Ti Umuna nga Ar-ari 16:1-34

  • Mensahe ni Jehova maibusor ken Baasa (1-7)

  • Elah, ari ti Israel (8-14)

  • Zimri, ari ti Israel (15-20)

  • Omri, ari ti Israel (21-28)

  • Ahab, ari ti Israel (29-33)

  • Bangonen manen ni Hiel ti Jerico (34)

16  Impakaammo ni Jehova babaen ken Jehu+ nga anak ni Hanani+ ti mensahena maibusor ken Baasa, ket kinunana:  “Intan-okka manipud iti tapok ket pinagbalinka a lider ti ilik nga Israel,+ ngem tinuladmo ti inaramid ni Jeroboam a nakaigapuan ti panagbasol ti ilik nga Israel isu a pinagpungtotdak gapu kadagiti basolda.+  Gapuna, pukawekto ni Baasa ken ti pamiliana, ket pagbalinekto a kas iti kaputotan ni Jeroboam+ nga anak ni Nebat.  Kanento dagiti aso ti asinoman a kaputotan ni Baasa a matay iti siudad; ken kanento dagiti billit ti asinoman a kaputotanna a matay iti away.”  Ti dadduma pay a pasamak iti pakasaritaan ni Baasa, ti inaramidna ken ti panagballigina, ket naisurat iti libro dagiti pasamak idi tiempo dagiti ari ti Israel.  Naginana ni Baasa a kas kadagidi ammana ket naitabon idiay Tirza.+ Ni Elah nga anakna ti simmaruno nga ari.  Impakaammo pay ni Jehova babaen ken propeta Jehu nga anak ni Hanani ti mensahena maibusor ken Baasa ken iti pamiliana, gapu iti amin a dakes nga inaramidna a nakaigapuan ti panagpungtot ni Jehova, ta nagbalin a kas iti kaputotan ni Jeroboam, ken gapu iti panangpapatayna kenkuana.*+  Iti maika-26 a tawen ti panagturay ni Ari Asa ti Juda, ni Elah nga anak ni Baasa ti nagbalin nga ari iti Israel idiay Tirza, ket nagturay iti dua a tawen.  Ni Zimri nga adipenna ti panguluen ti kagudua dagiti kumakaruahena. Nagplano iti dakes maibusor ken Elah bayat nga adda idiay Tirza nga agbarbartek iti balay ni Arza, ti agay-aywan iti sangakabbalayan ni Elah idiay Tirza. 10  Simrek ni Zimri ket pinatayna+ ni Elah iti maika-27 a tawen ti panagturay ni Ari Asa ti Juda, ket isu ti nagbalin nga ari. 11  Idi nagtugawen iti tronona kas ari, pinapatayna ti intero a pamilia ni Baasa. Awan ti inteddana uray maysa a lalaki,* kabagian* man wenno gayyem ni Baasa. 12  Iti kasta, inibus ni Zimri ti intero a pamilia ni Baasa, maitunos iti sao ni Jehova maibusor ken Baasa babaen ken Jehu a propeta.+ 13  Maigapu daytoy iti amin a basol da Baasa ken Elah nga anakna a nakaigapuan ti panagbasol ti Israel ta pinagpungtotda ni Jehova a Dios ti Israel gapu kadagiti awan serserbina nga idoloda.+ 14  Ti dadduma pay a pasamak iti pakasaritaan ni Elah, ti amin nga inaramidna, ket naisurat iti libro dagiti pasamak idi tiempo dagiti ari ti Israel. 15  Iti maika-27 a tawen ti panagturay ni Ari Asa ti Juda, pito nga aldaw a nagari ni Zimri idiay Tirza bayat a nagkampo maibusor iti Gibeton,+ a sakup idi dagiti Filisteo. 16  Nangngeg dagiti nagkampo a soldado a naikuna: “Nagplano ni Zimri iti dakes ket pinatayna pay ti ari.” Gapuna, pinagbalin ti intero nga Israel ni Omri,+ a pangulo ti armada, kas ari iti Israel iti dayta nga aldaw idiay kampo. 17  Pimmanaw ni Omri ken ti intero nga Israel idiay Gibeton ket pinalikmutanda ti Tirza. 