Ti Umuna nga Ar-ari 6:1-38

  • Ibangon ni Solomon ti templo (1-38)

    • Makin-uneg a siled (19-22)

    • Dagiti kerubin (23-28)

    • Dagiti naikitikit, dagiti ridaw, ti makin-uneg a paraangan (29-36)

    • Nalpas ti templo iti agarup pito a tawen (37, 38)

6  Iti maika-480 a tawen kalpasan ti iruruar dagiti Israelita* idiay Egipto,+ iti maikapat a tawen ti panagari ni Solomon iti Israel, iti bulan ti Ziv*+ (kayatna a sawen, ti maikadua a bulan), rinugianna nga ibangon ti balay ni Jehova.*+  Ti balay nga imbangon ni Ari Solomon para ken Jehova ket 60 a kasiko* ti kaatiddogna, 20 a kasiko ti kaakabana, ken 30 a kasiko ti kangatona.+  Ti beranda+ iti sango ti templo* ket 20 a kasiko ti kaatiddogna,* a kapada ti kaakaba ti balay.* Ti kaakaba ti beranda ket 10 a kasiko manipud iti sango ti balay.  Inyaramidanna ti balay kadagiti tawa nga umak-akikid dagiti hambana.*+  Nagaramid met iti patakder iti sikigan ti diding ti balay. Naipalawlaw* dayta kadagiti diding ti balay, dagiti diding ti templo* ken ti kaunegan a siled,+ ket nangaramid kadagiti siled iti aglikmut.+  Ti umuna a kadsaaran ti nayabay a patakder ket lima a kasiko ti kaakabana. Ti maikadua a kadsaaran ket innem a kasiko ti kaakabana ken pito a kasiko ti kaakaba ti maikatlo a kadsaaran. Inaramidna dagiti diding nga adda pakaisalpakan dagiti suelo iti tunggal kadsaaran tapno saanen a kasapulan a maabutan ti diding iti aglawlaw ti balay.+  Ti nausar iti panagibangon iti balay ket dagiti naisaganan a natikap a batbato,+ isu a bayat a maibangbangon dayta, awan idi ti nangngeg nga uni dagiti martilio wenno wasay wenno aniaman a remienta a landok.  Ti pagserkan iti umuna a kadsaaran ket adda iti abagatan* a sikigan ti balay.+ Adda agdan nga agturong iti maikadua agingga iti maikatlo a kadsaaran.  Intultuloyna nga imbangon ti balay agingga a nalpas.+ Inatepanna iti kayo ken tabla a sedro.+ 10  Lima a kasiko ti kangato ti tunggal siled nga inaramidna iti uneg ti patakder a nayabay iti aglawlaw ti balay.+ Kayo a sedro ti nausar a pangyabay kadagita iti diding ti balay. 11  Kabayatanna, kastoy ti imbaga ni Jehova ken ni Solomon: 12  “No agtulnogka kadagiti bilinko ken tungpalem dagiti pagannurotak ken aramidem ti amin a paglintegak,+ tungpalekto met dagiti inkarik ken ni David nga amam maipapan iti daytoy a balay a bangbangonem,+ 13  ket agtaengakto iti tengnga dagiti Israelita+ ken saankonto a baybay-an ti ilik nga Israel.”+ 14  Intultuloy ni Solomon nga imbangon ti balay tapno malpas. 15  Dinidinganna ti balay iti tabla a sedro. Pinasukotanna dagiti diding iti kayo, manipud iti suelo agingga iti bobida, ket kayo a parwa ti inkalupkopna iti suelo.+ 16  Iti makinlikud a paset ti balay, nangaramid iti siled a 20 a kasiko ti kaakabana, a ti dibisionna ket tabla a sedro manipud suelo agingga iti bobida. Inaramidna iti uneg dayta* ti kaunegan a siled,+ ti Kasasantuan.+ 17  Ti templo*+—ti makinsango a paset ti uneg ti balay—ket 40 a kasiko ti kaatiddogna. 18  Dagiti sedro iti uneg ti balay ket nakitikitan kadagiti tabungaw+ ken nakaukrad a sabsabong.+ Puro sedro ti makita iti uneg; awan ti bato. 19  Insaganana ti makin-uneg a siled+ ti balay tapno maikabil sadiay ti lakasa ti tulag ni Jehova.+ 20  Ti makin-uneg a siled ket 20 a kasiko ti kaatiddogna, 20 a kasiko ti kaakabana, ken 20 a kasiko ti kangatona.