Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

  A2

Nibii Ni Yɔɔ Biblia Nɛɛ Mli

Ajie Blɔfo Kristofoi A-Greek Ŋmalɛ Lɛ—Jeŋ Hee Shishitsɔɔmɔ Iɛ kpo yɛ afi 1950 mli, ni ajie Blɔfo Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ, ni ji Biblia muu lɛ fɛɛ kpo yɛ afi 1961 mli. Kɛjɛ no sɛɛ kɛbaa nɛɛ, mɛi akpekpei nyɔŋmai abɔ ni wieɔ wiemɔi ni fa fe 180 lɛ ená Ŋmalɛ Krɔŋkrɔŋ lɛ ni akwɛ wiemɔi ni aŋma Biblia lɛ yɛ mli klɛŋklɛŋ kwraa lɛ anɔ atsɔɔ shishi jogbaŋŋ ni kanemɔ waaa lɛ he sɛɛ.

Jeŋ Hee Biblia Shishitsɔɔmɔ Ajinafoi Akuu lɛ ena akɛ esa akɛ amɛkɛ wiemɔi ni kɛ́ mɛi kane ŋmɛnɛ lɛ, ebaashɛ amɛtsui he lɛ atsu nii. Enɛ hewɔ lɛ, atsɔɔ Biblia nɛɛ shishi yɛ gbɛ ni baahã ashɛ otii ni nyiɛ sɛɛ nɛɛ ahe:

  • Akɛ wiemɔi ni akɛfɔɔ nitsumɔ ŋmɛnɛ ni anuɔ shishi oya tsu nii. Akɛ nɔkwɛmɔnɔ lɛ, ŋmɛnɛ lɛ, mɛi babaoo leee nɔ ni ji “asooyi.” No hewɔ lɛ, akɛ wiemɔ ni ji “yishɛɛ kakla” eye najiaŋ. (1 Samuel 1:11) Akɛ wiemɔ ni ji “afukpɔŋɔ” lɛ tsu nii kɛye “yoma” najiaŋ, ejaakɛ ŋmɛnɛ lɛ, mɛi babaoo kɛ wiemɔ ni ji “yoma” lɛ tsuuu nii. (Kojolɔi 7:12) Bei pii lɛ, kɛ́ akɛ wiemɔ ni ji “pia” tsu nii lɛ, mɛi babaoo enaaa nɔ ni atsɔɔ lɛ, no hewɔ lɛ, akɛ wiemɔ ni mɛi pii kɛtsuɔ nii ni ji “sɛɛtsu” lɛ eye najiaŋ. (Jajelɔ 10:20) Wiemɔ kroko ni ŋmɛnɛ lɛ, mɛi babaoo nuuu shishi ji toloo, no hewɔ lɛ, yɛ Biblia nɛɛ mli lɛ, akɛ wiemɔ ni ji “leebi ŋulami” ye najiaŋ. (Kpojiemɔ 2:28) Wiemɔ ko ni ŋmɛnɛ lɛ akɛfɔɔɔ nitsumɔ ji “najiashi maaŋoo,” no hewɔ lɛ, akɛ wiemɔ ni ji “najiashi sɛi” tsu nii yɛ Biblia nɛɛ mli.—Lala 110:1; Bɔfoi 2:35.

    Ŋmɛnɛ lɛ, kɛ́ akɛɛ yoo ko ji “ajwamaŋ” lɛ, mɛi nuɔ shishi akɛ eji yoo ni nyiɛɔ hii anɔ. Shi Hebri kɛ Greek wiemɔi ni atsɔɔ shishi yɛ Bibliai komɛi amli akɛ “ajwamaŋ” lɛ kɔɔ yoo ni hɔ̃ɔ ehe loo ekɛ hii náa bɔlɛ koni awo lɛ nyɔmɔ lɛ he. No hewɔ lɛ, yɛ Biblia nɛɛ mli lɛ, atsɔɔ Hebri kɛ Greek wiemɔi nɛɛ ashishi akɛ “ashawo” koni shishinumɔ ni yɔɔ sɛɛ lɛ afee faŋŋ.—Ezekiel 23:29; Yoel 3:3; Yakobo 2:25; Kpojiemɔ 17:5.