18  Idi nakita ni Zimri a naparmeken ti siudad, napan iti natibker a torre iti balay* ti ari sa pinuoranna ti balay, ket natay sadiay.+ 19  Maigapu daytoy kadagiti basolna ta inaramidna ti dakes iti imatang ni Jehova babaen ti panangtuladna ken ni Jeroboam ken iti basolna a nakaigapuan ti panagbasol ti Israel.+ 20  Ti dadduma pay a pasamak iti pakasaritaan ni Zimri ken ti dakes a panggepna ket naisurat iti libro dagiti pasamak idi tiempo dagiti ari ti Israel. 21  Nabingay ti Israel iti daydi a tiempo. Adda dagiti nagbalin a pasurot ni Tibni nga anak ni Ginat, ta kayatda a pagbalinen nga ari, ken adda met dagiti nagbalin a pasurot ni Omri. 22  Ngem inabak dagiti pasurot ni Omri dagiti pasurot ni Tibni nga anak ni Ginat. Iti kasta, natay ni Tibni ket ni Omri ti nagbalin nga ari. 23  Iti maika-31 a tawen ti panagturay ni Ari Asa ti Juda, nagbalin ni Omri nga ari iti Israel, ket nagturay iti 12 a tawen. Innem a tawen a nagari idiay Tirza. 24  Ginatangna ken Shemer ti bantay ti Samaria iti dua a talento* a pirak, ket nangibangon iti siudad iti tuktok ti bantay. Pinanagananna ti siudad a binangonna iti Samaria,*+ manipud iti nagan ni Shemer a makinkukua* iti bantay. 25  Inar-aramid ni Omri ti dakes iti imatang ni Jehova, ket dakdakes pay ngem iti amin nga immun-una kenkuana.+ 26  Tinuladna ni Jeroboam nga anak ni Nebat ken ti basolna a nakaigapuan ti panagbasol ti Israel ta pinagpungtotda ni Jehova a Dios ti Israel gapu kadagiti awan serserbina nga idoloda.+ 27  Ti dadduma pay a pasamak iti pakasaritaan ni Omri, ti inaramidna ken dagiti panagballigina, ket naisurat iti libro dagiti pasamak idi tiempo dagiti ari ti Israel. 28  Naginana ni Omri a kas kadagidi ammana ket naitabon idiay Samaria. Ni Ahab+ nga anakna ti simmaruno nga ari. 29  Ni Ahab nga anak ni Omri ti nagbalin nga ari iti Israel iti maika-38 a tawen ti panagturay ni Ari Asa ti Juda. Nagturay ni Ahab nga anak ni Omri iti Israel iti 22 a tawen idiay Samaria.+ 30  Iti imatang ni Jehova, dakdakes ti inaramid ni Ahab nga anak ni Omri ngem iti amin nga immun-una kenkuana.+ 31  Saan a napnek a nangtulad kadagiti basol ni Jeroboam+ nga anak ni Nebat. Inasawana pay ni Jezebel+ nga anak ni Etbaal, nga ari dagiti Sidonio,+ ket nangrugi nga agserbi ken agruknoy ken Baal.+ 32  Malaksid iti dayta, nangaramid iti altar para ken Baal iti balay* ni Baal+ nga imbangonna idiay Samaria. 33  Nangibangon pay ni Ahab iti sagrado a poste.*+ Ad-adu ti inaramidna a namagpungtot ken Jehova a Dios ti Israel ngem iti amin nga immun-una nga ari ti Israel. 34  Idi kaaldawanna, binangon manen ni Hiel a taga-Bethel ti Jerico. Idi impasdekna ti pundasion, natay ni Abiram nga inauna nga anakna, ket idi inkabilna dagiti ruangan, natay ni Segub nga inaudi nga anakna, maitunos iti sao ni Jehova nga imbaga ni Josue nga anak ni Nun.+

Footnotes

Kayatna a sawen, ni Nadab nga anak ni Jeroboam.
Lit., “asinoman nga umis-isbo iti pader.” Pagsasao iti Hebreo a panglais kadagiti lallaki.
Wenno “mangibales iti dara.”
Wenno “palasio.”
Ti 1 talento ket 34.2 kg. Kitaem ti App. B14.
Kaipapananna, “Kukua ti Puli a Shemer.”
Lit., “apo.”
Wenno “templo.”
Kitaem ti Glosario.