Ezekiel 12:1-28

  • Akɛ mfonirifeemɔŋ nifeemɔi gba nomŋɔɔ lɛ (1-20)

    • Nibii ni akɛbaaya nomŋɔɔ mli (1-7)

    • Lumɔ lɛ baashi kɛya yɛ duŋ mli (8-16)

    • Amɛkɛ tsuiyeli baaye nii, amɛkɛ gbeyeishemɔ baanu nu (17-20)

  • Lakamɔ wiemɔ sɛɛ baafo (21-28)

    • “Miwiemɔi lɛ eko eko ekpeŋ sɛɛ” (28)

12  Yehowa kɛɛ mi ekoŋŋ akɛ:  “Gbɔmɔ bi,* atuatselɔi ashĩa oyɔɔ lɛ. Amɛyɛ hiŋmɛii ni akɛnaa nii, shi amɛnaaa nii, kɛ toii ni akɛnuɔ nii, shi amɛnuuu nii,+ ejaakɛ amɛji atuatselɔi ashĩa.+  Shi bo, gbɔmɔ bi,* buamɔ nibii ni okɛbaaya nomŋɔɔ mli lɛ anaa. Kɛ́ je tsɛre lɛ, yaa nomŋɔɔ mli yɛ amɛhiɛ. Shi oshĩa lɛ ni oya nomŋɔɔ mli yɛ he kroko yɛ amɛhiɛ. Eyɛ mli akɛ amɛji atuatselɔi ashĩa moŋ, shi ekolɛ amɛbaayoo sɛɛ.  Kɛ́ je tsɛre lɛ, okɛ ojatsu ni okɛbaaya nomŋɔɔ mli lɛ aje kpo yɛ amɛhiɛ, koni gbɛkɛnaashi mli lɛ, oshi ni oya yɛ amɛhiɛ tamɔ mɔ ko ni aŋɔ lɛ nom kɛmiiya.+  “Gbuu fɔlɔ owo gbogbo lɛ mli yɛ amɛhiɛ, ni okɛ ojatsu lɛ atsɔ jɛmɛ kɛje kpo.+  Okɛ ojatsu lɛ afɔ̃ okɔɔŋ ni okɛtsɔ duŋ lɛ mli kɛje kpo yɛ amɛhiɛ. Haa ohiɛ koni okana shikpɔŋ, ejaakɛ mikɛ bo miifee okadi kɛmiihã Israel shĩa lɛ.”+  Mifee tamɔ bɔ ni afã mi lɛ pɛpɛɛpɛ. Be ni je tsɛre lɛ, mijie mijatsu lɛ kɛje kpo akɛ jatsu ni akɛmiiya nomŋɔɔ mli, ni gbɛkɛnaashi lɛ mikɛ minine gbu fɔlɔ miwo gbogbo lɛ mli. Ni be ni duŋ wo lɛ, miwó mijatsu lɛ kɛje kpo ni mikɛfɔ̃ mikɔɔŋ yɛ amɛhiɛ tuuntu.  Leebi mli lɛ, Yehowa kɛɛ mi ekoŋŋ akɛ:  “Gbɔmɔ bi,* ani Israel shĩa lɛ, atuatselɔi ashĩa lɛ biii bo akɛ, ‘Mɛni ofeɔ lɛ?’ 10  Kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Sane nɛɛ kɔɔ lumɔ+ ni yɔɔ Yerusalem lɛ kɛ Israel shĩa lɛ mli bii lɛ fɛɛ ni yɔɔ maŋ lɛ mli lɛ ahe.”’ 11  “Kɛɛmɔ akɛ, ‘Miji okadi kɛhã nyɛ.+ Bɔ ni mifee lɛ, nakai pɛpɛɛpɛ abaafee amɛ. Abaaŋɔ amɛ kɛya, amɛbaaya nomŋɔɔ mli.+ 12  Lumɔ ni yɔɔ amɛteŋ lɛ kɛ enibii baashwie ekɔɔŋ, ni ebaashi kɛya be ni duŋ ewo. Ebaagbu fɔlɔ ewo gbogbo lɛ mli ni ekɛ enibii lɛ baatsɔ jɛmɛ kɛya.+ Ebaaha ehiɛ koni ekana shikpɔŋ.’ 13  Maŋmɛ miyaa lɛ yɛ enɔ, ni miyaa ni mikɛgbɔbiɔ lɛ baadu lɛ.+ No sɛɛ lɛ, mikɛ lɛ baaba Babilon, Kaldeabii lɛ ashikpɔŋ lɛ nɔ, shi enaŋ; ni jɛmɛ ebaagbo yɛ.+ 14  Ni magbɛ ehe gbɔmɛi fɛɛ, eyelikɛbualɔi lɛ kɛ esraafoi lɛ fɛɛ mashwã he fɛɛ he;+ ni magbala klante kɛnyiɛ amɛsɛɛ.