka iti kanenyo nga agina. 14  Ta daytoy ti kinuna ni Jehova a Dios ti Israel: ‘Saanto a maibusan iti arina ti dakkel a burnay, ket saanto met a maatianan iti lana ti putik agingga iti aldaw a pagtuduen ni Jehova iti rabaw ti daga.’”+ 15  Napan ti babai ket inaramidna ti imbaga ni Elias, ket adda kinnan ti pamiliana iti adu nga aldaw.+ 16  Saan a naibusan iti arina ti dakkel a burnay, ken saan a naatianan iti lana ti putik, maitunos iti imbaga ni Jehova babaen ken Elias. 17  Idi agangay, nagsakit ti anak ti makinkukua iti balay. Kimmaro unay ti sakitna ket natay.+ 18  Gapuna, kinuna ti babai ken ni Elias: “O adipen ti pudno a Dios, ania ti basolko kenka?* Immayka kadi tapno ipalagipmo ti biddutko ken tapno patayem ti anakko?”+ 19  Ngem kinuna ni Elias: “Itedmo kaniak ti anakmo.” Innala ni Elias ti ubing kadagiti takiag ni nanangna sa inyulina iti siled iti pangatepan a paggigiananna idi, ket impaiddana iti katre.+ 20  Impakaasina ken Jehova: “O Jehova a Diosko,+ dangram met kadi ti balo a babai a pagdagdagusak babaen ti panangipalubosmo a matay ti anakna?” 21  Kalpasanna, namitlo a nagrukob iti rabaw ti ubing sa inkararagna ken Jehova: “O Jehova a Diosko, pangngaasim ta pasubliem ti biag daytoy nga ubing.” 22  Pinatgan ni Jehova ti kiddaw ni Elias,+ isu a nagsubli ti biag ti ubing ket nagungar.+ 23  Innala ni Elias ti ubing ket imbabana manipud iti siled iti pangatepan sa inyawatna ken nanangna, sa kinunana: “Kitaem, sibibiag ti anakmo.”+ 24  Iti kasta, kinuna ti babai ken ni Elias: “Ita, mamatiakon a pudno nga adipennaka ti Dios+ ken agpayso ti sao ni Jehova nga imbagam.”

Footnotes

Kaipapananna, “Ni Jehova ti Diosko.”
Lit., “nga agtaktakderak iti sanguananna.”
Wenno “Karayan Kerit.”
Wenno “Karayan Kerit.”
Wenno “ania ti pakibiangak kenka?”