Ti Umuna nga Ar-ari 19:1-21

  • Itarayan ni Elias ti pungtot ni Jezebel (1-8)

  • Agparang ni Jehova ken ni Elias idiay Horeb (9-14)

  • Dutokan ni Elias da Hazael, Jehu, ken Eliseo (15-18)

  • Nadutokan ni Eliseo a sumukat ken Elias (19-21)

19  Imbaga ni Ahab+ ken ni Jezebel+ ti amin nga inaramid ni Elias ken ti panangpapatayna iti amin a propeta babaen ti espada.+  Gapu iti dayta, nangibaon ni Jezebel iti mensahero a mangibaga ken Elias: “Dusaendak koma dagiti dios no diak aramiden kenka iti kastoy nga oras inton bigat ti inaramidmo iti tunggal maysa* kadakuada!”  Nagbuteng ni Elias, isu a timmakder ket nagtartaray tapno maispal ti biagna.*+ Nakadanon idiay Beer-sheba+ a sakup ti Juda,+ ket imbatina sadiay ti katulonganna.  Maysa nga aldaw a nagnagna a nagturong iti let-ang. Nagsardeng ken nagtugaw iti sirok ti kayo a retama. Kiniddawna a matay koman ket kinunana: “Huston, O Jehova! Alaemon ti biagko,*+ ta saanak a naim-imbag ngem kadagidi ammak.”  Kalpasanna, nagidda ket nakaturog iti sirok ti kayo a retama. Pagammuan ta adda anghel a nangsagid kenkuana+ a nagkuna: “Bumangonka ket manganka.”+  Idi timmaliaw, adda nakitana iti uluananna a nagbukel a tinapay iti rabaw ti bumegbeggang a batbato ken sangapitser a danum. Nangan ken imminum sa nagidda manen.  Di nagbayag, nagsubli ti anghel ni Jehova iti maikadua a daras ket sinagidna ni Elias ken kinunana: “Bumangonka ket manganka, ta saanmo a kabaelan ti agdaliasat.”  Iti kasta, bimmangon ket nangan ken imminum. Immanay ti bileg a naalana iti dayta a taraon iti 40 nga aldaw ken 40 a rabii a pannagnana agingga a nakadanon idiay Horeb, ti bantay ti pudno a Dios.+  Simrek iti maysa a kueba+ ket imyan sadiay. Imbaga kenkuana ni Jehova: “Ania ti ar-aramidem ditoy, Elias?” 10  Insungbatna: “Sireregta nga agserserbiak kenka, O Jehova a Dios dagiti armada;+ ta binaybay-an dagiti umili ti Israel ti tulagmo,+ dinadaelda dagiti altarmo, ken pinatayda dagiti propetam iti espada,+ ket siak laeng ti natedda. Ita, sapsapulendak tapno alaenda ti biagko.”*+ 11  Ngem kinuna ti Dios: “Rummuarka ket agtakderka iti bantay iti sanguanan ni Jehova.” Limmabas ni Jehova,+ ket adda napigsa nga angin a namagrengngat iti bambantay ken nangburak iti dadakkel a batbato iti sanguanan ni Jehova,+ ngem awan ni Jehova iti angin. Nagsardeng ti angin ket nagginggined,+ ngem awan ni Jehova iti ginggined. 12  Kalpasan ti ginggined, adda apuy,+ ngem awan ni Jehova iti apuy. Kalpasan ti apuy, adda naalumamay ken nakapsut a timek.+ 13  Idi nangngeg dayta ni Elias, dagus nga inyabbongna iti rupana ti opisial a kagayna+ ket rimmuar ken nagtakder iti pagserkan ti kueba. Adda timek a nagkuna kenkuana: “Ania ti ar-aramidem ditoy, Elias?” 14  Insungbatna: “Sireregta nga agserserbiak kenka, O Jehova a Dios dagiti armada; ta binaybay-an dagiti umili ti Israel ti tulagmo,+ dinadaelda dagiti altarmo, ken pinatayda dagiti propetam iti espada, ket siak laeng ti natedda. Ita, sapsapulendak tapno alaenda ti biagko.”*+ 15  Kinuna kenkuana ni Jehova: “Agsublika ket mapanka idiay let-ang ti Damasco. Inton makadanonka sadiay, dutokam ni Hazael+ kas ari iti Siria. 16  Dutokam ni Jehu+ nga apoko ni Nimsi kas ari iti Israel, ken dutokam met ni Eliseo* nga anak ni Safat manipud Abel-mehola kas propeta a mangsukat kenka.+ 17  Asinoman a makalasat iti espada ni Hazael,+ papatayento ni Jehu;+ ket asinoman a makalasat iti espada ni Jehu, papatayento ni Eliseo.+ 18  Adda pay 7,000 a nabati iti Israel,+ aminda ket saan a nagparintumeng ken ni Baal+ ken saan a nangbisong kenkuana.”+ 19  Iti kasta, napan ket nasarakanna ni Eliseo nga anak ni Safat bayat nga agar-arado a kaduana ti 12 a paris ti kalakian a baka iti sangona, ket iturturongna ti maika-12 a paris. Limmabas ni Elias ket impalladawna ken Eliseo ti opisial a kagayna.+ 20  Pinanawan ni Eliseo dagiti bakana ket nagtaray a nangkamakam ken Elias sa kinunana: “Pangngaasim ta palubosannak a mangbisong kada tatang ken nanangko. Kalpasanna, sumurotakto kenka.” Insungbatna: “Mapanka, saanka a laplapdan.” 21  Gapuna, nagsubli sa innalana ti sangaparis a kalakian a baka ket indatonna dagita. Inusarna dagiti sangol a pinangluto iti karne dagiti baka sa intedna kadagiti tattao, ket nanganda. Kalpasanna, simmurot ken Elias ket nagserbi kenkuana.+

Footnotes

Wenno “no saanko a mapagbalin ti kararuam a kas iti kararua ti tunggal maysa.”
Wenno “kararuana.”
Wenno “kararuak.”
Wenno “kararuak.”
Wenno “kararuak.”
Kaipapananna, “Ti Dios ti Mangisalakan.”