    Ga wiemɔ kroko ni ŋmɛnɛ lɛ mɛi babaoo nuuu shishi ji “blohu.” No hewɔ lɛ, bɔ ni afee ni mɔ fɛɛ mɔ ana nɔ ni atsɔɔ lɛ, akɛ wiemɔ ni ji “henaabuamɔhe” tsu nii yɛ Biblia nɛɛ mli. (Abɛi 22:13; Yaafo 2:11) Agbɛnɛ hu, mɛi pii leee nɔ ni ji “koklolonto” loo “kokrolonto,” no hewɔ lɛ, akɛ wiemɔ ni ji “tai”  eye najiaŋ. (1 Maŋtsɛmɛi 7:30; Daniel 7:9) “Agorigo” ji kwɛ̃ɛ nii ko yibii ni kɛ́ atsĩ tã ŋmɛnɛ lɛ, mɛi babaoo enaaa nɔ ni eji, ejaakɛ soro bɔ ni atsɛɔ lɛ ŋmɛnɛ. Yɛ Biblia nɛɛ mli lɛ, akɛ bɔ ni mɛi babaoo tsɛɔ lɛ ni ji “kɔkumba” lɛ tsu nii.—Yesaia 1:8; Yeremia 10:5.

    Wiemɔ ni ji “butru” lɛ ji wiemɔ ko ni kɛ́ wɔɔkɛɛ lɛ, egbo kwraa, shi wiemɔ ni ma mɛi anaa ŋmɛnɛ ji “bɔta.” Enɛ hewɔ lɛ, akɛ “bɔta” tsu nii yɛ Biblia nɛɛ mli moŋ fe “butru.” (Hiob 20:17) Wiemɔi komɛi hu ni akɛ wiemɔi ni anuɔ shishi oya ye amɛnajiaŋ ji nɔ ni nyiɛ sɛɛ nɛɛ: akɛ “brik” ye “ntayaa” najiaŋ, akɛ “taŋki agbo ko ni atsɛɔ lɛ Ŋshɔ” ye “Ŋshɔ ni ashwie” najiaŋ, akɛ “dade amaga” ye “amaga ni ashwie” najiaŋ, akɛ “agba” ye “asese” najiaŋ, ni akɛ “pateeshɛŋ” ye “muhɔɔ” najiaŋ.—2 Samuel 12:31; 1 Maŋtsɛmɛi 7:23; Nahum 1:14; Yona 4:5; Luka 23:45.

  • Ahã Biblia mli wiemɔi komɛi ashishinumɔ efee faŋŋ. Afɔɔ Hebri wiemɔ ni ji neʹphesh kɛ Greek wiemɔ ni ji psy·kheʹ lɛ shishitsɔɔmɔ akɛ “susuma.” Kɛ́ akwɛ hei fɛɛ ni akɛ Hebri kɛ Greek wiemɔi nɛɛ tsu nii yɛ, yɛ Biblia lɛ mli lɛ jogbaŋŋ lɛ, anaa faŋŋ akɛ ekɔɔ (1) gbɔmɔ, loo (2) gbɔmɔ wala, loo (3) bɔɔ nii ni hiɛ kamɔ, loo (4) nibii ni mɔ ko shweɔ loo efeɔ lɛ akɔnɔ, loo yɛ shihilɛi komɛi amli po lɛ (5) gbɔmɔ ni egbo he. Shi akɛni esoro nɔ ni baa mɛi ajwɛŋmɔ mli kɛ́ amɛnu wiemɔ ni ji “susuma” lɛ hewɔ lɛ, akpɛ yiŋ akɛ he fɛɛ he ni Hebri kɛ Greek wiemɔi nɛɛ baaje kpo yɛ lɛ, abaatsɔɔ shishi yɛ shishinumɔ ni yɔɔ sɛɛ lɛ naa, ni bei pii lɛ akɛ shishigbɛ niŋmaa ni ji “Loo ‘susuma’” lɛ woɔ he. (Akɛ nɔkwɛmɔnɔ lɛ, kwɛmɔ 1 Mose 1:20; 2:7; 3 Mose 19:28; Lala 3:2; Abɛi 16:26; Mateo 6:25 lɛ.) Shi akɛ wiemɔ ni ji “susuma” lɛ tsu nii yɛ Biblia mli lalawiemɔi komɛi loo ŋmalɛi komɛi ni ale waa lɛ amli, ni akɛ shishigbɛ niŋmaa ni gbalaa jwɛŋmɔ kɛyaa Wiemɔi Titrii Amligbalamɔ lɛ nɔ, loo etsɔɔ gbɛ kroko ni abaanyɛ atsɔɔ shishi lɛ woɔ he.—5 Mose 6:5; Lala 131:2; Abɛi 2:10; Mateo 22:37.

