Ezekiel 15:1-8

  • Yerusalem, wain tso ni sɛɛnamɔ ko bɛ he (1-8)

15  Yehowa kɛɛ mi ekoŋŋ akɛ:  “Gbɔmɔ bi,* mɛɛ gbɛ nɔ esoro wain tso loo wain tso nine ni yɔɔ koo mli tsei ateŋ lɛ yɛ tso fɛɛ tso he?  Ani abaanyɛ akɛ etso lɛ eko atsu nii? Aloo, ani abaanyɛ akɛ etso lɛ eko afee nii ni akɛ nibii tsotsoroɔ nɔ?  Naa! Akɛwoɔ la mli akɛ lai, ni la lɛ shãa enaabui enyɔ lɛ fɛɛ, ni eŋalaa eteŋ. Ani abaanyɛ akɛtsu nii agbɛnɛ?  Be ni eyɔɔ emuu po lɛ anyɛɛɛ akɛtsu nɔ ko. Ni amrɔ nɛɛ ni eshã ni eŋala lɛ, ani nɔ ko yɛ ni abaanyɛ akɛtsu lo?”  “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Tamɔ bɔ ni mikɛ wain tso ni yɔɔ koo mli tsei ateŋ lɛ ehã akɛ akɛfee lai ni ashã lɛ, nakai nɔŋŋ mafee mɛi ni yɔɔ Yerusalem lɛ.+  Majie mihiɛ maka amɛ. Amɛje la lɛ mli, shi la baakpãtã amɛhiɛ. Ni kɛ́ mijie mihiɛ mika amɛ lɛ, nyɛbaaná nyɛle akɛ miji Yehowa.’”+  “‘Ni mahã shikpɔŋ lɛ atsɔ amaŋfɔ,+ ejaakɛ amɛyeee anɔkwa,’+ Nuŋtsɔ Ofe Yehowa kɛɛ.”

Shishigbɛ Niŋmaa

Hebri sht. ŋm., “binuu.”