Ezekiel 40:1-49

  • Akɛ Ezekiel tee Israel yɛ ninaa lɛ mli (1, 2)

  • Ezekiel na sɔlemɔ shĩa ko yɛ ninaa mli (3, 4)

  • Kpoi lɛ kɛ agbói lɛ (5-47)

    • Agbó ni hiɛ kwɛɔ bokãgbɛ lɛ (6-16)

    • Kponɔgbɛ kpo lɛ; agbói krokomɛi lɛ (17-26)

    • Mligbɛ kpo lɛ kɛ agbói lɛ (27-37)

    • Tsũi kɛhã sɔlemɔ shĩa lɛ mli sɔɔlɔi lɛ (38-46)

    • Afɔleshaa latɛ lɛ (47)

  • Sɔlemɔ shĩa lɛ ablanaa lɛ (48, 49)

40  Yɛ afi ni ji 25 lɛ mli yɛ be ni aŋɔ wɔ nom lɛ mli,+ yɛ afi lɛ shishijee mli, yɛ gbi ni ji nyɔŋma yɛ nyɔɔŋ lɛ mli lɛ nɔ, yɛ afi ni ji 14 be ni maŋ lɛ gbee shi lɛ sɛɛ,+ yɛ nakai gbi lɛ nɔ nɔŋŋ lɛ, Yehowa nine lɛ ba minɔ, ni ewó mi kɛtee maŋ lɛ mli.+  Etsɔ ninai ni jɛ Nyɔŋmɔ ŋɔɔ anɔ ekɛ mi ba Israel shikpɔŋ lɛ nɔ ni ekɛ mi yadamɔ gɔŋ ko ni kwɔ waa nɔ,+ ni tsũ ko ni tamɔ maŋ ma nɔ yɛ wuoyigbɛ.  Be ni ekɛ mi ba jɛmɛ lɛ, mina nuu ko ni su tamɔ akɔɔble yɛ jɛmɛ.+ Ehiɛ flaks* kpãa kɛ gãlã susumɔ tso* yɛ edɛŋ+ ni edamɔ agbó lɛ mli.  Nuu lɛ kɛɛ mi akɛ: “Gbɔmɔ bi,* kwɛmɔ nɔ fɛɛ nɔ ni mikɛbaatsɔɔ bo lɛ jogbaŋŋ, ni obo mi toi jogbaŋŋ ni ohã ojwɛŋmɔ ahi* nɔ, ejaakɛ no hewɔ akɛ bo ba biɛ lɛ. Gbaa Israel shĩa lɛ nɔ fɛɛ nɔ ni obaana lɛ.”+  Mina gbogbo ko yɛ sɔlemɔ shĩa* lɛ he kɛkpe. Nuu lɛ hiɛ gãlã susumɔ tso ni kɛlɛ ji ninetalɔi ekpaa (akɛ dɛ̃ lɛɛmɔ kome kɛlɛ efata ninetalɔ kome fɛɛ ninetalɔ kome he).* Ebɔi gbogbo lɛ susumɔ, ni etilɛ ji gãlã tso kome, ni ekwɔlɛ ji gãlã tso kome.  Kɛkɛ ni eba agbó ni hiɛ kwɛɔ bokãgbɛ lɛ,+ ni ekwɔ etrakpoi lɛ. Be ni esusu agbó lɛ shinaa lɛ shi lɛ, elɛɛmɔ ji gãlã tso kome, ni shinaa shi kroko lɛ hu lɛɛmɔ ji gãlã tso kome.  Bulɔi atsũ lɛ eko fɛɛ eko kɛlɛ ji gãlã tso kome kɛlɛ, ni elɛɛmɔ hu ji gãlã tso kome kɛlɛ, gbɛ ni kã bulɔ tsũ kome kɛ ekroko teŋ lɛ feɔ ninetalɔi enumɔ.+ Agbó lɛ shinaa lɛ shi ni yɔɔ agbó ni hiɛ kwɛɔ shĩa lɛ mligbɛ lɛ he ablanaa lɛ masɛi lɛ lɛɛmɔ ji gãlã tso kome.  Esusu agbó lɛ he ablanaa lɛ kɛtee mligbɛ, ni ená gãlã tso kome.  Kɛkɛ ni esusu agbó lɛ he ablanaa lɛ, ni ená ninetalɔi kpaanyɔ; ni esusu ehe akulashiŋi lɛ, ni ená ninetalɔi enyɔ; ni agbó lɛ he ablanaa lɛ hiɛ kwɛɔ shĩa lɛ mligbɛ. 