    Agbɛnɛ hu, he fɛɛ he ni akɛ wiemɔ ni ji “sabai” tsu nii yɛ ni ekɔɔ sabai diɛŋtsɛ ahe lɛ, atsɔɔ shishi akɛ “sabai.” Shi kɛ́ akɛ wiemɔ ni ji “sabai” tsu nii yɛ okadifeemɔ mli tamɔ eji yɛ Lala 7:9Lala 26:2Kpojiemɔ 2:23 lɛ nɛkɛ lɛ, atsɔɔ shishi akɛ “bɔ ni mɔ nuɔ nii ahe yɛ emligbɛ tɔ̃ɔ” loo “mligbɛ susumɔi,” ni akɛ shishigbɛ niŋmaa ni ji “Hebri sht. ŋm., ‘sabai’” woɔ he.

    Wiemɔi komɛi ni akɛtsu nii yɛ Bibliai komɛi ni afee kɛtsɔ enɛ hiɛ lɛ amli lɛ ekomɛi hãaa anyɛ ana nɔ ni Hebri loo  Greek wiemɔ ni akɛtsu nii lɛ tsɔɔ diɛŋtsɛ. Akɛ nɔkwɛmɔnɔ lɛ, Bibliai komɛi ni yɔɔ momo lɛ tsɔɔ Greek wiemɔ koʹmos shishi akɛ “yakayaka shwɛmɔ,” loo “shwɛmɔ fɔŋ,” loo “dãanumɔ mli basabasafeemɔ.” Ŋmɛnɛ lɛ, kɛ́ akɛɛ “yakayaka shwɛmɔ” loo “shwɛmɔ fɔŋ” lɛ, nɔ ni baa mɛi pii ajwɛŋmɔ mli ji shwɛmɔi ni kɔɔ bɔlɛnamɔ he. Ni kɛ́ akɛɛ “dãanumɔ mli basabasafeemɔ” hu lɛ, nɔ ni baa mɛi pii ajwɛŋmɔ mli ji, mɔ ko ni etɔ dãa ni eefee basabasa. Shi Greek wiemɔ koʹmos lɛ kɔɔ mɛi ni ebua amɛhe naa kɛmiishwɛ amɛhiɛ yɛ gbɛ ni yɔɔ hoo nɔ lɛ he. No hewɔ lɛ, yɛ Biblia nɛɛ mli lɛ, atsɔɔ Greek wiemɔ nɛɛ shishi akɛ, “henaabuamɔi (loo okpɔlɔŋmɛi) ni yɔɔ hoo.”—Romabii 13:13; Galatiabii 5:21; 1 Petro 4:3.

