Job 8:1-22
8 Ket simmungbat ni Bildad a Suhita+ ket kinunana:
2 “Kasanonto kabayag nga iyeb-ebkasmo dagitoy a banag,+Idinto ta dagiti sasao ti ngiwatmo maysada laeng a nabileg nga angin?+
3 Ti met laeng Dios ballikugennanto aya ti panangukom,+Wenno ti met laeng Mannakabalin-amin ballikugennanto aya ti kinalinteg?+
4 No nagbasol a maikaniwas kenkuana ti bukodmo nga annak,Iti kasta ipalubosna a mapanda iti ima ti iyaalsada,
5 No sika sapulemto ti Dios,+Ken no iti Mannakabalin-amin ipakaasimto ti parabur,
6 No nasin-aw ken napalungdoka,+Ita agriingen maipaay kenkaKet sigurado nga isublina ti nalinteg a disso a pagyanam.
7 Kasta met, ti punganaymo nalabit bassit a banag,Ngem ti mismo a tungpalmo kalpasanna dumakkel unay.+
8 Pudno, imtuodem, pangngaasim, maipapan iti immun-una a kaputotan,+Ket iturongmo ti asikasom iti bambanag a sinukimat dagiti ammada.+
9 Ta idi kalmantayo laeng,+ ket awan ti ammotayo,Agsipud ta dagiti aldawtayo iti daga maysada nga anniniwan.+
10 Saandanto aya nga isuro kenka, ibaga kenka,Ket manipud iti pusoda saandanto aya a mangpataud iti sasao?
11 Tumayagto aya ti maysa a mula a papiro+ nga awan ti nalutulot a disso?Dumakkelto aya ti maysa a runo nga awan ti danum?
12 Bayat nga adda pay laeng dayta iti buselna, saan a nakettel,Umun-unanto pay a magango ngem iti amin a sabsabali a ruot.+
13 Kasta dagiti dasdas dagidiay amin a mangliplipat iti Dios,+Ket ti mismo a namnama ti maysa nga apostata mapukawto,+
14 A ti pagkammatalkanna makeltay,Ket ti pagtalkanna maysa a balay ti lawwalawwa.+
15 Isu agsadagto iti balayna, ngem saanto nga agtalinaed a sitatakder;Petpetannanto, ngem saanto nga agpaut.
16 Isu napnuan tubbog iti sanguanan ti init,Ket iti minuyonganna rummuar ti bukodna a saringit.+
17 Iti maysa a bunton ti bato nailagalaga dagiti ramutna,Maysa a balay a naaramid iti batbato makitana.
18 No isu alun-onen ti maysa manipud dissona,+Isu sigurado nga ilibakto met dayta, a kunkunana, ‘Saanka a nakita.’+
19 Adtoy! Dayta ti pannakapunas ti dalanna;+Ket manipud iti tapok tumanor ti sabsabali.
20 Adtoy! Ti met laeng Dios saannanto a laksiden ti asinoman nga awan pakababalawanna,Saannanto met a tenglen ti ima dagita managaramid iti dakes,
21 Agingga a mapunnona ta ngiwatmo iti katawa,Ken dagita bibigmo iti narag-o a panagdir-i.
22 Dagidiay mismo a manggurgura kenka makawesandanto iti bain,+Ket ti tolda dagidiay nadangkes maawanton.”