10  Agbó ni hiɛ kwɛɔ bokãgbɛ lɛ he bulɔi atsũi lɛ, etɛ yɛ biɛ, ni etɛ hu yɛ biɛ. Tsũi etɛ lɛ fɛɛ adaramɔ kome, ni akulashiŋi ni yɔɔ amɛhe lɛ hu adaramɔ kome. 11  Kɛkɛ ni esusu he ni atsɔɔ kɛboteɔ agbó lɛ mli lɛ lɛɛmɔ, ni ená ninetalɔi 10; ni agbó lɛ kɛlɛ ji ninetalɔi 13. 12  Afabaŋ ni afo yɛ bulɔi atsũi lɛ ahiɛ yɛ biɛ kɛ biɛ lɛ eko fɛɛ eko feɔ ninetalɔ kome. Bulɔi atsũi lɛ ni yɔɔ biɛ kɛ biɛ lɛ, eko fɛɛ eko feɔ ninetalɔi ekpaa. 13  Kɛkɛ ni esusu agbó lɛ kɛjɛ bulɔi atsũ lɛ ekome yiteŋ* kɛtee ekroko yiteŋ, ni elɛɛmɔ ji ninetalɔi 25; shinaa kome yɛ shinaa kroko hiɛ.+ 14  Kɛkɛ ni esusu akulashiŋi ni yɔɔ amɛhe lɛ, ni eko fɛɛ eko kwɔlɛ ji ninetalɔi 60, nakai nɔŋŋ eji yɛ akulashiŋi ni yɔɔ agbói ni yɔɔ kpo lɛ he fɛɛ kɛbɔle lɛ hu agbɛfaŋ. 15  Kɛjɛ he ni atsɔɔ kɛboteɔ agbó lɛ mli lɛ hiɛ, kɛtee ablanaa ni yɔɔ agbó lɛ mligbɛ lɛ hiɛ lɛ, ená ninetalɔi 50. 16  Samfɛji ni amɛmligbɛ lɛɛ fe amɛsɛɛgbɛ+ yɛ bulɔi atsũi lɛ kɛ amɛhe akulashiŋi ni yɔɔ agbó lɛ mli lɛ ahe yɛ biɛ kɛ biɛ. Samfɛji yɛ ablanai lɛ hu amligbɛ biɛ kɛ biɛ, ni tɛŋ tsei ahe mfonirii+ yɛ akulashiŋi ni yɔɔ bulɔi atsũi lɛ ahe lɛ ahe. 17  Kɛkɛ ni ekɛ mi ba kponɔgbɛ kpo lɛ nɔ, ni mina niyelihei*+ yɛ kpo lɛ hewɔŋ fɛɛ, ni akɛ tɛi ekala shikpɔŋ kɛbɔle kpo lɛ he fɛɛ. Niyelihei 30 yɛ tɛi ni akɛkala shikpɔŋ lɛ nɔ. 18  Tɛi ni akɛkala shikpɔŋ yɛ agbói lɛ amasɛi lɛ kɛ agbói lɛ hiɛ kɛlɛ kome—enɛ ji tɛi ni akɛkala shikpɔŋ ni yɔɔ shishigbɛ lɛ. 19  Kɛkɛ ni esusu gbɛ ni kã shi* kɛjɛ shishigbɛ agbó lɛ hiɛ kɛtee mligbɛ kpo lɛ he. Ená ninetalɔi 100 yɛ bokãgbɛ kɛ kooyigbɛ fɛɛ. 20  Kponɔgbɛ kpo lɛ yɛ agbó ko ni hiɛ kwɛɔ kooyigbɛ, ni esusu ekɛlɛ kɛ elɛɛmɔ. 21  Bulɔi atsũi etɛ yɛ biɛ kɛ biɛ. Ehe akulashiŋi lɛ kɛ ablanaa lɛ adaramɔ tamɔ klɛŋklɛŋ agbó lɛ nɔŋŋ. Ekɛlɛ ji ninetalɔi 50 ni elɛɛmɔ ji ninetalɔi 25. 22  Ni ehe samfɛji lɛ, kɛ eblanaa lɛ, kɛ ehe tɛŋ tsei lɛ ahe mfonirii+ lɛ adaramɔ tamɔ agbó ni hiɛ kwɛɔ bokãgbɛ lɛ anɔ lɛ nɔŋŋ. Akwɔɔ atrakpoi kpawo kɛyaa he, ni eblanaa lɛ yɛ amɛhiɛ. 