    Yɛ Hebri kɛ Greek mli lɛ, wiemɔ ni ji “tsui” lɛ kɔɔ tsui lɛ diɛŋtsɛ he, ni agbɛnɛ hu, akɛtsuɔ nii yɛ okadifeemɔ mli. Nakai nɔŋŋ eji yɛ Ga mli. No hewɔ lɛ, bei pii lɛ, akɛ wiemɔ ni ji “tsui” lɛ tsuɔ nii yɛ hei ni ejeɔ kpo yɛ lɛ. Shi yɛ ŋmalɛi fioo komɛi amli lɛ, kɛ́ akɛ tsui tsu nii ni shishinumɔ ni yɔɔ sɛɛ lɛ efeŋ faŋŋ lɛ, akɛ wiemɔi krokomɛi tsuɔ nii koni shishinumɔ ni yɔɔ sɛɛ lɛ afee faŋŋ. Akɛ nɔkwɛmɔnɔ lɛ, yɛ Abɛi awolo lɛ mli lɛ, atsɔɔ Hebri wiemɔ ni shishi ji “ebɛ tsui” lɛ shishi akɛ “ebɛ jwɛŋmɔ,” ni akɛ bɔ ni eji yɛ Hebri mli lɛ ewo shishigbɛ niŋmaa mli. (Abɛi 6:​32; 7:​7) Atsɔɔ wiemɔi krokomɛi tamɔ “ewo fɔ,” kɛ “heloo,” kɛ “akolonto” shishi yɛ nakai gbɛ nɔŋŋ nɔ. (1 Mose 45:18; Jajelɔ 5:6; Hiob 16:15) Agbala wiemɔi nɛɛ ekomɛi amli yɛ “Biblia Mli Wiemɔi Titrii Amligbalamɔ” lɛ mli.

Nibii krokomɛi ni yɔɔ Biblia nɛɛ mli:

Akɛ shishigbɛ niŋmai saŋŋ ewo Biblia nɛɛ mli. Ajara shishigbɛ niŋmai lɛ amli awo fãi ni nyiɛ sɛɛ nɛɛ amli:

  • “Loo” Etsɔɔ gbɛ kroko ni abaanyɛ atsɔɔ Hebri, Aramaik, loo Greek wiemɔ lɛ shishi ni baahã anu shishi yɛ gbɛ kome too lɛ nɔŋŋ nɔ.—Kwɛmɔ 1 Mose 1:2 lɛ shishigbɛ niŋmaa ni yɔɔ wiemɔ ni ji “hewalɛ lɛ miitsu nii” lɛ he; kɛ Yoshua 1:8 lɛ shishigbɛ niŋmaa ni yɔɔ wiemɔ ni ji “ojwɛŋ nɔ” lɛ he.

  • “Shishitsɔɔmɔi komɛi kɛɔ akɛ” Etsɔɔ gbɛ kroko ni abaanyɛ atsɔɔ Hebri, Aramaik, loo Greek wiemɔ lɛ shishi ni baahã anu shishi yɛ gbɛ kroko nɔ, ni ebaanyɛ eba lɛ akɛ no hu ja.—Kwɛmɔ 1 Mose 21:6 lɛ shishigbɛ niŋmaa ni yɔɔ wiemɔ ni ji “kɛ mi baaŋmɔ” lɛ he; kɛ Zakaria 14:21 lɛ shishigbɛ niŋmaa ni yɔɔ wiemɔ ni ji “Kanaannyo” lɛ he.

  •  “Hebri sht. ŋm.; Aramaik sht. ŋm.; Greek sht. ŋm.” Etsɔɔ Hebri, Aramaik, loo Greek wiemɔi lɛ ni atsɔɔ shishi ekomekomei loo shishinumɔ diɛŋtsɛ ni yɔɔ Hebri, Aramaik, loo Greek wiemɔ ko sɛɛ.—Kwɛmɔ 1 Mose 30:22 lɛ shishigbɛ niŋmaa ni yɔɔ wiemɔ ni ji “kɛtsɔ musu ni ehã ena lɛ nɔ” lɛ he; kɛ 3 Mose 26:9 lɛ shishigbɛ niŋmaa ni yɔɔ wiemɔ ni ji “maha miduromɔ lɛ aba nyɛnɔ” lɛ he.