+ 15  Ni kɛ́ mishwie amɛ kɛtee jeŋmaji lɛ amli ni migbɛ amɛ mishwã shikpɔji lɛ anɔ lɛ, amɛbaaná amɛle akɛ miji Yehowa. 16  Shi mahã amɛteŋ mɛi fioo ko aje klante lɛ naa, kɛ hɔmɔ lɛ mli, kɛ tsɛŋemɔ hela ni gbeɔ mɔ lɛ dɛŋ, koni amɛyagba amɛnifeemɔi ni yɔɔ nyaŋemɔ lɛ fɛɛ yɛ jeŋmaji ni amɛbaaya mli lɛ amli; ni amɛbaaná amɛle akɛ miji Yehowa.” 17  Ni Yehowa kɛɛ mi ekoŋŋ akɛ: 18  “Gbɔmɔ bi,* okɛ hekpokpomɔ aye oniyenii* lɛ, ni onu onu lɛ kɛ gbeyeishemɔ kɛ tsuiyeli.+ 19  Kɛɛmɔ shikpɔŋ lɛ nɔ bii lɛ akɛ, ‘Nɔ ni Nuŋtsɔ Ofe Yehowa kɛɔ mɛi ni yɔɔ Yerusalem yɛ Israel shikpɔŋ lɛ nɔ lɛ nɛ: “Amɛkɛ tsuiyeli baaye amɛniyenii* lɛ, ni amɛkɛ gbeyeishemɔ baanu amɛnu lɛ, ejaakɛ amɛshikpɔŋ lɛ baatsɔ amaŋfɔ+ kwraa yɛ yiwalɛ nii ni mɛi fɛɛ ni yɔɔ nɔ lɛ feɔ lɛ hewɔ.+ 20  Abaakpãtã maji ni mɛi yɔɔ mli lɛ ahiɛ, ni shikpɔŋ lɛ baatsɔ shikpɔŋ ni akɛfeee nɔ ko;+ ni nyɛbaaná nyɛle akɛ miji Yehowa.”’”+ 21  Ni Yehowa kɛɛ mi ekoŋŋ akɛ: 22  “Gbɔmɔ bi,* mɛni ji abɛ ni nyɛbuɔ yɛ Israel akɛ, ‘Gbii hoɔ amɛyaa, ni ninaa fɛɛ ninaa feɔ efolo’ lɛ?+ 23  No hewɔ lɛ, kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɛ nɛ: “Mahã wiemɔ nɛɛ sɛɛ afo, ni amɛkɛtsuŋ nii dɔŋŋ akɛ abɛ yɛ Israel.”’ Shi kɛɛmɔ amɛ akɛ, ‘Gbii lɛ ebɛŋkɛ,+ ni ninaa fɛɛ ninaa baaba mli.’ 24  Ejaakɛ amale ninaa loo lakamɔ* klamɔ ehiŋ Israel shĩa lɛ mli dɔŋŋ.+ 25  ‘“Ejaakɛ, mi, Yehowa, mawie. Wiemɔ fɛɛ wiemɔ ni mawie lɛ baaba mli ni ekpeŋ sɛɛ.+ Bo atuatselɔi ashĩa, yɛ nyɛgbii lɛ amli lɛ,+ mawie wiemɔ lɛ ni mahã eba mli,” Nuŋtsɔ Ofe Yehowa kɛɛ.’” 26  Yehowa kɛɛ mi ekoŋŋ akɛ: 27  “Gbɔmɔ bi,* nɔ ni Israelbii* lɛ kɛɔ nɛ, ‘Ninaa ni enaa lɛ, jeee bianɛ kwraa ebaaba mli, ni egbalɛ lɛ kɔɔ wɔsɛɛ bei ni yɔɔ shɔŋŋ lɛ ahe.’+ 28  No hewɔ lɛ, kɛɛmɔ amɛ akɛ, ‘Nɔ ni Nuŋtsɔ Ofe Yehowa kɛɔ nɛ: “‘Miwiemɔi lɛ eko eko ekpeŋ sɛɛ; nɔ fɛɛ nɔ ni mawie lɛ baaba mli,’ Nuŋtsɔ Ofe Yehowa kɛɛ.”’”

Shishigbɛ Niŋmaa

Hebri sht. ŋm., “binuu.”
Hebri sht. ŋm., “binuu.”
Hebri sht. ŋm., “binuu.”
Hebri sht. ŋm., “binuu.”
Hebri sht. ŋm., “oblodo.” Kwɛmɔ Wiemɔi Titrii Amligbalamɔ lɛ.
Hebri sht. ŋm., “amɛblodo.” Kwɛmɔ Wiemɔi Titrii Amligbalamɔ lɛ.
Hebri sht. ŋm., “binuu.”
Loo “yiteŋmuluwoo.”
Hebri sht. ŋm., “binuu.”
Hebri sht. ŋm., “Israel shĩa.”