23  Agbó ko yɛ mligbɛ kpo lɛ nɔ ni hiɛ kwɛɔ kooyigbɛ agbó lɛ kɛ ekroko ni hiɛ kwɛɔ bokãgbɛ agbó lɛ. Esusu gbɛ ni kã agbó nɛɛ kɛ agbó nɛɛ teŋ lɛ, ni ená ninetalɔi 100. 24  No sɛɛ lɛ, ekɛ mi ba wuoyigbɛ, ni mina agbó ko yɛ wuoyigbɛ.+ Esusu ehe akulashiŋi lɛ kɛ eblanaa lɛ, ni amɛdaramɔ tamɔ ekrokomɛi lɛ nɔŋŋ. 25  Samfɛji yɛ ebiɛ kɛ ebiɛ kɛ eblanaa lɛ he tamɔ samfɛji krokomɛi lɛ nɔŋŋ. Ekɛlɛ ji ninetalɔi 50 ni elɛɛmɔ ji ninetalɔi 25. 26  Akwɔɔ atrakpoi kpawo kɛyaa he,+ ni eblanaa lɛ yɛ amɛhiɛ. Ni tɛŋ tsei ahe mfonirii yɛ ehe akulashiŋi lɛ ahe, eko yɛ eko fɛɛ eko he. 27  Mligbɛ kpo lɛ yɛ agbó ko ni hiɛ kwɛɔ wuoyigbɛ; esusu gbɛ ni kã agbó nɛɛ kɛ agbó nɛɛ teŋ lɛ kɛtee wuoyigbɛ, ni ekɛlɛ ji ninetalɔi 100. 28  No sɛɛ lɛ, ekɛ mi tsɔ wuoyigbɛ agbó lɛ mli kɛba mligbɛ kpo lɛ nɔ; be ni esusu wuoyigbɛ agbó lɛ, edalɛ tamɔ ekrokomɛi lɛ nɔŋŋ. 29  Ehe bulɔi atsũi lɛ, kɛ ehe akulashiŋi lɛ, kɛ eblanaa lɛ adaramɔ tamɔ ekrokomɛi lɛ nɔŋŋ. Samfɛji yɛ ebiɛ kɛ ebiɛ kɛ eblanaa lɛ hu he. Ekɛlɛ ji ninetalɔi 50 ni elɛɛmɔ ji ninetalɔi 25.+ 30  Ablanai yɛ ehewɔ fɛɛ kɛbɔle; amɛkɛlɛ ji ninetalɔi 25 ni amɛlɛɛmɔ ji ninetalɔi 5. 31  Eblanaa lɛ hiɛ kwɛɔ kponɔgbɛ kpo lɛ nɔ, ni tɛŋ tsei ahe mfonirii yɛ akulashiŋi ni yɔɔ ehe lɛ ahe,+ ni akwɔɔ atrakpoi kpaanyɔ kɛyaa he.+ 32  Be ni ekɛ mi jɛ bokã kɛba mligbɛ kpo lɛ nɔ lɛ, esusu agbó lɛ, ni edalɛ tamɔ ekrokomɛi lɛ nɔŋŋ. 33  Ehe bulɔi atsũi lɛ, kɛ ehe akulashiŋi lɛ, kɛ eblanaa lɛ adaramɔ tamɔ ekrokomɛi lɛ nɔŋŋ, ni samfɛji yɛ ebiɛ kɛ ebiɛ kɛ eblanaa lɛ hu he. Ekɛlɛ ji ninetalɔi 50 ni elɛɛmɔ ji ninetalɔi 25. 34  Eblanaa lɛ hiɛ kwɛɔ kponɔgbɛ kpo lɛ nɔ, ni tɛŋ tsei ahe mfonirii yɛ akulashiŋi enyɔ lɛ fɛɛ ahe, ni akwɔɔ atrakpoi kpaanyɔ kɛyaa he. 35  Kɛkɛ ni ekɛ mi ba kooyigbɛ agbó lɛ mli+ ni esusu agbó lɛ; edalɛ tamɔ ekrokomɛi lɛ nɔŋŋ. 36  Ehe bulɔi atsũi lɛ, kɛ ehe akulashiŋi lɛ, kɛ eblanaa lɛ tamɔ ekrokomɛi lɛ nɔŋŋ. Samfɛji yɛ ebiɛ kɛ ebiɛ. Ekɛlɛ ji ninetalɔi 50 ni elɛɛmɔ ji ninetalɔi 25. 37  Ehe akulashiŋi lɛ kwɛɔ kponɔgbɛ kpo lɛ nɔ gbɛ, ni tɛŋ tsei ahe mfonirii yɛ ekulashiŋi enyɔ lɛ fɛɛ ahe, ni akwɔɔ atrakpoi kpaanyɔ kɛyaa he. 38  Niyelihe ko kɛ enaa shinaa yɛ agbói lɛ ahe akulashiŋi lɛ amasɛi, yɛ he ni afɔɔ shãa afɔlei lɛ ahe yɛ lɛ.