Job 42:1-17
42 Ket ni Job simmungbat ken Jehova ket kinunana:
2 “Naammuak a kabaelam nga aramiden amin a bambanag,+Ket awan ti kapanunotan a saanmo a kabaelan a ragpaten.+
3 ‘Siasino daytoy a mangliblibeg iti pammatigmaan nga awanan pannakaammo?’+Gapuna nagsaoak, ngem saanko idi a maaw-awatanBambanag a nakaskasdaaw unay kaniak, isuda a saanko nga ammo.+
4 ‘Dumngegka, pangngaasim, ket siak agsaoakto.Saludsodanka, ket pakaammuannak.’+
5 Iti alimadamad nangngegko ti maipapan kenka,Ngem ita ti bukodko a mata makitanaka.
6 Dayta ti makagapu a mangaramidak iti panangibabawi,Ket agbabawiak+ iti tapok ken dapdapo.”
7 Ket naaramid kalpasan a sinao ni Jehova dagitoy a sasao ken Job, a ni Jehova kinunana ken Elifaz a Temanita:“Ti ungetko bimmara a maibusor kenka ken iti dua a kakaduam,+ ta saankayo a nagsao iti napudno+ maipapan kaniak kas iti panagsao ni adipenko a Job.
8 Ket ita mangalakayo maipaay kadakayo iti pito a toro ken pito a kalakian a karnero+ ket mapankayo ken adipenko a Job,+ ket masapul a mangidatonkayo iti mapuoran a sakripisio maigapu kadakayo a mismo; ket ni met laeng Job nga adipenko ikararagannakayto.+ Ti rupana laeng ti awatekto tapno saanko nga aramiden kadakayo ti nakababain a kinamaag, ta saankayo a nagsao iti napudno maipapan kaniak, kas iti panagsao ni adipenko a Job.”+
9 Iti kasta ni Elifaz a Temanita ken ni Bildad a Suhita ken ni Zofar a Naamatita napanda ket inaramidda ti kas iti sinao kadakuada ni Jehova; ket ngarud inawat ni Jehova ti rupa ni Job.
10 Ket imbaw-ing ni Jehova a mismo ti kautibo a kasasaad ni Job+ idi nagkararag maigapu kadagiti kaduana,+ ket kas kanayonan rinugian ni Jehova nga ited ti isuamin a kukua idi ni Job, iti mamindua a kaadu.+
11 Ket nagtultuloy nga immay kenkuana ti amin a kakabsatna a lallaki ken ti amin a kakabsatna a babbai ken dagidiay amin a sigud a makaam-ammo kenkuana,+ ket rinugianda ti makipangan kenkuana iti tinapay+ iti balayna ken makipagrikna kenkuana ken mangliwliwa kenkuana gapu iti isuamin a didigra nga impalubos ni Jehova a dumteng kenkuana; ket nangtedda kenkuana tunggal maysa iti sangkapisi a kuarta ken tunggal maysa iti balitok a singsing.
12 No maipapan ken Jehova, binendisionanna+ ti naud-udi a tungpal ni Job nga ad-adda ngem iti punganayna,+ iti kasta naaddaan iti sangapulo ket uppat a ribu a karnero ken innem a ribu a kamelio ken sangaribu a paris ti bakbaka ken sangaribu nga asna.
13 Naaddaan met iti pito nga annak a lallaki ken tallo nga annak a babbai.+
14 Ket pinanagananna ti umuna Jemima ket ti nagan ti maikadua Kezia ket ti nagan ti maikatlo Keren-happuc.
15 Ket awan babbai a nasarakan a kas kalibnos ti annak a babbai ni Job iti intero a daga, ket ni amada inikkanna ida iti tawid iti nagtetengngaan ti kakabsatda a lallaki.+
16 Ket ni Job nagtultuloy a nagbiag kalpasan daytoy iti sangagasut ket uppat a pulo a tawen+ ket nakitana ti annakna ken appokona+—uppat a kaputotan.
17 Ket idi agangay natay ni Job, lakay ken napneken iti al-aldaw.+