+ Kinalupkopanna dayta iti puro a balitok ngem sedro ti inkalupkopna iti altar.+ 21  Puro a balitok ti inkalupkop ni Solomon iti uneg ti balay,+ ket nangikabil kadagiti balitok a kawar iti sango ti kaunegan a siled+ a nakalupkopan iti balitok. 22  Balitok ti inkalupkopna iti intero a balay agingga a nalpas. Balitok met ti inkalupkopna iti intero nga altar+ iti asideg ti kaunegan a siled. 23  Iti kaunegan a siled, nangaramid iti dua a kerubin+ a saleng,* a 10 a kasiko ti katayag ti tunggal maysa.+ 24  Lima a kasiko ti kaatiddog ti tunggal payak ti kerubin. Manipud iti murdong ti maysa a payak agingga iti murdong ti maysa pay a payak ket 10 a kasiko. 25  Ti katayag ti maikadua a kerubin ket 10 a kasiko met. Agpada ti kadakkel ken sukog ti dua a kerubin. 26  Ti katayag ti maysa a kerubin ket 10 a kasiko, ken kasta met ti sabali a kerubin. 27  Kalpasanna, inkabilna dagiti kerubin+ iti makin-uneg a siled.* Nakaukrad dagiti payak dagiti kerubin. Ti payak ti maysa ket dumanon iti diding sa dumanon met iti bangir a diding ti payak ti sabali. Nakaukrad dagiti payakda agingga iti tengnga ti siled isu nga agsinnagid dagita. 28  Balitok ti inkalupkopna kadagiti kerubin. 29  Amin a diding ti makin-uneg ken ti makinruar a siled* ti balay ket kinitikitanna iti ladawan dagiti kerubin,+ kayo a palma,+ ken nakaukrad a sabsabong.+ 30  Kinalupkopanna met iti balitok ti suelo dagita a dua a siled ti balay. 31  Ti pagserkan a mapan iti kaunegan a siled ket inyaramidanna kadagiti ridaw a saleng, adigi iti agsumbangir a sikigan, ken hamba, kas maikalima a paset.* 32  Naaramid iti kayo a saleng ti dua a ridaw, ket kinitikitanna dagita kadagiti kerubin, kayo a palma, ken nakaukrad a sabsabong, sa kinalupkopanna iti balitok. Kinalupkopanna iti balitok dagiti kerubin ken kayo a palma. 33  Kasta met laeng ti disenio ti inaramidna a saleng a hamba ti ridaw iti pagserkan ti templo,* a dayta ket kakapat a paset.* 34  Nangaramid iti dua a ridaw a kayo ti parwa. Ti tunggal ridaw ket addaan iti dua a rikep nga agpusipos.+ 35  Kinitikitanna dagita kadagiti kerubin, kayo a palma, ken nakaukrad a sabsabong, sa kinalupkopanna iti balitok. 36  Naaramid ti makin-uneg a paraangan+ iti tallo a katuon ti natikap a batbato ken maysa a katuon a kayo ti sedro.+ 37  Naisaad ti pundasion ti balay ni Jehova iti maika-4 a tawen, iti bulan ti Ziv;*+ 38  ket iti maika-11 a tawen, iti bulan ti Bul* (kayatna a sawen, iti maikawalo a bulan), nalpas ti balay ken ti amin a paspasetna sigun iti plano.+ Pito a tawen a binangon dayta ni Solomon.

Footnotes

Lit., “annak ni Israel.”
Kitaem ti App. B15.
Kitaem ti App. B8.
Ti 1 kasiko ket 44.5 cm. Kitaem ti App. B14.
Lit., “templo ti balay.”
Wenno “kalawana.”
Wenno “a 20 a kasiko a naipasurot iti kaakaba ti balay.”
Wenno “tawa nga ak-akaba ti makin-uneg ngem ti makinruar a pasetna.”
Kayatna a sawen, iti tallo a sikigan.
Tumukoy iti Nasantuan.
Lit., “kannawan.”
Kayatna a sawen, iti uneg ti balay.
Kayatna a sawen, ti Nasantuan, nga adda iti sango ti Kasasantuan.
Lit., “kayo a lana,” mabalin a ti Aleppo pine.
Kayatna a sawen, ti Kasasantuan.
Lit., “ti uneg ken ti ruar.”
Nalabit tumukoy iti pannakaaramid ti hamba ti ridaw wenno iti rukod dagiti ridaw.
Tumukoy iti Nasantuan.
Nalabit tumukoy iti pannakaaramid ti hamba ti ridaw wenno iti rukod dagiti ridaw.
Kitaem ti App. B15.
Kitaem ti App. B15.