+ 39  Okpɔlɔi enyɔ mamɔ agbó lɛ he ablanaa lɛ biɛ nɛɛ, ni enyɔ hu mamɔ biɛ nɛɛ, ni nomɛi anɔ agbeɔ kooloi ni akɛshãa shãa afɔlei+ lɛ, kɛ esha afɔlei+ lɛ, kɛ sɔ̃ afɔlei+ lɛ yɛ. 40  Kɛ́ ookwɔ kɛmiiya kooyigbɛ agbó lɛ naa gbɛ lɛ, okpɔlɔi enyɔ mamɔ he ni atsɔɔ kɛboteɔ mli lɛ yɛ agbónaa gbɛ. Okpɔlɔi enyɔ hu mamɔ agbó lɛ ablanaa lɛ afã kroko lɛ nɔ. 41  Okpɔlɔi ejwɛ mamɔ agbó lɛ biɛ, ni ejwɛ hu mamɔ ebiɛ—fɛɛ feɔ kpaanyɔ—ni nomɛi anɔ agbeɔ kooloi ni akɛshãa afɔlei lɛ yɛ. 42  Tɛ ni ako akɛfee okpɔlɔi ejwɛ ni agbeɔ kooloi ni akɛshãa shãa afɔle lɛ yɛ nɔ lɛ. Eko fɛɛ eko kɛlɛ ji ninetalɔ kome kɛ fã, ni elɛɛmɔ ji ninetalɔ kome kɛ fã, ni ekwɔlɛ ji ninetalɔ kome. Amɛnɔ akɛ nibii ni akɛgbeɔ kooloi ni akɛshãa shãa afɔlei kɛ afɔlei krokomɛi lɛ shwieɔ. 43  Nibii ni akɛ nii shwieɔ nɔ ni eko fɛɛ eko lɛɛmɔ ji dɛ̃ lɛɛmɔ kome yɛ mligbɛ gbogboi lɛ ahe fɛɛ kɛkpe; ni akɛ loo ni akɛbaashã nikee afɔlei lɛ shwieɔ okpɔlɔi lɛ anɔ. 44  Niyelihei kɛhã mɛi ni láa+ lɛ yɛ mligbɛ agbó lɛ agbónaa gbɛ; amɛyɛ mligbɛ kpo lɛ nɔ yɛ kooyigbɛ agbó lɛ masɛi, ni amɛhiɛ kwɛɔ wuoyigbɛ. Niyelihe kroko yɛ bokãgbɛ agbó lɛ masɛi, ni ehiɛ kwɛɔ kooyigbɛ. 45  Ekɛɛ mi akɛ: “Niyelihe nɛɛ ni hiɛ kwɛɔ wuoyigbɛ lɛ ji osɔfoi ni sɔmɔɔ yɛ sɔlemɔ shĩa lɛ mli lɛ anɔ.+ 46  Niyelihe ni hiɛ kwɛɔ kooyigbɛ lɛ ji osɔfoi ni sɔmɔɔ yɛ afɔleshaa latɛ lɛ he lɛ anɔ.+ Amɛji Zadok+ bihii lɛ, ni ji Levibii lɛ ateŋ mɛi ni ahala ni amɛba Yehowa hiɛ ni amɛsɔmɔ lɛ lɛ.”+ 47  Kɛkɛ ni esusu mligbɛ kpo lɛ. Ekɛlɛ ji ninetalɔi 100 ni elɛɛmɔ ji ninetalɔi 100, ekoji ejwɛ lɛ fɛɛ hiɛ kɛlɛ kome. Afɔleshaa latɛ lɛ yɛ sɔlemɔ shĩa lɛ hiɛ. 48  Kɛkɛ ni ekɛ mi ba sɔlemɔ shĩa lɛ ablanaa lɛ nɔ,+ ni esusu ablanaa lɛ he akulashiŋ lɛ, ni ená ninetalɔi enumɔ yɛ biɛ kɛ ninetalɔi enumɔ hu yɛ biɛ. Agbó lɛ lɛɛmɔ ji ninetalɔi etɛ yɛ biɛ kɛ ninetalɔi etɛ hu yɛ biɛ. 49  Ablanaa lɛ kɛlɛ ji ninetalɔi 20 ni elɛɛmɔ ji ninetalɔi 11.* Akwɔɔ atrakpoi kɛyaa he. Akulashiŋi yɛ shinaatsei lɛ ahe, ekome yɛ biɛ ni ekome hu yɛ biɛ.+

