1, 2. Ano ang aton mga kinatuhayan kon parte sa mga kahimtangan sang pamilya kag sa aton espirituwalidad?

SI Jehova ang nagtukod sang kahimusan sa pamilya. (Efe. 3:14, 15) Pero bisan ang mga miembro sang isa ka pamilya may lainlain nga mga kinaiya kag mga kahimtangan. Mahimo nga kaupod mo ang imo mga ginikanan asta sa imo pagdaku. Ang iban mahimo nga napatyan sing mga ginikanan bangod sang balatian, aksidente, ukon trahedya. Ang iban gani wala makahibalo kon sin-o ang ila mga ginikanan.

² Subong miembro sang pamilya nga nagasimba kay Jehova, ang aton espirituwalidad lainlain man. Mahimo nga ‘ginpadaku ka sa kamatuoran,’ subong sang ginasiling sang iban, kag ginpatudok sang imo mga ginikanan sa imo ang mga prinsipio sang Dios. (Deut. 6:6, 7) Ukon mahimo nga lakip ka sa linibo nga nakasulod sa kamatuoran paagi sa pagbantala sang iban nga alagad ni Jehova.—Roma 10:13-15; 1 Tim. 2:3, 4.

3. Sa ano kita tanan palareho?

³ Bisan pa sa sini, may pila ka butang nga palareho kita tanan. Nagaantos kita sa resulta sang paglapas ni Adan kag nakapanubli sing di-kahimpitan, sala, kag kamatayon. (Roma 5:12) Pero  subong matuod nga mga sumilimba, nagakaigo nga matawag naton si Jehova nga ‘aton Amay.’ Mahimo masiling sang pinili nga katawhan sang Dios sadto ang narekord sa Isaias 64:8: “O GINOO, ikaw amon Amay.” Isa pa, ginsugdan ni Jesus ang modelo nga pangamuyo sa pagsiling: “Amay namon nga yara sa langit, pakabalaanon ang imo ngalan.”—Mat. 6:9.

4, 5. Para mapadalom ang aton gugma sa aton Amay, si Jehova, ano ang aton binagbinagon?

⁴ Ang aton Amay sa langit nagaatipan kag nagaamlig sa aton subong katawhan nga nagatawag sa iya ngalan nga may pagtuo. Suno sa salmista, si Jehova nagsiling: “Bangud nga ginhigugma [ako sang matuod nga sumilimba], busa luwason ko sia; ipahamtang ko sia sa hitaas, bangud nga ginkilala niya ang akon ngalan.” (Sal. 91:14) Si Jehova nga Dios mahigugmaon nga nagaaman sing palalagyuhan gikan sa aton mga kaaway kag nagaamlig sa aton subong iya katawhan, agod indi kita mapapas.

⁵ Para maapresyar pa gid naton ang aton Amay sa langit, binagbinagon naton ang tatlo ka importante nga butang: (1) Ang aton Amay amo ang aton Manug-aman. (2) Si Jehova ang aton Manug-amlig. (3) Ang Dios amo ang aton pinakamaayo nga Abyan. Samtang ginabinagbinag naton ini nga mga punto, maayo gid kon pamalandungan naton ang aton kaangtanan sa Dios kag hunahunaon kon paano naton sia mapadunggan subong aton Amay. Makabulig man kon hunahunaon naton ang mga pagpakamaayo ni Jehova sa mga nagapalapit sa iya.—Sant. 4:8.

6. Ano ang isa ka paagi nga si Jehova nangin Manughatag sang “tagsa ka maayong dulot”?

⁶ “Ang tagsa ka maayong dulot kag tagsa ka himpit nga regalo gikan sa hitaas,” sulat ni disipulo Santiago, “nagagikan ini sa Amay sang langitnon nga mga kapawa.” (Sant. 1:17) Ang kabuhi mismo dalayawon nga regalo gikan kay Jehova. (Sal. 36:9) Kon gamiton naton ini sa pagtuman sa kabubut-on sang Dios, makatigayon kita sing madamo nga pagpakamaayo karon kag sing kabuhi nga dayon sa bag-o nga kalibutan. (Hulu. 10:22; 2 Ped. 3:13) Pero paano ini mangin posible kay napanubli naton ang malain nga resulta sang paglapas ni Adan?