  • Wiemɔ komɛi ashishinumɔ kɛ nibii komɛi ahe saji Gbɛ́i komɛi ashishi (Kwɛmɔ 1 Mose 3:17 lɛ shishigbɛ niŋmaa ni yɔɔ wiemɔ ni ji “Adam” lɛ he; kɛ 2 Mose 15:23 lɛ shishigbɛ niŋmaa ni yɔɔ wiemɔ ni ji “Mara” lɛ he); susumɔnii (Kwɛmɔ 1 Mose 6:15 lɛ shishigbɛ niŋmaa ni yɔɔ wiemɔ ni ji “ninetalɔi” lɛ he); etsɔɔ nɔ diɛŋtsɛ loo mɔ diɛŋtsɛ ni awieɔ ehe lɛ (Kwɛmɔ 1 Mose 38:5 lɛ shishigbɛ niŋmaa ni yɔɔ wiemɔ ni ji, “eyɛ” lɛ he); saji komɛi ni he hiaa ni yɔɔ Saji Krokomɛi lɛ kɛ Wiemɔi Titrii Amligbalamɔ lɛ mli.—Kwɛmɔ 1 Mose 37:35 lɛ shishigbɛ niŋmaa ni yɔɔ wiemɔ ni ji “Gbonyobu” lɛ he; kɛ Mateo 5:22 lɛ shishigbɛ niŋmaa ni yɔɔ wiemɔ ni ji, “Gehena” lɛ he.

Biblia lɛ hiɛgbɛ sane ni yitso ji “Nyɔŋmɔ Wiemɔ Lɛ Mlibotemɔ” lɛ wieɔ Biblia mli tsɔɔmɔi komɛi ni esa akɛ ale klɛŋklɛŋ lɛ ahe. Kɛ́ ojɛ Kpojiemɔ wolo lɛ nɔ nɔŋŋ lɛ, obaana “Biblia Mli Woji” lɛ, ni no sɛɛ lɛ “Biblia Mli Wiemɔi Ni Ato Naa” lɛ, ni yɛ no hu sɛɛ lɛ, “Wiemɔi Titrii Amligbalamɔ” lɛ. Wiemɔi Titrii Amligbalamɔ lɛ yeɔ ebuaa mɔ ni kaneɔ Biblia lɛ ni enuɔ wiemɔi komɛi ni akɛtsu nii yɛ Biblia lɛ mli lɛ ashishi. Nibii ni yɔɔ Saji Krokomɛi A lɛ mli ji: “Taomɔ Nii Ni Esa Akɛ Ashɛ He Yɛ Biblia Shishitsɔɔmɔ Mli,” “ Nibii Ni Yɔɔ Biblia Nɛɛ Mli,” “Bɔ Ni Fee Ni Wɔnine Shɛ Biblia Lɛ Nɔ,” “Nyɔŋmɔ Gbɛ́i Lɛ Kɛ Hebri Ŋmalɛ Lɛ,” “Nyɔŋmɔ Gbɛ́i Lɛ Kɛ Kristofoi A-Greek Ŋmalɛ Lɛ,” “Akrabatsa: Yuda Kɛ Israel Gbalɔi Kɛ Maŋtsɛmɛi,” kɛ “Nibii Titrii Ni Tee Nɔ Yɛ Yesu Shihilɛ Mli.” Nibii ni yɔɔ Saji Krokomɛi B lɛ mli ji map srɔtoi, akrabatsai kɛ saji krokomɛi ni mɛi sumɔɔ ni amɛkase Biblia lɛ jogbaŋŋ lɛ baanyɛ aná he sɛɛ.

Biblia lɛ mli wolo fɛɛ wolo shishijee lɛ, obaana baafã ko ni awie saji ni yɔɔ wolo lɛ yitso fɛɛ yitso mli lɛ ahe kuku yɛ mli, ni atsɔɔ kukuji ni saji lɛ yɔɔ amɛmli, ni ehãa anaa saji ni Biblia mli wolo ko wieɔ he. Yɛ baafã fɛɛ baafã lɛ, akɛ alfabɛta ko ewo ŋmalɛi lɛ amli wiemɔi lɛ ekomɛi ahe, ni asaa ato nakai alfabɛtai lɛ anaa yɛ baafã lɛ teŋgbɛ, ni atsɔɔ ŋmalɛi komɛi ni kɛ wiemɔi ni alfabɛta lɛ yɔɔ he lɛ yɔɔ tsakpãa yɛ jɛmɛ..