Ti Umuna nga Ar-ari 4:1-34

  • Ti panangituray ni Solomon (1-19)

  • Kinarang-ay bayat ti panagari ni Solomon (20-28)

    • Kinatalged iti sirok ti kaubasan ken kayo a higos (25)

  • Sirib ni Solomon ken dagiti proverbiona (29-34)

4  Nagturay ni Ari Solomon iti intero nga Israel.+  Dagitoy ti nangato nga opisialna:* ti padi ket ni Azarias nga anak ni Zadok;+  dagiti sekretario+ ket da Elioref ken Ahias nga annak ni Sisa; ti paralista ket ni Jehosafat+ nga anak ni Ahilud;  ti pangulo ti armada ket ni Benaias+ nga anak ni Jehoiada; dagiti papadi ket da Zadok ken Abiatar;+  ti panguluen dagiti opisial ket ni Azarias nga anak ni Natan;+ ni Zabud nga anak ni Natan ket maysa a padi ken gayyem ti ari;+  ni Ahisar idi ti mangidadaulo kadagiti agserserbi iti palasio; ken ni Adoniram+ nga anak ni Abda ti mangidadaulo kadagiti naayaban nga agtrabaho.+  Nangdutok ni Solomon iti 12 nga opisial a mangidaulo iti intero nga Israel ken mangsuplay iti taraon iti ari ken iti palasiona. Iti tinawen, maysa a bulan ti batang ti tunggal maysa kadakuada a mangsuplay iti taraon.+  Dagitoy ti naganda: Ti anak ni Hur, iti kabambantayan ti Efraim;  ti anak ni Deker, iti Makaz, Saalbim,+ Bet-semes, ken Elon-bet-hanan; 10  ti anak ni Hesed, iti Arubot (sakupna ti Soco ken ti intero a Hefer); 11  ti anak ni Abinadab, iti intero a bakras ti Dor (ni Tafat a balasang ni Solomon ti nagbalin nga asawana); 12  ni Baana nga anak ni Ahilud, iti Taanak, Megiddo,+ ken iti intero a Bet-sean,+ iti abay ti Zaretan iti baba ti Jezreel, manipud Bet-sean agingga iti Abel-mehola ken iti rehion ti Jokmeam;+ 13  ti anak ni Geber, iti Ramot-gilead+ (sakupna dagiti babassit nga ili iti Gilead+ a kukua ni Jair+ nga anak ni Manases; sakupna met ti rehion ti Argob+ idiay Basan:+ 60 a dadakkel a siudad nga addaan pader ken gambang a trangka ti ruangan); 14  ni Ahinadab nga anak ni Iddo iti Mahanaim;+ 15  ni Ahimaaz iti Neftali (inasawana ni Basemat a maysa pay kadagiti babbalasang ni Solomon); 16  ni Baana nga anak ni Husai iti Aser ken Bealot; 17  ni Jehosafat nga anak ni Parua iti Isacar; 18  ni Simei+ nga anak ni Ela iti Benjamin;+ 19  ni Geber nga anak ni Uri iti Gilead,+ iti daga ni Sihon+ nga ari dagiti Amoreo ken ni Og+ nga ari ti Basan. Adda met maysa nga opisial a panguluen ti amin a dadduma pay nga opisial iti daga. 20  Kas iti kaadu ti darat iti igid ti baybay ti kaadu idi ti umili ti Juda ken Israel;+ mangmangan, umin-inum, ken agragragsakda.+ 21  Inturayan ni Solomon ti amin a pagarian manipud iti Karayan*+ agingga iti daga dagiti Filisteo ken iti pagpatinggaan ti Egipto. Nagbuis ken nagserbida ken Solomon iti unos ti panagbiagna.+ 22  Daytoy ti inaldaw a taraon iti palasio ni Solomon: 30 a cor* a napino nga arina ken 60 a cor nga arina, 23  10 a nalukmeg a baka, 20 a baka a nataraken iti pagpastoran, ken 100 a karnero, malaksid pay kadagiti gasela, nagduduma a kita ti ugsa, ken nataraken a billit a kakok. 24  Inturayan ni Solomon ti intero a laud ti Karayan,*+ manipud Tifsa agingga idiay Gaza,+ a pakairamanan ti amin nga ari iti laud ti Karayan; natalna ti amin a lugar a sakupna.+ 25  Natalged idi ti biag ti amin nga adda idiay Juda ken Israel iti sirok ti bukodda a puon ti ubas ken kayo a higos, manipud Dan agingga idiay Beer-sheba, bayat a sibibiag ni Solomon. 26  Addaan ni Solomon iti 4,000* a kuadra ti kabalio para kadagiti karuahena ken 12,000 a kabalio.*+ 27  Dagitoy nga opisial ti nangsuplay iti taraon ni Ari Solomon ken ti amin a mangmangan iti lamisaanna. Adda bulan a batang ti tunggal opisial ket siniguradoda a maipaay ti amin a kasapulan iti palasio.+ 28  Nangyegda met iti sebada ken garami a kanen dagiti kabalio, a pakairamanan dagiti kabalio ti karuahe, sigun iti responsabilidad ti tunggal maysa. 29  Inikkan ti Dios ni Solomon iti naisangsangayan a sirib ken pannakatarus, ken mannakaawat a puso* a saan a matukod ti tao.*+ 30  Ni Solomon ti kasisiriban iti amin a taga-Daya ken taga-Egipto.+ 31  Awan ti makaartap iti kinasiribna. Nasirsirib ngem ni Etan+ nga Ezrahita ken da Heman,+ Calcol,+ ken Darda nga annak a lallaki ni Mahol. Nagdindinamag ni Solomon iti amin a kaarrubana a nasion.+ 32  Nangputar* iti 3,000 a proverbio+ ken 1,005 a kanta.+ 33  Adu ti ammona maipapan kadagiti kayo a kas iti sedro ti Lebanon ken iti mula a hisopo+ nga agtubo iti pader, agraman dagiti animal,+ billit,*+ agkarkarayam a parsua,*+ ken ikan. 34  Napan ken Solomon dagiti tattao manipud iti amin a nasion tapno denggenda ti siribna. Napan met kenkuana dagiti ari iti intero a daga a nakadamag iti kinasiribna.+

Footnotes

Wenno “prinsipena.”
Kayatna a sawen, ti Eufrates.
Ti 1 cor ket 220 L. Kitaem ti App. B14.
Kayatna a sawen, ti Eufrates.
Agparang daytoy a bilang iti dadduma a manuskrito ken iti kapadana a salaysay. Iti dadduma a manuskrito, 40,000.
Wenno “kumakabalio.”
Lit., “nalawa a puso.”
Lit., “kas iti darat iti igid ti baybay.”
Wenno “Nangibaga.”
Wenno “agtaytayab a parsua.”
Mabalin a karaman dagiti reptilia ken insekto.