7. Paano kita ginhatagan sang Dios sing kahigayunan para makatigayon sing suod nga kaangtanan sa iya?

⁷ Ginpakita ni Jehova nga sia gid ang Dakung Manug-aman sa indi maisip nga paagi. Halimbawa, ang iya indi matupungan nga kaayo nagaluwas sa aton. Tanan kita makasasala kag nakapanubli sing di-kahimpitan sa aton una nga dutan-on nga amay. (Roma 3:23) Pero bangod sang gugma ni Jehova, nangita sia sing paagi para may kahigayunan kita nga makatigayon sing suod nga kaangtanan sa iya. “Paagi sini ang gugma sang Dios ginpadayag sa aton kahimtangan,” sulat ni apostol Juan, “bangod ginpadala sang Dios ang iya bugtong nga Anak sa kalibutan agod maagom naton ang kabuhi paagi sa iya. Amo ini ang gugma, indi nga ginhigugma naton ang Dios, kundi ginhigugma niya kita kag ginpadala ang iya Anak subong nagapasag-uli nga halad para sa aton mga sala.”—1 Juan 4:9, 10.

8, 9. Paano si Jehova nangin Dakung Manug-aman sang tion ni Abraham kag ni Isaac? (Tan-awa ang piktyur sa umpisa sini nga artikulo.)

⁸ Sang ika-19 nga siglo B.C.E., ang natuman nga tagna nagapakita sang mahigugmaon nga aman ni Jehova agod matigayon sang matinumanon nga katawhan ang kabuhi nga wala sing katapusan. Ang Hebreo 11:17-19 nagpaathag: “Bangod sa pagtuo si Abraham, sang gintilawan sia, daw subong nga ginhalad na niya si Isaac, kag ang tawo nga malipayon nga nagbaton sang mga saad nagtinguha nga ihalad ang iya bugtong nga anak, bisan pa ginsilingan na sia: ‘Ang tawgon nga “imo binhi” mangin paagi kay Isaac.’ Apang ginkabig niya nga ang Dios makasarang sa pagbanhaw sa iya bisan gikan sa mga patay; kag gikan sa sini ginbaton man niya sia sa malaragwayon nga paagi.” Mahapos naton makita ang pagkaanggid sini. Ginhalad ni Jehova  ang iya Anak, si Jesucristo, para sa kalibutan sang katawhan.—Basaha ang Juan 3:16, 36.

⁹ Pat-od nga naumpawan si Isaac kay wala nadayon ang paghalad sa iya! Nagapasalamat gid sia sa aman sang Dios nga ginbulos sa iya subong halad—isa ka karnero nga lalaki nga napukot sa kasiutan. (Gen. 22:10-13) Gani ini nga lugar gintawag nga Jehova-jireh, nga nagakahulugan “ang GINOO magatigana.”—Gen. 22:14.

10, 11. Sin-o ang nagapanguna sa “ministeryo sa pagpasag-uli,” kag paano nila ini nahimo?

¹⁰ Samtang ginapamalandungan naton kon paano nangin Dakung Manug-aman si Jehova, mapinasalamaton nga ginakilala naton ang importante nga katungdanan ni Jesucristo. Bisan si Pablo nagbaton sa sini nga nagasiling: “Amo ini ang amon ginhinakop, nga ang isa ka tawo napatay para sa tanan; matuod, ang tanan napatay; kag napatay sia para sa tanan agod ang mga nagakabuhi indi na magkabuhi para sa ila kaugalingon, kundi para sa iya nga napatay para sa ila kag ginbanhaw.”—2 Cor. 5:14, 15.

¹¹ Bangod sang ila gugma sa Dios kag sa ila pagpasalamat sa daku nga pribilehiyo sa pag-alagad sa iya, ang mga Cristiano sadto malipayon nga nagbaton “sang ministeryo sa pagpasag-uli.” Ang ila pagbantala kag paghimo sing mga disipulo naghatag sing kahigayunan sa mga interesado nga makighidait sa Dios, mangin Abyan niya, kag sa ulihi mangin espirituwal niya nga mga anak. Sa karon, ang hinaplas nga mga alagad ni Jehova nagahimo man sini nga ministeryo. Bangod sang ila nahimo subong embahador sang Dios kag sang Cristo, posible na mabuyok ni Jehova ang mga interesado kag mangin mga tumuluo.—Basaha ang 2 Corinto 5:18-20; Juan 6:44; Binu. 13:48.

12, 13. Paano naton mapakita nga ginaapresyar naton ang mga aman ni Jehova?

