Ti Umuna nga Ar-ari 3:1-28

  • Asawaen ni Solomon ti anak a babai ni Faraon (1-3)

  • Agparang ni Jehova ken ni Solomon iti tagtagainep (4-15)

    • Agkiddaw ni Solomon iti sirib (7-9)

  • Ti desision ni Solomon maipapan iti dua nga ina (16-28)

3  Nakialiansa ni Solomon ken ni Faraon nga ari ti Egipto babaen ti panagasawa. Inasawana* ti anak a babai ni Faraon,+ ket inyawidna iti Siudad ni David+ sa nagnaed sadiay agingga a nalpasna a binangon ti balayna,+ ti balay ni Jehova,+ ken ti pader ti Jerusalem.+  Ngem agidatdaton pay laeng idi dagiti tattao iti nangangato a disso+ ta saan pay a naibangon ti balay para iti nagan ni Jehova.+  Intultuloy ni Solomon nga ayaten ni Jehova babaen ti panangtungpalna kadagiti paglintegan ni David nga amana. Isuna laeng ta nangipapaay kadagiti daton a mapuoran kadagiti nangato a disso.+  Napan ti ari idiay Gibeon tapno agidaton, ta dayta ti kalatakan* a nangato a disso.+ Nangipaay ni Solomon iti 1,000 a daton a mapuoran iti altar nga adda sadiay.+  Idiay Gibeon, nagparang ni Jehova ken ni Solomon iti rabii babaen ti tagtagainep. Kinuna ti Dios: “Ibagam no ania ti kayatmo nga itedko kenka.”+  Insungbat ni Solomon: “Impakitam ti dakkel a napudno nga ayatmo iti adipenmo a ni David nga amak ta nagbalin a matalek, nalinteg, ken napasnek kenka. Intultuloymo nga impakita kenkuana dayta a dakkel a napudno nga ayat agingga ita nga aldaw ta inikkam iti anak nga agtugaw iti tronona.+  Ita, Jehova a Diosko, pinagbalinmo daytoy adipenmo nga ari a kasukat ni David nga amak, uray no agtutuboak* laeng ken awan pay kapadasak.*+  Daytoy adipenmo ti mangiturturay iti ili a pinilim+ a di mabilang ti kaaduna.  Isu nga ikkam koma daytoy adipenmo iti natulnog a puso tapno nalinteg dagiti aramidek a pangngeddeng para iti ilim,+ tapno mailasinko ti nagdumaan ti naimbag ken dakes,+ ta asino ti makabael a mangukom iti daytoy nakaad-adu* a tattaom?” 10  Naragsakan ni Jehova ta kasta ti kiniddaw ni Solomon.+ 11  Kinuna kenkuana ti Dios: “Gapu ta kiniddawmo ti pannakaawat tapno kabaelam a solbaren dagiti problema+ dagiti umili ken saanmo a kiniddaw ti atiddog a biag* wenno kinabaknang wenno ipapatay* dagiti kabusormo, 12  patgak ti kiddawmo.+ Ikkanka iti masirib ken mannakaawat a puso,+ ket awanto ti nasirsirib ngem sika, iti man kasakbayam wenno kalpasam.+ 13  Itedkonto met kenka ti kinabaknang ken dayaw+ uray no dimo kiniddaw,+ tapno awanto ti ari a kas kenka bayat a sibibiagka.*+ 14  No surotem dagiti dalanko babaen ti kanayon a panagtulnogmo kadagiti regulasion ken bilinko, kas iti inaramid ni David nga amam,+ ikkankanto met iti atiddog a biag.”*+ 15  Idi nakariing ni Solomon, nabigbigna a nagtagtagainep. Kalpasanna, napan idiay Jerusalem ket nagtakder iti sango ti lakasa ti tulag ni Jehova ket nangipaay kadagiti daton a mapuoran ken daton a pakikappia+ ken nangisagana iti piesta para iti amin nga adipenna. 16  Naminsan, adda dua a balangkantis a napan iti ari ket nagtakderda iti sanguananna. 17  Kinuna ti umuna a babai: “Apo, maymaysa a balay ti pagnanaedanmi iti daytoy a babai, ket adda idiay balay idi aganakak. 18  Tallo nga aldaw kalpasan ti panaganakko, naganak met daytoy a babai. Duakami laeng idi iti balay. 19  Bayat ti rabii, natay ti anakna ta napandaganna. 20  Isu a bimmangon iti tengnga ti rabii ket innalana ti anakko iti sikigak bayat a nakaturog daytoy adipenmo sa impaiddana kadagiti takiagna,* ket impaiddana ti natay nga anakna kadagiti takiagko. 21  Idi agriingak iti bigat tapno pasusuek ti anakko, nakitak a natayen. Isu a miningmingak a naimbag ket nakitak a saan nga isu ti ubing nga inyanakko.” 22  Ngem kinuna ti sabali a babai: “Saan, ti anakko ti sibibiag ket ti anakmo ti natay!” Ngem kinuna ti umuna a babai: “Saan, ti anakmo ti natay ket ti anakko ti sibibiag.” Kasta ti panagpinnapilitda iti sanguanan ti ari. 23  Kamaudiananna, imbaga ti ari: “Kuna ti maysa, ‘Anakko ti sibibiag, ket ti anakmo ti natay!’ ket kuna met ti sabali, ‘Saan, ti anakmo ti natay ket ti anakko ti sibibiag!’” 24  Imbaga ti ari: “Iyalaandak iti espada.” Isu nga inyawatanda iti espada. 25  Kinuna ngarud ti ari: “Guduaenyo ti sibibiag nga ubing. Itedyo ti kaguduana iti maysa a babai ket itedyo ti kagudua iti sabali a babai.” 26  Dagus a nagpakpakaasi iti ari ti makin-anak iti sibibiag nga ubing ta maasian unay iti anakna. Kinunana: “Pangngaasim, apo! Diyo patayen ti ubing! Itedyo lattan kenkuana!” Ngem kinuna ti sabali a babai: “Awan kadata ti pakaitedan ti ubing. Bay-am a guduaenda!” 27  Iti kasta, kinuna ti ari: “Itedyo ti sibibiag nga ubing iti umuna a babai ta isu ti inana! Diyo patayen.” 28  Nagdinamag iti intero nga Israel ti pangngeddeng ti ari, ket nagsiddaawda* kenkuana,+ ta nakitada nga adda kenkuana ti sirib ti Dios a mangipakat iti hustisia.+

Footnotes

Wenno “Innalana.”
Lit., “dakkel.”
Wenno “ubingak.”
Lit., “ken diak ammo no kasano ti rummuar ken no kasano ti sumrek.”
Wenno mabalin a, “nasukir.” Lit., “nadagsen.”
Lit., “adu nga aldaw.”
Wenno “kararua.”
Lit., “iti amin nga aldawmo.”
Lit., “paatiddogekto met dagiti aldawmo.”
Lit., “barukongna.”
Lit., “nagbutengda.”