Job 9:1-35
9 Ket simmungbat ni Job ket kinunana:
2 “Iti kinapudnona ammok a kasta dayta.Ngem kasano a ti mortal a tao adda iti umiso no iti pannakisubang iti Dios?+
3 No isu maragsakan a makisupiat kenkuana,+Isu saanna a masungbatan iti maminsan manipud iti sangaribu.
4 Isu masirib iti puso ken napigsa iti pannakabalin.+Siasino ti makaipakita kenkuana iti kinasungit ket agbanag a di nadangran?+
5 Iyalisna dagiti bantay,+ iti kasta saan pay ketdi a maammuan ida dagiti tattao,Daydiay a nangduprak kadakuada iti ungetna.+
6 Pagkintayegenna ti daga manipud iti dissona,Iti kasta agpigerger dagiti mismo nga adigina.+
7 Kunaenna iti init a saan koma nga agsilnag,Ket iti aglikmut dagiti bituen isu mangikabil iti selio,+
8 Iyunnatna ti langlangit nga is-isuna+Ken agtalaytay kadagiti nangato a dalluyon ti baybay;+
9 Aramidenna ti Ash a konstelasion, ti Kesil a konstelasion,Ken ti Kimah a konstelasion+ ken dagiti makin-uneg a siled ti Abagatan;
10 Agaramid iti naindaklan a bambanag a di masukimat,+Ken nakaskasdaaw a bambanag nga awanan bilang.+
11 Adtoy! Isu lumabas iti sibayko ket saanko a makita,Ket agtultuloy a mapan ket isu saanko a mailasin.+
12 Adtoy! Isu mangrabsut. Siasino ti makasaranget kenkuana?Siasino ti agkunanto kenkuana, ‘Ania ti ar-aramidem?’+
13 Ti met laeng Dios saannanto nga ibaw-ing ti ungetna;+Iti babana agruknoyto dagiti katulongan ti maysa a manangduklos.+
14 Anian nga ad-adda pay no kas pagarigan siak sumungbatak kenkuana!Piliekto ti sasaok kenkuana,+
15 Isu a saanko a sungbatan, uray no pudno nga addaak koma iti umiso.+Iti kabusorko iti linteg ipakaasik ti parabur.+
16 No immawagak kenkuana, sungbatannak ngata?+Diak patien nga umimdeng iti timekko;
17 Isu a mangdunor kaniak babaen iti bagyoKen pudno unay a mangpaadu kadagiti sugatko nga awan rason.+
18 Saannanto nga ipalubos kaniak ti pananglang-abko iti kabbaro nga anges,+Ta melmelmelannak iti napait a bambanag.
19 No iti pannakabalin napigsa ti asinoman, isu adda sadiay;+Ket no iti kinahustisia napigsa ti asinoman, O maayabanak koma!
20 No addaak koma iti umiso, ti bukodko a ngiwat ibatadnak a nadangkes;No awan koma ti pakababalawak, iti kasta ideklaranak a nakillo.
21 No awan koma ti pakababalawak, saanko nga ammo ti kararuak;Pagkedkedak ti biagko.
22 Maysa a banag ti adda. Dayta ti makagapu a kunaek,‘Daydiay awan pakababalawanna, kasta met daydiay nadangkes, iyegna iti panagpatinggada.’+
23 No ti met laeng dumaruros a layus pataudenna koma ti giddato nga ipapatay,Iti mismo a pannakaupay dagidiay awanan basol isu mangrabrabak.
24 Ti met laeng daga nayawat iti ima daydiay nadangkes;+Ti rupa dagiti ukomna abbonganna.No saan, siasino, ngarud, dayta?
25 Kasta met ti mismo nga al-aldawko nagbalinda a naparpartak ngem ti maysa a tumataray;+Nagtarayda, sigurado a saandanto a makita ti naimbag.
26 Naggunayda a mapan kas kadagiti runo a barangay,Kas maysa nga agila a sumiag nga agsublisubli a maipaay iti makan.+
27 No kinunak, ‘Lipatek koma ti pakaseknak,+Baliwak koma ti rupak+ ket pagraniagek,’
28 Nagamakak kadagiti amin a rigatko;+Ammok a saannakto nga ibilang nga awanan basol.
29 Siak agbalinak a nadangkes.Apay ngata nga agbannogak iti kinaubbaw laeng?+
30 No pudno a binugguak ti bagik iti danum ti niebe,Ken pudno a dinalusak dagiti imak iti potasa,+
31 Ngarud iti abut irebrebnak,Ket dagiti kawesko sigurado a karimondak.
32 Ta isu saan a tao+ a kas kaniak tapno rebbeng a sungbatak,Tapno rebbeng a sangsangkamaysakami a dumteng iti panangukom.
33 Awan ti persona a mangngeddeng iti nagbaetanmi,+Tapno iparabawna koma ti imana kadakami a dua.
34 Ikkatenna koma kaniak ti sarukodna,+Ket ti kinamakaaliawna, saannak koma a pagkullayawen.
35 Agsaoak koma ket saanak nga agbuteng kenkuana,Ta saan a kasta ti pagannayasak a mismo.