¹² Bangod sang pagpasalamat kay Jehova subong Dakung Manug-aman, ang tanan nga Cristiano nga may paglaum sa duta nagabulig sa mga hinaplas sa pagbantala sang Ginharian. Sa sini nga hilikuton, ginagamit naton ang Biblia, nga isa pa ka dalayawon nga aman sang Dios. (2 Tim. 3:16, 17) Paagi sa paggamit sing maayo sang Pulong sang Dios sa aton ministeryo, ginahatagan naton ang iban sing kahigayunan nga matigayon ang kabuhi nga wala sing katapusan. Para mabuligan kita sa sini nga hilikuton, tanan kita nagasalig sa isa pa ka aman ni Jehova—ang iya balaan nga espiritu. (Zac. 4:6; Luc. 11:13) Dalayawon gid ang mga resulta sini, subong sang ginapakita sang tagsa ka edisyon sang Tuigan nga Libro sang mga Saksi ni Jehova. Isa gid ka kadungganan nga makigbahin sa sini nga hilikuton para sa kadayawan sang aton Amay kag Manug-aman!

¹³ Bangod sang tanan nga aman sang Dios, dapat naton pamangkuton ang aton kaugalingon: ‘Ginahimo ko bala ang akon bug-os nga masarangan sa ministeryo para mapakita kay Jehova nga ginaapresyar ko gid ang iya mga aman? Ano ang himuon ko para mag-uswag kag mangin mas epektibo nga manugbantala sang maayong balita?’ Mapakita naton ang aton apresasyon sa dalayawon nga mga aman sang Dios paagi sa pag-una sang intereses sang Ginharian. Kon himuon naton ini, pat-uron ni Jehova nga maaman ang aton mga kinahanglanon. (Mat. 6:25-33) Bangod sang gugma sang Dios, pat-od nga luyag gid naton himuon ang aton masarangan para mapahamut-an sia kag mapahalipay.—Hulu. 27:11.

14. Paano si Jehova nangin Manluluwas sang iya katawhan?

¹⁴ Si salmista David nag-amba: “Ako imol kag nawad-an; apang ang Ginoo nagahunahuna sa akon. Ikaw kabulig ko kag manluluwas ko!” (Sal. 40:17) Sulitsulit nga nangin Manluluwas si Jehova sang iya katawhan subong isa ka grupo, ilabi na kon grabe ang paghingabot sa ila kag wala sila ginaluatan sang ila mga kaaway. Nagapasalamat gid kita sa bulig sang Dios sa sina nga mga tion kag sa espirituwal nga mga aman nga padayon niya nga ginahatag sa aton!

15. Isaysay kon paano gintinguhaan sang isa ka mahigugmaon nga amay nga amligan ang iya bata.

¹⁵ Ang mahigugmaon nga amay wala lamang nagaaman para sa iya mga kabataan kundi nagaamlig man sa ila. Natural lang nga luwason niya sila kon yara sila sa katalagman. Ang isa ka utod nga lalaki nakadumdom sing isa ka insidente sang bata pa sia. Manugpauli sila sang iya amay halin sa pagministeryo kag matabok sila sa isa ka sapa. Bangod mabunok ang ulan sina nga aga, nagbaha ang sapa. Para makatabok sila, kinahanglan nila maglumpat sa dalagku nga mga bato. Nag-una sia sa iya amay, pero nakadalin-as sia sa bato gani nahulog sia sa tubig kag nagpungapunga. Nagapasalamat gid sia kay madasig sia nga gin-uyatan sa abaga sang iya amay kag ginluwas sa pagkalumos! Ang aton Amay sa langit nagaluwas sa aton gikan sa daw nagahuganas nga sapa sa sining malaut nga kalibutan, kag gikan sa manuggahom sini, si Satanas. Si Jehova amo gid ang pinakamaayo nga Manug-amlig nga malauman sang tanan.—Mat. 6:13; 1 Juan 5:19.

16, 17. Paano ginbuligan kag gin-amligan ni Jehova ang mga Israelinhon sang nagpakig-away sila sa mga Amaleknon?

¹⁶ Ang mahigugmaon nga pangamlig ni Jehova makita gid sang ginluwas niya ang mga Israelinhon gikan sa pagkaulipon sa Egipto kag milagruso nga gin-amligan sa ila pagtabok sa Pula nga Dagat sang 1513 B.C.E. Sa tapos sang paglakbay sa kamingawan pakadto sa Bukid Sinai, nakaabot ang pungsod sa Refidim.