Shishigbɛ Niŋmaa

Flaks ji tso ko ní aduɔ kɛjɛ blema tɔ̃ɔ ní akɛ emli kpãi lɛ feɔ klala (linen).
Hebri sht. ŋm., “binuu.”
Hebri sht. ŋm., “okɛ otsui ama.”
Hebri sht. ŋm., “yɛ shĩa.” Yɛ yitso 40-48 lɛ mli lɛ, kɛ́ akɛ wiemɔ “shĩa” lɛ tsu nii yɛ Hebri mli ni eekɔ sɔlemɔ shĩa loo sɔlemɔ tsũ lɛ diɛŋtsɛ he lɛ, wɔtsɔɔ shishi akɛ “sɔlemɔ shĩa.”
Hebri sht. ŋm., “gãlã susumɔ tso ninetalɔi ekpaa, ninetalɔ kome kɛ dɛ̃ lɛɛmɔ kome.” Eji ninetalɔ kakadaŋŋ. Kwɛmɔ Saji Krokomɛi B14 lɛ.
Eeenyɛ efee akɛ, ekɔɔ bulɔi atsũ lɛ gbogbo lɛ yiteŋ he.
Loo “mina piai.”
Hebri sht. ŋm., “esusu lɛɛmɔ lɛ.”
Shishitsɔɔmɔi komɛi kɛɔ akɛ, “12.”