¹⁷ Bangod sa tagna sang Dios sa Genesis 3:15, mahimo nga desperado gid si Satanas nga salakayon ang daw wala sing mahimo nga mga Israelinhon. Gingamit niya ang mga Amaleknon, nga kaaway sang katawhan sang Dios. (Num. 24:20) Binagbinaga kon ano ang ginhimo ni Jehova paagi sa apat ka matutom nga lalaki nga sanday Josue, Moises, Aaron, kag Hur. Samtang nagapakig-away si Josue sa  mga Amaleknon, yara sa malapit nga bungyod sanday Moises, Aaron, kag Hur. Ang mga Israelinhon nagadaug sa inaway kon ibayaw ni Moises ang iya mga kamot. Kon kapuyon na ang iya mga kamot, itib-ong ini nanday Aaron kag Hur. Gani paagi sa bulig kag pangamlig ni Jehova, “ginlaglag ni Josue si Amalec kag ang iya katawohan.” (Ex. 17:8-13) Si Moises nagpatindog diri sing halaran, nga ginatawag Jehova-nissi, buot silingon “ang GINOO akon hayahay.”—Basaha ang Exodo 17:14, 15.

18, 19. Ano nga pangamlig ang gin-aman sang Dios sa iya mga alagad sa aton tion?

¹⁸ Ginaamligan ni Jehova ang mga nagahigugma kag nagatuman sa iya. Pareho sa mga Israelinhon sa Refidim, nagapangayo kita sing bulig sa Dios para maamligan gikan sa pagsalakay sang mga kaaway. Pirme kita ginaamligan ni Jehova subong isa ka grupo, kag ginaluwas niya kita batok sa Yawa. Dumduma ang mga sitwasyon nga gin-amligan sang Dios ang aton mga kauturan nga nagpabilin nga neutral. Halimbawa, amo sini ang natabo sa panahon sang Nazi sa Germany kag sa iban nga pungsod sang dekada 1930 kag maaga nga bahin sang dekada 1940. Kon basahon naton kag pamalandungan ang mga sugilanon sang kabuhi kag mga kasaysayan sa Tuigan nga Libro parte sa pangamlig sang Dios sa tion sang paghingabot, magabakod ang aton pagsalig kay Jehova subong aton Dalangpan.—Sal. 91:2.

¹⁹ Paagi sa organisasyon ni Jehova kag sa mga publikasyon, makabaton kita sing mahigugmaon nga mga pahanumdom nga makaamlig sa aton. Binagbinaga kon paano kita sini mabuligan. Ang kalibutan nadalman na gid sa sobra nga pagpatuyang kag pornograpiya, pero si Jehova nagaaman sing mga pahanumdom kag praktikal nga bulig para makabantay kita sa katalagman sa moral. Halimbawa, nakabaton kita sing laygay gikan sa aton Amay nga likawan ang malain nga pagpakig-upod paagi sa indi nagakaigo nga paggamit sang social networking. *—1 Cor. 15:33.

20. Ano nga pangamlig kag panuytoy ang matigayon paagi sa kongregasyon?

²⁰ Paano naton mapakita nga ‘natudloan’ gid kita ni Jehova? Paagi sa pagtuman sa iya mga sugo. (Isa. 54:13) Mabaton naton sa mga kongregasyon ang panuytoy kag pangamlig, kay may matutom nga mga lalaki nga nagaalagad subong mga gulang nga makahatag sa aton sing bulig kag laygay base sa Kasulatan. (Gal. 6:1) Sa masami, ang mahigugmaon nga pag-atipan ni Jehova matigayon naton paagi sa sining “mga dulot nga mga lalaki.” (Efe. 4:7, 8) Paano naton dapat tamdon ang ila mga laygay? Ang kinabubut-on nga pagpasakop kag pagkamatinumanon nagaresulta sang pagpakamaayo sang Dios.—Heb. 13:17.

21. (a) Ano ang determinado naton nga himuon? (b) Ano ang binagbinagon sa masunod nga artikulo?

²¹ Kabay pa nga mangin determinado kita nga magpagiya sa balaan nga espiritu kag magsunod sa panuytoy sang aton Amay sa langit. Kinahanglan man naton pamalandungan ang kabuhi sang iya Anak, si Jesucristo, kag panikasugan nga sundon ang indi matupungan niya nga halimbawa. Bangod matinumanon sia asta sa kamatayon, nakabaton si Jesus sing daku nga padya. (Fil. 2:5-11) Pareho sa iya, pakamaayuhon man kita kon magsalig kita sing bug-os tagipusuon kay Jehova. (Hulu. 3:5, 6) Gani kabay pa nga padayon kita nga magsalig kay Jehova subong indi matupungan nga Manug-aman kag Manug-amlig. Daku gid nga kalipay kag pribilehiyo nga maalagad sia! Ang aton gugma sa iya magadalom pa samtang ginapamalandungan naton ang ikatlo nga paagi nga ginaatipan kita sang aton Amay—ang iya pagpakig-abyan. Binagbinagon sang masunod nga artikulo kon paano naton nangin pinakamaayo nga Abyan si Jehova.